CNI News
၂၀၂၂ ခုနှစ်၊ ဩဂုတ် ၃၀
လက်ရှိကာလတွင် ပုဂံဒေသသို့ ခရီးသွားဝင်ရောက်မှုများ နည်းပါးနေသည့်အပြင် လျှပ်စစ်မီးပုံမှန်မရရှိခြင်းနှင့် စက်သုံးဆီဈေးနှုန်း မြင့်တက်နေမှုကြောင့် ပုဂံဟိုတယ်ဇုန်ရှိ ဟိုတယ်များ ဖွင့်လှစ်ရန် အခက်အခဲ ရှိနေသည်ဟု ပုဂံရှိ ဟိုတယ်လုပ်ငန်းရှင်များထံမှ သိရသည်။
ပုဂံသို့ ခရီးသွားဝင်ရောက်မှုသည် ယခုအချိန်တွင် ပုံမှန်ထက် ဆယ်ပုံတစ်ပုံခန့်သာရှိနေပြီး လျှပ်စစ်မီး အချိန်မှန် မရရှိသည့်အတွက် ဟိုတယ်များမှာ မီးစက်များ မောင်းနှင်နေရခြင်းကြောင့် ဆုံးရှုံးမှု ဖြစ်ပေါ်နေသည်ဟု မြန်မာနိုင်ငံ ဟိုတယ်ဆိုင်ရာလုပ်ငန်းရှင်များအသင်း ပုဂံဇုန် ဥက္ကဋ္ဌ ဦးဇော်ဝိတ်က CNI သတင်းဌာနသို့ ပြောသည်။
“ဖွင့်ရင်လည်း ရှုံးတာက သေချာတယ်လေ။ ဖွင့်ပြီဆိုရင် ဧည့်သည်က မရှိတဲ့အတွက်ကြောင့် ဝင်ငွေက မရှိဘူး။ ဧည့်သည်လေး ၂ ခန်း ၃ခန်း လာရင်လည်း မီးစက်လေး နှိုးပေးလိုက်ရင်လည်း ရှုံးပြီ။ တစ်ခါတလေပျက်ရင် တစ်ကြိမ်ပျက်ရင် ၃ နာရီ ၅ နာရီပဲ။ တစ်ရက်ကို ၂ ကြိမ်ပျက်တယ် အဲဒီလို ၄ နာရီ ၅ နာရီ။ အဲဒီတော့ ၂၄ နာရီမှာ ၁၀ နာရီ ၁၂ နာရီလောက်က မီးပျက်နေတာ။ အန်ကယ်တို့ ဟိုတယ်က မီးစက်ကြီးတွေကလည်းပဲ တစ်ခါ နှိုးလိုက်ပြီဆိုရင် တစ်နာရီကို ၃ ဂါလံကနေ ၅ ဂါလံအထိ အရွယ်အစားပေါ်မှာ မူတည်ပြီးတော့ ရှိတယ်။ အဲဒီတော့ ဆီတစ်ဂါလံကလည်း ၁ သောင်း ၄ ထောင်အထိ ရှိတယ်။ အဲဒီတော့ တစ်နာရီကို ၅ တစ်ဂါလံ ကုန်တဲ့စက်ဆိုရင် အခန်းခလေးရတာမှ ၃/၄/၅ သောင်းပဲရတာ။ ဆီဈေးတွေ ကျသွားပြီး လျှပ်စစ်မီးတွေ ပုံမှန်ဖြစ်ပြီဆိုရင်တော့လည်း ဖွင့်ရင် ဖွင့်မှာပေါ့” ဟု သူက ပြောသည်။
ပုဂံရှိ ဟိုတယ်များသည် ကိုဗစ် - ၁၉ ရောဂါ ဖြစ်ပွားသည့်ကာလ ၂၀၂၀ မတ်လမှစတင်၍ ပိတ်ထားခဲ့ရပြီး လက်ရှိ တွင် ဟိုတယ် ၁၅၄ လုံးအနက် ၆၄ လုံးသာ ဖွင့်လှစ်ထားနိုင်ကြောင်း သိရသည်။
ဒါ့အပြင် ပိတ်ထားရသည့် ဟိုတယ်များသည် အချိန်ကာလ ၂ နှစ်ကျော်နေပြီဖြစ်သည့်အတွက် ပျက်စီးမှုများ ရှိနေခြင်းနှင့် ပြင်ဆင်မှုများ ပြုလုပ်ရမည်ဖြစ်ခြင်းကြောင့် လက်ရှိတွင် ဖွင့်လှစ်နိုင်မည် မဟုတ်သေးကြောင်း ဟိုတယ်လုပ်ငန်းရှင်များက ပြောသည်။
ပုဂံဒေသရှိ ဟိုတယ်တစ်ခုမြင်ကွင်း
ပိတ်ထားသည့် ဟိုတယ်များနှင့် လက်ရှိဖွင့်လှစ်ထားသည့် ဟိုတယ်များလည်ပတ်လာစေရန်အတွက် နိုင်ငံတော် အစိုးရအနေဖြင့် လျှပ်စစ်မီးပုံမှန်ဖြစ်ရန်၊ စက်သုံးဆီးဈေးနှုန်း ကျဆင်းရန်နှင့် လုံခြုံရေးကောင်းမွန်ဖို့ လုပ်ဆောင် ရန် လိုအပ်သည်ဟု ဦးဇော်ဝိတ်က ဆက်ပြောသည်။
“နိုင်ငံတော်အနေနဲ့ အဓိက ပံ့ပိုးပေးဖို့ကတော့ နံပါတ် ၁ လျှပ်စစ်မီး ပုံမှန်ရအောင် လုပ်ပေးရမယ်။ နောက်တစ်ခါ ဆီဈေးတွေ ကျအောင် လုပ်ပေးရမယ်။ နောက် လုံခြုံရေးကောင်းအောင် လုပ်ပေးရမယ်။ အဲဒါဆိုလို့ရှိရင် ပြီး ပြည့်စုံသွားပြီ။ အဲဒါဆိုလို့ရှိရင် နိုင်ငံခြားသားရော မြန်မာရော ဝင်လာကြမှာ သေချာတယ်။ အန်ကယ်တို့ private sector ကတော့ ဧည့်သည်လာပြီဆိုရင် အန်ကယ်တို့က Ready ပဲ တန်းပြီး လုပ်မှာ။ ရှိသမျှ ဟိုတယ် ၁၀၀ ကျော် ကလည်း ချက်ချင်း အလုပ်လုပ်ကြမှာ” ဟု ၎င်းကပြောသည်။
ဟိုတယ်နှင့် ခရီးသွားလာရေး ဝန်ကြီးဌာန ပုဂံဌာနခွဲအနေဖြင့် ပွင့်လင်းရာသီဖြစ်သည့် အောက်တိုဘာလတွင် ပြည်တွင်းပြည်ပ ခရီးသွားဝင်ရောက်မှု များပြားလာနိုင်ကြောင်းနှင့် ဟိုတယ်အများအပြား ဖွင့်လှစ်လာနိုင်ရန် မျှော်လင့်ထားကြောင်း ဟိုတယ်နှင့် ခရီးသွားဝန်ကြီးဌာန(ပုဂံဌာနခွဲ)ဒုတိယညွှန်ကြားရေးမှူး ဦးဝင်းအောင်က CNI သတင်းဌာနသို့ ပြောသည်။
“ကျနော်တို့ ဒေသက တောက်လျှောက်ပေါ့နော် ဖွင့်ကတည်းက ဧည့်သည်တွေက လာရောက်ပြီးတော့ လည်ပတ် တယ်။ အခုလည်း လာလည်ပတ်တယ်။ အထူးသဖြင့်တော့ စနေ၊ တနင်္ဂနွေတို့ အခါကြီး ရက်ကြီးပေါ့နော် အဲလို ရက်တွေဆိုလို့ရှိရင် ဧည့်သည်တွေက ပိုပြီးတော့ များတာပေါ့နော်။ ဘတ်စ်ကားကြီးတွေနဲ့လာတာ ရှိသလို ကိုယ်ပိုင်ကားလေးတွေနဲ့လည်း လာတာရှိတယ်။ နောက်ပြီးတော့ ဟိုက်ဂျက်တို့နဲ့ အဲလို အဖွဲ့လိုက်လာတာတွေ ရှိပါတယ်။ အဲဒါကြောင့်မို့လို့ ကျနော်တို့ အနေနဲ့ကတော့ပေါ့နော် ပွင့်လင်းရာသီမှာတော့ ခရီးသွားဧည့်သည်တွေ လာမယ်လို့ မျှော်လင့်ပါတယ်။ ဟိုတယ်တွေလည်း ပိုပြီးတော့မှ ဖွင့်လာနိုင်မယ်။ ဒေသခံတွေလည်း အလုပ် အကိုင်တွေ ရပြီးတော့မှ သူတို့ရဲ့ လူမှုစီးပွားဘဝလည်း အထိုက်အလျောက် တိုးတက်လာမယ်လို့ ကျနော်တို့ မျှော်လင့်ပါတယ်” ဟု ပြောသည်။
ထို့နောက် ယခုကာလတွင် ပုဂံဒေသခံများအနေဖြင့်အလုပ်ကိုင်ရှားပါးမှုနှင့် ခရီးသွားဝင်ရောက်မှု နည်းပါးသည့် အတွက် မိသားစုစီးပွားရေး ဝင်ငွေကျဆင်းမှုများကိုလည်း ရင်ဆိုင်ကြုံတွေ့နေရသည်ဟု သိရသည်။
လက်ရှိကာလတွင် အကြောင်းအမျိုးမျိုးကြောင့် ပုဂံ - ညောင်ဦးဒေသသို့ ခရီးသွားဝင်ရောက်မှုများမှာ ဆက်လက် နည်းပါးနေမည်ဖြစ်ပြီး လာမည့် ပွင့်လင်းရာသီ ရောက်ရှိသည့်အချိန်တွင်လည်း ခရီးသွားများ ဆက်လက် နည်းပါး နေမည်ဆိုပါက ဟိုတယ်များမှာ ဆက်လက်ဖွင့်လှစ်ရန် ခက်ခဲနေမည်ဟု ဟိုတယ်လုပ်ငန်းရှင်များက ပြောသည်။
