CNI International News

ကိယက်ဗ်၊ မတ်လ ၂၆

ယူကရိန်းတွင် တိုက်ပွဲများကြီးကြပ်နေသည့် ရုရှားတပ်ဖွဲ့မှူးတစ်ဦးသည် ၎င်းတို့အချင်းချင်း မကျေမနပ်ဖြစ်စဉ်တစ်ခုကြောင့် မတ်လ ၂၆ ရက်တွင် တင့်ကားပေါ်မှ ပြုတ်ချသေဆုံးသွားခဲ့ကြောင်း အနောက်အုပ်စု အစိုးရများ၏ ပြောကြားချက်ကို ကိုးကား လျက် ဗြိတိန်မီဒီယာ ဒေးလီးမေးလ်က ရေးသားဖော်ပြခဲ့သည်။

ရုရှားဗိုလ်မှူးကြီး ယူရီမက်ဗီဒက်ဗ် သေဆုံးမှုသည် ၎င်း၏ အမှတ် ၃၇ မော်တော်ရိုင်ဖယ် တပ်မဟာအတွက် ကြီးကြီးမားမား ဆုံးရှုံးမှုဖြစ်ပြီး ရက်ရက်စက်စက် သတ်ဖြတ်ခံရခြင်းဖြစ်နိုင်သည်ဟု ယူဆရကြောင်း အနောက်အုပ်စု အစိုးရအရာရှိများက ယုံကြည်ထားကြသည်။

အလားတူ အမှတ် ၄၉ လက်နက်ပေါင်းစုံ စုစည်းတပ်မှ ကွပ်ကွဲရေးမှူး တာဝန်ယူထားသူ ရုရှား ဒုတိယဗိုလ်ချုပ်ကြီး တစ်ဦး လည်း တိုက်ပွဲတွင် ကျဆုံးခဲ့ရာ ယခုစစ်ပွဲအတွင်း ရုရှားအဆင့်မြင့် တပ်အရာရှိများ ၇ ယောက်မြောက် သေဆုံးမှုဟု သိရသည်။

ဗလာဒီမာပူတင် စုစည်းထားသည့် တပ်ရင်းပေါင်း ၁၂၀ အနက် တပ်ရင်း ၂၀ သည် ယူကရိန်း၏ တင်းမာစွာ ခုခံနေမှုများ ကြောင့် စစ်ရေးလှုပ်ရှားမှုများ ရှေ့မတိုးနိုင်ကြောင်း မကြာသေးမီက သတင်းထွက်ပေါ်ခဲ့ပြီးနောက် ယခုကဲ့သို့ ဗိုလ်မှူးကြီး မက်ဗီဒက်ဗ်သေဆုံးမှု ကြားသိရခြင်း ဖြစ်သည်။

ရုရှား၏တပ်စုစည်းမှု အားနည်းချက်သည် လက်ရှိကာလအတွက် မှတ်သားစရာကောင်းကြောင်း အနောက်အုပ်စုအစိုးရ အရာရှိတစ်ဦးက ကောက်ချက်ချခဲ့ပြီး ရုရှား၏ စစ်ရေးအောင်မြင်သည်ဟု ထုတ်ဖော်ပြောဆိုချက်များကို ၎င်းက ရှုတ်ချခဲ့ သည်။

ရုရှားတပ်ဖွဲ့ကိုတွေ့ရစဉ်(GETTY IMAGES)

စစ်မျက်နှာ အချို့နေရာများတွင် ရုရှားဘက်မှ ဆုံးရှုံးမှု အလွန်များပြားကြောင်း၊ အစောပိုင်းက ရုရှားနည်းဗျူဟာတပ်ဖွဲ့များ တွင် တပ်ရင်း ၁၁၅ ရင်းမှ ၁၂၀ အထိ ရှိခဲ့သော်လည်း ယခုအခါ မော်တော်ယာဉ်ပြုပြင်ရေးလိုအပ်ချက် (သို့မဟုတ်) ဆုံရှုံးမှု ပမာဏ ကြီးမားခြင်းတို့ကြောင့် တပ်ရင်း ၂၀ ခန့်သာ မဆုတ်ခွာဘဲ ရှိနေကြောင်း အနောက်နိုင်ငံများမှ အစိုးရအရာရှိများက ပြောကြားခဲ့ကြသည်။

ဗိုလ်မှူးကြီးသေဆုံးမှု၌ တင့်ကားမှာ အရှိန်ပြင်းပြင်းဖြင့် မောင်းနှင်သွားပုံရကြောင်း၊ ၎င်းကို ၎င်း၏တပ်သားများက တမင် တကာ သတ်ဖြတ်သည်ဟု မိမိတို့ ယုံကြည်ကြောင်း အဆိုပါအရာရှိများက ဆက်လက် ပြောကြားခဲ့ကြသည်။

ဗိုလ်မှူးကြီး မက်ဗီဒက်ဗ်သည် ခြေထောက်အတွင်း ဒဏ်ရာပြင်းထန်စွာရရှိပြီး ဆေးရုံသို့ အရေးပေါ် ပို့ဆောင်နေရသည့် ဗွီဒီယို မှတ်တမ်းဖိုင်များ ထွက်ပေါ်လာ၍ အနောက်အုပ်စုက အထက်ပါ သဘောထား မှတ်ချက်များကို ပြောကြားခဲ့ကြခြင်း ဖြစ် သည်။

ထို့ပြင် ရုရှား၏စစ်ရေး ရှေ့တိုးလာမှု၌ ဓာတုလက်နက်များ အသုံးပြုလာမည်ကိုလည်း စိုးရိမ်နေကြသည်။

တပ်ဖွဲ့ဝင်အင်အား ၁၅၀၀ ရှိသည့် ဗိုလ်မှူးကြီး မက်ဗီဒက်ဗ်၏ တင့်ကားတပ်ရင်းတွင် သေဆုံး/ဒဏ်ရာရရှိခြင်းများကြောင့် အင်အားထက်ဝက်ခန့် လျော့ပါးသွားခဲ့ကြောင်း ယူကရိန်းသတင်းထောက် ရိုမန်ဆိုင်ဘလိတ် (Roman Tsymbaliuk) ၏ ဖေ့စ်ဘွတ်ခ်၌ ရေးသားဖော်ပြချက်ကို ကိုးကားလျက် ဒေးလီးမေးလ်က သတင်းဆက်လက်ဖော်ပြခဲ့သည်။

Source: Daily Mail

CNI International News

ဂျစ်ဒါ၊ မတ်လ ၂၆

ဖော်မြူလာဝမ်းပြိုင်ပွဲ စီစဉ်ထားသည့် ဆော်ဒီအာရေဗျနိုင်ငံ၊ ဂျစ်ဒါမြို့ရှိ ရေနံသိုလှောင်ရုံတစ်ခုကို ပစ်မှတ်ထား၍ ယီမင်မှ ဟူသီသူပုန်များ မတ်လ ၂၅ ရက်တွင် တိုက်ခိုက်ခဲ့ကြောင်း အေပီသတင်းအရ သိရသည်။

ဆော်ဒီအာဏာပိုင်များက လာမည့် Grand Prix ပြိုင်ပွဲကို စီစဉ်ထားသည့်အတိုင်း ဆက်လက် ကျင်းပသွားမည်ဟု ပြောကြား ခဲ့သော်လည်း ယခုတိုက်ခိုက်မှုမှာ ဟူသီသူပုန်များ၏အမြင့်ဆုံး တိုက်ခိုက်နိုင်စွမ်းကို ပြသလျက်ရှိသည်။

မကြာသေးမီ ရက်ပိုင်းအတွင်းကလည်း ဟူသီသူပုန်များသည် အလားတူ လောင်စာဆီ သိုလှောင်ရုံတစ်ခုကို ပစ်မှတ်ထား တိုက်ခိုက်ခဲ့ရာ ယင်းနေရာသည်လည်း ဂျစ်ဒါမြို့ နိုင်ငံတကာလေဆိပ်၏ အရှေ့တောင်ဘက်တွင် တည်ရှိပြီး မက္ကာသို့ သွားကြမည့် မွတ်ဆလင်ဘုရားဖူးများအတွက် အရေးကြီးသော အချက်အချာနေရာဖြစ်သည်။

အဆိုပါ တိုက်ခိုက်မှုတွင်တော့ ထိခိုက်ဒဏ်ရာရသူ မရှိကြောင်း သိရသည်။

ထိုဖြစ်စဉ်နှင့်ပတ်သက်၍ အထူးထင်ရှားသော ဆော်ဒီအာရမ်ကို (Saudi Aramco) ရေနံကုမ္ပဏီထံသို့ အေပီသတင်းဌာနက သဘောထားမှတ်ချက် တောင်းခံခဲ့သော်လည်း တုံ့ပြန်ခြင်း မရှိပေ။

ယခု ရေနံနှင့်လောင်စာဆီ သိုလှောင်ရုံကို ဟူသီသူပုန်များ ဒုံးကျည်ဖြင့် ပစ်မှတ်ထားသော တိုက်ခိုက်ခြင်းအား “ရန်လိုသော စစ်ဆင်ရေး” ဟု ဆော်ဒီအာဏာပိုင်များက ပြောသည်။

ယီမင်နိုင်ငံတွင် ဆော်ဒီအာရေဗျ ဦးဆောင်သော ညွန့်ပေါင်းတပ်ဖွဲ့သည် လက်ရှိကာလတွင် အီရန်ကျောထောက် နောက်ခံ ပေးထားသည့် ဟူသီသူပုန်တပ်ဖွဲ့များနှင့် တိုက်ခိုက်မှုများ ရှိနေသည်။

ဟူသီတပ်ဖွဲ့များသည် ၂၀၀၄ ခုနှစ်၊ စက်တင်ဘာလတွင် ယီမင်နိုင်ငံ၏မြို့တော် ဆာနာကို သိမ်းပိုက်နိုင်ခဲ့ကြသည်။ ဆော်ဒီ သည် ၂၀၁၅ ခုနှစ်တွင် ယီမင်စစ်ပွဲ၌ ဝင်ရောက်တိုက်ခိုက်ခဲ့ပြီး အရပ်သားများ သေဆုံးခဲ့သော လေကြောင်း တိုက်ခိုက်မှုများ ကြောင့် နိုင်ငံတကာက အပြစ်တင်ဝေဖန်ခဲ့သည်။

ဟူသီသူပုန် တပ်ဖွဲ့များကလည်း ဆော်ဒီအာရေဗျ နိုင်ငံအတွင်းသို့ မောင်းသူမဲ့ လေယာဉ်(ဒရုန်း)များ၊ ဒုံးကျည်များနှင့် မော်တာကျည်များ ပစ်လွှတ်နေခဲ့ကြောင်း ဆော်ဒီဘက်မှ အကြောင်းပြခဲ့သည်။

ဂျစ်ဒါမြို့သို့ ဟူသီများ ဒုံးကျည်ဖြင့် တိုက်ခိုက်မှုကြောင့် မီးလောင်မှု ဖြစ်ပွားခဲ့ကြောင်း၊ တင့်ကားနှစ်စီး ပျက်စီးခဲ့ပြီး ထိခိုက် ဒဏ်ရာ ရသူမရှိဘဲ မီးငြှိမ်းသတ်နိုင်ခဲ့ကြောင်း ဆော်ဒီဦးဆောင်သော ညွန့်ပေါင်းတပ်ဖွဲ့မှ ဗိုလ်မှူးချုပ် အဆင့်ရှိသူ တာကီ အယ်လ် မာကီ (Turki al-Malki) က ပြောကြားခဲ့သည်။

“ဒီလို ရန်လိုတဲ့လုပ်ရပ်တွေ တိုးမြှင့်လုပ်ဆောင်လာပြီး ရေနံသိုလှောင်ရုံ၊ စက်ရုံတွေကို ပစ်မှတ်ထားလာတာမို့ စွမ်းအင်ဆိုင်ရာ လုံခြုံရေးနဲ့ ကမ္ဘာ့စီးပွားရေးရဲ့ ကျောရိုးဖြစ်တဲ့ ရေနံလုပ်ငန်းကို ထိခိုက်စေဖို့ ရည်ရွယ်တာ ထင်ရှားပါတယ်” ဟု ဆော်ဒီအစိုးရ အာဘော် သတင်းဌာနမှနေ၍ အယ်လ်မာကီက ပြောကြားခဲ့သည်။

Source: AP

CNI International News

ကိယက်ဗ်၊ မတ်လ ၂၆

ယခင်သီတင်းပတ်က စစ်ဘေးဒဏ်မှ အကာအကွယ်အဖြစ် လူအများ ခိုလှုံနေရသော မာရီယူပေါလ်မြို့ရှိ ပြဇာတ်ရုံတွင် ရုရှားလေကြောင်း တိုက်ခိုက်မှုကြောင့် လူ ၃၀၀ ခန့် သေဆုံးခဲ့ကြောင်း၊ ထိုတိုက်ခိုက်မှုသည် အရပ်သား အသေအပျောက် အများဆုံး တိုက်ခိုက်ခံရမှုဖြစ်ကြောင်း ယူကရိန်းအာဏာပိုင်များက မတ်လ ၂၅ ရက်တွင် သတင်းထုတ်ပြန်ခဲ့သည်။

ပြဇာတ်ရုံထဲတွင် သေကြေပျက်စီးမှုရှိခဲ့၍ မော်စကိုအနေဖြင့် အရပ်သားများကို တမင်တကာဖြစ်စေ၊ ခွဲခြား၍ဖြစ်စေ သတ်ဖြတ်မှု မြောက်ခြင်းကြောင့် စစ်ရာဇဝတ်မှု ကျူးလွန်ရာရောက်သည်ဟု စွပ်စွဲချက်များလည်း ထွက်ပေါ်လာခဲ့သည်။

တစ်ချိန်တည်းတွင် မော်စကို၏ စစ်ပွဲရည်မှန်းချက်များ ကျဉ်းမြောင်းသွားခြင်းကို သိသာစေသည့် အချက်အနေဖြင့် ရုရှား တပ်ဖွဲ့များ မြို့တော်ကိယက်ဗ်သို့ ဦးတည်သိမ်းပိုက်မည့် အစီအစဉ်၌ မြေပြင်ထိုးစစ် ရပ်တန့်ထားပုံရကြောင်း၊ ဒွန်ဘတ်စ် ဒေသကို ထိန်းချုပ်ရန် ပြောင်းလဲ အာရုံစိုက်လာကြောင်း အမေရိကန်စစ်ဘက်က ပြောသည်။

ယခု ရက်ပိုင်းများအတွင်း မော်စကိုသည် ယူကရိန်း အရှေ့တောင်ဘက်ရှိ ဒွန်ဘတ်စ်ကို ဗျူဟာအပြောင်းအရွှေ့ လုပ်ရမည်ဟု ယူဆရကြောင်း အေပီသတင်းတွင် ဖော်ပြထားသည်။

ယူကရိန်းသမ္မတ ဇာလန်းစကီးက စစ်ပွဲအဆုံးသတ်ရေး ညှိနှိုင်းရန် ရုရှားကို ထပ်မံတောင်းဆိုခဲ့သော်လည်း ငြိမ်းချမ်းရေးနှင့် ၎င်း၏ နယ်မြေပိုင်ဆိုင်မှုကို လဲလှယ်မည်မဟုတ်ကြောင်း ပြတ်ပြတ်သားသား ပြောကြားခဲ့သည်။

ယူကရိန်းအမျိုးသားတစ်ဦး တိုက်ခိုက်မှုကြားက အသက်လုပြေးနေစဉ်(AP)

“ယူကရိန်းရဲ့ ပိုင်နက်နယ်မြေ အခိုင်အမာ တည်ရှိမှုကို အာမခံသင့်တယ်။ အဲဒါအတွက် အခြေအနေတွေက တရားမျှတဖို့ လို တယ်။ ယူကရိန်းပြည်သူတွေက သူတို့(ရုရှား)တွေကို တခြားနည်းလမ်းနဲ့ ခေါင်းညိတ်မှာတော့ မဟုတ်ဘူး” ဟု ညစဉ်ထုတ်ပြန် လေ့ရှိသည့် ဗွီဒီယိုမိန့်ခွန်းတွင် ဇာလန်းစကီးက ပြောကြားခဲ့သည်။

မတ်လ ၁၆ ရက်ကတည်းက လေကြောင်း တိုက်ခိုက်ခံခဲ့ရသော မာရီယူပေါလ် ပြဇာတ်ရုံအတွင်း အခင်းဖြစ်ပွားစဉ် လူပေါင်း ရာနှင့်ချီ၍ ရှိနေခဲ့သည်ဟု ယူကရိန်းအာဏာပိုင်များက ပြောကြားခဲ့သော်လည်း အသေအပျောက်စာရင်း ထုတ်ပြန်ရေးမှာ ကြန့်ကြာနေခဲ့သည်။

သေဆုံးသူ အရေအတွက်ကို ၎င်းတို့၏ တယ်လီဂရမ်ချန်နယ်မှ မတ်လ ၂၅ ရက်ကျမှ ထုတ်ပြန်ခဲ့ရာတွင် မျက်မြင်သက်သေ များကို မာရီယူပေါလ် တာဝန်ရှိသူများက ကိုးကားဖော်ပြခဲ့သည်။ သို့သော် ပြဇာတ်ရုံအတွင်း အပျက်အစီးများကြားထဲ မျက်မြင်သက်သေများ ဘယ်လိုရောက်လာကြလဲ (သို့မဟုတ်) အရေးပေါ် ဝန်ထမ်းတွေက အပျက်အစီးများ တူးဖော်၍ အလောင်းများအကုန် ထုတ်ယူပြီးပြီလားဆိုသည့် ခိုင်လုံသော အချက်အလက်များ ရှင်းရှင်းလင်းလင်း မသိရသေးပေ။

“ပြဇာတ်ရုံကို ပစ်မှတ်ထား တိုက်ခိုက်ခြင်းသည် အရပ်သားများကို ဦးတည်ချေမှုန်းခြင်းဖြစ်၍ ထိတ်လန့်တုန်လှုပ်မိကြောင်း” အမေရိကန်သမ္မတ ဂျိုးဘိုင်ဒန်၏ အမျိုးသားလုံခြုံရေးအကြံပေးဖြစ်သူ ဂျက်ဆူလီဗန်က မှတ်ချက်ချခဲ့သည်။

Source: AP

CNI International News

၂၀၂၂ ခုနှစ်၊ မတ်လ ၂၆

ရုရှားသမ္မတ ဗလာဒီမာပူတင်သည် ဖေဖော်ဝါရီလ ၂၄ ရက် အစောပိုင်းတွင် ယူကရိန်းနိုင်ငံကို အင်အား အလုံးအရင်းဖြင့် အတိအလင်း ကျူးကျော်ဝင်ရောက်ခဲ့ရာ ဒုတိယကမ္ဘာစစ်နောက်ပိုင်း ဥရောပမြေပေါ်တွင် အကြီးမားဆုံး ဖြစ်ပွားခဲ့သည့် စစ်ပွဲဟု သတ်မှတ်ကြသည်။

ကျူးကျော်မှု စတင်သည့်လတွင် ယူကရိန်းမြို့များကို ရုရှားတပ်များ ဝိုင်းရံခဲ့ပြီး ယူကရိန်းပြည်သူ ၁၀ သန်းကျော် အိုးအိမ်မဲ့ ဖြစ်ခဲ့ရသည်။ မမှတ်မိနိုင်လောက်သည့် အကြိမ်အရေအတွက်အထိ ဗုံးကြဲတိုက်ခိုက်ခံရခဲ့သဖြင့် အရပ်သား ရာနှင့်ချီ၍ သေဆုံးခဲ့ရသည်။

ထိုလုပ်ရပ်ကြောင့် အမေရိကန် ဦးဆောင်သော အနောက်အုပ်စုက ရုရှားနိုင်ငံအပေါ် ပိုင်ဆိုင်မှု ဆုတ်ကိုင်ခြင်းနှင့် ပို့ကုန် ပိတ်ပင်ခြင်း အပါအဝင် ပြင်းထန်သော ဒဏ်ခတ်ပိတ်ဆို့မှုများ ချမှတ်ခဲ့သည်။ ထို့ကြောင့် ၎င်းအဖြစ်အပျက်များက COVID-19 ကပ်ရောဂါကြောင့် ယုတ်လျော့ ကျဆင်းပြီးနောက် အားယူခါစ ကမ္ဘာ့စီးပွားရေး ပြန်လည် ဦးမော့ရမည့် အလားအလာကို အမှောင်ထုထဲသို့ ပြန်လည်တွန်းပို့လိုက်သည်။

စစ်ပွဲ ပထမလမှ ယခုအချိန်အထိ အဓိကအရေးပါသော ရက်စွဲများမှာ  အောက်ပါအတိုင်း ဖြစ်သည်။

 ယူကရိန်းစစ်သမီးပျိုတစ်ဦး(AFP)

ဖေဖော်ဝါရီလ  ၂၄ ။            ။ ယူကရိန်းကို ရုရှားက ပြင်းပြင်းထန်ထန် ထိုးစစ်ဆင်သည်။ ယူကရိန်းသမ္မတ ဇာလန်းစကီးက နိုင်ငံအတွင်းရှိ တပ်အင်အားစုစည်းရန် အမိန့်ထုတ်လိုက်သည်။ ရုရှားဘဏ်များကို အမေရိကန်က ပိတ်ဆို့အရေးယူကြောင်း ကြေညာပြီးနောက် မော်စကို၏ စတော့အိတ်ချိန်းသည် ၄၅ ရာခိုင်နှုန်း ကျဆင်းသွားသည်။

ဖေဖော်ဝါရီလ  ၂၆။             ။ ဥရောပသမဂ္ဂ (EU) က ရုရှားဘဏ်များကို ကမ္ဘာလုံးဆိုင်ရာ ဘဏ္ဍာရေးစနစ် (Worldwide Interbank Financial Telecommunication) SWIFT မှ အဆက်အသွယ် ဖြတ်တောက်ခဲ့သည်။

ဖေဖော်ဝါရီလ  ၂၇။             ။ EU က ရုရှားအရပ်ဘက် လေယာဉ်တွေကို EU လေပိုင်နက်ပေါ် ပျံသန်းဝင်ရောက်ခြင်းမှ တား မြစ် လိုက်သည်။ ရုရှားပိုင် မီဒီယာများ ဖြစ်ကြသည့် Sputnik နှင့် Russia Today (RT) တို့ကို ၎င်းတို့၏ လုပ်ငန်းခွဲများနှင့် အတူ EU နိုင်ငံများအတွင်း လေလှိုင်းကြားမှ ရုပ်သံ၊ ရေဒီယိုထုတ်လွှင့်မှုနှင့် အင်တာနက် ဝက်ဘ်ဆိုက်၊ လူမှုကွန်ရက်တို့ကို ပိတ်ပင်သည်။ ရုရှားတပ်များ ယူကရိန်း၏မြို့တော် ကိယက်ဗ်၊ ခါကိဗ်နှင့် ခါဆွန်မြို့များဆီသို့ ဦးတည်ချီတက်နေသည်။ ယူကရိန်းနိုင်ငံသား စစ်မှုထမ်းအင်အား တိုးပွားလာသည်။

ဖေဖော်ဝါရီလ  ၂၈။             ။ ယူကရိန်းသည် EU တွင် ပါဝင်ရန် လျှောက်ထားသည်။ ရုရှားနှင့် ယူကရိန်း အပစ်အခတ်ရပ်စဲ ရေး ဆွေးနွေးပွဲများ စတင်သည်။ ရုရှား ရူဘယ်ငွေ တန်ဖိုးသည် ၃၀ ရာခိုင်နှုန်း ကျဆင်းသွားကာ ပူတင်အပေါ် အရင်းအနှီး ထိန်းချုပ်ရန် တွန်းအားပေးခဲ့သည်။

EU သည် ရုရှားဗဟိုဘဏ်နှင့် ငွေပေးချေမှုများကို တားမြစ်လိုက်ပြီး ယူကရိန်းစစ်တပ်အတွက် ယူရို သန်း ၅၀၀ (ဒေါ်လာ ၅၅၄ သန်း) ထောက်ပံ့ရေး အစီအစဉ်ကို အတည်ပြုခဲ့သည်။ ထိုအစီအစဉ်များအတွက် EU နိုင်ငံများအနေဖြင့် တတိယနိုင်ငံ တစ်နိုင်ငံဆီသို့ လူအသေအပျောက်ရှိစေမည့် ထောက်ပံ့မှုပေးအပ်ရန် ပထမဆုံးအကြိမ် သဘောတူညီခဲ့ခြင်း ဖြစ်သည်။

ယူကရိန်းနိုင်ငံအတွင်း ရုရှားပစ်ခတ်လိုက်တဲ့ လက်နက်ကြီး(AFP)

မတ်လ ၁ ။                     ။ ၆၅ ကီလိုမီတာ ရှည်လျားသည့် ရုရှားစစ်ယာဉ်တန်းသည် ကိယက်ဗ်မြို့သို့ ဦးတည် မောင်းနှင် သည်။ ယူကရိန်း အရှေ့ဘက်ရှိ ခါကိဗ် (Kharkiv)၊ မာရီယူပေါလ် (Mariupol)နှင့် တောင်ဘက်ရှိ ခါဆွန် (Kherson) မြို့တို့တွင် စစ်ရေးဖိအားများ တိုးလာသည်။

ရုရှားစစ်သားများသည် အရပ်သားများကို အစုလိုက်အပြုံလိုက် သေစေသည့် လက်နက်များ၊ ဗုံးများ အသုံးပြုနေကြောင်း လူ့ အခွင့်အရေး စောင့်ကြည့်ရေးအဖွဲ့က သတင်းထုတ်ပြန်သည်။ အမေရိကန်သည် ရုရှားလေယာဉ်များကို ၎င်း၏ ဝေဟင်ပိုင်နက် ထဲသို့ ဝင်ရောက်မပျံသန်းရန် ပိတ်ပင်လိုက်သည်။

 မတ်လ ၂ ။               ။ စစ်ပွဲပထမလအတွင်း ကျခဲ့သော ပထမဆုံးနှင့် တစ်ခုတည်းသော ယူကရိန်းမြို့ကြီး တစ်မြို့ ဖြစ် သော ခါဆွန်မြို့အတွင်းသို့ ရုရှားတင့်ကားများ ဝင်ရောက်လာသည်။ ယူကရိန်းနိုင်ငံ အရှေ့တောင်ပိုင်းရှိ မာရီယူပေါလ် ဆိပ် ကမ်းမြို့ကို ရုရှားတပ်ဖွဲ့များ ဝိုင်းထားသည်။ ထိုနေ့အထိ ယူကရိန်းမှ ထွက်ပြေးလာသည့် ဒုက္ခသည်အရေအတွက် တစ်သန်း ကျော် ရှိသည်။

မတ်လ ၃ ။               ။ နိုင်ငံတကာရာဇဝတ်တရားရုံး၏ ထိပ်တန်းအစိုးရရှေ့နေသည် ဖြစ်နိုင်ချေရှိသော စစ်ရာဇဝတ် မှုများ ကို စုံစမ်းစစ်ဆေးရန် ရှေ့ပြေးအဖွဲ့တစ်ဖွဲ့ကို ယူကရိန်းသို့ စေလွှတ်လိုက်သည်။

မတ်လ ၄ ။               ။ ရုရှားနိုင်ငံရှိ အခြားသော မီဒီယာ ပလက်ဖောင်းများကြားတွင် တွစ်တာ၊ ဖေ့စ်ဘွတ်ခ်၊ ဗွီအိုအေ၊ ဘီဘီစီနှင့် Deutsche Welle (DW သတင်းဌာန) တို့ကို ပူတင်က ပိတ်ခဲ့သည်။ သူသည် “သတင်းအမှား  ဖန်တီးမှု” ပြစ်မှု ကျူးလွန်သူကို ထောင်ဒဏ် ၁၅ နှစ်အထိ ချမှတ်နိုင်သည့် ရာဇဝတ်မှုဆိုင်ရာ ဥပဒေသစ်တစ်ရပ်ကို လက်မှတ်ရေးထိုးခဲ့သည်။

မတ်လ ၅ ။               ။ အမေရိကန်နိုင်ငံခြားရေးဝန်ကြီး အန်တိုနီဘလင်ကင်သည် ပိုလန်-ယူကရိန်းနယ်စပ်တွင် ယူကရိန်း နိုင်ငံခြားရေးဝန်ကြီး ဒီမီထရိုကူလီဘာနှင့် တွေ့ဆုံသည်။ ရုရှားစစ်သားများ ယူကရိန်းမှ အမေရိကန်က တိုက်တွန်းလိုက် ကြောင်း ဘလင်ကင်က တစ်ဆက်တည်း ပြောကြားခဲ့သည်။  

ဇာလန်းစကီး မိန့်ခွန်းပြောနေ(AFP)

မတ်လ ၆ ။               ။ ယူကရိန်းသမ္မတ ဇာလန်းစကီးသည် ကိယက်ဗ်မြို့မှပင် ညစဉ် ဗွီဒီယိုမိန့်ခွန်းများ ထုတ်ပြန်၍ ယူကရိန်း ပြည်သူများနှင့် ကမ္ဘာကို စဉ်ဆက်မပြတ် ထိတွေ့နေခဲ့သည်။ ရုရှားနိုင်ငံ၏ အကြီးဆုံး အစိုးရလေကြောင်းလိုင်း ဖြစ်သည့် Aeroflot က နိုင်ငံတကာလေကြောင်း ပျံသန်းမှုအားလုံးကို ရပ်ဆိုင်းတော့ မည်ဖြစ်ကြောင်း ပြောကြားခဲ့သည်။

မတ်လ ၇ ။               ။ Brent ရေနံစိမ်း တစ်စည်လျှင် ၁၃၉.၁၃ ဒေါ်လာနှုန်းသို့ ယာယီရောက်ရှိသွားသည်။ ယူကရိန်း ဒုက္ခသည်ဦးရေ ၁ ဒသမ ၇ သန်းအထိ တိုးလာသည်။

မတ်လ ၈ ။               ။ မော်စကိုနှင့် ကိယက်ဗ်တို့အကြား ဆွေးနွေးမှုအရ သဘောတူထားသည့်အတိုင်း အရပ်သားများ ဆူမီ မြို့ကို လူသားချင်း စာနာမှု စင်္ကြန်လမ်းကြောင်းမှတစ်ဆင့် ရွှေ့ပြောင်းခဲ့ကြသည်။  မြောက်အတ္တလန္တိတ်စစ်စာချုပ်အဖွဲ့ (နေတိုး) သည် ယခုစစ်ပွဲထဲ ဝင်မပါလို၍ ယူကရိန်းလေတပ်သို့ ဆိုဗီယက်ခေတ် MiG-29 တိုက်လေယာဉ်များ လွှဲပြောင်းပေး ရန် ပိုလန်ကမ်းလှမ်းချက်ကို အမေရိကန်က ပယ်ချလိုက်သည်။

ဥရောပကော်မရှင်သည် ယခုနှစ်ကုန်တွင် ရုရှား၏ သဘာဝဓာတ်ငွေ့အပေါ် မှီခိုနေရမှုကို သုံးပုံနှစ်ပုံ လျှော့ချမည့် REPower EU အစီအစဉ်ကို ထုတ်ဖော်ပြသခဲ့သည်။ ရုရှားတို့ ယူကရိန်းပိုင်နက်ထဲ ကျူးကျော်ဝင်ရောက်လာချိန်မှစ၍ ရေနံဈေးနှုန်းများ တဟုန်ထိုး မြင့်တက်ခဲ့သည်။ ရုရှားနိုင်ငံမှ ရေနံစိမ်းတင်သွင်းမှုကို အမေရိကန်က တားမြစ်ပိတ်ပင်ခဲ့သည်။ ယူကရိန်း ဒုက္ခ သည် ဦးရေ ၂ သန်းကျော်အထိ ရှိလာသည်။  

 မတ်လ ၉ ။               ။ ရုရှားလေကြောင်း တိုက်ခိုက်မှုသည် မာရီယူပေါလ်မြို့ရှိ သားဖွားဆေးရုံကို ထိမှန်ခဲ့ပြီး လူ ၃ ဦး သေဆုံးခဲ့သည်။ ရုရှားကတော့ ဆေးရုံထဲတွင် “အစွန်းရောက်များ” ရှိနေသည်ဟု ပြောသည်။ ကိယက်ဗ်မြို့တော်၏ အနောက်မြောက်ပိုင်း ဆင်ခြေဖုံးရပ်ကွက်များဖြစ်ကြသည့် အီရာပင် (Irpin) နှင့် ဗော်ဇဲ (Vorzel) တို့တွင် တိုက်ပွဲများ ဖြစ်ပွား၍ သွေးထွက်သံယိုဖြင့် ဒုက္ခသည်များ ပြေးလွှားနေသည်။ နိုင်ငံတကာ ငွေကြေးရန်ပုံငွေအဖွဲ့ (IMF) ၏ အမှုဆောင် ဘုတ်အဖွဲ့သည် ယူကရိန်းအတွက် အရေးပေါ်ဘဏ္ဍာငွေ ဒေါ်လာ ၁ ဒသမ ၄ ဘီလီယံကို အတည်ပြုခဲ့သည်။

လူသူရှင်းလင်းနေတဲ့ လမ်းမကြီးပေါ်က အစားအသောက်ကို သယ်ဆောင်သွားနေတဲ့ ယူကရိန်းအမျိုးသားတစ်ဦး(AFP)

မတ်လ ၁၀ ။             ။ ရုရှားတပ်ဖွဲ့များသည် လူသားချင်း စာနာထောက်ထားမှုဆိုင်ရာ ထောက်ပံ့ရေးပစ္စည်းများ မာရီယူပေါလ်မြို့သို့ ရောက်ရှိခြင်းမှ တားဆီးပြီး အရပ်သား ဘေးကင်းရေး စင်္ကြန်လမ်းကြောင်းကို ဗုံးကြဲတိုက်ခိုက်ခဲ့သည်။ အမေရိကန်ကွန်ဂရက်(လွှတ်တော်)က ယူကရိန်း ဒုက္ခသည်နှင့် စစ်ရေးအကူအညီအတွက် ဒေါ်လာ ၁၃ ဒသမ ၆ ဘီလီယံ အသုံးစရိတ်ကို ခွင့်ပြုခဲ့သည်။

မတ်လ ၁၁ ။             ။ ယူကရိန်းအရှေ့တောင်ပိုင်းရှိ မာလီတိုပေါလ်မြို့တော်ဝန်ကို ရုရှားနိုင်ငံသားများက ပြန်ပေး ဆွဲခဲ့သည်။ ဆီးရီးယားမှ ပုံမှန်မဟုတ်သော တိုက်ခိုက်ရေးသမား ၁၆,၀၀၀ အထိ ယူကရိန်းသို့ တပ်ဖြန့်ချထားရန် ပူတင်က အတည်ပြုခဲ့သည်။

ဒုက္ခသည် စုစုပေါင်း ၂ ဒသမ ၅ သန်းကျော် ရှိလာခဲ့ရာ နောက်ထပ် တိုးလာသည့် လူ ၂ သန်းမှာ ပြည်တွင်း၌ အိုးမဲ့အိမ်မဲ့ ဖြစ် နေကြောင်း ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံးက ထုတ်ပြန်သည်။ EU သည် ဗာဆိုင်း နန်းတော်ကြေညာ ချက်ကို ထုတ်ပြန်ပြီး ဥရောပ ကာကွယ်ရေးစွမ်းရည်ကို ဦးတည်ကာ ရွေ့လျားလာခဲ့သည်။

မတ်လ ၁၂ ။             ။ မာရီယူပေါလ်မြို့တွင် အေပီသတင်းဌာနမှ သတင်းထောက် အဖွဲ့တစ်ဖွဲ့က တိုက်တာ အဆောက်အဦ တစ်ခုကို ရုရှားတင့်ကားဖြင့် ပစ်ခတ်မှုအား ရိုက်ကူးခဲ့ရာ အေပီသတင်းထောက်တစ်ဦးသည် ရုရှားစနိုက်ပါ ထိမှန်၍ ကျန်းမာ ရေး ဝန်ထမ်းများက အရေးပေါ် ခေါ်ဆောင်သွားခဲ့ရသည်။ မြို့တွင်းနေထိုင်သူများကို သက်သာရာရန် ကြိုးပမ်းပေးနေသည့် လူသားချင်းစာနာမှုဆိုင်ရာ ထောက်ပံ့ရေး ယာဉ်တန်းကို ရုရှားစစ်သားများ တားဆီးခဲ့သည်။

မတ်လ ၁၃ ။            ။ ရုရှားသည် ပိုလန်နယ်စပ်မှ ၂၅ ကီလိုမီတာအကွာ ယာဗရိုဗစ်ဒေသရှိ စစ်ရေးလေ့ကျင့်ရေး စခန်းတစ်ခု တွင် ခရုဇ်ဒုံးကျည်အစင်း ၃၀ ပစ်လွှတ်၍ ယူကရိန်းအနောက်ပိုင်းသို့ တိုက်ခိုက်မှုများ ချဲ့ထွင်သည်။ အနည်းဆုံး လူ ၃၅ ဦး သေ ဆုံးပြီး ၁၃၄ ဦး ဒဏ်ရာရရှိခဲ့ကြောင်း ယူကရိန်း တာဝန်ရှိသူများက ပြောသည်။

လက်နက်ကိုင်ဆောင်ထားတဲ့အမျိုးသားတစ်ဦး(AFP)

မတ်လ ၁၄ ။            ။ ချေချင်းညှာခေါင်းဆောင်နှင့် ပူတင်သစ္စာခံသူ ရမ်ဇန် ကာဒီရော့ဗ်က ချေချင်းညှာတို့အုပ်စုက မော်စကို၏ ယူကရိန်းကို တိုက်ခိုက်ရာတွင် ၎င်းတို့ပူးပေါင်းပါဝင်သည်ဟု ပြောသည်။ အမေရိကန် အမျိုးသားလုံခြုံရေး အကြံပေး ဂျက်ဆူလီဗန်နှင့် တရုတ် နိုင်ငံခြားရေးညွှန်ကြားရေးမှူး ယန်ဂျီချီတို့ တွေ့ဆုံဆွေးနွေးသည်။ အကူအညီပေးရေး ယာဉ်တန်းကို ရုရှားစစ်သားများ ပိတ်ဆို့ထားရာမှ ဖယ်ရှားပေး၍ အစီးရေ ၁၆၀ ခန့် မာရီယူပေါလ်မြို့မှ ထွက်ခွာနိုင်ခဲ့သည်။

မတ်လ ၁၅ ။             ။ ချက်၊ ပိုလန်နှင့် စလိုဗေးနီးယား ဝန်ကြီးချုပ်များ ကိယက်ဗ်မြို့သို့ ရထားခရီးစဉ်ဖြင့် ရောက်ရှိလာ သည်။ အရပ်သား နှစ်သောင်းကျော် မာရီယူပေါလ်မြို့ထဲမှ ထွက်ပြေးနိုင်ခဲ့သည်။ ဒုက္ခသည် ဦးရေ ၃ သန်း ကျော်သွားပြီ ဖြစ် သည်။ ယူကရိန်းသမ္မတ ဇာလန်းစကီးက နေတိုးအဖွဲ့ဝင်ဖြစ်လာလျှင် ယူကရိန်းအတွက် အလားအလာကောင်းတစ်ခုဟု မယုံကြည်ကြောင်း၊ မော်စကိုနှင့် စေ့စပ်ညှိနှိုင်းရေး အပေးအယူလုပ်ဖို့အတွက် ဖြစ်နိုင်ခြေရှိတဲ့ အကြောင်းရင်းများကို ထုတ်ပြ လာခဲ့သည်။

မတ်လ ၁၆ ။               ။ ရုရှားနှင့် ယူကရိန်း စေ့စပ်ညှိနှိုင်းရေးမှူးများက လုံခြုံရေးအာမခံချက် ရရှိရန်နှင့် ရုရှားတပ်များ ထွက်ခွာသွားရန်အတွက် ယူကရိန်းက ကြားနေရေး ဆွေးနွေးကြသည်။ ပူတင်က စစ်ပွဲ၏ ပြည်တွင်း ပြိုင်ဘက်များကို တိုင်းပြည်အားပျော့စေရန် အနှောင့်အယှက်ပေးနေသော ‘မှက်’များနှင့် ခိုင်းနှိုင်းပြောသည်။

“နိုင်ငံကို ခိုင်မာစေမည့် လူ့အဖွဲ့အစည်းနှင့် သဘာဝအား လိုအပ်သလို သန့်စင်ရှင်းထုတ်ရေး” အကြောင်းကို ပူတင်ပြောပြီး သဘောထားကွဲလွဲမှုများမှ ပြိုကွဲလာနိုင်သည့် အလားအလာကို အရိပ်အမြွက်ပြသခဲ့သည်။

မတ် ၁၈ ။                 ။ မာရီယူပေါလ်မြို့ စည်ပင်သာယာပြဇာတ်ရုံ ဗုံးကြဲတိုက်ခိုက်ခံရ၍ အပျက်အစီးများကြားမှ လူပေါင်း ၁၃၀ ကို ကယ်ဆယ်နိုင်ခဲ့သော်လည်း နောက်ထပ် လူပေါင်းရာနှင့်ချီ ပိတ်မိခဲ့ကြောင်း၊ ရုံအတွင်း သေဆုံးသူ ၃၀၀ ခန့်ရှိကြောင်း ယူကရိန်းက ပြောသည်။

နောက်ထပ် အရပ်သား ၅,၀၀၀ ကို မြို့တွင်းမှ ရွှေ့ပြောင်းပေးခဲ့ရသဖြင့် ဘေးကင်းရာ ရွှေ့ပြောင်းသူ မာရီယူပေါလ်မြို့ခံ ဦးရေ မှာ ၃၅,၀၀၀ အထိ ရှိလာသည်။ ယူကရိန်း အာဏာပိုင်များက မာရီယူပေါလ်မြို့ ရုရှားလက်သို့ ကျသွားလျှင် ပင်လယ် ထွက် ပေါက် ပိတ်မည်ဟု ယူကရိန်းအာဏာပိုင်များက ပြောခဲ့ပြီး ရုရှားတပ်ဖွဲ့များ မြို့ထဲသို့ ဝင်ရောက်ကာ မြို့လယ်ခေါင်တွင် တိုက်ပွဲများ ဖြစ်ပွားခဲ့ကြောင်း သိရသည်။

မြို့တွင်းက ယူကရိန်းစစ်သည်များ(AFP)

မြို့ကောင်စီက ရုရှား၏ ဗုံးကြဲတိုက်ခိုက်မှုအတွင်း လူပေါင်း ၂၅၀၀ သေဆုံးခဲ့သည်ဟု ခန့်မှန်းထားသည်။ ယူကရိန်း အနောက် ဘက်ပိုင်းရှိ လိုဗစ် (Lviv) မြို့ထဲသို့  ဒုံးကျည်ခြောက်စင်းကို ပင်လယ်နက်ရေပြင်ပေါ်ရှိ ရုရှားစစ်သင်္ဘောမှ ပစ်ခတ်ခဲ့သည်။ အမေရိကန်သမ္မတ ဂျိုးဘိုင်ဒင်က တရုတ်သမ္မတ ရှီကျင့်ဖျင်က ပဋိပက္ခတွင် ရုရှားကို “ပစ္စည်းထောက်ပံ့မှု” ကမ်းလှမ်းပါက နောက်ဆက်တွဲ အကျိုးဆက်များအကြောင်း သတိပေးထားသည်။

မတ်လ ၂၀ ။               ။  အရပ်သား ၄၀၀ ခန့် ခိုလှုံနေဆဲဖြစ်သည့် မာရီယူပေါလ်မြို့ရှိ အနုပညာကျောင်း တစ်ကျောင်းကို ရုရှားက လေကြောင်းမှ တိုက်ခိုက်၍ ဖျက်ဆီးခဲ့သည်။ ယူကရိန်းနိုင်ငံမှာ နေရပ်စွန့်ခွာ ထွက်ပြေးသူများ အပါအဝင် စုစုပေါင်း ၁၀ သန်းကျော် အိုးအိမ်စွန့်ခွာ ထွက်ပြေးခဲ့ရကြောင်း ကုလသမဂ္ဂက ပြောသည်။

မတ်လ ၂၁ ။                ။ မာရီယူပေါလ်မြို့ လက်နက်ချရန် ရုရှား၏ရာဇသံကို ယူကရိန်း ပယ်ချလိုက်သည်။

မတ်လ ၂၂ ။                ။ ယူကရိန်းတွင် ဓာတုနှင့် ဇီဝလက်နက်များ ရှိနေကြောင်း ပူတင်၏ စဉ်ဆက်မပြတ် အခိုင်အမာ ပြောကြားမှုနှင့်ပတ်သက်၍ "ထိုလက်နက် နှစ်မျိုးစလုံးကို အမှန်တကယ်သုံးရန် သူပဲ (ပူတင်) စဉ်းစားနေကြောင်း သိသာပါ ကြောင်း” ဟု ဂျိုးဘိုင်ဒန်က တုံ့ပြန်ပြောကြားခဲ့သည်။

မတ်လ ၂၃။                 ။ စစ်ပွဲတစ်လပြည့်လုနီး၌ ရုရှားတပ်ဖွဲ့ဝင် ၇,၀၀၀ မှ ၁၅,၀၀၀ အတွင်း အသေအပျောက် ရှိခဲ့ကြောင်း မြောက်အတ္တလန္တိတ်စစ်စာချုပ်အဖွဲ့(နေတိုး)က ခန့်မှန်းသည်။ ပူတင်က ရုရှား၏မိတ်ဆွေ မဟုတ်သော နိုင်ငံများစာရင်းကို ကြေညာခဲ့ပြီး ယင်းနိုင်ငံများစာရင်းတွင် ဥရောပနိုင်ငံအချို့၊ အမေရိကန်၊ ဂျပန်နှင့် စင်ကာပူတို့ ပါဝင်သည်။

ယူကရိန်းနယ်စပ် ပိုလန်နိုင်ငံအတွင်းက အမေရိကန်စစ်စခန်းကို ရောက်လာတဲ့ ဘိုင်ဒန်(Reuters)

မတ်လ ၂၄ ။                ။ အမေရိကန်သမ္မတ ဂျိုးဘိုင်ဒန်သည် ယူကရိန်းပဋိပက္ခနှင့်ပတ်သက်၍ အနောက်အုပ်စု မဟာမိတ် အဖွဲ့၊ စက်မှုထိပ်သီး (G-7) နိုင်ငံများ၊ ဥရောပသမဂ္ဂ (EU)တို့နှင့် ထိပ်သီးတွေ့ဆုံ ဆွေးနွေးရန် ဘယ်လ်ဂျီယံနိုင်ငံ၊ ဘရပ်ဆဲလ် မြို့သို့ ရောက်ရှိလာခဲ့သည်။

“အခု ထိပ်သီးအစည်းအဝေး (၃) ကြိမ်စလုံးမှာ ဘယ်သူတွေက ကျနော်တို့မိတ်ဆွေလဲ၊ ဘယ်သူတွေက ကျနော်တို့ရဲ့ လုပ်ဖော် ကိုင်ဖက်လဲ၊ ဘယ်သူက ကျနော်တို့ကို ရောင်းစားပြီး သစ္စာဖောက်တာလဲဆိုတာ တွေ့ပါလိမ့်မယ်” ဟု ထိုနေ့ အစောပိုင်းတွင် ထုတ်ပြန်ခဲ့သော ဗွီဒီယိုမိန့်ခွန်း၌ ဇာလန်းစကီးက ပြောသည်။

မတ်လ ၂၅ ။               ။ ဂျိုးဘိုင်ဒန်သည် ၎င်း၏ ဥရောပခရီးစဉ် နောက်ဆုံး အပြီးသတ်အဖြစ် ပိုလန်နိုင်ငံသို့ ရောက်ရှိလာ သည်။ နေတိုးအုပ်စုဝင် ပိုလန်သည် ယူကရိန်း၏ အိမ်နီးချင်းအဖြစ် အရေးပါ၍ လေကြောင်းရန် ကာကွယ်ရေးစနစ်ကို ဝါရှင်တန်၏ အစီအစဉ်ဖြင့် အသင့်ချထားလိုက်သည်။ 

Ref: Aljazeera and News Agencies

CNI International News

ပြုံယမ်း၊ မတ်လ ၂၅

မြောက်ကိုရီးယားခေါင်းဆောင် ကင်ဂျုံအန်းသည် ၎င်း၏ ကာကွယ်ရေး တိုးမြှင့်ရန်နှင့် အမေရိကန်အပေါ် ကာလရှည်ကြာ ထိပ်တိုက်တွေ့နိုင်ရန် ရည်ရွယ်ချက်တို့ဖြင့် ပြုံယမ်း၏ အကြီးမားဆုံး တိုက်ချင်းပစ်ဒုံးကျည် (ICBM)ကို စမ်းသပ် ပစ်လွှတ်ခဲ့ ကြောင်း အစိုးရအာဘော်မီဒီယာက မတ်လ ၂၅ ရက် (ယနေ့) သတင်းဖော်ပြခဲ့သည်ဟု အယ်လ်ဂျာဇီးယားတွင် ရေးသား ထားသည်။

အနက်ရောင် သားရေဂျာကင်နှင့် နေကာမျက်မှန်တို့ကို ဝတ်ဆင်ထားသည့် ကင်မ်ဂျုံအန်းသည် တိုက်ချင်းပစ်ဒုံးကျည် အမျိုး အစားသစ် Hwasong-17 ကို မတ်လ ၂၄ ရက်တွင် လွှတ်တင်နေမှုအား ကြီးကြပ်နေခဲ့သည်။

၂၀၁၇ ခုနှစ်နောက်ပိုင်း နျူကလီးယားထိပ်ဖူး တပ်ဆင်ထားသည့် ICBM ပထမဆုံး စမ်းသပ်မှုကို မြောက်ကိုရီးယား လုပ် ဆောင်ခဲ့ခြင်းအပေါ် တောင်ကိုရီးယားနှင့် ဂျပန်နိုင်ငံတို့အပြင် အမေရိကန်ကပါ အပြစ်တင်ရှုတ်ချခဲ့ကြသည်။

ကုလသမဂ္ဂအကြီးအကဲ အန်တိုနီယို ဂူတာရက်စ်ကလည်း ယခုပစ်လွှတ် စမ်းသပ်မှုသည် လုံခြုံရေးကောင်စီ၏ ဆုံးဖြတ်ချက် များကို အတိအလင်း ချိုးဖောက်ခြင်းဖြစ်ကြောင်း ရှုတ်ချခဲ့သည်။

မြောက်ကိုရီးယားက ပစ်လွှတ်လိုက်တဲ့ ICBM တိုက်ချင်းပစ်ဒုံးပျံ(KCNA)

မြောက်ကိုရီးယားမီဒီယာ KCNA ၏ အဆိုအရ အဆိုပါ လက်နက်ကို ပြုံယမ်း နိုင်ငံတကာလေဆိပ်မှ ပစ်လွှတ်ခဲ့ရာ ဒေါင်လိုက် အမြင့်ဆုံး ၆,၂၄၈ ကီလိုမီတာ (မိုင် ၃,၈၈၀) ရောက်ရှိခဲ့ပြီး အလျားလိုက် အကွာအဝေး ၁,၀၉၀ ကီလိုမီတာ (မိုင် ၆၈၀) ဖြင့် ဂျပန်ပင်လယ်ထဲသို့ နောက်ဆုံးကျသည်အထိ ၆၇ မိနစ်ကြာ ပျံသန်းခဲ့ကြောင်း သိရသည်။

“ကိုရီးယား ကျွန်းဆွယ်တဝိုက် နေ့စဉ်နှင့်အမျှ စစ်ရေးတင်းမာမှုများ တိုးလာနေပြီး နျူကလီးယားစစ်ပွဲ အန္တရာယ်နှင့်အတူ အမေရိကန် နယ်ချဲ့သမားများ ကာလရှည်ကြာ ထိပ်တိုက်တွေ့မှုများကို မရှောင်လွှဲနိုင်တော့သဖြင့် ယခုကဲ့သို့ စမ်းသပ် ပစ် လွှတ်ရန် ကင်မ်က အမိန့်ပေးခဲ့ကြောင်း” မြောက်ကိုရီးယားနိုင်ငံပိုင် KCNA သတင်းဌာနက ထုတ်လွှင့်ခဲ့သည်။

မြောက်ကိုရီးယား၏ မဟာဗျူဟာမြောက် လက်နက်သစ် ထွက်ပေါ်လာခြင်းသည် ကျနော်တို့ လက်နက်ကိုင် တပ်ဖွဲ့များ၏ စွမ်းအားကို တကမ္ဘာလုံးက မျက်ဝါးထင်ထင် သိမြင်စေမည်ဖြစ်ကြောင်း ကင်မ်က ပြောကြားခဲ့သည်။

မြောက်ကိုရီးယားသည် ယခု နှစ်ဆန်းပိုင်းကတည်းက ဒုံးကျည်စမ်းသပ်မှု ဆယ်ကြိမ်ထက်မနည်း ရှိခဲ့ပြီး ကိုရိုနာဗိုင်းရပ်စ် ကြောင့် နယ်စပ်ဂိတ်များ မပိတ်မီကပင် ၎င်း၏ နျူကလီးယား လက်နက်ပိုင်ဆိုင်မှုကို အမေရိကန် လက်ခံလာစေရန် တွန်း အား ပေးနေခဲ့ကြောင်း လေ့လာသုံးသပ်သူများက ပြောကြသည်။

Source: Aljazeera

CNI International News

ဝယ်လင်တန် (ဩစတြေးလျ)၊ မတ်လ ၂၅

တရုတ်သည် ပစိဖိတ်သမုဒ္ဒရာ၏ အနောက်တောင်ဘက်တွင် တည်ရှိသော ဆော်လမွန်ကျွန်းစုနိုင်ငံထဲ၌ သင်္ဘောသွားလာ မှုများ အပါအဝင် စစ်ရေးအင်အား မြှင့်တင်လာနိုင်ကြောင်း ပေါက်ကြားလာသောစာရွက်စာတမ်းတစ်စောင်ကို ကိုးကားလျက် အေပီသတင်းဌာနက မတ်လ ၂၅ ရက် (ယနေ့) ရေးသားဖော်ပြသည်။

ဩစတြေးလျနှင့် အနီးတဝိုက်တွင် ကြီးထွားလာနေသော ဖွံ့ဖြိုးရေးလုပ်ငန်းများ အကောင်အထည်ဖော်နေကြောင်း ပေါက် ကြားလာသော စာရွက်စာတမ်းတစ်စောင်ကို ကိုးကားလျက် အေပီသတင်းဌာနက ရေးသား ဖော်ပြခဲ့ခြင်း ဖြစ်သည်။

ဆော်လမွန်ကျွန်းစုအစိုးရသည် တရုတ်နှင့် ရဲတပ်ဖွဲ့ဆိုင်ရာ ပူးပေါင်းဆောင်ရွက်ရေး သဘောတူစာချုပ်ကို လက်မှတ်ရေးထိုး ခဲ့ကြောင်း မတ်လ ၂၄ ရက်တွင် ထုတ်ဖော်ကြေညာခဲ့သည်။

သို့သော် ဩစတြေးလျနှင့် ဆက်စပ်နေသည့် နောက်ထပ် ထွက်ပေါ်လာသော သတင်း၌ အွန်လိုင်းတွင် ပေါက်ကြားသွားခဲ့ သည့် ပိုမိုကြီးမားသော လုံခြုံရေးအစီအစဉ် မူကြမ်းရေးသားချက်မှာ အဓိကကျနေသည်။

ဆော်လမွန်ကျွန်းမြို့တော် ဟိုနီအာရာ အဓိကရုဏ်း(AP)

အဆိုပါ လုံခြုံရေးအစီအစဉ် မူကြမ်း၏ စည်းကမ်းချက်များတွင် တရုတ်နိုင်ငံသည် ရဲတပ်ဖွဲ့၊ စစ်မှုထမ်းများနှင့် တခြား လက်နက်ကိုင် တပ်ဖွဲ့များကို ဆော်လမွန်ကျွန်းစုနိုင်ငံ၏ လူမှုစည်းလုံးညီညွတ်မှုကို ထိန်းသိမ်းရာ၌ ကူညီရန်နှင့် တခြား အကြောင်း အမျိုးမျိုးဖြင့် စေလွှတ်နိုင်ရန် ပါရှိသည်။
ထို့ပြင် ပင်လယ်ခရီး တထောက်ရပ်နားနှင့် ရိက္ခာများ ဖြည့်တင်းရန်အတွက်လည်း ဆော်လမွန်ကျွန်းများဆီသို့ တရုတ် သင်္ဘောများ စေလွှတ် တာဝန်ပေးနိုင်မည်ဟု သိရသည်။

အဆိုပါ သဘောတူ စာချုပ်မူကြမ်းတွင် မီဒီယာရှင်းလင်းပွဲများ အပါအဝင် ပူးတွဲလုံခြုံရေး အစီအစဉ်များနှင့်ပတ်သက်၍ ဆော်လမွန်ကျွန်းစုအစိုးရက ထုတ်ပြန်သည့် အချက်အလက်များကို တရုတ်လက်မှတ်ရေးထိုးရန် လိုအပ်သည်ဟု ပြဋ္ဌာန်း ထားသည်။

တရုတ်နိုင်ငံဘက်မှ ရည်မှန်းချက် ကြီးမားလွန်းသော အဆိုပါသဘောတူညီချက် မူကြမ်းနှင့်ပတ်သက်၍ ဩစတြေးလျ၊ နယူးဇီလန်နှင့် အမေရိကန်တို့က အလွန်အမင်း စိုးရိမ်ကြမည်ဖြစ်ကြောင်း နယူးဇီလန်နိုင်ငံ၊ မာဆေး(Massey) တက္ကသိုလ်မှ နိုင်ငံတကာလုံခြုံရေးဆိုင်ရာ ဝါရင့်ကထိက အန်နာပါဝဲလ် (Anna Powles) က ပြောကြားခဲ့သည်။

ဆော်လမွန်ကျွန်းစုထံသို့ တရုတ်က ဘယ်လိုကုန်စည်များ တင်ပို့မှာလဲ၊ အနာဂတ်ကာလအတွက် ရေတပ် အခြေစိုက် စခန်း တည်ဆောက်ဖို့ တရုတ်တွင် အလားအလာ ရှိ/မရှိ စသည်တို့မှာ စိတ်ဝင်စားစရာ ဖြစ်ကြောင်း ၎င်းက ဆက်လက် ပြောကြားခဲ့ သည်။

ဆော်လမွန်ကျွန်းကိုတွေ့ရစဉ်(GETTY IMAGES)

သတင်းအချက်အလက်များ အများသိအောင် ထုတ်ပြန်ခြင်းကို ဆော်လမွန်ကျွန်းစု အစိုးရအပေါ် ထိန်းချုပ်ခြင်းဖြင့် တရုတ်က နိုင်ငံရေးကြိုးကိုင်လာရန် ကြိုးစားမည်ကို မိမိစိုးရိမ်မိကြောင်း ၎င်းက ဖြည့်စွက်ပြောကြားခဲ့သည်။

ယခု ပေါက်ကြားလာသည့် သဘောတူစာချုပ်မူကြမ်းပါ အကြောင်းအရာများကို တိုက်ရိုက် မသုံးနှုန်းဘဲ ဩစတြေးလျနိုင်ငံ၊ နိုင်ငံခြားကုန်သွယ်ရေးဌာနက “မိမိတို့ဒေသတွင်းလုံခြုံရေး မတည်မငြိမ်ဖြစ်စေမည့် မည်သည့် လုပ်ရပ်မျိုးမဆို မိမိတို့ စိုးရိမ် ပူပန်မည်ဖြစ်ကြောင်း” ထုတ်ပြန်ခဲ့သည်။

“ဆော်လမွန်ကျွန်းစု၏ မြို့တော် ဟိုနီအာရာ၊ ဩစတြေးလျနှင့် ၎င်းအိမ်နီးချင်းများသည် ပြီးခဲ့သည့်နှစ်က အဓိကရုဏ်း ဖြစ်ပွားပြီးနောက် ပြည်ပအကူအညီမယူဘဲ လုံခြုံရေးအစီအမံများ ပို့ဆောင်နိုင်ခဲ့ကြောင်း” အဆိုပါဌာန၏ ထုတ်ပြန်ချက် ထဲတွင် ဆက်လက်ဖော်ပြထားသည်။

Source: AP

CNI International News

မော်စကို၊ မတ်လ ၂၅

ရုရှားကာကွယ်ရေးဝန်ကြီး ဆာဂျေရွှိုင်ဂုနှင့်ပတ်သက်၍ သဘောထား မှတ်ချက်ပေးရန် မီဒီယာများက ကရင်မလင်ပြောရေးဆိုခွင့်ရှိသူကို မေးမြန်းရာ ငြင်းဆန်ခဲ့ခြင်းကြောင့် ဆာဂျေရွှိုင်ဂု၏ ရာထူးတာဝန်အပေါ် ထင်ကြေးများ အမြောက်အမြား ထွက်ပေါ်လာခဲ့သည်ဟု စီအင်န်အင်န်က ရေးသားဖော်ပြသည်။

ရုရှားကာကွယ်ရေးဝန်ကြီး ဆာဂျေရွှိုင်ဂုသည် ကျန်းမာရေးပြဿနာများနှင့် ရင်ဆိုင်နေရသဖြင့် ၎င်းနှင့် ပတ်သက်၍ သဘောထားမှတ်ချက်ပေးရန် ကရင်မလင်ပြောရေးဆိုခွင့်ရှိသူက မတ်လ ၂၄ ရက်တွင် မီဒီယာများကို ငြင်းဆန်ခဲ့ခြင်းဖြစ်သည်။

ရုရှားသမ္မတ ဗလာဒီမာပူတင်၏ အနီးကပ် လူယုံဖြစ်သူ ရွှိုင်ဂုသည် ယူကရိန်းကို ရုရှားကျူးကျော်မှု၌ ဦးဆောင် သည့်အခန်းကဏ္ဍမှ ပါဝင်နေသော်လည်း မကြာသေးမီက ၎င်း၏အကြောင်း တိမ်မြှုပ်ပျောက်ကွယ်နေခဲ့သည်။

ရွှိုင်ဂုသည် ကျန်းမာရေးမကောင်းဘဲ ဖြစ်နေကြောင်း လွတ်လပ်စွာ ရေးသားဖော်ထုတ်လေ့ရှိသည့် ရုရှား မီဒီယာတစ်ခုဖြစ်သော အေးဂျင့်စတိုဗို (Agentstvo) က ကာကွယ်ရေးဝန်ကြီးဌာနမှ အမည်မဖော်လိုသူ သတင်းရင်းမြစ်များကို ကိုးကားလျက် မတ်လ ၂၃ ရက်တွင် သတင်းဖော်ပြခဲ့သည်။

ထို့နောက် မတ်လ ၂၄ ရက်တွင် ကာကွယ်ရေးဝန်ကြီး ရွှိုင်ဂု၏ ကျန်းမာရေးအခြေအနေနှင့်ပတ်သက်၍ မီဒီယာ များ၏ မေးမြန်းချက်များကို ကရင်မလင် သမ္မတနန်းတော်မှ ပြောရေးဆိုခွင့်ရှိသူ ပက်စကော့ဗ်က ရှောင်ရှား တုံ့ပြန်သွားခဲ့သည်။

“လောလောဆယ်မှာ ကာကွယ်ရေးဝန်ကြီးဟာ သူ့ထမ်းဆောင်နေရတဲ့တာဝန်တွေ အများကြီး စုပုံနေပါတယ်။ အထူးစစ်ဆင်ရေးတွေ လုပ်နေတယ်။ ပုံမှန်အားဖြင့်ဆိုရင် အခုအချိန်မှာ မီဒီယာတွေကို အတိအကျချပြလို့ မရသေးဘူး။ ဒါကို နားလည်နိုင်လောက်တယ်ထင်ပါတယ်” ဟု ရွှိုင်ဂုနှင့်ပတ်သက်၍ သတင်းအသံတိတ်နေခြင်း အား စီအင်န်အင်န်က မေးမြန်းရာ ပက်စကော့ဗ်က ဖြေကြားခဲ့သည်။

သို့သော် အေးဂျင့်စတိုဗိုမီဒီယာ၏သတင်းဖော်ပြချက်ကို စီအင်န်အင်န်က ဆက်လက်မေးမြန်းခဲ့ရာ ၎င်းက ငြင်းဆန်ခဲ့သည်။

“ခင်ဗျားတို့ အေးဂျင့်စတိုဗို မီဒီယာရဲ့သတင်းကို နားမထောင်သင့်ဘူး။ ကျေးဇူးပြုပြီးတော့ ဒီမေးခွန်းတွေကို ကာကွယ်ရေးဝန်ကြီးဌာနကိုပဲ မေးပါဗျ” ဟု ၎င်းက ပြောကြားခဲ့သည်။

ရွှိုင်ဂု၏ရုပ်ပုံလွှာသည် မတ်လ ၁၈ ရက်က Channel One ထုတ်လွှင့်ချက်တွင် ပါဝင်ဖော်ပြခံခဲ့ရသော်လည်း ရုရှား သတင်းထောက်များကတော့ အဆိုပါထုတ်လွှင့်သည့်သတင်း၌ ၎င်းတက်ရောက်ခဲ့သည့်ပွဲမှာ မတ်လ ၁၁ ရက် ကတည်းက ဖြစ်နိုင်သည်ဟု ခန့်မှန်းနေကြသည်။

အစိုးရပိုင် ရုပ်သံချန်နယ်ဖြစ်သည့် Russia 24 ၌ ရွှိုင်ဂုတက်ရောက်ခဲ့သော အွန်လိုင်းအစည်အဝေးပွဲကို မတ်လ ၂၄ ရက်၌ ထုတ်လွှင့်ပြသခဲ့သော်လည်း အစည်းအဝေးကျင်းပခဲ့သည့်အချိန်ကိုမူ အတိအကျ မဖော်ပြခဲ့ပေ။

ရွှိုင်ဂုသည် ယူကရိန်းစစ်ဆင်ရေးအတွက် အဝေးမှနေ၍ ရုရှားအစိုးရ၏ အမျိုးသားလုံခြုံရေးကောင်စီကို အစီရင်ခံ တင်ပြရကြောင်း ကရင်မလင်ပြောရေးဆိုခွင့်ရှိသူက ပြောကြားခဲ့သည်။

တိုက်ရိုက်အင်တာဗျူးတစ်ခုကို ပြတ်တောင်း … ပြတ်တောင်းပြသခဲ့သည့် သတင်းတင်ဆက်မှု၌ ရွှိုင်ဂု စကား ပြောဆိုနေခြင်းကို မပြသခဲ့သော်လည်း ပူတင်ထံသို့ အစီရင်ခံနေရသော အခြားဗီဒီယိုခေါ်ဆိုမှု၌ ပါဝင် တက် ရောက်သူများအကြား ရွှိုင်ဂု၏ရုပ်ပုံလွှာကို တွေ့မြင်ခဲ့ရကြောင်း စီအင်န်အင်န်သတင်းအရ သိရသည်။

Source: CNN

CNI International News

အဒစ်အဘာဘာ၊ မတ်လ ၂၅

အီသီယိုးပီးယားနိုင်ငံ၏မြောက်ပိုင်း တီဂရေးဒေသတွင် ၁၆ လကြာ ဖြစ်ပွားနေသော လက်နက်ကိုင်ပဋိပက္ခကို လူသားချင်း စာနာထောက်ထားမှုအရ အစိုးရက အပစ်အခတ်ရပ်စဲကြောင်း ကြေညာခဲ့သည်ဟု မတ်လ ၂၅ ရက်၊ နံနက်ပိုင်းက ဘီဘီစီ အင်္ဂလိပ်ပိုင်းဝက်ဘ်ဆိုက်တွင် ဖော်ပြထားသည်။

အီသီယိုးပီးယား ပြည်တွင်းစစ်ကြောင့် လူ ၅ သန်းကျော် စားနပ်ရိက္ခာ လိုအပ်ခဲ့သော်လည်း ယမန်နှစ် ဒီဇင်ဘာလ လယ်ကတည်းက တီဂရေးဒေသသို့ ပို့ဆောင်ရေးလမ်းကြောင်းများကို အစိုးရဘက်မှ ဖြတ်တောက်ဟန့်တားခဲ့သည်။

အီသီယိုးပီးယားနိုင်ငံသို့ ယခုတလော အမေရိကန်ထံမှ အထူးသံတမန် ဒေးဗစ်ဆက်တာဖီးလ် ရောက်ရှိလာပြီးနောက် အစိုးရ၏ အပစ်အခတ်ရပ်စဲကြောင်း အထက်ပါကြေညာချက် ထွက်ပေါ်လာခဲ့သည်။

အဆိုပါ ကြေညာချက်အပေါ် တီဂရေးဒေသမှ လက်နက်ကိုင်တပ်ဖွဲ့များက တစ်စုံတစ်ရာ တုံ့ပြန်ခြင်း မရှိသေးပေ။

တီဂရေးဒေသသို့ စားနပ်ရိက္ခာ အကူအညီများ မရောက်ရှိအောင် အစိုးရအနေဖြင့် တားဆီးခဲ့ကြောင်း ကမ္ဘာ့ကျန်းမာရေးအဖွဲ့ (WHO) တီးဒရော့အက်ဟနွန်ဂျီဘရီယီးဆက်က စွပ်စွဲ၍ ကပ်ဆိုးတစ်ခုဟု ပြောကြားခဲ့သည်။

တီဂရေးဒေသမှ လက်နက်ကိုင်အဖွဲ့ဖြစ်သည့် တီဂရေးပြည်သူ့လွတ်မြောက်ရေးတပ်ဦး (TPLF) သည် ထောက်ပံ့ကူညီရေး ရိက္ခာများကို အမှန်တကယ်လိုအပ်နေသူများ လက်လှမ်းမမီအောင် တားဆီးနေသည်ဟု အီသီယိုးပီးယားအစိုးရက စွပ်စွဲထားသည်။

ငတ်မွတ်ခေါင်းပါးခြင်း (သို့မဟုတ်) ကျန်းမာရေးအထောက်အပံ့များ ချို့တဲ့ခြင်းတို့ကြောင့် အဆိုပါဒေသမှ လူအများ သေဆုံးနေရကြောင်း သတင်းများ ထွက်ပေါ်လျက်ရှိသည်။

ကမ္ဘာ့စားနပ်ရိက္ခာအစီအစဉ် (WFP) မှ ဇန်နဝါရီလထုတ်ပြန်ချက်တွင် တီဂရေးဒေသခံစုစုပေါင်း၏ ၄၀ ရာခိုင်နှုန်းနီးပါး အစာရေစာ ငတ်မွတ်ခြင်းခံစားနေရကြောင်း၊ ကိုယ်ဝန်ဆောင်နှင့်နို့တိုက်မိခင်အားလုံး၏ ထက်ဝက်မှာ အာဟာရချို့တဲ့ နေကြကြောင်း ဖော်ပြထားသည်။

မတ်လ ၂၄ ရက် ရက်စွဲဖြင့် ထုတ်ပြန်ခဲ့သော အစိုးရ၏ကြေညာချက်ထဲတွင် “ယခုအပစ်အခတ်ရပ်စဲမှုသည် အကန့် အသတ်မရှိကြောင်းနှင့် ချက်ချင်းအသက်ဝင်ကြောင်း ပြောကြားခဲ့သော်လည်း အစိုးရနှင့်လက်နက်ကိုင်တို့အကြား အပြန်အလှန်လုပ်ဆောင်မှုရှိပါက နိုင်ငံမြောက်ပိုင်းရှိ ပြည်သူများ၏ဘဝ တိုးတက်ကောင်းမွန်လာမည်ဖြစ်ကြောင်း ထည့်သွင်းရေးသားထားသည်။

Source: BBC

CNI International News

ဝါဆော၊ မတ်လ ၂၄

သံတမန်ရေးအရ အကာအကွယ်ယူ၍ မိမိတို့ပြည်တွင်းတွင် လှုပ်ရှားနေကြသည့် ထောက်လှမ်းရေး အရာရှိများဟု သံသယရှိသူ ရုရှားနိုင်ငံသား ၄၅ ဦးကို နှင်ထုတ်ရန် ပိုလန်အစိုးရက အမိန့်ပေးခဲ့ကြောင်း ၎င်းအစိုးရတာဝန်ရှိသူများက ပြောကြားသည်ဟု အေပီသတင်းအရ သိရသည်။

အဆိုပါ ရုရှားနိုင်ငံသားများသည် ပိုလန်လုံခြုံရေးအတွက် အန္တရာယ်ရှိသည်ဟု သတ်မှတ်လိုက်ကြောင်း ပိုလန်နိုင်ငံခြားရေးဝန်ကြီးဌာနအနေဖြင့် ၎င်းတို့ကို အမြန်ဆုံးနှင်ထုတ်ရန် ပြည်တွင်းလုံခြုံရေး အေဂျင်စီ က တောင်းဆိုထားကြောင်း အေပီက သတင်းဆက်လက်ဖော်ပြသည်။

“သူတို့ဟာ သံတမန်အဆင့်အတန်းကို သုံးပြီး လက်တွေ့မှာတော့ ကျနော်တို့ပြည်တွင်းကနေ ရုရှား ထောက်လှမ်းရေးတာဝန်တွေ ထမ်းဆောင်နေပါတယ်” ဟု ပိုလန်ပြည်တွင်းလုံခြုံရေးပြောခွင့်ရသူ စတိန်းစလောဇာယန်းက ပြောသည်။

ပိုလန်နိုင်ငံခြားရေးဝန်ကြီးဌာနက ပိုလန်ဆိုင်ရာရုရှားသံအမတ် ဆာဂျေအန်ဒရီဗ်ကို ဆင့်ခေါ်ခဲ့ပြီး သံရုံး ဝန်ထမ်း ၄၅ ဦးကို နှင်ထုတ်ကြောင်း အသိပေးပြောကြားခဲ့သည်။ ထို့အပြင် ပိုလန်နှင့် ချိတ်ဆက် လုပ်ကိုင်နေသော ရုရှားကုန်သွယ်ရေးမစ်ရှင်ထံသို့လည်း အကြောင်းကြားစာတစ်စောင် ပေးပို့ခဲ့သည်။

ယခုနှင်ထုတ်ခံရသူများစာရင်းတွင် မပါဝင်သည့် ဆာဂျေအန်ဒရီဗ်က ပိုလန်မှ အနှင်ခံရသူများသည် ပုံမှန်သံတမန်ရေးနှင့်ကုန်သွယ်ရေးဆိုင်ရာ ကိစ္စများကိုသာ လုပ်ဆောင်နေသူများဖြစ်ကြကြောင်း ပိုလန်နိုင်ငံခြားရေးဝန်ကြီးဌာနနှင့်တွေ့ဆုံမှုအပြီးတွင် သတင်းထောက်များကို ပြောကြားခဲ့ပြီး ပိုလန်၏ဆုံးဖြတ်ချက်ကို ပြင်းပြင်းထန်ထန် ရှုတ်ချခဲ့သည်။

ရုရှားအနေဖြင့် အပြန်အလှန်တုံ့ပြန်မှုအခြေခံ၍ လုပ်ပိုင်ခွင့်ရှိကြောင်း ၎င်းက ဆက်လက် ပြောကြား ခဲ့သည်။

အထူးအန္တရာယ်ရှိသူတစ်ဦးမှအပ ယခုနှင်ထုတ်ခံရသူစာရင်းတွင် ပါဝင်သူ ရုရှားနိုင်ငံသားအားလုံးသည် နိုင်ငံအတွင်းမှ ၄၈ နာရီအတွင်း ထွက်ခွာပေးရမည်ဖြစ်ပြီး ၅ ရက်တိတိအချိန်ပေးထားကြောင်း ပိုလန် နိုင်ငံခြားရေးဝန်ကြီးဌာန ပြောခွင့်ရသူ လူကာဆက်ဇ်ဂျာစီနာ (Lukasz Jasina) က ပြောကြားခဲ့သည်။

“ရုရှားဟာ ယူကရိန်းကို ရိုင်းစိုင်းကြမ်းတမ်းတဲ့ စစ်ပွဲဆင်နွှဲနေတာ သီတင်းပတ် ၃ ပတ်ကျော်သွားပါပြီ။ ကျနော်တို့နဲ့ တခြားအနောက်နိုင်ငံတွေကို အဓိကရန်သူတွေအဖြစ် သူတို့က သဘောထားကြတယ်” ဟု ဂျာစီနာက ဆက်လက်ပြောကြားခဲ့သည်။

ယခုကဲ့သို့ ရုရှားထောက်လှမ်းရေးများကို နှင်ထုတ်ခြင်းအတွက် ပိုလန်ဘက်မှ တိကျသော အကြောင်း ပြချက်မပေးသော်လည်း ၎င်းအနေဖြင့် ယူကရိန်းဒုက္ခသည်များကို အစုလိုက်အပြုံလိုက် လက်ခံပေးနေ ချိန်တွင် ရုရှားထောက်လှမ်းနေခြင်းက ဆိုးရွားသောခြိမ်းခြောက်မှုတစ်ရပ်ဖြစ်ကြောင်း ဂျာစီနာက ထောက်ပြခဲ့သည်။

Source: AP