CNI Sport News
၂၀၂၃ ခုနှစ်၊ ဖေဖော်ဝါရီ ၁၀
ဟာတေစပေါ်အသင်းဟာ အခုတစ်ပတ်အတွင်း ဖြစ်ပွားခဲ့တဲ့ ငလျင်လှုပ်ခတ်ပြီးနောက် တူရကီစူပါလိဂ်ပြိုင်ပွဲ ကနေ နုတ်ထွက်ခဲ့တယ်လို့ တူရကီကလပ်များအသင်းဥက္ကဋ္ဌ အလီကော့စ်က ကြာသပတေးနေ့က ပြောခဲ့ပါတယ်။
အလီကော့စ်က “ဟာတေစပေါ်က စာတစ်စောင် ပေးပို့ထားပါတယ်။ ဒီရာသီပွဲတွေကို သူတို့ မကစားနိုင်တော့ ဘူးဆိုပြီး ကျနော်တို့ကို အကြောင်းကြားထားပါတယ်”လို့ တူရကီဘောလုံးအဖွဲ့ချုပ် ဥက္ကဋ္ဌနဲ့ ပြုလုပ်ခဲ့တဲ့ သတင်း စာ ရှင်းလင်းပွဲမှာ ပြောခဲ့တာပါ။
ဟာတေစပေါ်အသင်း တောင်ပံကစားသမား အက်ဆုကို အပျက်အဆီးတွေကနေ ကယ်ဆယ်ခဲ့ပြီး ဆေးရုံကို ပို့ဆောင်ထားတယ်လို့ အသင်းဒုဥက္ကဋ္ဌက ပြောခဲ့ပေမယ့် ပျောက်ဆုံးနေဆဲလို့ သတင်းတွေမှာ ဖော်ပြထားပါတယ်။
ဒါ့အပြင် အသင်းရဲ့ အားကစားဒါရိုက်တာ တာနာဟာ ပျောက်ဆုံးနေဆဲ ဒါမှမဟုတ် အပျက်အဆီးတွေအောက်မှာ ရှိနေတယ်လို့ တူရကီသတင်းအေဂျင်စီ အန်နာဒိုလူက ဖော်ပြထားပါတယ်။
ဟာတေစပေါ်အသင်းဟာ အခုနှစ်ရာသီ တူရကီလိဂ် အမှတ်ပေးဇယား အဆင့် ၁၄ နေရာမှာ ရပ်တည်နေပြီး တန်းဆင်းဇုန်အဆင့် ၁၆ မှာရှိတဲ့ ကာဆင်မ်ပါဆာအသင်းနဲ့ ရမှတ် ၁ မှတ်သာ ကွာဟနေတာပါ။
တူရကီငလျင်ကြောင့် ပိတ်မိနေသူတွေကို ကယ်ထုတ်နေကြစဉ်
ဒါ့အပြင် ဂါဇီယန်တက်ပ် ပြည်နယ်ဟာ ငလျင်ဗဟိုချက်နဲ့ နီးပြီး ဆိုးရွားစွာ ရိုက်ခတ်ခံခဲ့ရတာကြောင့် အဲဒီဒေသ အခြေစိုက်အသင်းနဲ့ ပတ်သက်ပြီးတော့လည်း တူရကီကလပ်များအသင်းဥက္ကဋ္ဌ အလီကော့စ်က ပြောခဲ့သေးပါတယ်။
အလီကော့စ်က “ဂါဇီယန်တက်ပ် အသင်းလည်း လိဂ်ကနေ နုတ်ထွက်ချင်တယ်ဆိုရင်တော့ ဒီကလပ်နှစ်သင်းရဲ့ အခွင့်အရေးတွေ မထိခိုက်အောင် ကျန် ၁၇ သင်းနဲ့ ဆက်သွားဖို့ စီစဉ်ထားတယ်လို့”ပြောခဲ့တာပါ။
ဒါပေမယ့် ဂါဇီယန်တက်ပ် ဘက်ကတော့ ဆုံးဖြတ်ချက် မချရသေးဘူးလို့ သိရပါတယ်။
တူရကီလိဂ်ပွဲတွေဟာ ငလျင်အဖြစ်အပျက်ကြောင့် ပြန်လည်စတင်ဖို့ နှောင့်နှေးနေပြီး မတ်လ ၃ ရက်မှာ စတင် နိုင်ဖို့ မျှော်လင့်ထားပါတယ်။
တူရကီနဲ့ ဆီးရီးယားမှာ လှုပ်ခတ်ခဲ့တဲ့ ငလျင်ကြောင့် ကစားသမား အများအပြားနဲ့ နည်းပြ အများအပြား အသက် ဆုံးရှုံးခဲ့ရတယ်လို့ တူရကီဘောလုံးအဖွဲ့ချုပ်က အတည်ပြုခဲ့ပါတယ်။
Source: Reuters
