CNI Sport News
၂၀၂၅ ခုနှစ်၊ ဧပြီ ၃
အာဆင်နယ်အသင်းရဲ့ အားကစားဒါရိုက်တာအသစ် ဘာတာဟာ ဘီလ်ဘာအိုအသင်းကြယ်ပွင့် နီကိုဝီလီယံစ်ရဲ့ အေးဂျင့်နဲ့ တွေ့ဆုံပြီး အပြောင်းအရွှေ့အတွက် ဆွေးနွေးခဲ့တယ်လို့ The Times က ဖော်ပြထားပါတယ်။
အာဆင်နယ်အသင်းဟာ နီကိုဝီလီယံစ်ကို ကာလရှည်ကြာ စိတ်ဝင်စားနေခဲ့ပြီး ယူရို ၂၀၂၄ ပြိုင်ပွဲအပြီးမှာ ခေါ်ယူဖို့ ကြိုးစားခဲ့ပေမယ့် အပြောင်းအရွှေ့ မဖြစ်ခဲ့တာပါ။
ပြီးခဲ့တဲ့နွေရာသီက ဘာစီလိုနာအသင်းရဲ့ စိတ်ဝင်စားမှုကို ရရှိခဲ့တဲ့ နီကိုဝီလီယံစ်ဟာ ဘီလ်ဘာအိုအသင်းမှာ ဆက်ပြီး ရှိနေခဲ့ပေမယ့် သူ့ရဲ့စာချုပ်ထဲမှာ စာချုပ်ဖျက်သိမ်းကြေး ပေါင် ၄၈.၄ သန်း ပါဝင်နေတာဖြစ်ပါတယ်။
အဲဒါကြောင့် အာဆင်နယ်အသင်းဟာ နွေရာသီ အပြောင်းအရွှေ့ မတိုင်ခင် နီကိုဝီလီယံစ်ကို ခေါ်ယူနိုင်ဖို့အတွက် ကြိုးပမ်းမှုတွေကို အရှိန်မြှင့်လုပ်ဆောင်နေခဲ့တာပါ။
မကြာသေးခင်ကမှ အာဆင်နယ်အသင်းရဲ့ အားကစားဒါရိုက်တာ အသစ်အဖြစ် ခန့်အပ်ခံထားရတဲ့ ဘာတာဟာ အပြောင်းအရွှေ့တွေအတွက် စတင်လှုပ်ရှားမှုအဖြစ် နီကိုဝီလီယံစ်ရဲ့ အေးဂျင့်နဲ့တွေ့ဆုံခဲ့တာ ဖြစ်ပါတယ်။
နီကိုဝီလီယံစ်ကို တွေ့ရစဉ်
ဒါပေမယ့် နီကိုဝီလီယံစ်ကို ခေါ်ယူဖို့ ကြိုးစားနေတာဟာ အာဆင်နယ်အသင်း တစ်သင်းတည်း မဟုတ်ဘဲ ချယ်လ်ဆီး၊ ဘာစီလိုနာနဲ့ ဘိုင်ယန်မြူးနစ် အသင်းတို့လည်း ပါဝင်တယ်လို့ The Guardian က ဖော်ပြထားတာပါ။
နီကိုဝီလီယံစ်ဟာ ဒီရာသီ အစောပိုင်းမှာ ဒဏ်ရာနှိပ်စက်မှုတွေ ခံခဲ့ရပေမယ့် ပြိုင်ပွဲစုံ ၉ ဂိုး သွင်းယူထားပြီး ဂိုးဖန်တီးမှု ၇ ကြိမ် ပြုလုပ်ထားပါတယ်။
အာဆင်နယ်အသင်းဟာ ဒီရာသီမှာ တိုက်စစ် ကစားသမား အများအပြားရဲ့ ဒဏ်ရာတွေကြောင့် နေရာစုံမှာ အသုံးပြုနိုင်တဲ့ တိုက်စစ် ကစားသမားတစ်ဦးကို ဈေးကွက်ထဲမှာ ရှာဖွေနေခဲ့တာပါ။
အာဆင်နယ်အသင်းဟာ တိုက်စစ်မှူးသစ် ခေါ်ယူမှုအဖြစ် နယူးကာဆယ်အသင်း တိုက်စစ်မှူး အစ်ဆက်ကို အဓိက ပစ်မှတ်အဖြစ် သတ်မှတ်ထားပေမယ့် ပြောင်းရွှေ့ကြေး ပေါင်သန်း ၁၅၀ တောင်းဆိုမှုကြောင့် အခြား ရွေးချယ်စရာတွေကို ရှာဖွေနေခဲ့ပါတယ်။
အာဆင်နယ်အသင်းဟာ ရီးရယ်လ်အသင်းနဲ့ ချန်ပီယံလိဂ် ကွာတားဖိုင်နယ် ပထမအကျော့ ပွဲစဉ်မတိုင်ခင် အဲဗာတန်အသင်းနဲ့ ပရီးမီးယားလိဂ်ပွဲစဉ် ယှဉ်ပြိုင်ရမှာဖြစ်ပါတယ်။
Source: Metro
