CNI Sport News
၂၀၂၄ ခုနှစ်၊ မတ်လ ၂၁
မန်စီးတီးနဲ့ ရီးရယ်လ်အသင်း တိုက်စစ်မှူးဟောင်း ရော်ဘင်ဟိုဟာ မုဒိမ်းမှုကြောင့် သူ့ရဲ့ဇာတိ ဘရာဇီးလ်နိုင်ငံမှာ ထောင်ဒဏ် ၉ နှစ် ကျခံရမယ်လို့ တရားရုံးက ပြောခဲ့ပါတယ်။
အသက် ၄၀ နှစ်အရွယ်ရှိ ရော်ဘင်ဟိုဟာ ၂၀၁၃ ခုနှစ်က အယ်လ်ဘေးနီးယား အမျိုးသမီးတစ်ဦးကို အုပ်စုဖွဲ့ မုဒိမ်းကျင့်မှုမှာ အပြစ်ရှိတယ်လို့ အီတလီတရားရုံးက ၂၀၁၇ ခုနှစ်က ဆုံးဖြတ်ခဲ့တာပါ။
ဒါပေမယ့် ရော်ဘင်ဟိုဟာ ဘရာဇီးလ်မှာ နေထိုင်နေတာကြောင့် ပြစ်ဒဏ်ကျခံရခြင်း မရှိခဲ့တာဖြစ်ပါတယ်။
အခုအချိန်မှာတော့ အီတလီအာဏာပိုင်တွေရဲ့ တောင်းဆိုမှုကြောင့် ရော်ဘင်ဟိုကို ဘရာဇီးလ်မှာ ပြစ်ဒဏ်ကျခံဖို့ ဘရာဇီးလ် တရားသူကြီးတွေက ဆုံးဖြတ်ခဲ့တာပါ။
လက်ရှိအချိန်မှာတော့ ဒီစီရင်ချက်အတွက် ဖြစ်နိုင်ဖွယ်ရှိတဲ့ အယူခံဝင်မှုကို ဆိုင်းငံ့ထားတာကြောင့် ရော်ဘင်ဟို ဟာ ပြစ်ဒဏ်ကျခံရမှာ မဟုတ်သေးပါဘူး။
ရော်ဘင်ဟိုကို တွေ့ရစဉ်
ဘရာဇီးလ်လက်ရွေးစင် အသင်းအတွက် ပွဲပေါင်း ၁၀၀ ပါဝင်ကစားခဲ့တဲ့ ရော်ဘင်ဟိုဟာ မုဒိမ်းမှုစွပ်စွဲခံရချိန်က အေစီမီလန်အသင်းမှာ ကစားနေတာဖြစ်ပါတယ်။
ရော်ဘင်ဟိုဟာ အီတလီတရားရုံးက ချမှတ်ခဲ့တဲ့ ပြစ်ဒဏ်ကို ၂၀၂၀ ခုနှစ်က အယူခံဝင်ခဲ့တာမှာ အရေးနိမ့်ခဲ့ပြီး နောက် ၂၀၂၂ ခုနှစ်မှာ ထောင်ဒဏ် ချမှတ်ခံခဲ့ရတာပါ။
အီတလီအစိုးရရှေ့နေတွေဟာ ရော်ဘင်ဟိုကို နိုင်ငံတကာ ဖမ်းဝရမ်းထုတ်ခဲ့တာ ဖြစ်ပါတယ်။
မန်စီးတီးအသင်းမှာ ၂ ရာသီကြာ ကစားခဲ့တဲ့ ရော်ဘင်ဟိုက ဒီလိင်ဆက်ဆံမှုဟာ သဘောတူညီမှုကြောင့် ဖြစ်ခဲ့တာဖြစ်ပြီး မျှတမှုမရှိတဲ့ ပြစ်ဒဏ်ချခံခဲ့ရတယ်လို့ ပြောခဲ့တာပါ။
ရော်ဘင်ဟိုဟာ မန်စီးတီးအသင်းထံ မပြောင်းရွှေ့ခင် ရီးရယ်လ်အသင်းမှာ ၄ ရာသီကြာ ကစားခဲ့ပြီး လာလီဂါ ဖလား ၂ ကြိမ် ရယူနိုင်ခဲ့ပါတယ်။
ဘရာဇီးလ် ကစားသမားဟောင်းဟာ မန်စီးတီးအသင်းမှာ ခြေစွမ်းမပြသနိုင်ခဲ့တာကြောင့် ၂ ရာသီကြာကစားပြီး အေစီမီလန်အသင်းထံ ပြောင်းရွှေ့ခဲ့တာပါ။
ရော်ဘင်ဟိုဟာ အေစီမီလန်အသင်းက ထွက်ခွာပြီးနောက် ဂွမ်ကျိုး၊ အသလက်တီကိုမင်နဲရိုး၊ ဆီဗာစပေါ်၊ အစ္စတန်ဘူလ်အသင်းတွေထံ ပြောင်းရွှေ့ကာ ကစားသမားဘဝကို အဆုံးသတ်ခဲ့တာဖြစ်ပါတယ်။
Source: BBC
