CNI Sport News
၂၀၂၃ ခုနှစ်၊ ဇွန်လ ၁၃
ဘတ်ပီဟာ စာချုပ်သက်တမ်း တိုးတော့မှာ မဟုတ်ဘူးလို့ ပီအက်စ်ဂျီအသင်းကို ပြောခဲ့တာကြောင့် ပြင်သစ် ကလပ်ဟာ အခုနွေရာသီမှာ ကစားသမားကို ရောင်းချဖို့ ပြင်ဆင်နေတယ်လို့ နိုင်ငံတကာ အားကစားသတင်း တွေမှာ ဖော်ပြထားပါတယ်။
ပီအက်စ်ဂျီနဲ့ ပြင်သစ် အသင်းခေါင်းဆောင်တို့ ချုပ်ဆိုထားတဲ့ စာချုပ်ဟာ ၂၀၂၄ မှာ ကုန်ဆုံးမှာဖြစ်ပြီး ကစား သမားဟာ နောက်ထပ် တစ်နှစ် ထပ်မံ သက်တမ်းတိုးဖို့အတွက် ရွေးချယ်ခွင့် ရှိပါတယ်။
ဘတ်ပီအနေနဲ့ ၂၀၂၅ အထိ သက်တမ်းတိုးမယ်ဆိုရင် ဇူလိုင်လ ၃၁ ရက် နောက်ဆုံးထားပြီး ပီအက်စ်ဂျီအသင်းကို ပြောရမှာ ဖြစ်ပါတယ်။
ပြင်သစ်ကစားသမားဟာ လအတော်ကြာ ဆွေးနွေးမှုတွေ ပြုလုပ်ပြီးနောက် သက်တမ်းတိုးမှာ မဟုတ်တဲ့ အကြောင်းကို ပီအက်စ်ဂျီအသင်းထံ စာပေးပို့ခဲ့ပါတယ်။
ပီအက်စ်ဂျီ အသင်းကတော့ ဘတ်ပီကို စာချုပ်သက်တမ်းတိုးဖို့ စိတ်အားထက်သန်နေပေမယ့် ကစားသမားပေး ပို့တဲ့စာကြောင့် စိတ်ပျက်နေခဲ့တယ်လို့ သိရပါတယ်။
ဘတ်ပီအနေနဲ့ စာချုပ်သက်တမ်း မတိုးတော့ဘူးဆိုရင် လာမယ့် ဇန်နဝါရီမှာ အခြားအသင်းတွေနဲ့ အကြို စာချုပ်ချုပ်ဆိုလို့ ရမှာဖြစ်သလို ရာသီအကုန်မှာ အလွတ်နဲ့ ထွက်ခွာခွင့်ပါ ရရှိမှာပါ။
မက်ဆီနဲ့ ဘတ်ပီကို တွေ့ရစဉ်
ပီအက်စ်ဂျီအသင်းဟာ ဒီအခြေအနေတွေကြောင့် ဘတ်ပီကို စာချုပ်သက်တမ်း မတိုးနိုင်ရင် အခုနွေရာသီ အပြောင်းအရွှေ့မှာ ရောင်းချဖို့ ပြင်ဆင်ရမှာ ဖြစ်ပါတယ်။
ဘတ်ပီကို ခေါ်ယူဖို့ ကာလကြာရှည် စိတ်ဝင်စားနေတဲ့ ရီးရယ်လ်အသင်းဟာ ဒီအခြေအနေကို စောင့်ကြည့်နေ တယ်လို့ သတင်းတွေမှာ ဖော်ပြထားပါတယ်။
ဘတ်ပီဟာ ပြီးခဲ့တဲ့နှစ်က စပိန်ကလပ်ထံ ပြောင်းဖို့ နီးစပ်ခဲ့ပေမယ့် ပီအက်စ်ဂျီအသင်းနဲ့ စာချုပ်သက်တမ်း တိုးခဲ့ လို့ အပြောင်းအရွှေ့ မဖြစ်ခဲ့ပါဘူး။
ရီးရယ်လ်အသင်းဟာ လက်ရှိအချိန်မှာ အသင်းခေါင်းဆောင် ဖြစ်ခဲ့သူ ဘန်ဇီမာ တစ်ယောက် ဆော်ဒီကလပ် အယ်လ်အီးတီဟတ်ကို ပြောင်းခဲ့လို့ တိုက်စစ်မှူး ရှာဖွေနေပါတယ်။
ဒါကြောင့် စပါးတိုက်စစ်မှူး ဟာရီကိန်း တစ်ယောက်လည်း ရီးရယ်လ်ရဲ့ ကစားသမား အဝယ်စာရင်းထဲမှာ ပါဝင်နေ ပြန်ပါတယ်။
၂၀၁၇ က မိုနာကိုကနေ ယူရိုသန်း ၁၈၀ နဲ့ ရောက်ရှိလာခဲ့တဲ့ ဘတ်ပီဟာ ပီအက်စ်ဂျီ အသင်းအတွက် ပွဲပေါင်း ၂၆၀ ပါဝင်ကစားပြီး ၂၁၂ ဂိုး သွင်းယူကာ အသင်းရဲ့ ဂိုးသွင်း အများဆုံး ကစားသမားအဖြစ် ရှိနေပါတယ်။
ပီအက်စ်ဂျီအသင်းဟာ မကြာသေးခင်က စာချုပ်သက်တမ်း ကုန်ဆုံးခဲ့ပြီဖြစ်တဲ့ မက်ဆီကို လက်လွှတ်ခဲ့ရပြီး နောက် နောက်ထပ် နာမည်ကြီး ကစားသမားဖြစ်တဲ့ ဘတ်ပီကိုပါ ဆုံးရှုံးရဖွယ် ရှိနေပါတယ်။
Source: BBC
