CNI News
၂၀၂၂ ခုနှစ်၊ ဩဂုတ် ၅
ရန်ကုန်မြို့၊ မင်္ဂလာတောင်ညွန့်မြို့နယ်၊ အောင်ဆန်းကွင်းဘေးတွင် ဖွင့်လှစ်ထားသည့် အဝေးပြေး ယာဉ်လိုင်းဂိတ် များကို တန်ဆာပစ္စည်းများ လက်ခံပို့ဆောင်ခြင်းအား ဩဂုတ်လ ၄ ရက်နေ့မှစတင်၍ တားမြစ်ကြောင်း သတင်းများ ထွက်ပေါ်လာပြီးနောက် ဩဂုတ် ၅ ရက်နေ့တွင် အောင်ဆန်းကွင်းကားဂိတ်သည် ခြောက်ကပ်လျက် ရှိနေ သည်ဟု ကားဂိတ်များမှ သိရသည်။
ယာဉ်လိုင်းဂိတ်များအနေဖြင့် အခြေအနေများကို စောင့်ကြည့်နေကြကြောင်း၊ ခရီးသည်များအနေဖြင့် ကုန်စည် လာရောက် ပို့ဆောင်မှုမရှိသေးကြောင်း အောင်ဆန်းကွင်းမှ ယာဉ်လိုင်းတာဝန်ရှိသူတစ်ဦးက CNI သို့ ပြောသည်။
၎င်းက “ဘယ်လို ဖြစ်သွားလဲဆိုတော့ ဒီကနေ့ကတော့ အကုန်ခြောက်ကပ်သွားတယ်။ အခု ဂိတ်တွေ အကုန်လုံး မေးကြည့်တော့ အခြေအနေလေး နည်းနည်းစောင့်ကြည့်နေတုန်းပေါ့။ ဒီ ၁ ရက်၊ ၂ ရက် ရှောင်တခင် စစ်ဆေး မယ် ဘာညာပြောထားတာကိုး။ နောက်ပြီးတော့ မနေ့က အွန်လိုင်းမှာလည်း အရမ်းတွေ ပြန့်နေပြီးတော့မှ အရမ်းဟော့ဖြစ်နေတော့ ဂိတ်တွေ နည်းနည်း၊ Customer ကျတော့ ဒါမျိုး အသံထွက်ရင် မလာကြတော့တာလေ။ အခုလောလောဆယ် ခြောက်ကပ်နေတာ။ ဘာကားမှလည်း မရှိဘူး အဲလိုမျိုး ဖြစ်နေတာ”ဟု ပြောသည်။
အောင်ဆန်းကွင်းရှိ ယာဉ်လိုင်းဂိတ်များကို ကားလက်မှတ်ရောင်းချမှုကိုသာ ဆက်လက်ခွင့်ပြုမည်ဖြစ်ပြီး ပါဆယ်ပစ္စည်း ပို့ဆောင်ခွင့်ကို ခွင့်မပြုကြောင်း ပြီးခဲ့သည့် ဩဂုတ်လ ၃ ရက်နေ့တွင် အောင်ဆန်းကွင်းရှိ ယာဉ်လိုင်း ၄၅ ခုကို မင်္ဂလာတောင်ညွန့်မြို့နယ် အုပ်ချုပ်ရေးမှူးမှ ခေါ်ယူတွေ့ဆုံ ပြောကြားခဲ့သည်ဟု ယာဉ်လိုင်းတာဝန်ရှိသူများထံမှ သိရသည်။
ခြောက်ကပ်နေသည့် အောင်ဆန်းကွင်း ကားဂိတ်အခြေအနေ(ဓါတ်ပုံ-CNI)
ထို့သို့ ပြောဆိုရာတွင် ယာဉ်လိုင်းများမှ လက်မှတ်တစ်ခုသာ ရောင်းချရမည်ဆိုပါက အဆင်မပြေကြောင်း ပြောဆိုရာ သက်ဆိုင်ရာ တာဝန်ရှိသူမှ တစ်ပတ်ကြာမှ ပြန်လည်အကြောင်းပြန်ပေးမည်ဟု ပြောဆိုကြောင်း အောင်ဆန်းကွင်းရှိ အမည်မဖော်လိုသူ ယာဉ်လိုင်းဂိတ်မှူးတစ်ဦးက CNI သတင်းဌာနသို့ ပြောသည်။
“အရင် အရင်ချိန်တွေ သူတို့သတိပေးတယ်ပေါ့။ လုံခြုံရေးအကြောင်းပြချက်နဲ့ ပါဆယ်လက်မခံဖို့။ အစ်ကိုတို့ လုပ်ငန်းတွေအတွက်ကျတော့ ပါဆယ်လက်မခံဘဲ ကားလက်မှတ်ပဲ ရောင်းဖို့။ အစ်ကိုတို့ လုပ်ငန်းတွေကျတော့ ဒီလိုအခြေအနေမျိုးမှာ ၁ လလုံးနေမှ လက်မှတ် ၁ စောင်မှ မရောင်းရဘူးလေ။ အားလုံးခက်ခဲနေတာလေ။ သူတို့က လုံခြုံရေး အခြေအနေ အကြောင်းပြပြီးတော့မှ ပါဆယ်တွေ လက်မခံဖို့ အစ်ကိုတို့ကို အစည်းအဝေး ခေါ်တယ်။ မနေ့က ခေါ်ပြီးတော့ သူတို့ညွှန်ကြားချက်ကို ဖတ်ပြတယ်။ ဖတ်ပြပြီး အစ်ကို့တို့ကို သိရှိကြောင်း လက်မှတ်ထိုးခိုင်းတယ်။ ပြီးရင် နောက်ရက်တွေမှာ သူတို့ ရှောင်တခင်ဝင်စစ်မယ်ပြောတယ်။ ဂိတ်မှာ ပစ္စည်းတွေ မမြင်ချင်ဘူးပေါ့ အဲလိုပြောတယ်။ ပြောတော့ အစ်ကို့တို့ကလည်း အစ်ကိုတို့ အခက်အခဲကို ပြန်ပြောပြတယ် သူတို့ကို။ ပြန်ပြောပြတော့ အဲဒီမှာ တာဝန်ရှိတဲ့ ဗိုလ်ကြီးတစ်ယောက် အဲ့ဗိုလ်ကြီးက အစ်ကိုတို့ အခက်အခဲ တင်ပြတော့ သူက အထက်ကို သူတင်ပြပေးပါမယ်ပေါ့။ ကျနော်တို့က ဘယ်လောက်ထိ စောင့်ရမှာလဲဆိုတော့ အနည်းဆုံး ၁ ပတ်လောက်တော့ သူ့ကို အချိန်ပေးပါတဲ့ အဲလိုမျိုးတော့ ပြောတယ်” ဟု ၎င်းကပြောသည်။
အောင်ဆန်းကွင်းရှိ ကားဂိတ်များအနေဖြင့် ပါဆယ်ပစ္စည်းများကို ဖွင့်ဖောက်စစ်ဆေးပြီးမှသာ လက်ခံခြင်း လုပ်ဆောင်ရမည်ဟုလည်း ညွှန်ကြားထားသည်ဟု သိရသည်။
သို့သော်လည်း ယာဉ်လိုင်းများကို မည်သည့်ကုန်ပစ္စည်းအမျိုးအစားကို သယ်ဆောင်ခွင့်မပြုဆိုသည့် ကန့်သတ် ထားမှုကို ပြောဆိုထားခြင်းမရှိသေးကြောင်း သိရသည်။
အောင်ဆန်းကွင်းရှိ ယာဉ်လိုင်းဂိတ်များသည် ပါဆယ်ပို့ကုန်ပစ္စည်းများကို အဓိကထားဝန်ဆောင်မှု ပြုလုပ်နေခြင်း ဖြစ်ပြီး လက်မှတ်ရောင်းချရမှုသည် အနည်းငယ်သာ ရှိသည်ဟု သိရသည်။
