CNI Sport News
၂၀၂၆ ခုနှစ်၊ ဇွန်လ ၁၉
၂၀၂၆ ကမ္ဘာ့ဖလားပြိုင်ပွဲရဲ့ ပူးတွဲအိမ်ရှင် ကနေဒါအသင်းဟာ အုပ်စုဒုတိယမြောက်ပွဲမှာ ကာတာအသင်းကို ၆ ဂိုး-ဂိုး မရှိနဲ့ ဂိုးပြတ်အနိုင်ရပြီး ကမ္ဘာ့ဖလားပြိုင်ပွဲမှာ သူတို့ရဲ့ပထမဆုံး နိုင်ပွဲရရှိသွားခဲ့ပါတယ်။
ကနေဒါအသင်းအတွက် ဂျိုနသန်ဒေးဗစ်က ဟက်ထရစ်သွင်းပြီး လာရင်၊ ဆာလီဘာနဲ့ ကာတာကစားသမား ကိုယ့်ဂိုးကိုယ် ၁ ဂိုး သွင်းယူပေးခဲ့တာပါ။
ပြီးခဲ့တဲ့ကမ္ဘာ့ဖလားပြိုင်ပွဲ ၂ ကြိမ်စလုံးမှာ နိုင်ပွဲမရခဲ့တဲ့ ကနေဒါအသင်းဟာ ပူးတွဲအိမ်ရှင်အဖြစ် ကျင်းပတဲ့ ဒီပြိုင်ပွဲမှာ နိုင်ပွဲရခဲ့ပြီး အုပ်စုကနေတက်ဖို့ အခြေအနေ ကောင်းခဲ့ပါတယ်။
ကနေဒါအသင်းနည်းပြ ဂျက်ဆီမာ့ရှ်က “ဘယ်သူမှ ဒါကိုမေ့မှာ မဟုတ်သလို ကနေဒါလူမျိုးတွေလည်း ဒီနေ့ကို မေ့မှာ မဟုတ်ပါဘူး။ ဒီနိုင်ငံမှာ အရည်အချင်းရှိတဲ့ သူတွေ အများကြီးရှိသလို စိတ်ဓါတ်ပိုင်း၊ စိတ်ဆန္ဒတွေလည်း ရှိပါတယ်။ ဒီနိုင်ငံကို ထူးခြားစေတဲ့ အရာတွေ အများကြီးရှိတယ်ဆိုတာ လူတိုင်းနားလည်ဖို့ အလွန်အရေးပါတဲ့ အခိုက်အတန့်ပါ”လို့ ပြောခဲ့တာပါ။
ကနေဒါအသင်းကို တွေ့ရစဉ်
ဒီပွဲမှာ ကာတာအသင်း ကစားသမား မာဒီဘိုရဲ့ ကြမ်းတဲ့ ပြစ်ဒဏ် ကျူးလွန်မှုကြောင့် ကနေဒါအသင်းက ကိုနေး ခြေထောက်ကျိုးသွားခဲ့ပြီး မာဒီဘိုလည်း အနီကတ်ပြသခြင်း ခံခဲ့ရပါတယ်။
ကာတာအသင်းဟာ ပထမပိုင်းမှာလည်း ကစားသမား ၁ ဦး ထုတ်ပယ်ခံခဲ့ရလို့ ကစားသမား ၉ ဦးနဲ့ လက်ကျန် မိနစ်တွေကို ကစားခဲ့ရပါတယ်။
ကိုနေးဟာ ဆိုးရွားတဲ့ ဒဏ်ရာကြောင့် ဆေးရုံမှာ ခွဲစိတ်ကုသမှု ခံယူရမယ်လို့ ကနေဒါအသင်းနည်းပြက အတည်ပြုခဲ့ပါတယ်။
ကနေဒါအသင်းဟာ ဒီနိုင်ပွဲကြောင့် အုပ်စုတွင်း ၂ ပွဲ ကစားအပြီးမှာ ရမှတ် ၄ မှတ်ရရှိကာ ဆွစ်ဇာလန်အသင်းနဲ့ ရမှတ်တူ ဂိုးကွာခြားချက်အသာနဲ့ ထိပ်ဆုံးနေရာမှာ ရပ်တည်နေတာပါ။
ကနေဒါအသင်းဟာ အုပ်စုနောက်ဆုံးပွဲအဖြစ် ဇွန်လ ၂၄ ရက်မှာ ဆွစ်ဇာလန်အသင်းနဲ့ ယှဉ်ပြိုင်မှာ ဖြစ်ပါတယ်။
Source: ESPN
