CNI Sport News
၂၀၂၄ ခုနှစ်၊ နိုဝင်ဘာ ၆
ယူနိုက်တက်အသင်းထံ ပြောင်းရွှေ့ဖို့ ချိတ်ဆက်မှုတွေခံနေရတဲ့ တိုက်စစ်မှူး ဂျီယိုကီရက်စ်ကို ဒီရာသီကုန်တဲ့အထိ စပို့တင်းလစ္စဘွန်းအသင်းမှာ ဆက်ပြီးရှိနေဖို့ နည်းပြ အာမိုရင်က တိုက်တွန်းခဲ့ပါတယ်။
အာမိုရင်က “ဂျီယိုကီရက်စ်ဟာ စပို့တင်း ကစားသမားဖြစ်ပြီး ကြီးမားတဲ့ကလပ်မှာ သူအများကြီး လုပ်ဆောင် နေတာပါ။ ကျနော်ကတော့ သူ့ကို ဒီမှာဆက်ရှိစေချင်ပြီး စပို့တင်းအသင်းနဲ့အတူ ရာသီပြီးဆုံးအောင် လုပ်ရမှာပါ။ ဒီအခိုက်အတန့်မှာ ဂျီယိုကီရက်စ်နဲ့ ပတ်သက်ပြီး ဟာသလုပ်ဖို့တောင် မရှိပါဘူး။ ဒါက ကျနော့်ရဲ့မြို့၊ ကျနော့်ရဲ့ နိုင်ငံဖြစ်တဲ့အတွက် ကျနော် လေးစားမှုရှိပါတယ်။ သူဟာ ရာသီအကုန်ထိ ဆက်နေဖို့ လိုပါတယ်”လို့ ပြောခဲ့တာ ပါ။
အာမိုရင်ဟာ ပြီးခဲ့တဲ့ မန်စီးတီးအသင်းနဲ့ ချန်ပီယံလိဂ်ပွဲစဉ်မှာ စပို့တင်းလစ္စဘွန်းအသင်း နည်းပြဘဝ နောက်ဆုံး အိမ်ကွင်းပွဲစဉ်ကို ကိုင်တွယ်ခဲ့တာ ဖြစ်ပါတယ်။
စပို့တင်းလစ္စဘွန်းအသင်းက မန်စီးတီးအသင်းကို ၄ ဂိုး-၁ ဂိုးနဲ့ အနိုင်ရခဲ့တဲ့ပွဲမှာ ဥရောပထိပ်သီး အသင်းတွေရဲ့ ပစ်မှတ်ဖြစ်တဲ့ ဂျီယိုကီရက်စ်ဟာ ဟက်ထရစ် သွင်းယူနိုင်ခဲ့တာပါ။
အသက် ၂၆ နှစ်အရွယ်ရှိ ဂျီယိုကီရက်စ်ဟာ ကိုဗင်ထရီအသင်းကနေ ရောက်ရှိလာပြီး ကတည်းက စပို့တင်းလစ္စဘွန်း အသင်းအတွက် ၆၇ ပွဲ ကစားထားတာမှာ ၆၆ ဂိုး သွင်းယူထားတာ ဖြစ်ပါတယ်။
ဂျီယိုကီရက်စ်ကို တွေ့ရစဉ်
စပို့တင်းလစ္စဘွန်းအသင်း နည်းပြ အာမိုရင်ဟာ လာမယ့် နိုဝင်ဘာ ၁၁ ရက်မှာ ယူနိုက်တက်အသင်းကို နည်းပြအဖြစ် တရားဝင် ကိုင်တွယ်မှာဖြစ်တာကြောင့် ဂျီယိုကီရက်စ်ဟာ ယူနိုက်တက်အသင်းထံ ပြောင်းရွှေ့ နိုင်တယ်လို့ သတင်းတွေ ထွက်နေတာပါ။
အာမိုရင်ဟာ မန်စီးတီးအသင်းနဲ့ပွဲအပြီးမှာ ဂျီယိုကီရက်စ်ကို ယူနိုက်တက်အသင်းထံ ခေါ်ယူဖို့ စိတ်ဝင်စားခြင်း ရှိ/မရှိ မေးမြန်းခံခဲ့ရပြီး သူကတော့ ဆွီဒင်တိုက်စစ်မှူးကို စပို့တင်းလစ္စဘွန်းအသင်းမှာ ရာသီအကုန်ထိ ဆက်ရှိဖို့ ပြောခဲ့တာဖြစ်ပါတယ်။
ဂျီယိုကီရက်စ်ကလည်း စပို့တင်းလစ္စဘွန်းအသင်းမှာ ပျော်ရွှင်နေတယ်လို့ အပြောင်းအရွှေ့ သတင်းတွေနဲ့ ပတ်သက်ပြီး တုန့်ပြန်ထားတာပါ။
အာမိုရင်ဟာ လာမယ့် ဘရာဂါအသင်းနဲ့ ပေါ်တူဂီလိဂ်ပွဲစဉ်မှာ စပို့တင်းလစ္စဘွန်းအသင်းကို သူ့ရဲ့နောက်ဆုံး ပွဲစဉ်အဖြစ် ကိုင်တွယ်သွားမှာ ဖြစ်ပါတယ်။
Source: Metro
