CNI International News

ဝါရှင်တန်၊ မတ်လ ၁၅

ယူကရိန်းစစ်ပွဲမှာ ရုရှားကို အကူအညီမပေးဖို့ တရုတ်အား အမေရိကန်က သတိပေးလိုက်သလို မော်စကို(ရုရှား) ဆင်နွှဲနေ သော စစ်ပွဲကို ဘေဂျင်း(တရုတ်) ဆက်လက်ပံ့ပိုးမည်ဆိုပါက အကျိုးဆက်များ ရှိလာမည်ဟု ပြောကြားခဲ့ကြောင်း အယ်လ်ဂျာ ဇီးယား သတင်းအရ သိရသည်။

ဝါရှင်တန်၏ စိုးရိမ်ပူပန်မှုများကို အမေရိကန် အမျိုးသားလုံခြုံရေးအကြံပေး ဂျက်ဆူလီဗန် (Jake Sullivan)က တရုတ်နိုင်ငံ ခြားရေး ကော်မရှင်ရုံး ညွှန်ကြားရေးမှူး ယန်ဂျီချီနှင့်တွေ့ဆုံစဉ် ပြောကြားခဲ့ကြောင်း အမေရိကန်နိုင်ငံခြားရေးဝန်ကြီးဌာန ပြောခွင့်ရသူ နက်ပရင့်စ်က မတ်လ ၁၄ ရက်တွင် သတင်းထောက်များနှင့်တွေ့ဆုံစဉ် အသိပေးခဲ့သည်။

“ယူကရိန်းကို တိုက်ခိုက်ဖို့ သမ္မတပူတင် ရွေးချယ်တဲ့ စစ်ပွဲကို စီးပွားရေး၊ ငွေကြေး၊ စကားလုံး အသုံးအနှုန်းတွေနဲ့ ကူညီပံ့ပိုး နေကြတဲ့ တရုတ်ပြည်သူ့သမ္မတနိုင်ငံ (ဒါမှမဟုတ်) ကမ္ဘာပေါ်က တခြားနိုင်ငံတွေကို ကျနော်တို့ အနီးကပ် စောင့်ကြည့်နေပါ တယ်” ဟု နက်ပရင့်စ်က ပြောကြားခဲ့သည်။

ဆက်လက်ပြီး ၎င်းက “ပြီးတော့ သိုသိုသိပ်သိပ်ဖြစ်စေ၊ လူသိရှင်ကြားဖြစ်စေ ဘေဂျင်း ကူညီပံ့ပိုးနေဦးမယ်ဆိုရင် အကျိုးဆက် တွေ ရှိလာမယ်ဆိုတာ ကျနော်တို့ အတိအလင်း အသိပေးလိုပါတယ်” ဟု ပြောကြားခဲ့သည်။

ယူကရိန်းစစ်ပွဲ(AFP)

မြောက်အတ္တလန္တိတ် စစ်စာချုပ်အဖွဲ့(နေတိုး)အနေဖြင့် ဆိုဗီယက်အုပ်စုဝင်ဟောင်းများထံ ချဲ့ထွင်နေခြင်း ရပ်တန့်ရန် မော်စကိုက တောင်းဆိုခဲ့ပြီး ယူကရိန်းနယ်စပ်အနီး ရုရှားတပ်များကို လအတန်ကြာ စုစည်းထားခဲ့သည်။

ထို့နောက် မော်စကိုသည် ဖေဖော်ဝါရီ ၂၄ ရက်က ယူကရိန်းနိုင်ငံအတွင်းသို့ အပြည့်အဝ ကျူးကျော်ဝင်ရောက်ခဲ့သည်။

ရုရှားအပေါ် အမေရိကန်နှင့် ၎င်း၏မဟာမိတ်များက အရှိန်အဟုန်ဖြင့် ပိတ်ဆို့အရေးယူခဲ့ပြီး စစ်ပွဲကြောင့် ယူကရိန်းပြည်တွင်း မှ ထွက်ပြေးတိမ်းရှောင်သူ ၂ ဒသမ ၈ သန်းကျော်ရှိခဲ့ရာ အထူးသဖြင့် ယူကရိန်းမြို့များကို ရုရှားတပ်များ ဗုံးကြဲ တိုက်ခိုက် ခြင်းကြောင့်ဖြစ်ကြောင်း ကုလသမဂ္ဂက ပြောကြားခဲ့သည်။

အဆိုပါ စစ်ရေးပဋိပက္ခကို ထိန်းထိန်းသိမ်းသိမ်း လုပ်ဆောင်ကြရန် တရုတ်က တိုက်တွန်းခဲ့ပြီး စစ်ပွဲအဆုံးသတ်ဖို့ တွေ့ဆုံ ဆွေးနွေးရေးအား ထောက်ခံကြောင်း ပြသခဲ့သော်လည်း ကျူးကျော်မှုကို ရှုတ်ချဝေဖန်ခြင်း အလျဉ်းမရှိပေ။

ယူကရိန်းသို့ ရုရှားကျူးကျော် တိုက်ခိုက်မှုကို ရှုတ်ချဖို့ ရည်ရွယ်သည့် ကုလသမဂ္ဂ လုံခြုံရေးကောင်စီ၏ အဆိုပြုချက်အား ယခင်လ အကုန်ပိုင်းက တရုတ် ရှောင်ရှားခဲ့သည်။ အဆိုပါ ရှုတ်ချရေး အစီအမံကို လုံခြုံရေးကောင်စီ အမြဲတမ်းအဖွဲ့ဝင် ရုရှား က ဗီတိုအာဏာဖြင့် ပယ်ချခဲ့ပြီး ဖြစ်သည်။

အမေရိကန် အမျိုးသားလုံခြုံရေးအကြံပေး ဂျက်ဆူလီဗန်ကိုတွေ့ရစဉ်(AP)

မော်စကိုသည် ဘေဂျင်းထံမှ စစ်ရေးအကူအညီ ရယူနေကြောင်း အမည်မဖော်လိုသူ အမေရိကန်အစိုးရ အရာရှိများကို ကိုးကားလျက် အမေရိကန်မီဒီယာများက သတင်းဖော်ပြကြပြီးနောက် ယခုကဲ့သို့ ဂျက်ဆူလီဗန်နှင့် ယန်ဂျီးချီတို့၏ ဆွေးနွေးမှု ပေါ်ပေါက်လာခဲ့သည်။ တရုတ်ကတော့ အဆိုပါသတင်းများကို အတိအကျ အသိအမှတ်မပြုဘဲ ပယ်ချခဲ့သည်။

“အမေရိကန်ဟာ ယူကရိန်းအရေးနဲ့ ပတ်သက်ပြီး တရုတ်ကို ပစ်မှတ်ထားတဲ့ မဟုတ်မမှန် လုပ်ကြံသတင်းတွေ ဖြန့်နေတာပါ” ဟု တရုတ်နိုင်ငံခြားရေးဝန်ကြီးဌာန ပြောခွင့်ရသူ ဂျောင်လိဂျန် (Zhao Lijian) က မတ်လ ၁၃ ရက်၌ ပြောကြားခဲ့သည်။

ယူကရိန်းအပေါ် မိမိတို့ ရပ်တည်ချက်နှင့်ပတ်သက်၍ သတင်းအမှားများ ဖြန့်ဝေသည့် မည်သည့်လုပ်ရပ်မဆို ပြတ်ပြတ် သားသား ဆန့်ကျင်ကြောင်း ယန်ဂျီးချီက ဂျက်ဆူလီဗန်နှင့် ဆွေးနွေးမှု၌ ထည့်သွင်း ပြောကြားခဲ့ကြောင်း သိရသည်။

Source: Aljazeera

CNI International News

မော်စကို၊ မတ်လ ၁၅

ရုရှားနိုင်ငံပိုင် ရုပ်သံလိုင်းမှ ဝန်ထမ်းတစ်ဦးသည် ယူကရိန်းသို့ကျူးကျော်မှုကို ဆန့်ကျင်သောအားဖြင့် ညနေခင်း သတင်းတင်ဆက်နေခြင်းအား အနှောင့်အယှက်ပေးခဲ့ကြောင်း သိရသည်။

Pervy Kanal ရုပ်သံလိုင်းညနေခင်းသတင်း တိုက်ရိုက်ထုတ်လွှင့်နေစဉ် အဆိုပါဝန်ထမ်းသည် သတင်းကြေညာ နေသူ အမျိုးသမီးနောက်ကွယ်သို့ ပြေးထွက်လာပြီး ရုရှားနှင့် ယူကရိန်းအလံများ၊ အင်္ဂလိပ်နှင့် ရုရှားဘာသာတို့ဖြင့် စာသားများ ဖော်ပြထားသည့် လက်ကိုင်ပိုစတာကို ကိုင်မြှောက်ပြခဲ့သည်။ ၎င်းဖော်ပြထားသော စာသားများတွင် “စစ်ပွဲအလိုမရှိ။ စစ်ပွဲရပ်ပါ။ ဝါဒဖြန့်တာတွေ မယုံကြနဲ့။ ဒီမှာ မင်းကို သူတို့လိမ်နေတယ်။ ရုရှားလူမျိုးတွေ စစ်ဆန့် ကျင်ကြ” စသည်ဖြင့် ရေးသားထားသည်။

ယခုဖြစ်စဉ်သည် ရုရှားနိုင်ငံပိုင် မီဒီယာတစ်ခုအတွက် ထူးထူးခြားခြား စစ်ဆန့်ကျင်ရေး ကန့်ကွက်မှုတစ်ခု ဖြစ်ခဲ့ သည်။ ရုရှားမီဒီယာများအနေဖြင့် ယူကရိန်းသို့ ရုရှားကျူးကျော်မှုကို သိသိသာသာ လျှော့ပေါ့ထုတ်လွှင့်နေခဲ့ပြီး ကျူးကျော်တိုက်ခိုက်နေခြင်းကို “အထူးစစ်ဆင်ရေး” တစ်ခုအဖြစ်သာ ပုံဖော်နေခဲ့သည်။

ထိုသို့ ပုံဖော်ထုတ်လွှင့်မှု၏ရလဒ်အနေဖြင့် ရုရှားနိုင်ငံသားအများအပြားသည် ၎င်းတို့နိုင်ငံအနေဖြင့် ယူကရိန်းသို့ စစ်အင်အားအလုံးအရင်းဖြင့် ကျူးကျော်ဝင်ရောက်နေသည်ဟု ရိုးရှင်းစွာ ယုံကြည်လက်ခံခြင်း မရှိပေ။

ယင်းဖြစ်စဉ် ဖြစ်ပွားပြီး မရှေးမနှောင်းမှာပင် ဆန္ဒထုတ်ဖော်သူက ၎င်းမည်သူမည်ဝါဖြစ်ကြောင်း ရှင်းပြထားသည့် ကြိုတင်ရိုက်ကူးထားသော ဒုတိယဗီဒီယိုဖိုင်မှာ လူမှုကွန်ရက် Account များပေါ် ပျံ့နှံ့လာခဲ့သည်။

၎င်းသည် မာရီနာအိုဗာစီယန်နီကိုဗာအမည်ရှိ အမျိုးသမီးတစ်ဦးဖြစ်ပြီး Pervy Kanal ရုပ်သံလိုင်းတွင် အယ်ဒီတာ အဖြစ် ထမ်းဆောင်နေကြောင်း ရုရှားနိုင်ငံပိုင်မီဒီယာများနှင့် လွတ်လပ်သောမီဒီယာတစ်ခုဖြစ်သည့် Meduza တို့က ထုတ်ဖော်ခဲ့ကြသည်။

၎င်းသည် ရုရှားသမ္မတဗလာဒီမာပူတင်ကို စစ်ပွဲအစပျိုးခဲ့ခြင်းအတွက် အပြစ်တင်ခဲ့ပြီး ရုရှားပြည်သူများလည်း အလားတူဆန္ဒထုတ်ဖော်ကြရန် တိုက်တွန်းခဲ့သည်။

“ယူကရိန်းမှာ ဖြစ်ပျက်နေတာက ရာဇဝတ်မှုပါ။ ပြီးတော့ ရုရှားဟာ ရန်လိုတဲ့နိုင်ငံဖြစ်နေပါတယ်” ဟု အိုဗာစီယန် နီကိုဗာအမည်ရှိ အဆိုပါအမျိုးသမီးက ဆက်လက်ပြောကြားခဲ့သည်။

“ရန်လိုတိုက်ခိုက်ခြင်းအတွက် တာဝန်ရှိသူမှာ တစ်ဦးတည်းသာဖြစ်ပြီး ထိုသူမှာ ဗလာဒီမာပူတင်ဖြစ်ကြောင်း” ၎င်းက စွပ်စွဲခဲ့သည်။

၎င်း၏ဖခင်သည် ယူကရိန်းလူမျိုးဖြစ်ပြီး မိခင်ကတော့ ရုရှားလူမျိုးဖြစ်ကြောင်း၊ ရုရှားနိုင်ငံပိုင်မီဒီယာအတွက် အလုပ်လုပ်ပေးခဲ့မိ၍ လွန်စွာနောင်တရမိကြောင်း အိုဗာစီယန်နီကိုဗာက ရင်ဖွင့်ခဲ့သည်။

“ကံမကောင်းစွာနဲ့ပဲ ပြီးခဲ့တဲ့နှစ်အနည်းငယ်အတွင်း ကျမက Pervy Kanal မီဒီယာမှာ အလုပ်လုပ်ခဲ့ပြီး ကရင် မလင်အတွက် ဝါဒဖြန့်ပေးခဲ့ရလို့ အခုတော့ အင်မတန် ရှက်နေမိတယ်။ ရုပ်သံဖန်သားပြင်ကနေ လိမ်ညာ ပြောရ တာ ရှက်စရာပါ” ဟု အိုဗာစီယန်နီကိုဗာက ဖြည့်စွက်ပြောကြားခဲ့သည်။

သူမဆန္ဒထုတ်ဖော်ခဲ့သော အခိုက်အတန့်အသည် စစ်ဆန့်ကျင်ရေးဆန္ဒပြသူပေါင်း ထောင်နှင့်ချီ၍ ဖမ်းဆီးခံခဲ့ရ သော ရုရှားနိုင်ငံအတွက် ကြီးမားသည့်အကျိုးဆက်ဖြစ်ပေါ်လာနိုင်ဖွယ်ရှိနေသည်။ အဆိုပါဖြစ်စဉ်ကို စုံစမ်း စစ် ဆေးပေးရန် Tass ရုရှားသတင်းဌာနက ရုရှားအစိုးရရှေ့နေရုံးထံသို့ အကြောင်းကြားခဲ့သည်။

Source: vice.com