CNI Sport News
၂၀၂၃ ခုနှစ်၊ စက်တင်ဘာ ၂၇
ယူကရိန်းနိုင်ငံကို လွန်ခဲ့တဲ့ ၁၉ လက ကျူးကျော်ဝင်ရောက်ပြီးနောက်ပိုင်း ပထမဆုံးအကြိမ်အဖြစ် ရုရှားနိုင်ငံ အသင်းတွေကို ဥရောပ ယူ-၁၇ ပြိုင်ပွဲယှဉ်ပြိုင်ဖို့ ခွင့်ပြုခဲ့တယ်လို့ ဥရောပဘောလုံးအဖွဲ့ချုပ်(UEFA) က အတည်ပြု ခဲ့ပါတယ်။
အရွယ်ရောက်ပြီးသား လူတွေရဲ့ လုပ်ရပ်ကြောင့် ယောင်္ကျားလေးတွေနဲ့ မိန်းကလေးတွေကို အပြစ်ပေးတာမျိုး မလုပ်သင့်ဘူးလို့ ယူအီးအက်ဖ်အေက ပြောထားပါတယ်။
ဒါ့အပြင် ဘောလုံးမှာ ငြိမ်းချမ်းရေးနဲ့ မျှော်လင့်ချက်တွေကို ဘယ်တော့မှ အရှုံးမပေးသင့်ဘူးလို့လည်း ဒီအဖွဲ့အစည်းရဲ့ ထုတ်ပြန်ချက်ထဲမှာ ဖော်ပြထားပါတယ်။
ယူအီးအက်ဖ်အေဟာ ယူကရိန်းကို အပြည့်အဝ ကျူးကျော်တဲ့ ၂၀၂၂ ခုနှစ်၊ ဖေဖော်ဝါရီလက စတင်ပြီး ရုရှား အသင်းတွေ အားလုံးကို ဥရောပပြိုင်ပွဲ ယှဉ်ပြိုင်ခွင့် ဆိုင်းငံ့ခဲ့တာပါ။
စိန့်ပီတာစဘတ်နဲ့ ကာဇန်မှာ ကျင်းပဖို့ စီစဉ်ထားတဲ့ ၂၀၂၂ ချန်ပီယံလိဂ် ဗိုလ်လုပွဲနဲ့ ၂၀၂၃ ဥရောပစူပါဖလား အိမ်ရှင်အဖြစ် ကျင်းပခွင့် ရထားတာကိုလည်း ရုပ်သိမ်းခဲ့တဲ့အပြင် နိုင်ငံပိုင် စွမ်းအင်ကုမ္ပဏီကြီး Gazprom နဲ့ စပွန်ဆာစာချုပ်ကိုလည်း ဖျက်သိမ်းခဲ့တာ ဖြစ်ပါတယ်။
UEFA ကိုတွေ့ရစဉ်
ယူအီးအက်ဖ်အေကတော့ ရုရှားရဲ့ တရားမဝင်စစ်ပွဲကို ရှုတ်ချကြောင်းနဲ့ အခြားရုရှားအသင်းတွေကို ဆက်ပြီး ဆိုင်းငံ့ထားဆဲ ဖြစ်တယ်လို့ ပြောထားတာပါ။
ယူအီးအက်ဖ်အေဥက္ကဋ္ဌ ဆက်ဖာရင်က "ရုရှားအသင်းကြီးတွေကို စစ်ပွဲပြီးဆုံးပြီး ငြိမ်းချမ်းရေးရတဲ့အထိ ဆက်ပြီး ဆိုင်းငံ့သွားမှာပါ။ ဒါပေမယ့် ကလေးတွေကို ကျနော်တို့ရဲ့ ပြိုင်ပွဲကနေ ပိတ်ပင်ခဲ့ရင် သူတို့ကို အသိအမှတ်ပြုခွင့် ပျက်ကွက်မှာဖြစ်သလို တိုက်ရိုက်ခွဲခြား ဆက်ဆံသလို ဖြစ်နေမှာပါ။
သူတို့ကို ယှဉ်ပြိုင်ကစားဖို့ အခွင့်အရေးပေး ခဲ့ရင် ပိုတောက်ပပြီး ပိုစွမ်းဆောင်နိုင်တဲ့ အနာဂတ်မျိုးဆက်နဲ့ ပိုကောင်းမွန်တဲ့ မနက်ဖြန်ဖြစ်ဖို့ ကျနော်တို့ မျှော်လင့်ထားတဲ့ အရာတွေကို ရင်းနှီးမြုပ်နှံနေပါတယ်"လို့ ပြောခဲ့ပါတယ်။
ရုရှား ယူ-၁၇ အသင်းတွေကို ဥရောပပြိုင်ပွဲမှာ ယှဉ်ပြိုင်ခွင့် ပြုခဲ့ပေမယ့် ဒီပွဲတွေကို ရုရှားနိုင်ငံမှာ ကစားမှာ မဟုတ် သလို အသင်းတွေဟာ နိုင်ငံရဲ့ဝတ်စုံကို ဝတ်ဆင်ခွင့်ရမှာ မဟုတ်တဲ့အပြင် အလံ ဒါမှမဟုတ် နိုင်ငံတော်သီချင်း ဖွင့်ခြင်းကိုလည်း ယူအီးအက်ဖ်အေက ခွင့်ပြုသွားမှာ မဟုတ်ပါဘူး။
လာမယ့်နှစ် ဥရော ပယူ-၁၇ အမျိုးသားပြိုင်ပွဲရဲ့ နောက်ဆုံးအဆင့် ပွဲစဉ်တွေကို ဆိုက်ပရပ်စ်မှာ ကျင်းပသွားမှာ ဖြစ်ပြီး အမျိုးသမီးပြိုင်ပွဲကို လာမယ့်နှစ် မေလ ဆွီဒင်မှာ ကျင်းပသွားမယ်လို့ သိရပါတယ်။
Source: BBC
