CNI Sport News
၂၀၂၅ ခုနှစ်၊ စက်တင်ဘာ ၁၅
ချယ်လ်ဆီးအသင်းရဲ့ ကစားသမားသစ် အီမီဂါဟာ ပြင်သစ် လီဂူး-၁ ကလပ် စထရာဘောင်းအသင်း ပရိသတ်တွေရဲ့ လှောင်ပြောင်မှုတွေကြောင့် ဝမ်းနည်းကြေကွဲနေခဲ့ပါတယ်။
အသက် ၂၂ နှစ်အရွယ်ရှိ ဒတ်ချ်ကစားသမားဟာ ချယ်လ်ဆီးအသင်း ပိုင်ရှင်တွေ ပိုင်ဆိုင်တဲ့ ကလပ်အသင်း နှစ်သင်းကြား အပြောင်းအရွှေ့အဖြစ် စထရာဘောင်းအသင်းကနေ ချယ်လ်ဆီးအသင်းထံ ပြောင်းရွှေ့မှာ ဖြစ်ပါတယ်။
အီမီဂါဟာ လာမယ့် နွေရာသီမှသာ ချယ်လ်ဆီးအသင်းထံ ပြောင်းရွှေ့မှာ ဖြစ်တဲ့အတွက် ဒီရာသီ စထရာဘောင်း အသင်းမှာ ဆက်ပြီးကစားရမှာပါ။
ဒါပေမယ့် စထရာဘောင်းအသင်း ပရိသတ်တွေကတော့ လီဟာဗရီအသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ ပြင်သစ် လီဂူး-၁ ပွဲစဉ်ရဲ့ ပွဲချိန်အတွင်းမှာ ဒီအပြောင်းအရွှေ့ သတင်းကို ပြင်းပြင်းထန်ထန် တုံ့ပြန်ခဲ့ကြပါတယ်။
အီမီဂါကို တွေ့ရစဉ်
စထရာဘောင်းအသင်း ပရိသတ်တွေဟာ အီမီဂါကို “အင်္ကျီပြောင်းပြီးသွားရင် မင်းရဲ့ အသင်းခေါင်းဆောင် လက်ပတ်ကို ပြန်ပေးဆိုပြီး”ရေးသားထားတဲ့ စာတန်းကို ကွင်းအတွင်းမှာ ပြသထားခဲ့တာပါ။
အီမီဂါဟာ ဒဏ်ရာကြောင့် လီဟာဗရီအသင်းနဲ့ပွဲစဉ်မှာ စထရာဘောင်းအသင်းအတွက် မပါဝင်နိုင်ခဲ့ပေမယ့် တစ်လတာ အကောင်းဆုံး ကစားသမားဆုကို ရယူတဲ့အချိန်မှာ ကျယ်လောင်စွာ လှောင်ပြောင်မှုတွေ ခံခဲ့ရတာ ဖြစ်ပါတယ်။
စထရာဘောင်းအသင်း နည်းပြ လီယန်ရိုစီနီယာက “အီမီဂါဟာ ဝမ်းနည်းကြေကွဲနေပြီး ကျနော်လည်း အတူတူ ပါပဲ။ မြင်တွေ့ခဲ့ရတဲ့အတွက် အရာကို ကျနော် အလွန်စိတ်ပျက်မိပါတယ်။ ပြီးခဲ့တဲ့ရာသီရဲ့ အကောင်းဆုံး ကစားသမားတွေထဲက တစ်ဦးကို ဒီလိုဆန့်ကျင်တာဟာ လက်ခံနိုင်စရာ မရှိပါဘူး။ အီမီဂါဟာ အသင်းမှာရှိနေတဲ့ အချိန်အထိ အသင်းခေါင်းဆောင်အဖြစ် ဆက်ရှိနေမယ်”လို့ အသင်းရဲ့မီဒီယာအဖွဲ့ကို ပြောခဲ့တာပါ။
ချယ်လ်ဆီးနဲ့ စထရာဘောင်း အသင်းဟာ ကစားသမား အများအပြားကို လဲလှယ်မှုတွေ ပြုလုပ်ခဲ့ပြီး မကြာသေး မီက ချယ်လ်ဆီးအသင်းဟာ စထရာဘောင်းအသင်းထံ ရောင်းချခဲ့တဲ့ ကစားသမားတစ်ဦးကို ရက်အနည်းငယ် အကြာမှာ ပြန်လည်ခေါ်ယူခဲ့ပါတယ်။
ချယ်လ်ဆီးအသင်းဟာ ဘန်ချီဝဲလ်ကို စထရာဘောင်းအသင်းထံ အငှားချခဲ့သလို ဇွန်လ အစောပိုင်းက ခေါ်ယူခဲ့တဲ့ မာမာဒူဆားကို ပြင်သစ်ကလပ်ထံ ပြန်ပြီး အငှားချခဲ့တာ ဖြစ်ပါတယ်။
Source: Dailymail
