CNI Sport News
၂၀၂၃ ခုနှစ်၊ မေလ ၂
ကမ္ဘောဒီးယားနိုင်ငံမှာ ကျင်းပနေတဲ့ ဆီးဂိမ်းစ် အမျိုးသားဘောလုံးပြိုင်ပွဲအဖြစ် မြန်မာအသင်းနဲ့ တီမောအသင်းတို့ မေလ ၂ ရက် နေ့လယ်ပိုင်းက ကစားခဲ့တာမှာ မြန်မာအသင်းက ၁ ဂိုး- ဂိုးမရှိနဲ့ အနိုင်ရရှိသွားခဲ့ပါတယ်။
ဒီပွဲစဉ်ရဲ့ ပထမပိုင်းမှာ ၂ သင်းစလုံးဟာ ဂိုးမသွင်းနိုင်ခဲ့တဲ့အတွက် ဂိုးမရှိ သရေရလဒ်နဲ့ ပြီးဆုံးခဲ့ပြီး ဒုတိယပိုင်းမှာ တော့ ဂိုးရဖို့ အပြိုင်အဆိုင် အားထုတ်ခဲ့ကြတာပါ။
တီမောအသင်းရဲ့ ဂိုးပေါက် ကန်သွင်းမှုတွေကို မြန်မာနောက်ခံလူတွေ ဖျက်ထုတ် ကာကွယ်နေခဲ့ရသလို မြန်မာ အသင်းရဲ့ တိုက်စစ်ဆင်မှုတွေကိုလည်း တီမောအသင်းရဲ့ ခံစစ်ပိုင်းက အကောင်းဆုံး ကာကွယ်နေခဲ့လို့ ၂ သင်း စလုံး ဂိုးရဖို့ ခက်ခဲနေခဲ့ပါတယ်။
ဒါပေမယ့် ပွဲချိန် ၇၃ မိနစ်မှာတော့ မြန်မာအသင်း အဖိုးတန် သွင်းဂိုးရခဲ့ပြီး ဟိန်းထက်အောင် ကန်တင်တဲ့ ထောင့်ကန်ဘောကနေ တီမောဂိုးသမား ပုတ်ထုတ်တာမှာ ပြန်ကျလာတဲ့ ဘောလုံးကို သက်ဟိန်းစိုးက သွင်းယူ သွားခဲ့တာ ဖြစ်ပါတယ်။
အဲဒီနောက်ပိုင်းမှာ တီမောအသင်းဟာ ချေပဂိုးရဖို့ ကြိုးစားခဲ့ပေမယ့် မြန်မာအသင်းက အသည်းအသန် ဖျက်ထုတ် ခဲ့လို့ ပွဲအပြီးမှာ မြန်မာအသင်းက တီမောအသင်းကို ၁ ဂိုး- ဂိုးမရှိနဲ့ အနိုင်ရကာ ဆီးဂိမ်းစ်အုပ်စု အဖွင့်ပွဲစဉ်မှာ ၃ မှတ် စတင် ရရှိသွားခဲ့ပါတယ်။
မြန်မာအသင်းဟာ အုပ်စု ဒုတိယပွဲစဉ်အဖြစ် မေလ ၄ ရက်မှာ အင်ဒိုနီးရှားအသင်းနဲ့ ယှဉ်ပြိုင်ရမှာ ဖြစ်ပါတယ်။
