CNI Sport News
၂၀၂၃ ခုနှစ်၊ နိုဝင်ဘာ ၂၈
အယ်လ်နာဆာအသင်းဟာ ပါဆီပိုလစ်အသင်းနဲ့ အာရှချန်ပီယံလိဂ်ပွဲစဉ်မှာ ဂိုးမရှိ သရေကျခဲ့ပေမယ့် အသင်းခေါင်းဆောင် ရော်နယ်ဒိုက အသင်းရဲ့အောင်မြင်မှုကြောင့် ပျော်ရွှင်တယ်လို့ ပြောခဲ့ပါတယ်။
ရော်နယ်ဒိုက “ကျနော်တို့ဟာ အုပ်စု ပထမနဲ့ နောက်တစ်ဆင့်တက်နိုင်ခဲ့ပြီး ပြိုင်ပွဲစုံ ၂၀ ပွဲ ဆက်တိုက် ရှုံးပွဲမရှိ ကစားနိုင်တဲ့ အောင်မြင်မှုကြောင့် ပျော်ရွှင်ပါတယ်။ အလွန်ကောင်းမွန်တဲ့ အသင်းလိုက်လုပ်ဆောင်မှုပါ”လို့ သူ့ရဲ့ ဆိုရှယ်မီဒီယာမှာ ရေးသားထားခဲ့တာပါ။
အယ်လ်နာဆာအသင်းဟာ ပါဆီပိုလစ်အသင်းနဲ့ သရေကျခဲ့တာကြောင့် အာရှချန်ပီယံလိဂ်အုပ်စုတွင်း ပွဲစဉ် ၅ ပွဲ ကစားပြီးချိန်မှာ ရမှတ် ၁၃ မှတ်နဲ့ ၁၆ သင်း အဆင့် တက်ရောက်နိုင်ခဲ့ပြီ ဖြစ်ပါတယ်။
ဒီပွဲစဉ်ရဲ့ ပွဲချိန်အစောပိုင်းမှာ ပါဆီပိုလစ်ကစားသမားဟာ ရော်နယ်ဒိုကို ဂိုးဧရိယာအတွင်း ပြစ်ဒဏ် ကျူးလွန်ခဲ့တယ်ဆိုပြီး ကွင်းလယ်ဒိုင်လူကြီးက ပင်နယ်တီသတ်မှတ်ပေးခဲ့ပါတယ်။
အယ်လ်နာဆာအသင်းနှင့် ပါဆီပိုလစ်အသင်းတို့ ယှဉ်ပြိုင်ကစားခဲ့သည့် ပွဲစဉ်
ဒါပေမယ့် ရော်နယ်ဒိုက ဒီဖြစ်ရပ်ဟာပြစ်ဒဏ်ဘောမဟုတ်တဲ့အတွက် ပင်နယ်တီဆုံးဖြတ်ချက်ကို ပြန်ပြောင်းဖို့ ကွင်းလယ်ဒိုင်လူကြီးကို တောင်းဆိုခဲ့တာပါ။
အဲ့ဒါကြောင့် ကွင်းလယ်ဒိုင်လူကြီးဟာ VAR နဲ့ ပြန်လည်သုံးသပ်ပြီးနောက် ဒီဆုံးဖြတ်ချက်ကို ပြန်ပြောင်းခဲ့တာပဲဖြစ်ပါတယ်။
ဆိုရှယ်မီဒီယာတွေမှာတော့ ပင်နယ်တီကိုငြင်းဆန်ခဲ့တဲ့ ရော်နယ်ဒိုရဲ့ လုပ်ရပ်အပေါ် လေးစားကြောင်း ဖော်ပြနေကြပါတယ်။
အသက် ၃၈ နှစ် အရွယ်ရှိ ရော်နယ်ဒိုဟာ ဒီရာသီမှာ အယ်လ်နာဆာအသင်းအတွက် ခြေစွမ်းပြသနေတာဖြစ်ပြီး ပြိုင်ပွဲစုံ ၂၅ ပွဲမှာ ၂၄ ဂိုးအထိ သွင်းယူထားတာပါ။
ဆော်ဒီပရိုလိဂ် အမှတ်ပေးဇယား အဆင့် ၂ နေရာမှာ ရပ်တည်နေတဲ့ အယ်လ်နာဆာအသင်းဟာ ဒီတစ်ပတ် လိဂ်ပွဲစဉ်အဖြစ် ထိပ်ဆုံးနေရာက အယ်လ်ဟီလယ်အသင်းနဲ့ နိုဝင်ဘာ ၃၀ ရက်မှာ ယှဉ်ပြိုင်ရမှာပဲဖြစ်ပါတယ်။
