CNI Sport News
၂၀၂၃ ခုနှစ်၊ ဇွန်လ ၁၃
ဘာစီလိုနာအသင်း တိုက်စစ်မှူး လီဝန်ဒေါစကီးက သူဟာ ငွေကြေး အများအပြားရမယ့် ဆော်ဒီကို ပြောင်းဖို့ စိတ်ဝင်စားခြင်းမရှိဘဲ ငွေကြေးထက် သူ့မှာ တခြားဦးစားပေးတွေ ရှိတယ်လို့ ပြောခဲ့ပါတယ်။
လီဝန်ဒေါစကီးက “ကျနော် အဲဒီအကြောင်းကို မစဉ်းစားပါဘူး။ ဘာကိစ္စမှမရှိရင် ကျနော်က ဘာကြောင့် ဒါကို စဉ်းစားနေရမှာလဲ။ ကျနော်နဲ့ ဘာစီလိုနာအသင်းက စာချုပ်သက်တမ်း ရှိနေပါတယ်။ ဆော်ဒီမှာ ဖြစ်ပျက်နေတဲ့ အရာတွေကို မြင်တွေ့ရပေမယ့် ကျနော့်ကို စိတ်မပူပါနဲ့။ ဘာကြောင့်လဲဆိုရင် ကျနော့်မှာ တခြားဦးစားပေးရမယ့် အရာတွေ ရှိပါတယ်”လို့ ပိုလန်သတင်း Sport Interia ကို ပြောပါတယ်။
အပြောင်းအရွှေ့ ဈေးကွက်ကို ဆော်ဒီနိုင်ငံက ငွေကြေး အများအပြား သုံးစွဲပြီး ဝင်ရောက်လာခဲ့ပါတယ်။
အဲဒီနောက်မှာတော့ ရော်နယ်ဒိုကို ခေါ်ယူထားသလို မကြာသေးခင်က ဘန်ဇီမာကိုလည်း ခေါ်ယူထားနိုင်ခဲ့ပါ တယ်။
ဒါအပြင် ကန်တီ၊ ဖာမီနိုတို့ အပါအဝင် နာမည်ကြီး ကစားသမား အများအပြားကိုလည်း ခေါ်ယူနိုင်ဖို့ ချိတ်ဆက် မှုတွေ လုပ်နေပါတယ်။ ဒါပေမယ့် ဘာစီလိုနာအသင်း တိုက်စစ်မှူး လီဝန်ဒေါစကီးကတော့ ဆော်ဒီ အပြောင်း အရွှေ့ကို စိတ်ဝင်စားခြင်း မရှိပါဘူး။
လီဝန်ဒေါစကီးဟာ သူတို့မျိုးဆက်ရဲ့ အကြီးကျယ်ဆုံး တိုက်စစ်မှူးတွေထဲက တစ်ဦးအဖြစ် သတ်မှတ်ခံထားရပြီး နာမည်ကြီးတွေကို ပစ်မှတ်ထားနေတဲ့ ဆော်ဒီနိုင်ငံရဲ့ လိုအပ်ချက်နဲ့ ကိုက်ညီတဲ့ ကစားသမားလည်း ဖြစ်ပါတယ်။
ရော်နယ်ဒိုနဲ့ ဘန်ဇီမာကိုတွေ့ရစဉ်
အသက် ၃၄ နှစ်အရွယ်ရှိ လီဝန်ဒေါစကီးဟာ ဘာစီလိုနာအသင်းနဲ့ စာချုပ်သက်တမ်း ၃ နှစ် ကျန်ရှိနေသေးတာ ကြောင့် ငွေကြေး အများအပြား ရယူနိုင်မယ့် ကမ်းလှမ်းမှုတွေကို အလျင်စလို မဖြစ်ပါဘူး။
ဆော်ဒီဟာ မက်ဆီကို ဘီလျံနဲ့ချီတဲ့ ငွေကြေးပမာဏ အသုံးပြုပြီး ဆွဲဆောင်ခဲ့ပေမယ့် မရခဲ့တာကြောင့် နောက် ထပ် နာမည်ကြီးတွေကို ခေါ်ယူနိုင်ဖို့ ကြိုးစားနေပါတယ်။
လက်ရှိ အချိန်မှာ မန်စီးတီးအသင်းက မာရတ်ဇ်၊ ရီးရယ်လ်အသင်းက မိုဒရစ်နဲ့ ချယ်လ်ဆီးအသင်းက ကူလီဘာလီ တို့ကိုလည်း ခေါ်ယူနိုင်ဖို့ လုပ်ဆောင်နေသလို နည်းပြတွေကိုလည်း နိုင်ငံအတွင်း ခေါ်ဆောင်နိုင်ဖို့ ပစ်မှတ်ထား နေတာ ဖြစ်ပါတယ်။
ဆော်ဒီကလပ် အက်တီဖတ်အသင်းဟာ စတီဗင်ဂျရတ်ကို နည်းပြအဖြစ် ခန့်အပ်ဖို့ လုပ်ဆောင်နေတာကြောင့် လီဗာပူးလ် ဂန္တဝင်ကစားသမားဟာ ဆော်ဒီနိုင်ငံကို ရောက်ရှိနေပါတယ်။
စတီဗင်ဂျရတ်ဟာ အက်စတွန်ဗီလာကနေ ထုတ်ပယ်ခံရတဲ့ ပြီးခဲ့တဲ့နှစ် အောက်တိုဘာလ ကတည်းက နည်းပြ အလုပ်အကိုင် ရှာဖွေနေတာဖြစ်ပြီး လက်စတာ၊ ပိုလန်အသင်းတွေရဲ့ နည်းပြရာထူး အတွက်လည်း ချိတ်ဆက်မှု ခံခဲ့ရပါတယ်။
Source: Daily Mail
