CNI New
၂၀၂၅ ခုနှစ်၊ ဇူလိုင် ၁၁
အမေရိကန်သမ္မတ ဒေါ်နယ်ထရမ့် အနေဖြင့် မြန်မာနိုင်ငံမှ တင်သွင်းမည့် ပို့ကုန်များအပေါ် စည်းကြပ်ခွန် ကောက်ခံရာမှာ ၀ ရာခိုင်နှုန်းမှ ၁၀ ရာခိုင်နှုန်းကြား ချိန်ညှိကောက်ခံရန် နစကဥက္ကဋ္ဌ ဗိုလ်ချုပ်မှူးကြီးမင်းအောင် လှိုင်က စာပေးပို့ ညှိနှိုင်းလျက်ရှိသည်။
၂၀၂၅ ခုနှစ်၊ ဇူလိုင် ၇ ရက်က အမေရိကန်သမ္မတ ဒေါ်နယ်ထရမ့်မှ မြန်မာနိုင်ငံကို ကုန်သွယ်ခွန် ၄၀ ရာခိုင်နှုန်း ကောက်ခံမည်ဖြစ်ကြောင်း အကြောင်းကြားစာ တစ်စောင် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ထံ ပေးပို့ ခဲ့သည်။
ထို့နောက် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က အမေရိကန်သို့ မြန်မာနိုင်ငံမှ အဆင့်မြင့်ကိုယ်စားလှယ် အဖွဲ့တစ်ဖွဲ့ စေလွှတ်၍ ညှိနှိုင်းဆွေးနွေးလိုကြောင်း ၂၀၂၅ ခုနှစ်၊ ဇူလိုင် ၉ ရက်က အကြောင်းပြန်ကြားစာ သမ္မတ ဒေါ်နယ်ထရမ့်ထံ ပေးပို့ခဲ့သည်။
သမ္မတထရမ့်ထံ နစကဥက္ကဋ္ဌ ပေးပို့သည့်စာကို တွေ့ရစဉ်
နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က “ မြန်မာ-အမေရိကန် နှစ်နိုင်ငံ ဘက်ညီမျှသော ကုန်သွယ်မှု ဖော်ဆောင်နိုင်ရေးအတွက် မြန်မာနိုင်ငံမှ အမေရိကန်နိုင်ငံသို့ ပို့ကုန်များအပေါ် အခွန် ၁၀ ရာခိုင်နှုန်းမှ ၂၀ ရာခိုင်နှုန်းနှင့် အမေရိကန်နိုင်ငံမှ မြန်မာနိုင်ငံသို့ သွင်းကုန်များအပေါ် ၀ ရာခိုင်နှုန်းမှ ၁၀ ရာခိုင်နှုန်းကြား ချိန်ညှိ ကောက်ခံသွားရန် အဆိုပြုညှိနှိုင်းလိုပါတယ်”ဟု ပြောကြားခဲ့သည်။
အမေရိကန်သမ္မတ ဒေါ်နယ်ထရမ့်သည် မထင်မှတ်သည်များ ပြုလုပ်လေ့ရှိသည့်အတွက် မြန်မာဘက်က တောင်းဆိုမှုကို လက်ခံနိုင်ခြေလည်း ဖြစ်သွားနိုင်ကြောင်း၊ သို့သော် ရာခိုင်နှုန်း မည်မျှထိ လျှော့ပေးမည်ကိုတော့ စောင့်ကြည့်ရန်လိုကြောင်း စိုက်ပျိုးရေးနှင့်စီးပွားရေးအကြံပေး ကိုဇော်မင်းနိုင်က CNI သတင်းဌာနသို့ ပြောသည်။
၎င်းက “မှန်းရခက်တယ်ပေါ့၊ ဘာဖြစ်လို့လဲဆိုတော့ အမေရိကန်သမ္မတ ကိုယ်တိုင်ကိုယ်က မထင်မှတ်တာတွေ အရမ်းလုပ်တတ်တဲ့ အခါကြတော့ အမေရိကန်နိုင်ငံခြားရေးဝန်ကြီးက ကျနော်တို့ ဒီအာရှပေါ့၊ အရှေ့တောင်အာရှ ဘက်ကို နိုင်ငံခြားရေးမူဝါဒကို နည်းနည်းလေး ဇောင်းပေးလာတဲ့သဘော သတင်းလေးတွေ တက်လာတာ တွေ့ရ တယ်ပေါ့။ ဒီ SAC ဘက်က တောင်းဆိုချက်ကို အမေရိကန်ဘက်က လိုက်လျောနိုင်ဖို့ ရာခိုင်နှုန်း နည်းတယ်လို့ လည်း ပြောလို့မရဘူးပေါ့။ ဒေါ်နယ်ထရမ့်ရဲ့ နိုင်ငံခြားရေးမူဝါဒမှာ အာဆီယံတွေ၊ အရှေ့တောင်အာရှမှာ ဘယ်လို ဖြစ်လာမလဲဆိုတဲ့ဟာလည်း ကျနော်တို့က စောင့်ကြည့်ရအုံးမှာဆိုတော့ပေါ့နော်။ တခုခု ပြန်တုံ့ပြန်နိုင်ကောင်း လည်း တုံ့ပြန်နိုင်ခြေတော့ ရှိတယ်ပေါ့နော်။ တဖက်က တောင်းဆိုသလိုမျိုး ဖြစ်နိုင်ခြေတော့ရှိတယ်။ ဘယ်လောက် ရာခိုင်နှုန်း ဖြစ်မလဲတော့ နည်းနည်းလေးတော့ မှန်းဆရခက်တာပေါ့။ အခုချိန်မှာ ဒေါ်နယ်ထရမ့်က သူ့ရဲ့မူဝါဒကို ဘယ်လိုမျိုး အရှေ့တောင်အာရှအပေါ်မှာ ကစားမလဲပေါ့။ ခုနက ပြောသလို တရုတ်နဲ့အပြိုင် ကစား မလားဆိုတဲ့ဟာ ပေါ်မှာလည်း မူတည်နေတယ်ဆိုတော့လေ” ဟု ပြောသည်။
မြန်မာအထည်ချုပ် လုပ်ငန်းကို တွေ့ရစဉ်
အမေရိကန်က မြန်မာကို ကုန်သွယ်ခွန် ၄၀ ရာခိုင်နှုန်း ကောက်ခံမှုကို ဖြေလျှော့အောင် မလုပ်နိုင်ပါက အထည်ချုပ်လုပ်ငန်းများ ထိခိုက်လာနိုင်ပြီး အလုပ်လက်မဲ့နှုန်း မြင့်တက်လာနိုင်ကြောင်း စီးပွားရေးလေ့လာ သုံးသပ်သူများက ထောက်ပြလျက်ရှိသည်။
မြန်မာနှင့်အမေရိကန်သည် ၂ဝ၂၃ - ၂ဝ၂၄ ခုနှစ် ဘဏ္ဍာနှစ်မှာ ကုန်သွယ်မှု ပမာဏ အမေရိကန်ဒေါ်လာ ၇ဝ၁ ဒသမ ၉ သန်းအထိရှိပြီး ၂ဝ၂၄ - ၂ဝ၂၅ ခုနှစ် ဘဏ္ဍာနှစ်မှာတော့ ကုန်သွယ်မှု ပမာဏ အနေဖြင့် အမေရိကန် ဒေါ်လာ ၅၈၈ ဒသမ ၃ သန်းကျော်အထိရှိကြောင်း နစကသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော် မင်းထွန်းက ပြောသည်။
