CNI Sport News
၂၀၂၅ ခုနှစ်၊ ဩဂုတ် ၁၃
ဆားဘီးယားတိုက်စစ်မှူး ဗလာဟိုဗစ်ဟာ ဂျူဗင်တပ်စ်အသင်းက သူ့ကိုဒီနွေရာသီမှာ ရောင်းချဖို့ ရည်ရွယ်ထား ပေမယ့် ကမ်းလှမ်းမှု အများအပြားကို ငြင်းပယ်ပြီးနောက် အသင်းရဲ့ အရန်ခုံတန်းမှာထိုင်ပြီး ရာသီကုန်ဆုံးဖို့ ဆန္ဒရှိနေပါတယ်။
Gazzetta dello Sport က ဗလာဟိုဗစ်ဟာ သူ့ရဲ့ စာချုပ်နောက်ဆုံးနှစ်မှာ ရရှိမယ့် အသားတင် လစာယူရို ၁၂ သန်းကို စွန့်လွှတ်မှာ မဟုတ်ဘူးဆိုတာ စီမံခန့်ခွဲမှုအဖွဲ့ကို ပြောထားတယ်လို့ ဖော်ပြထားတာပါ။
ဂျူဗင်တပ်စ်အသင်းဟာ ဗလာဟိုဗစ်ကို ဒီနွေရာသီမှာ ရောင်းချချင်နေပေမယ့် သူကတော့ အသင်းမှာ နောက်ထပ် တစ်ရာသီကြာ ဆက်နေပြီး အဆုံးသတ်ဖို့ ရှိနေတာ ဖြစ်ပါတယ်။
ဗလာဟိုဗစ်ဟာ ဖီနာဘာချီ၊ ဆော်ဒီကလပ် အသင်းတွေနဲ့ အေစီမီလန်အသင်းတို့ရဲ့ကမ်းလှမ်းမှုကို ရရှိထားတာပါ။
ဂျူဗင်တပ်စ်အသင်းဟာ ဒီရာသီမှာ အသင်းရဲ့ တိုက်စစ်ပိုင်းကို အကြီးအကျယ် ပြောင်းလဲဖို့ စီစဉ်နေပြီး ဗလာဟိုဗစ်ကို ရောင်းချတာကနေ ပြောင်းရွှေ့ကြေး ရှာဖွေဖို့ ရည်ရွယ်ထားတာ ဖြစ်ပါတယ်။
ဗလာဟိုဗစ်ကို တွေ့ရစဉ်
ဂျူဗင်တပ်စ်အသင်းနဲ့ ဒီရာသီကုန်ရင် ကုန်ဆုံးမယ့် ဗလာဟိုဗစ်ဟာ စာချုပ်သက်တမ်းတိုးဖို့ ကမ်းလှမ်းမှု မရရှိသလို အသင်းရဲ့ ရေရှည်စီမံကိန်းမှာ ပါဝင်မှု မရှိတော့တာပါ။
ပြီးခဲ့တဲ့ရာသီက PSG အသင်းကနေ အငှားနဲ့ လာရောက်ကစားခဲ့တဲ့ ကိုလိုမူအာနီကို ခေါ်ယူချင်နေတဲ့ ဂျူဗင်တပ်စ် အသင်းဟာ ဗလာဟိုဗစ်ကို ယူရိုသန်း ၂၀ ဝန်းကျင်နဲ့ ရောင်းချသွားဖို့ ဆုံးဖြတ်ထားတာ ဖြစ်ပါတယ်။
အေစီမီလန်အသင်းကို ကိုင်တွယ်နေတဲ့ နည်းပြအယ်လီဂရီဟာ ဂျူဗင်တပ်စ်အသင်းကို ကိုင်တွယ်ချိန်က လက်တွဲ ခဲ့တဲ့ ဗလာဟိုဗစ်ကို ဆန်စီရိုထံ ခေါ်ယူချင်နေပေမယ့် ဆွေးနွေးမှုတွေဟာ ရပ်တန့်နေခဲ့တာပါ။
အဲဒါကြောင့် အေစီမီလန်အသင်းဟာ ယူနိုက်တက်အသင်း တိုက်စစ်မှူး ဟော့ဂျ်လန်းကို အငှားနဲ့ခေါ်ယူနိုင်ဖို့ အာရုံ စိုက်လာခဲ့တာ ဖြစ်ပါတယ်။
ဂျူဗင်တပ်စ်အသင်းကတော့ ဗလာဟိုဗစ် အနေနဲ့ ပြန်လည်စဉ်းစားပြီး ကမ်းလှမ်းမှုတွေ လက်ခံကာ အသင်းကို အကူအညီပေးနိုင်ဖို့ မျှော်လင့်နေတာပါ။
အသက် ၂၅ နှစ်အရွယ်ရှိ ဗလာဟိုဗစ်ဟာ ဂျူဗင်တပ်စ်အသင်းအတွက် ၁၄၅ ပွဲ ကစားခဲ့ပြီး ၅၈ ဂိုး သွင်းယူကာ ကိုပါအီတာလီယာဖလား ၁ ကြိမ်သာ ဆုဖလားအောင်မြင်မှု ရယူထားနိုင်တာဖြစ်ပါတယ်။
Source: Goal
