CNI Sport News

၂၀၂၅ ခုနှစ်၊ အောက်တိုဘာ ၂

ဘာစီလိုနာအသင်းဟာ ချန်ပီယံလိဂ် League Phase ပွဲစဉ် ၂ အဖြစ် ယှဉ်ပြိုင်ခဲ့တဲ့ပွဲစဉ်မှာ PSG အသင်းကို ၂ ဂိုး-၁ ဂိုးနဲ့ အရေးနိမ့်ခဲ့ပြီးနောက် ဘာစီလိုနာအသင်းနည်းပြ ဟန်ဆီဖလစ်က အသင်းဟာ PSG အသင်းအဆင့်မှာ ရှိမနေခဲ့ဘူးလို့ ဝန်ခံခဲ့ပါတယ်။ 

ဟန်ဆီဖလစ်က “ကျနော်တို့ဟာ တူညီတဲ့အဆင့်မှာ ရှိနေတယ်လို့ ပြောစရာ မရှိဘူးဆိုတာ ဒီပွဲမှာ မြင်တွေ့နိုင်ပါ တယ်။ ဒါပေမယ့် ကျနော်ဟာ ကျနော့်အသင်းကို ယုံကြည်မှုရှိပါတယ်။ ဒီနေ့က ကျနော်တို့အတွက် အကောင်းဆုံး နေ့ မဟုတ်ခဲ့ပေမယ့် ဒီလိုအဆင့်မျိုး ရောက်ရှိအောင် ကျနော်တို့ ထပ်ပြီးကြိုးစားမှာပါ။ ကျနော်တို့လည်း PSG အသင်းလိုမျိုး ကစားနိုင်တယ်ဆိုတာ ရာနှုန်းပြည့် သေချာပြီး သူတို့ဆီကနေ သင်ယူကာ ပိုပြီးကောင်းအောင် လုပ်ရမယ်”လို့ ပြောခဲ့တာပါ။ 

ဒီပွဲမှာ ဘာစီလိုနာအသင်းဟာ ရက်ရှ်ဖို့ဒ်ရဲ့ ဖန်တီးပေးမှုကနေ ဖာရန်တောရက်စ်က ဦးဆောင်ဂိုး သွင်းယူနိုင်ခဲ့ ပေမယ့် လက်ရှိချန်ပီယံ PSG အသင်းအတွက် မာယူလူက ချေပဂိုးသွင်းပြီး ဂွန်ကာလိုရာမို့စ်က မိနစ် ၉၀ မှာ အနိုင်ဂိုး သွင်းယူခဲ့တာ ဖြစ်ပါတယ်။ 

ဘာစီလိုနာနဲ့ ပီအက်စ်ဂျီ ယှဉ်ပြိုင်နေစဉ်

ဘာစီလိုနာအသင်းဟာ ဒီရှုံးပွဲကြောင့် ဒီရာသီပြိုင်ပွဲစုံမှာ ပထမဆုံး ရှုံးပွဲကြုံတွေ့ခဲ့ပြီး PSG အသင်းကတော့ ချန်ပီယံလိဂ်ပွဲစဉ် ၂ ပွဲစလုံး အနိုင်ရရှိထားတာပါ။ 

PSG အသင်းဟာ ဒီပွဲစဉ်မှာ အဓိက ကစားသမားတွေဖြစ်တဲ့ ဒမ်ဘီလီ၊ ဒူအီ၊ ကာဗီချာနဲ့ မာကွင်ဟို့စ်တို့ ဒဏ်ရာ ကြောင့် မပါဝင်နိုင်ခဲ့ပေမယ့် ဘာစီလိုနာအသင်းကို အကောင်းဆုံးကစားပြီး နိုင်ပွဲရယူနိုင်ခဲ့တာ ဖြစ်ပါတယ်။ 

ဘာစီလိုနာအသင်းကလည်း ရာဖင်ညာ၊ ယိုအန်ဂါစီယာ၊ ဂါဗီနဲ့ဖာမင်လိုပက်ဇ်တို့ မပါဝင်ဘဲ PSG အသင်းနဲ့ ရင်ဆိုင်ခဲ့ရတာပါ။ 

ဘာစီလိုနာအသင်းနည်းပြ ဟန်ဆီဖလစ်က PSG အသင်းကို နောက်ကျ အနိုင်ဂိုး ပေးခဲ့ရတဲ့အပေါ် စိတ်ပျက်ခဲ့ ပေမယ့် လာမယ့်ပွဲတွေမှာ ပိုပြီးကောင်းမွန်အောင် သင်ယူရမယ်လို့ ပြောခဲ့ပါတယ်။ 

ဒီပွဲမှာ PSG အသင်းအတွက် အနိုင်ဂိုးသွင်းခဲ့တဲ့ ဂွန်ကာလိုရာမို့စ်က သူတို့ဟာနိုင်ပွဲနဲ့ ထိုက်တန်ခဲ့ပြီး ဘာစီလိုနာ အသင်းထက် ပိုပြီးကောင်းအောင် ကစားနိုင်ခဲ့တယ်လို့ ပြောခဲ့ပါတယ်။ 

ဒါအပြင် ဂွန်ကာလိုရာမို့စ်က သူတို့ဟာ ဒီရာသီမှာ အရာအားလုံးကို ထပ်ပြီး အနိုင်ယူချင်တယ်လို့ ပြောခဲ့တာ ဖြစ်ပါတယ်။ 

Source: ESPN