CNI International News

ဘရာစီးလီးယား၊ ဇန်နဝါရီ ၁၀

ဘရာဇီးလ်ရဲတပ်ဖွဲ့သည် လူရာချီ ဖမ်းဆီးကာ သမ္မတဟောင်း ဘော်ဆိုနာရို(Bolsonaro )အား ထောက်ခံသည့် အဓိကရုန်း ဖန်တီးသူများကို ၎င်းတို့ သိမ်းပိုက်ထားရာ နေရာများမှ ဖယ်ရှားခဲ့သည်ဟု အယ်ဂျာဇီးယား သတင်းတွင် ဖော်ပြထားသည်။

သမ္မတဟောင်းကို ထောက်ခံသူများသည် နိုင်ငံ၏လွှတ်တော်၊ သမ္မတနန်းတော်နှင့် ဗဟိုတရားရုံးချုပ်တို့ကို ထိန်းချုပ်ထားခဲ့ခြင်း ဖြစ်သည်။

ရဲတပ်ဖွဲ့မှ ထုတ်ပြန်ချက်တွင် မြို့တော် ဘရာစီးလီးယား (Brasilia) ၌ အနည်းဆုံးလူ ၃၀၀ ကို ထိန်းသိမ်း ခဲ့သည်ဟု ပါဝင်သည်။

ယင်းတို့သည် ဘော်ဆိုနာရို ရွေးကောက်ပွဲ ရှုံးနိမ့်မှုကို လက်မခံကြသူများဖြစ်ပြီး လွန်ခဲ့သော နှစ်နှစ်တွင် အမေရိကန် လွှတ်တော်အဆောက်အဦအား ဒေါ်နယ်ထရမ့် ထောက်ခံသူများက ဝင်ရောက်ကျူးကျော်သည့် ဖြစ်ရပ်နှင့်တူညီစွာ လုပ်ဆောင်ခဲ့ကြခြင်း ဖြစ်သည်။

ဒေါ်နယ်ထရမ့် ထောက်ခံသူများက လွှတ်တော်ကို သိမ်းပိုက်ခဲ့စဉ် (AP)

နောက်ဆုံး တစ်ဦးကို ရှာဖွေ ဖော်ထုတ်နိုင်သည်အထိ စုံစမ်းစစ်ဆေးမှုများကို လုပ်ဆောင်သွားမည်ဟု ရဲတပ်ဖွဲ့က ပြောသည်။

လက်ရှိအချိန်အထိ အဆိုပါဖြစ်ရပ်တွင် ထိခိုက်သေဆုံးမှု ရှိသည်ဆိုသည့် သတင်းမျိုး မတွေ့ရသေးပေ။ သို့သော် သမ္မတဟောင်းကို ထောက်ခံသူများသည် ဝင်ရောက်စီးနင်းမှုများတွင် ဖျက်ဆီးမှုများ လုပ်ဆောင်ခဲ့သည်။

၎င်းတို့သည် သမ္မတနန်းတော်ရှိ ပြတင်းပေါက်များမှ ပရိဘောဂများကို လွှင့်ပစ်ခဲ့ကြသလို လွှတ်တော် အစိတ် အပိုင်းတချို့ကို မီးသတ်ရေပန်းစနစ်ဖြင့် ပက်ဖျန်းခဲ့ပြီး ဗဟိုတရားရုံးချုပ်ရှိ အခမ်းအနား ကျင်းပရာ အခန်းများကိုလည်း မွှေနှောက်ခဲ့ကြသည်။

ယခု ဆူပုံအုံကြွမှုသည် သုံးနာရီကျော်သာ ကြာမြင့်ခဲ့သော်လည်း ယင်းက နှစ်ခြမ်းကွဲနေသော ဘရာဇီးလ်နိုင်ငံမှ နိုင်ငံရေး အခြေအနေကို မီးမောင်းထိုးပြနေသည်။

ထိုကွဲလွဲမှုသည် လက်ဝဲယိမ်းသမ္မတ လူဝစ္စ အင်နာစီယို လူလာ ဒါဆေးလ်ဗား (Luiz Inacio Lula da Silva) ၏ သမ္မတအဖြစ် ကျမ်းကျိန်ဆိုပြီးနောက် စတင်ပေါ်ပေါက်လာခဲ့ခြင်း ဖြစ်သည်။

လက်ဝဲယိမ်းသမ္မတ လူဝစ္စ အင်နာစီယို လူလာ ဒါဆေးလ်ဗားကိုတွေ့ရစဉ် (AP)

ဆာပေါ်လို (Sao Paulo) မြို့တွင် ပြုလုပ်ခဲ့သော သတင်းစာ ရှင်းလင်းပွဲ တစ်ခုတွင် လူလာက ဘော်ဆိုနာရိုသည် ဖက်ဆစ်တစ်ယူသန်များကို ဆူပူမှုများ လုပ်ဆောင်ရန် မြှောက်ပေးနေသည်ဟု စွပ်စွဲကာ ဘရာစီးလီးယားမြို့ လုံခြုံရေးကို ပြန်လည်ထိန်းချုပ်ရေး ဖက်ဒရယ်အစိုးရကို ညွှန်ကြားသည့် လောလောလတ်လတ် လက်မှတ်ထိုး ထားသော အမိန့်တစ်ခုကိုလည်း ဖတ်ကြားခဲ့သည်။

ထို့နောက် သမ္မတသည် ဘရာစီးလီးယားသို့ ပြန်သွားကာ ဆူပူသူများ သိမ်းပိုက်ခဲ့သည့် အဆောက်အဦများကို သွားရောက် ကြည့်ရှုခဲ့သည်ဟု ဘရာဇီးလ်မီဒီယာတစ်ခုတွင် ဖော်ပြသည်။

သမ္မတဟောင်း ဘော်ဆိုနာရိုသည် လက်ရှိအချိန်အထိ ရွေးကောက်ပွဲ ရှုံးနိမ့်မှုကို လက်မခံသေးပေ။ ၎င်းသည် သမ္မတ သက်တမ်းမကုန်ခင် ရက်ပိုင်းကပင် အမေရိကန်နိုင်ငံ ဖလော်ရီဒါသို့ သွားရောက်ခဲ့ပြီး ဘရာစီးလီးယားမှ ဖြစ်ရပ်များနှင့်ပတ်သက်၍ ခြောက်နာရီကြာ နှုတ်ဆိတ်နေခဲ့သည်။

သို့သော် လူလာ၏ စွပ်စွဲချက် ပေါ်ထွက်လာပြီးနောက် ပြည်သူပိုင် အဆောက်အဦများကို ကျူးကျော် ဝင်ရောက် ခြင်းအပေါ် ရှုတ်ချကြောင်းနှင့် လူလာ၏ စွပ်စွဲမှုများကို ငြင်းဆိုကြောင်း တွစ်တာတွင် ရေးသားတုန့်ပြန်ခဲ့သည်။

Source: အယ်ဂျာဇီးယား