CNI Sport News
၂၀၂၄ ခုနှစ်၊ အောက်တိုဘာ ၅
တားမြစ်ဆေးသုံးစွဲမှုကြောင့် ကနဦးပွဲပယ် ၄ နှစ် ချမှတ်ခံထားရတဲ့ ဂျူဗင်တပ်စ်အသင်းကွင်းလယ်လူ ပေါ့ဘာဟာ ဒီပြစ်ဒဏ်အပေါ်အယူခံဝင်ပြီးနောက် အားကစားခုံရုံးက သူ့ရဲ့ပွဲပယ်ကို ၁၈ လအထိလျှော့ချခဲ့ပါတယ်။
ဒီဆုံးဖြတ်ချက်ကြောင့် ပေါ့ဘာဟာ ၂၀၂၅ ခုနှစ်၊ဇန်နဝါရီမှာ ဂျူဗင်တပ်စ်အသင်းနဲ့လေ့ကျင့်မှုတွေ ပြန်လည်ပြုလုပ်ခွင့်ရမှာဖြစ်ပြီး မတ်လမှာ ပွဲကစားခွင့်ပြန်လည်ရရှိတော့မှာပါ။
ပေါ့ဘာကတော့ ဒီဆုံးဖြတ်ချက်အပေါ် ကြိုဆိုတယ်လို့ ကြေညာချက်ထုတ်ပြီး ပြောခဲ့ပါတယ်။
ပေါ့ဘာက “နောက်ဆုံးမှာတော့ အိပ်မက်ဆိုးကြီးပြီးဆုံးသွားပါပြီ။ ဒီဆုံးဖြတ်ချက်အပြီးမှာ ကျနော့်ရဲ့အိပ်မက်တွေကို ထပ်ပြီးအကောင်အထည်ဖော်နိုင်မယ့်နေ့ကို ကျနော် မျှော်လင့်နေပါတယ်။ ဒီအချိန်တွေဟာ ကျနော့်ဘဝမှာ အကြီးမားဆုံးစိတ်ဆင်းရဲစရာကာလဖြစ်ခဲ့ပါတယ်။ ဘာကြောင့်လဲဆိုရင် ကျနော်အလွန်ကြိုးစားအားထုတ်တဲ့ အရာတွေအားလုံးကို ရပ်တန့်ခဲ့ရလို့ပါ။ အခုကွင်းထဲကို ပြန်ဝင်ရဖို့ ကျနော် မစောင့်ဆိုင်းနိုင်တော့ဘူး”လို့ ပြောခဲ့တာပါ။
ပေါ့ဘာကို တွေ့ရစဉ်
ပေါ့ဘာဟာ ဂျူဗင်တပ်စ်အသင်းနဲ့ အူဒီးနီးစ်အသင်းတို့ပွဲအပြီး ကျပန်းစစ်ဆေးမှုခံယူခဲ့ရချိန်မှာ တားမြစ်ဆေးသုံးစွဲကြောင်း တွေ့ခဲ့ရလို့ ၂၀၂၃ ခုနှစ်၊သြဂုတ်ကတည်းက ပွဲကစားခွင့်မရတော့တာဖြစ်ပါတယ်။
ပေါ့ဘာကို ဒုတိယအကြိမ်မြောက် ထပ်မံစစ်ဆေးမှုပြုလုပ်ခဲ့တာမှာလည်း တားမြစ်ဆေးသုံးစွဲကြောင်း တွေ့ခဲ့ရတဲ့အတွက် ၂၀၂၄ ခုနှစ်၊ဖေဖော်ဝါရီမှာ ၄ နှစ်ပွဲပယ်ချမှတ်ခဲ့တာပါ။
ပေါ့ဘာကတော့ သူဟာ အမှားအယွင်းလုပ်ထားခြင်း မရှိဘူးလို့ပြောကာ အားကစားခုံရုံးထံ အယူခံဝင်ခဲ့တာဖြစ်ပါတယ်။
ပေါ့ဘာဟာ ယူနိုက်တက်အသင်းနဲ့ စာချုပ်ကုန်ဆုံးပြီးနောက် ၂၀၂၂ ခုနှစ်က ဂျူဗင်တပ်စ်အသင်းထံ ၄ နှစ်စာချုပ်ချုပ်ဆိုကာ ပြန်လည် ပြောင်းရွှေ့ခဲ့တာပါ။
ဒါပေမယ့် ပေါ့ဘာဟာ တားမြစ်ဆေးသုံးစွဲမှုကြောင့် ပွဲပယ်မခံရခင်အချိန်ထိ ဂျူဗင်တပ်စ်အသင်းအတွက် ၁၂ ပွဲသာပါဝင်ကစားနိုင်ခဲ့တာဖြစ်ပါတယ်။
Source: ESPN
