CNI Sport News
၂၀၂၃ ခုနှစ်၊ ဖေဖော်ဝါရီ ၁
ရုရှားအိုလံပစ်ကော်မတီ အကြီးအကဲက ရုရှားနိုင်ငံ ကိုယ်စားပြု အားကစားသမားတွေဟာ တခြားနိုင်ငံတွေနဲ့ မတူညီတဲ့ အခြေအနေကို မရောက်စေရဘူးလို့ ဇန်နဝါရီ ၃၁ ရက်က ပြောလိုက်ပါတယ်။
ရုရှားအိုလံပစ်ကော်မတီ အကြီးအကဲ ပေါ့ဇ်နီယာကော့ဗ်က “ရုရှား အားကစားသမားတွေဟာ တခြားအားကစား တွေလို တူညီတဲ့ အခြေအနေတွေမှာ အတိအကျ ပါဝင်ရပါမယ်။ အထူးသဖြင့် အိုလံပစ် လှုပ်ရှားမှုအတွက် လုံးဝ လက်မခံနိုင်တဲ့ နိုင်ငံရေးလွန်ကဲတဲ့ သူတွေရဲ့ နောက်ထပ် အခြေအနေတွေ ဒါမှမဟုတ် သတ်မှတ်ချက်တွေဟာ နှစ်သက်ဖွယ် မရှိပါဘူး”လို့ ပြောခဲ့ပါတယ်။
နိုင်ငံတကာအိုလံပစ်ကော်မတီ (IOC) ဟာ လာမယ့်နှစ် နွေရာသီ အားကစားပြိုင်ပွဲမှာ ရုရှားနိုင်ငံသားတွေ ပါဝင် ယှဉ်ပြိုင်နိုင်တဲ့ လမ်းကြောင်းတစ်ခုကို ရှာဖွေနေတယ်လို့ ပြီးခဲ့တဲ့ ရက်သတ္တပတ်က ပြောခဲ့ပါတယ်။
အိုလံပစ်ပွဲမှာ ရုရှားအလံကိုတွေ့ရစဉ်
IOC ဟာ သူတို့တွေကို နိုင်ငံတော်အလံအောက်မှာ မဟုတ်ဘဲ ကြားနေအဖြစ် ယှဉ်ပြိုင်ခွင့် ပြုဖွယ် ရှိနေတာပါ။
ရုရှားနဲ့အတူ သူ့ရဲ့မဟာမိတ် ဘယ်လာရုစ်နိုင်ငံက အားကစားသမားတွေဟာ ရုရှားက ယူကရိန်းကို ကျူးကျော်ချိန် ကစပြီး အိုလံပစ် အားကစားနည်း အများစုမှာ ပါဝင်ယှဉ်ပြိုင်ခွင့် ပိတ်ပင်ခြင်း ခံထားရတာ ဖြစ်ပါတယ်။
ယူကရိန်းကတော့ ရုရှားအားကစားသမားတွေကို ယှဉ်ပြိုင်ခွင့် ပြုမယ်ဆိုရင် ၂၀၂၄ အိုလံပစ်ပြိုင်ပွဲကို သပိတ် မှောက်မယ်လို့ ခြိမ်းခြောက်ထားတာပါ။
ပေါ့ဇ်နီယာကော့ဗ်က ရုရှားအားကစားသမားတွေကို ယှဉ်ပြိုင်ခွင့်ပြုဖို့ IOC ရဲ့ ကြိုးပမ်းမှုတွေကို ကြိုဆိုတယ်လို့ ပြောခဲ့ပါတယ်။ ယူကရိန်းသမ္မတ ဇာလန်းစကီးက အိုလံပစ်ပြိုင်ပွဲမှာ ရုရှားရဲ့ပါဝင်မှုက အကြမ်းဖက်မှုဟာ လက်ခံ နိုင်စရာ တစ်ခုအဖြစ် ပြသလိမ့်မယ်လို့ ပြောခဲ့တာပါ။
ဇာလန်းစကီးက နိုင်ငံတကာ အိုလံပစ်ကော်မတီ အကြီးအကဲ သောမတ်စ်ဘတ်ချ်ကို ကြားနေဆိုတာမျိုးက မရှိဘူး ဆိုတာ သူကိုယ်တိုင် မြင်တွေ့သွားစေဖို့ ဘတ်ခ်မင့်မြို့ဆီ လာရောက် လည်ပတ်ဖို့ ဖိတ်ကြားခဲ့တယ်လို့ ပြီးခဲ့တဲ့ အပတ်က ပြောခဲ့ပါတယ်။
Source: CNA
