CNI Sport News
၂၀၂၅ ခုနှစ်၊ မတ်လ ၂၆
ရီးရယ်လ်အသင်းဟာ လီဗာပူးလ်အသင်း ညာနောက်ခံလူ အာနိုးလ်ကို နွေရာသီမှာ အလွတ်ပြောင်းရွှေ့ကြေးနဲ့ ခေါ်ယူမှု အပြီးသတ်နိုင်ဖို့အတွက် ဆွေးနွေးမှုတွေ ပြုလုပ်နေခဲ့ပါတယ်။
ရီးရယ်လ်အသင်းနဲ့ အာနိုးလ်တို့ဟာ အပြောင်းအရွှေ့အတွက် သဘောတူညီမှု ရရှိထားပြီး ဆွေးနွေးမှုတွေဟာ နောက်ဆုံးအဆင့်ကို ရောက်ရှိနေပြီလို့ သိရပါတယ်။
အာနိုးလ်ဟာ လီဗာပူးလ်အသင်းနဲ့ စာချုပ်သက်တမ်း ၃ လသာ ကျန်ရှိတော့တာကြောင့် အင်္ဂလန်ပြင်ပ ကလပ် အသင်းတွေနဲ့ လွတ်လွတ်လပ်လပ် ဆွေးနွေးမှုတွေ ပြုလုပ်ခွင့်ရှိတာပါ။
ရီးရယ်လ်အသင်းဟာ အာနိုးလ်ကို ခေါ်ယူဖို့ ကာလရှည်ကြာ စောင့်ကြည့်နေတာဖြစ်ပြီး နွေရာသီ အပြောင်းအရွှေ့ မှာ အဓိကပစ်မှတ်အဖြစ် သတ်မှတ်ထားပါတယ်။
ရီးရယ်လ်အသင်းဟာ ပြီးခဲ့တဲ့ဇန်နဝါရီ အပြောင်းအရွှေ့က အာနိုးလ်ကို ခေါ်ယူဖို့ ပေါင်သန်း ၂၀ နဲ့ ကမ်းလှမ်းမှု ပြုလုပ်ခဲ့ပေမယ့် လီဗာပူးလ်အသင်းက ပယ်ချခဲ့တာပါ။
အဲဒါကြောင့် ရီးရယ်လ်အသင်းဟာ အာနိုးလ်ကို စာချုပ်ကုန်ဆုံးမယ့် နွေရာသီမှာ အလွတ်ပြောင်းရွှေ့ကြေးနဲ့ ခေါ်ယူနိုင်ဖို့ ကြိုးပမ်းခဲ့တာဖြစ်ပါတယ်။
အာနိုးလ်ကို တွေ့ရစဉ်
လီဗာပူးလ်အသင်းဟာ အကယ်ဒမီထွက် အာနိုးလ်ကို စာချုပ်သက်တမ်းတိုးနိုင်ဖို့ ဆွေးနွေးခဲ့ပေမယ့် အဆင်ပြေမှု မရှိခဲ့တာပါ။
အသက် ၆ နှစ် အရွယ်ကတည်းက လီဗာပူးလ်အသင်းကို ရောက်ရှိလာခဲ့တဲ့ အာနိုးလ်ဟာ အန်ဖီးလ်ကလပ်မှာပဲ သူ့ရဲ့ ကစားသမားဘဝကို ဖြတ်သန်းနေပြီး လက်ရှိအချိန်ထိ ပြိုင်ပွဲစုံပွဲပေါင်း ၃၄၉ ပွဲကစားထားပြီး ၂၂ ဂိုးသွင်း ယူကာ ပရီးမီးယားလိဂ်နဲ့ ချန်ပီယံလိဂ်ဖလား အပါအဝင် ဆုဖလားပေါင်း ၈ ခုအထိ ရယူထားတာ ဖြစ်ပါတယ်။
လီဗာပူးလ်အသင်း ပရိသတ်တွေကတော့ ရီးရယ်လ်အသင်းထံ ပြောင်းရွှေ့ဖို့ နီးစပ်နေတဲ့ အာနိုးလ်ကို ဒီရာသီ အသင်းရဲ့ လက်ကျန်ပွဲတွေမှာ အသုံးမပြုဖို့ နည်းပြအာနီဆလော့ကို တိုက်တွန်းနေကြတာပါ။
အာနိုးလ်ဟာ ပြီးခဲ့တဲ့ ပီအက်စ်ဂျီအသင်းနဲ့ ချန်ပီယံလိဂ်ပွဲစဉ်မှာ ရရှိခဲ့တဲ့ ဒဏ်ရာကြောင့် အနားယူနေရပြီး လာမယ့် ဧပြီထဲမှာ လီဗာပူးလ်အသင်းအတွက် ပြန်ပါဝင်ကစားနိုင်ဖို့ မျှော်လင့်နေတာ ဖြစ်ပါတယ်။
Source: BBC
