CNI Sport News

၂၀၂၂ ခုနှစ်၊ ဧပြီ ၁၈

မန်ချက်စတာယူနိုက်တက် တိုက်စစ်မှူး ရော်နယ်ဒိုက နောက်ထပ် ဟတ်ထရစ်သွင်းဂိုးတွေ ထပ်လာဦး မယ်ဆိုတဲ့ အကြောင်း ကို အရိပ်အမြွက် ပြောလိုက်ပါတယ်။

ရော်နယ်ဒိုဟာ နောဝစ်ချ်ကို အနိုင်ရတဲ့ပွဲမှာ ဟတ်ထရစ် ဂိုးသွင်းယူခဲ့တာ ဖြစ်ပါတယ်။

အသက် ၃၇ နှစ် အရွယ်ရှိ ရော်နယ်ဒိုဟာ နောဝစ်ချ်နဲ့ပွဲမှာ သွင်းယူခဲ့တဲ့ ဟတ်ထရစ်သွင်းဂိုးဟာ သူ့ရဲ့ ကစားသမားဘဝ အကြိမ်(၆၀)မြောက် ရရှိခဲ့တဲ့ ဟတ်ထရစ်လည်း ဖြစ်တာပါ။

ရော်နယ်ဒိုဟာ အသက် ၃၀ မပြည့်ခင်မှာ ဟတ်ထရစ် အကြိမ်(၃၀) ရယူခဲ့ပြီး အသက် ၃၀ ပြည့်ပြီးမှာ နောက်ထပ် ဟတ်ထရစ် အကြိမ်(၃၀) ရယူနိုင်ခဲ့တာ ဖြစ်ပါတယ်။ ရော်နယ်ဒိုဟာ ဒီရာသီမှာ မန်ချက်စတာယူနိုက်တက် အသင်းအတွက် ဟတ်ထရစ်(၂)ကြိမ် သွင်းယူနိုင်ခဲ့တာပါ။

ရော်နယ်ဒိုက “အသက် ၃၀ မတိုင်ခင်မှာ ဟတ်ထရစ်အကြိမ် ၃၀ ရခဲ့ပြီး အသက် ၃၀ ပြည့်ပြီးတဲ့အချိန်မှာ နောက်ထပ် ဟတ်ထရစ် အကြိမ် ၃၀ ရရှိခဲ့ပါတယ်။ အဲ့ဒါကြောင့် ဒီစကေးလ်ကို ဟန်ချက်ညီအောင်လုပ်ဖို့ အချိန်ကျပြီ”လို့ တွစ်တာမှာ ရေးသားခဲ့တာပါ။

ရော်နယ်ဒို ဂိုးသွင်းပြီး အောင်ပွဲခံနေစဉ်(United)

ရော်နယ်ဒိုဟာ ဒီဟတ်ထရစ် အကြိမ်(၆၀)ကို ပေါ်တူဂီ လက်ရွေးစင်အသင်းမှာ (၁၀)ကြိမ် ရယူနိုင်ခဲ့ပြီး ရီးရယ်လ် အသင်းမှာ (၄၄)ကြိမ်၊ မန်ချက်စတာ ယူနိုက်တက်နဲ့ ဂျူဗင်တပ်စ်မှာ (၃)ကြိမ်စီ ရယူနိုင်ခဲ့တာ ဖြစ်ပါတယ်။

ရော်နယ်ဒိုဟာ ဒီရာသီမှာ မန်ချက်စတာယူနိုက်တက် အသင်းအတွက် အကောင်းဆုံးပုံစံရဖို့ ရုန်းကန်နေရပေမယ့် ပြိုင်ပွဲစုံ ၂၁ ဂိုး သွင်းယူထားပြီး အသင်းရဲ့ ဂိုးသွင်းအများဆုံး ကစားသမားအဖြစ် ရပ်တည်နေတာပါ။ ပေါ်တူဂီ အသင်းခေါင်းဆောင်ဟာ ဒီသွင်းဂိုးတွေကြောင့် အသင်းနဲ့ ချုပ်ဆိုထားတဲ့ စာချုပ်သဘောတူညီမှုအရ အပိုဆုကြေး ပေါင်(၈)သိန်းခွဲ ရရှိခဲ့တာလည်း ဖြစ်ပါတယ်။

မန်ချက်စတာယူနိုက်တက် အသင်းဟာ အဓိက ပြိုင်ဘက်တွေဖြစ်တဲ့ စပါးနဲ့ အာဆင်နယ်တို့ အရေးနိမ့်ခဲ့ချိန်မှာ ရော်နယ်ဒိုရဲ့ ဟတ်ထရစ်ကြောင့် နိုင်ပွဲရခဲ့တဲ့အတွက် ချန်ပီယံလိဂ်ဝင်ခွင့်ရဖို့ မျှော်လင့်ချက် ရှင်သန်ခဲ့တာပါ။ မန်ချက်စတာကလပ်ဟာ လာမယ့် ပရီးမီးယားလိဂ်ပွဲစဉ်အဖြစ် လီဗာပူးလ်၊ အာဆင်နယ်တို့နဲ့ ကစားရမှာဖြစ်ပြီး ပွဲကြပ်တွေနဲ့ ရင်ဆိုင်နေရတာ ဖြစ်ပါ တယ်။

Source: The Sun

CNI Sport News

၂၀၂၂ ခုနှစ်၊ ဧပြီ ၁၈

ချယ်လ်ဆီး အသင်းကွင်းလယ်ကစားသမား မေဆန်မောင့် က လီဗာပူးလ်နဲ့ ကစားမယ့် အက်ဖ်အေဖလား ဗိုလ်လု ပွဲမှာ အနိုင်ယူပြီး ဝင်ဘာလေအိမ်မက်ဆိုးတွေကို အဆုံးသတ်မယ်လို့ ပြောလိုက်ပါတယ်။

ချယ်လ်ဆီး အသင်းဟာ ပြီးခဲ့တဲ့ ကာရာဘောင်းဖလား ဗိုလ်လုပွဲမှာ လီဗာပူးလ် အသင်းကို ပင်နယ်တီ အဆုံး အဖြတ်နဲ့ အရေးနိမ့်ခဲ့တဲ့အတွက် ဒီပွဲဟာ သူတို့အတွက် မကျေပွဲအဖြစ် လက်စားချေရမယ့် ပွဲအဖြစ်လည်း ရှိနေတာပါ။ မေဆန်မောင့်ဟာ ဝင်ဘာလေမှာ ကစားခဲ့တဲ့ အရေးပါတဲ့ ပွဲစဉ်(၅)ပွဲလုံးမှာ အရေးနိမ့်ခဲ့တာကြောင့် ဒီပွဲကို အနိုင်ယူပြီး ဒါကို အဆုံးသတ်နိုင်ဖို့ စိတ်ဆန္ဒပြင်းပြနေတာဖြစ်ပါတယ်။

မေဆန်မောင့် ဟာ ဝင်ဘာလေကွင်းမှာ ကစားခဲ့တဲ့ ဒါဘီအသင်းနဲ့ ချန်ပီယံရှစ်ပလေးအောဖ့်၊ ချယ်လ်ဆီး အသင်းနဲ့ အက်ဖ်အေဖလား ဗိုလ်လုပွဲ(၂)ပွဲ၊လီဗာပူးလ်နဲ့ ကာရာဘောင်းဖလား ဗိုလ်လုပွဲ၊အင်္ဂလန်နဲ့ ယူရိုပြိုင်ပွဲ ဗိုလ်လုပွဲ တွေမှာ အရေးနိမ့်ခဲ့တာပါ။မေဆန်မောင့် ဟာ ချယ်လ်ဆီး အသင်းက ပဲလေစ့် အသင်းကို ၂ ဂိုး-ဂိုးမရှိနဲ့ အနိုင်ရခဲ့တဲ့ အက်ဖ်အေဖလား အကြိုဗိုလ်လုပွဲမှာ အသင်းအတွက် အရေးပါတဲ့ ဒုတိယဂိုးကို သွင်းယူနိုင်ခဲ့တာဖြစ်ပါတယ်။

မေဆန်မောင့် က“ဝင်ဘာလေဗိုလ်လုပွဲမှာ အနိုင်ရဖို့ သေချာပေါက်အချိန်တန်နေပါပြီ။ ကျနော်ဟာ ဗိုလ်လုပွဲ (၅)ပွဲရှုံးနိမ့်ပြီးသွားပါပြီ။ ဒါကို လီဗာပူးလ်နဲ့ ကစားရမယ့်ပွဲမှာ ပြန်ဆပ်ရမယ့် အချိန်ရောက်ပြီ”လို့ ပြောခဲ့တာ ဖြစ်ပါတယ်။ ချယ်လ်ဆီး အသင်းနည်းပြ တူချယ်လ် ကလည်း ပြီးခဲ့တဲ့ ကာရာဘောင်းဖလား ဗိုလ်လုပွဲက ရှုံးကြွေးကို အက်ဖ်အေဖလား ဗိုလ်လုပွဲမှာ အနိုင်ယူပြီး ပြန်ဆပ်ဖို့ ပစ်မှတ်ထားနေတာပါ။

တူချယ်လ် က “သူတို့ရဲ့ တခြားဆုဖလားတွေအကြောင်းကို ကျနော်စိတ်မဝင်စားပါဘူး။ကျနော်တို့ဗိုလ်လုပွဲမှာ ရှုံးခဲ့ပြီး အဲ့ဒီတုန်းက အရာအားလုံးကို ပေးခဲ့ပါတယ်။ကျနော်တို့ပင်နယ်တီအထိ သွားခဲ့ပြီး ကံမကောင်းလို့ အရေး နိမ့်ခဲ့တာပါ။ အက်ဖ်အေဖလားဟာ ကမ္ဘာပေါ်မှာ ဂုဏ်သိက္ခာအရှိဆုံးနဲ့ ရိုးရာဆုဖလားလည်းဖြစ်ပါတယ်။ ကျနော် တို့ အခုလုပ်နိုင်တာကတော့ ဒီလိုခက်ခဲတဲ့ပွဲစဉ်အတွက် ကောင်းမွန်စွာ ပြင်ဆင်ထားနိုင်ဖို့ပါပဲ။ ဗိုလ်လုပွဲမှာ အနိုင်ရခဲ့မယ်ဆိုရင်တော့ ဒီရာသီကို ပိုပြီးချိုမြိန်စေတယ်”လို့ ပြောခဲ့တာဖြစ်ပါတယ်။

ချယ်လ်ဆီး အသင်းဟာ ပြီးခဲ့တဲ့အပတ်က ရီးရယ်လ် ကို အရေးနိမ့်ခဲ့ပြီး ချန်ပီယံလိဂ်ကွာတားဖိုင်နယ်ကနေ ထွက်ခဲ့ရတာကြောင့် အက်ဖ်အေဖလား ဟာ ဒီရာသီ လန်ဒန်ကလပ်ရယူနိုင်စရာ တစ်ခုတည်းသော ဆုဖလား လည်းဖြစ်တာပါ။ လီဗာပူးလ် အသင်းကတော့ ဆုဖလား(၄)လုံးလမ်းကြောင်းပေါ်မှာ ရှိနေတာဖြစ်ပါတယ်။

Source:DailyMail

CNI Sport News

၂၀၂၂ ခုနှစ်၊ ဧပြီ ၁၈

လမ်ပန်ဝါရီယာ အသင်းက အူဒုံဌာနီ အသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ ထိုင်းလိဂ်(၂) အဝေးကွင်းပွဲစဉ်မှာ မောင်မောင်လွင် ဟာ (၁)ဂိုးသွင်း၊ (၁)ဂိုးဖန်တီးသွားခဲ့ပါတယ်။

လမ်ပန်ဝါရီယာ အသင်းဟာ ဒီနိုင်ပွဲကြောင့် ထိုင်းလိဂ်(၁)ပြိုင်ပွဲကို တိုက်ရိုက်တန်းတက်နိုင်ဖို့ အခြေအနေ ကောင်းသွားခဲ့တာပါ။ မောင်မောင်လွင် ဟာ ဒီပွဲစဉ်ရဲ့ ပွဲချိန်(၃)မိနစ်မှာပဲ အသင်းဖော် တိုက်စစ်မှူး ဂိုးသွင်း နိုင်အောင် အလွန်ကောင်းမွန်တဲ့ ဂိုးဖန်တီးမှုပြုလုပ်သွားခဲ့တာဖြစ်ပါတယ်။ မောင်မောင်လွင် ဟာ လမ်ပန်ဝါရီယာ အသင်း အနိုင်သေချာစေမယ့် အဆုံးသတ်ဂိုးကို ပွဲချိန်မိနစ်(၉၀)ပြည့်ပြီး နာကျင်အချိန်ပိုမှာ ဂိုးသမားနဲ့ နောက်ခံ လူတွေကို လိမ်ခေါက်ပြီး သွင်းယူခဲ့တာပါ။

ဒီဂိုးဟာ မောင်မောင်လွင်အတွက် ထိုင်းလိဂ်(၂)ပြိုင်ပွဲမှာ သွင်းတဲ့ တတိယမြောက်သွင်းဂိုးလည်း ဖြစ်ပါတယ်။ မြန်မာ့လက်ရွေးစင် အသင်းခေါင်းဆောင်ဟာ ဒီရာသီ ထိုင်းလိဂ်(၂)ပြိုင်ပွဲမှာ လမ်ပန်ဝါရီယာ အသင်းအတွက် (၃)ဂိုးသွင်းပြီး (၇)ဂိုးဖန်တီးထားနိုင်ခဲ့တာပါ။ မောင်မောင်လွင် က ပွဲအပြီး သူ့ရဲ့ဖေ့စ်ဘွတ်စာမျက်နှာမှာ “ကျနော်တို့လုပ်နိုင်ပါတယ်”ဆိုပြီး ရေးသားခဲ့တာဖြစ်ပါတယ်။

မောင်မောင်လွင် ဟာ ထိုင်းလိဂ်(၂)ကို ရောက်ရှိလာကတည်းက ခြေစွမ်းပြနေခဲ့တဲ့အတွက် လမ်ပန်ဝါရီယာ အသင်းရဲ့ ပွဲထွက်ခွင့်တစ်နေရာကို အခိုင်အမာရယူထားတာပါ။ မောင်မောင်လွင် ဟာ ထိုင်းလိဂ်(၂)က ပေးတဲ့ ဖေဖော်ဝါရီလ တစ်လတာ အကောင်းဆုံးကစားသမားဆုကိုလည်း ရယူထားတာဖြစ်ပါတယ်။ လမ်ပန်ဝါရီယာ အသင်းဟာ ထိုင်းလိဂ်(၂)ပြိုင်ပွဲပြီးဆုံးဖို့ (၂)ပွဲပဲလိုတော့တဲ့အချိန်မှာ ဒုတိယနေရာက ဆူခိုထိုင်း အသင်းကို (၁)မှတ်၊ တတိယနေရာက ထရက် အသင်းကို (၄)မှတ်ဖြတ်ထားတာပါ။

အဲဒါကြောင့် လမ်ပန်ဝါရီယာ အသင်းဟာ လက်ကျန်(၂)ပွဲမှာ (၁)ပွဲအနိုင်ရရှိတာနဲ့ ထိုင်းလိဂ်(၁)ပြိုင်ပွဲကို တိုက်ရိုက် တန်းတက်နိုင်တော့မှာဖြစ်ပါတယ်။လမ်ပန်ဝါရီယာ အသင်းဟာ အခုလ(၂၄)ရက်မှာ ထိုင်းလိဂ်(၂) ပွဲစဉ်အဖြစ် ပရာချာ အသင်းနဲ့ ယှဉ်ပြိုင်ရမှာဖြစ်ပါတယ်။

CNI Sport News

၂၀၂၂ ခုနှစ်၊ ဧပြီ ၁၇

ရော်နယ်ဒိုဟာ နော်ဝစ်ခ်ျ အသင်းကို ၃ ဂိုး-၂ ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ မန်ချက်စတာယူနိုက်တက် အသင်းအတွက် ဟတ်ထရစ်ဂိုး သွင်းယူသွားနိုင်ခဲ့ပါတယ်။

ဒီပွဲအပြီးမှာတော့ ရော်နယ်ဒိုဟာ မန်ချက်စတာယူနိုက်တက် အသင်းကို ရောက်ရှိလာတုန်းက ချုပ်ဆိုခဲ့တဲ့ စာချုပ်ပါ အချက် အလက်အရ အပိုဆု ကြေး ပေါင်(၈)သိန်းခွဲ ရရှိသွားတာပါ။ ရော်နယ်ဒိုဟာ နော်ဝစ်ခ်ျနဲ့ပွဲက ဟတ်ထရစ်ကြောင့် မန်ချက်စတာ ယူနိုက်တက် အသင်းအတွက် တစ်ရာသီသွင်းဂိုး ၂၁ ဂိုးအထိ ရှိလာခဲ့ပါတယ်။

စာချုပ်အရ ရော်နယ်ဒိုဟာ တစ်ရာသီအတွင်း သွင်းဂိုး ၂၀ အထိ သွင်းယူနိုင်မယ်ဆိုရင် အပိုဆုကြေး ပေါင် ၇ သိန်းခွဲ ရရှိမှာပါ။ ဒီသွင်းဂိုး ပမာဏကို ကျော်လွန်းပြီး သွင်းတဲ့သွင်းဂိုးတိုင်းကို ပေါင် ၁ သိန်း ရရှိမှာ ဖြစ်ပါတယ်။ အဲ့ဒါကြောင့် ရော်နယ်ဒိုဟာ ပေါင် ၈ သိန်းခွဲအထိ ရရှိခဲ့တာပါ။

ရော်နယ်ဒို ဂိုးသွင်းပြီး အောင်ပွဲခံနေစဉ်(Twitter)

ရော်နယ်ဒို အနေနဲ့ ဒီရာသီ မန်ချက်စတာယူနိုက်တက် အသင်းရဲ့ ထိပ်တန်း ဂိုးသွင်းရှင် ဖြစ်ခဲ့မယ်ဆိုရင် အပိုဆုကြေး ပေါင် ၁ သန်း ထပ်မံရရှိမှာဖြစ်ပြီး ရရှိဖို့လည်း သေချာနေတာ ဖြစ်ပါတယ်။ ပေါ်တူဂီ အသင်းခေါင်းဆောင်ဟာ နောက်ထပ် ၉ ဂိုး သွင်း ယူပြီး တစ်ရာသီသွင်းဂိုး ၃၀ ပြည့်ခဲ့မယ်ဆိုရင် အပိုဆုကြေး စုစုပေါင်း ပေါင် ၂.၇၅ သန်းကို ရရှိမှာဖြစ်တယ်လို့ သိရပါတယ်။

ရော်နယ်ဒိုဟာ ဒီရာသီ မန်ချက်စတာယူနိုက်တက် အသင်းအတွက် ပရီးမီးယားလိဂ် ပြိုင်ပွဲမှာ ဒုတိယအကြိမ်မြောက် ဟတ်ထရစ်ဂိုး  ရယူနိုင်ခဲ့တာဖြစ်ပြီး ကစားသမားဘဝ အကြိမ်(၆၀)မြောက် ဟတ်ထရစ်လည်း ဖြစ်ပါတယ်။

Source: Metro

CNI Sport News

၂၀၂၂ ခုနှစ်၊ ဧပြီ ၁၆

မန်ချက်စတာယူနိုက်တက် ပရိသတ်တွေကတော့ တက်စ်လာ စီအီးအို အီလွန်မတ်စ်ကို ဂလေဇာမိသားစု ဆီကနေ အသင်းကို ဝယ်ယူဖို့ တောင်းဆိုမှု ပြုလုပ်လိုက်ပါတယ်။

အီလွန်မတ်စ်ဟာ တွစ်တာကို ဝယ်ယူဖို့ ပြင်ဆင်နေသူ ဖြစ်တာကြောင့် တွစ်တာ ကို ဝယ်မယ့်အစား ယူနိုက်တက်ကိုသာ ဝယ်ဖို့ အသင်းပရိသတ်တွေက တောင်းဆိုလိုက်ခြင်း ဖြစ်ပါတယ်။

အီလွန်မတ်စ်ဟာ ဆိုရှယ်မီဒီယာရဲ့ နာမည်ကြီး ပလက်ဖောင်းတစ်ခုဖြစ်တဲ့ တွစ်တာကို လွှဲပြောင်းရယူဖို့ ဒေါ်လာ ၄၃ ဘီလီယံ နဲ့ ကမ်းလှမ်းမှုတွေ စတင်ပြုလုပ်ခဲ့တာပါ။ အီလွန်မတ်စ်ဟာ တွစ်တာမှာ ရှယ်ယာ ၉.၂ ရာခိုင်နှုန်း ပိုင်ဆိုင်ထား သူဖြစ်ပါတယ်။

မန်ချက်စတာယူနိုက်တက် ပရိသတ်‌တွေဟာ အသင်းပိုင်ရှင်ဖြစ်တဲ့ ဂလေဇာမိသားစုအပေါ် စိတ်ပျက်နေတာကြောင့် အီလွန်မတ်စ်ကို တွစ်တာထက် ယူနိုက်တက်ကို ဝယ်ဖို့သာ အာရုံစိုက် စေချင်နေကြတာ ဖြစ်ပါတယ်။

ယူနိုက်တက် ပရိသတ်တစ်ဦးက "အီလွန်မတ်စ် အနေနဲ့ ယူနိုက်တက်ကို ဝယ်ယူလိုက်ပါ။ ပြီးရင် ကမ္ဘာပေါ်မှာရှိတဲ့ အကောင်း ဆုံး လူငယ်ကစားသမားတွေကို ဝယ်ယူဖို့ ဒေါ်လာ ၂ ဘီလီယံ ရင်းနှီးမြုပ်နှံလိုက်ပါ။ ကျနော်တို့ကို ယုံလိုက်ပါ သိပ်မကြာခင်မှာ ခင်‌ဗျားငွေတွေ ပြန်ရပြီး တွစ်တာမှာ ဆူညံနေပါလိမ့်မယ်။ တွစ်တာကို မဝယ်ပါနဲ့"လို့ ရေးသားခဲ့ပါတယ်။

နောက်တစ်ဦးက "အီလွန်မတ်စ် အနေနဲ့ ဘောလုံးအသင်း တစ်သင်းကို မပိုင်ဆိုင်ချင်ဘူးလား၊ မန်ချက်စတာယူနိုက်တက် ရှိတယ်"လို့ ရေးသားခဲ့သလို တခြားပရိသတ်တွေကလည်း ယူနိုက်တက်ကို ဝယ်ယူဖို့ အီလွန်မတ်စ်ကို ဆိုရှယ်မီဒီယာပေါ်မှာ စာရေးသားပြီး တောင်းဆိုခဲ့ကြတာပါ။

မန်ချက်စတာယူနိုက်တက် အသင်းဟာ ဖလားလက်မဲ့ရာသီ တစ်ရာသီပြီး တစ်ရာသီ ဖြတ်သန်းနေရသလို ဂလေဇာ မိသားစုရဲ့ အသင်းအပေါ် ရင်းနှီးမြုပ်နှံမှုတွေကို ပရိသတ်တွေက စိတ်ပျက်နေကြတာ ဖြစ်ပါတယ်။

Source: SPORTbible

CNI Sport News

၂၀၂၂ ခုနှစ်၊ ဧပြီ ၁၄

အသလက်တီကို အသင်းနဲ့ မန်စီးတီး အသင်းတို့ ကစားခဲ့တဲ့ ချန်ပီယံလိဂ် ကွာတားဖိုင်နယ် ဒုတိယအကျော့ ပွဲစဉ်မှာ အသလက်တီကို ကစားသမားတွေဟာ ကွင်းထဲမှာတင်မဟုတ်ဘဲ ဥမင်လှိုဏ်ခေါင်းထဲထိပါ မန်စီးတီး ကစားသမားတွေကို ရန်ရှာခဲ့ကြပါတယ်။

ဒီပွဲမှာတော့ နှစ်ဖက် ဂိုးမရှိ သရေကျခဲ့တာကြောင့် နှစ်ကျော့ပေါင်း ရလဒ် ၁ ဂိုး-ဂိုး မရှိနဲ့ မန်စီးတီးအသင်း အကြိုဗိုလ်လုပွဲ တက်နိုင်ခဲ့တာပါ။ ဒီပွဲစဉ်ရဲ့ ပွဲပြီးဆုံးခါနီးမှာ အသလက်တီကို နောက်ခံလူ ဖိလစ်ပီက မန်စီးတီး ကစားသမား ဖိုဒန်ကို ဖျက် ထုတ်ခဲ့တာကနေ ပြဿနာ စတင်ခဲ့တာ ဖြစ်ပါတယ်။ ဒီလိုဖျက်ထုတ်ခဲ့တဲ့ ဖိလစ်ပီလည်း နှစ်ဝါတစ်နီနဲ့ ထုတ်ပယ်ခံခဲ့ရတာပါ။

ဒီအချိန်မှာ ဆာဗစ်က ဖိုဒန်ကို ဆွဲထူခဲ့တာမှာ နှစ်ဖက် ကစားသမားတွေ ဝိုင်းအုံလာကြပြီးနောက် ရန်ပွဲဖြစ်ခဲ့ပါတယ်။ ဆာဗစ် က စတာလင်ရဲ့ခေါင်းကို တိုက်ခဲ့သလို ဂရီလစ်ရှ်ရဲ့ ဆံပင်ကိုပါ ဆွဲခဲ့တာပါ။ ကွင်းလယ်ဒိုင်လူကြီးကတော့ အသလက်တီကိုနဲ့ မန်စီးတီး ကစားသမားတချို့ကို အဝါကတ်ပြပြီး ပွဲကို ထိန်းချုပ်ခဲ့ပါတယ်။

အသလက်တီကိုနဲ့မန်စီးတီးပွဲ အချင်းများနေစဉ်(SPORTBIBLE)

ဒီရန်ပွဲဟာ ကွင်းထဲမှာတင် မကဘဲ ပွဲအပြီး ဥမင်လှိုဏ်ခေါင်းထဲ ဝင်တဲ့လမ်းတလျှောက်မှာပါ ထပ်ပြီး ဖြစ်ပွားခဲ့တာပါ။ ဆာဗစ် ဟာ ဂရီလစ်ရှ်ကို ထပ်ပြီး စိန်ခေါ်ခဲ့သလို ဗာဆယ်ကိုကလည်း လာပေါ်တေးကို ပစ္စည်းတွေနဲ့ ပစ်ပေါက်ခဲ့ပြီး မန်စီးတီး တစ်သင်းလုံးကို စိန်ခေါ်ခဲ့တာ ဖြစ်ပါတယ်။

ဗာဆယ်ကိုဟာ တံတွေးနဲ့ပါ ထွေးခဲ့တာတွေ လုပ်ခဲ့ပြီး သူ့ကို မနည်းထိန်းချုပ်ခဲ့ရပုံတွေကို ရုပ်သံ မှတ်တမ်းတွေအရ တွေ့ရှိ ခဲ့ရပါတယ်။

စပိန်ရဲတပ်ဖွဲ့တွေက ဥမင်လှိုဏ်ခေါင်းထဲကို ရောက်ရှိလာခဲ့ပြီး ကစားသမားတွေကို လူစုခွဲကာ ရန်ပွဲကို ထိန်းပေးခဲ့ရတာ ဖြစ် ပါတယ်။ ဒီလိုဖြစ်ရပ်တွေကြောင့် အသလက်တီကို အသင်းဟာ ယူအီးအက်ဖ်အေရဲ့ အရေးယူမှုကို ခံရဖွယ် ရှိနေတာ ဖြစ်ပါ တယ်။

Source: Sportbible

CNI Sport News

၂၀၂၂ ခုနှစ်၊ ဧပြီ ၁၃

မလေးရှားစူပါလိဂ်ဟာ တစ်ပတ်အကောင်းဆုံး အသင်းမှာ ပါဝင်တဲ့ ကစားသမားတွေကို ထုတ်ပြန်ခဲ့တာမှာ ဆီလန်ဂေါ အသင်းမှာ ကစားနေတဲ့ မြန်မာ့လက်ရွေးစင် ကစားသမား ဟိန်းထက်အောင် ပါဝင်နေခဲ့တာ ဖြစ်ပါတယ်။

ဆီလန်ဂေါ အသင်းက ကီဒတ်ရှ်အသင်းကို ၄ ဂိုး-၁ ဂိုးနဲ့ အနိုင်ရတဲ့ပွဲမှာ ဟိန်းထက်အောင်ဟာ ပွဲချိန်ပြည့် ပါဝင်ကစားခဲ့ပြီး ခြေစွမ်း ပြသနိုင်ခဲ့တာပါ။ ဟိန်းထက်အောင်ဟာ ဒီပွဲမှာ ဂိုးသွင်း ယူနိုင်ခြင်းနဲ့ ဂိုးဖန်တီးနိုင်ခြင်း မရှိခဲ့ပေမယ့် ဆီလန်ဂေါ အသင်း နောက်ဆုံးသွင်းယူခဲ့တဲ့ ဂိုးမှာ သူ့ရဲ့ အားထုတ်မှုကြောင့် ရခဲ့တာ ဖြစ်ပါတယ်။

ဟိန်းထက်အောင်ဟာ ရာသီအစပွဲတွေမှာ ဆီလန်ဂေါ အသင်းကြီးအတွက် မပါဝင်ခဲ့ရပေမယ့် ပါဝင်ခွင့်ရခဲ့တဲ့ ကီဒတ်ရှ်နဲ့ ပွဲမှာတော့ ပရိသတ် သဘောကျမယ့် စွမ်းဆောင်ရည်ကို ပြသခဲ့တာပါ။ အဲ့ဒါကြောင့်လည်း မလေးရှားစူပါလိဂ်ရဲ့ တစ်ပတ်တာ အကောင်းဆုံးအသင်းမှာ ရွေးချယ်ခံရတာ ဖြစ်ပါတယ်။

ဟိန်းထက်အောင်ဟာ ကီဒတ်ရှ်နဲ့ပွဲက စွမ်းဆောင်ရည်ကြောင့် မလေးရှားဘောလုံးမဂ္ဂဇင်းရဲ့ တစ်ပတ်တာ အကောင်း‌ဆုံး အသင်းမှာလည်း ပါဝင်ခဲ့တာပါ။ ဟိန်းထက်အောင်ဟာ မြန်မာနေရှင်နယ်လိဂ်ကလပ် ဟံသာဝတီယူနိုက်တက် ကနေ ထွက်ခွာပြီး ၂၀၂၁ မှာ ဆီလန်ဂေါ အရန်အသင်းကို ရောက်ရှိခဲ့တာ ဖြစ်ပါတယ်။

အဆိုပါ အသင်းမှာ ပြသခဲ့တဲ့ ခြေစွမ်းတွေကြောင့် ဟိန်းထက်အောင်ဟာ ဆီလန်ဂေါ အသင်းကြီးအတွက် ပါဝင် ကစားခွင့် ရနေခဲ့တာလည်း ဖြစ်ပါတယ်။

CNI Sport News

၂၀၂၂ ခုနှစ်၊ ဧပြီ ၁၃

ရီးရယ်လ် အသင်းရဲ့ ကွင်းလယ်ဖန်တီးရှင် မိုဒရစ်က‌တော့ ချယ်လ်ဆီးကို ရှုံးခဲ့ပေမယ့် ချန်ပီယံလိဂ်အကြို ဗိုလ်လုပွဲ တက်ခဲ့ ပြီးနောက် ဒါဟာ အလွန်ချိုမြိန်တဲ့ ရှုံးနိမ့်မှုဖြစ်တယ်လို့ ပြောလိုက်ပါတယ်။

ချယ်လ်ဆီးနဲ့ ရီးရယ်လ် အသင်းတို့ဟာ ဧပြီ ၁၃ ရက် မနက်ပိုင်းက ချန်ပီယံလိဂ် ကွာတားဖိုင်နယ် ဒုတိယအကျော့ ပွဲစဉ်အဖြစ် ကစားခဲ့တာ ဖြစ်ပါတယ်။ ဒီပွဲမှာ ချယ်လ်ဆီး အသင်းက ၃ ဂိုး- ၁ ဂိုးနဲ့ အနိုင်ရခဲ့တာပါ။ ပထမအကျော့အဖြစ် ကစားခဲ့တုန်းက ရီးရယ်လ် အသင်းက ၃ ဂိုး-၁ ဂိုးနဲ့ အနိုင်ရခဲ့တာ ဖြစ်ပါတယ်။

အဲ့ဒါကြောင့် အချိန်ပို ဆက်ကစားခဲ့ရပြီး ဘန်ဇီမာက ရီးရယ်လ်အတွက် နောက်ထပ် သွင်းယူခဲ့တာပါ။ ချယ်လ်ဆီး အသင်းက နောက်ထပ် သွင်းဂိုးတွေ ထပ်မံရယူဖို့ ကြိုးစားခဲ့ပေမယ့် မသွင်းနိုင်တော့တဲ့အတွက် ရီးရယ်လ် အသင်းက နှစ်ကျော့ပေါင်း ရလဒ် ၅ ဂိုး- ၄ ဂိုးနဲ့ အကြိုဗိုလ်လုပွဲ တက်နိုင်ခဲ့တာ ဖြစ်ပါတယ်။

မိုဒရစ်က "နည်းပြ အန်ဆယ်လော့တီက ကောင်းမွန်တဲ့ အပြောင်းအလဲတွေ လုပ်ခဲ့ပြီး သူ့ရဲ့ လူစားလဲမှုတွေက တကယ်ကို ကောင်းမွန်ခဲ့တာပါ။ သူတို့ဟာ ပွဲ‌အပေါ်မှာ ကြီးမားတဲ့ အကျိုးသက်ရောက်မှုတွေ ရှိခဲ့တယ်လို့ ကျနော်ထင်ပါတယ်။ ဒီပွဲဟာ အလွန်ချိုမြိန်တဲ့ ရှုံးနိမ့်မှုပါ"လို့ ပြောခဲ့တာပါ။

မိုဒရစ်ဟာ ချယ်လ်ဆီး အသင်းကိုလည်း ချီးကျုးသွားခဲ့ပြီး သူတို့ဟာ ရင်ဆိုင်ရခက်ခဲတဲ့အသင်း ဖြစ်တယ်လို့ ပြောခဲ့ပါတယ်။

"ချယ်လ်ဆီး အသင်းဖြစ်တဲ့ အတွက် ပထမပွဲပြီးကတည်းက ခက်ခဲမယ်ဆိုတာကို သိပါတယ်။ သူတို့ဟာ ကျနော်ရင်ဆိုင်ခဲ့ရတဲ့ အသင်းတွေမှာ အခက်အခဲဆုံး အသင်းပါ။ သူတို့ကစားပုံက မာကျောပြီး ကြံ့ခိုင်မှုကောင်းသလို ကျစ်လစ်မှုရှိတဲ့ အသင်းပါ။ ဒါကြောင့် ခက်ခဲမှုရှိမယ်ဆိုတာကို သိပါတယ်"လို့ ပြောခဲ့တာ ဖြစ်ပါတယ်။

ချယ်လ်ဆီး အသင်းဟာ ချန်ပီယံလိဂ်ပြိုင်ပွဲရဲ့ လက်ရှိ ချန်ပီယံဖြစ်ပေမယ့် ချန်ပီယံဆုကို မကာကွယ်နိုင်တော့ဘဲ ကွာတားဖိုင် နယ်ကနေပဲ လှည့်ပြန်ခဲ့ရတာ ဖြစ်ပါတယ်။

Source: Metro

CNI Sport News

၂၀၂၂ ခုနှစ်၊ ဧပြီ ၉

ပီအက်စ်ဂျီ အသင်းဟာ ဘတ်ပီကို လက်မှတ်ထိုးကြေး ပေါင်သန်း ၁၅၀ အထိပေးပြီး အသင်းမှာ နောက်ထပ် ၂ ရာသီ ဆက်ထိန်းသိမ်းဖို့ ပြင်ဆင်နေတယ်လို့ စပိန်ဘောလုံးကျွမ်းကျင်သူ ဂူလမ်က ပြောလိုက်ပါတယ်။

အသက် ၂၃ နှစ်အရွယ်ရှိ ဘတ်ပီနဲ့ ပီအက်စ်ဂျီအသင်းတို့ ချုပ်ဆိုထားတဲ့ စာချုပ်ဟာ ဒီရာသီအကုန်မှာ ကုန်ဆုံးတော့မှာပါ။ ဘတ်ပီဟာ ရီးရယ်လ်အသင်းကို ပြောင်းရွှေ့ဖို့ အကြိုသဘောတူညီမှု ရရှိထားတယ်လို့ သတင်းတွေ ထွက်နေတာ ဖြစ်ပါတယ်။

ပီအက်စ်ဂျီ အသင်းကတော့ ဘတ်ပီကို ဆက်ထိန်းသိမ်းနိုင်ဖို့ စိတ်အားထက်သန်နေပြီး တစ်နှစ်ကို အသားတင် လစာငွေ ပေါင် ၂၁ သန်းနဲ့ ကမ်းလှမ်းသွားဖို့လည်း ရှိနေတာပါ။

ဒီလို မက်မောလောက်စရာ ကမ်းလှမ်းမှုတွေ ရှိနေပေမယ့် ဘတ်ပီဟာ ရီးရယ်လ် အသင်းကိုပဲ ဦးစားပေး ရွေးချယ်မှုအဖြစ် သတ်မှတ်ထားတာ ဖြစ်ပါတယ်။

လော်ရီးယန့် အသင်းကို အနိုင်ရတဲ့ ပွဲအပြီးမှာ ဘတ်ပီက “ကျနော် ဘာဆုံးဖြတ်ချက်ကိုမှ မချရသေးပါဘူး။ ထည့်သွင်း စဉ်းစား ဖို့ အချက်အသစ်တွေ ရှိပါတယ်။ ဘယ်အချက်အသစ်လဲ ဆိုရင်တော့ အသစ်အဆန်းတွေပါပဲ”လို့ ပြောခဲ့တာပါ။

ဘတ်ပီကိုတွေ့ရစဉ်(Sports Mole)

ကာတာပိုင်ဆိုင်တဲ့ ပီအက်စ်ဂျီ အသင်းဟာ ဘတ်ပီကို စာချုပ်အသစ် ချုပ်ဆိုဖို့ ဖိအားပေး နေတယ်လို့လည်း သတင်းတွေမှာ ဖော်ပြထားပါတယ်။

သူတို့ဟာ လတ်မှတ်ထိုးကြေး ပေါင် ၁၂၅ သန်းနဲ့ ဘတ်ပီကို စာချုပ်သစ် ချုပ်ဆိုဖို့ ကမ်းလှမ်းထားပြီး ဖြစ်ပေမယ့် အခု အချိန် မှာတော့ နောက်ထပ် ပေါင် ၂၅ သန်း ထပ်ပေးဖို့ ပြင်ဆင်နေတာပါ။ ဘတ်ပီရဲ့ နောက်ထပ် ပြောင်းရွှေ့မယ့် အခြေအနေတွေနဲ့ ပတ်သက်ပြီး သူ့ရဲ့ မိဘတွေက ကိုယ်စားလှယ်အဖြစ် တာဝန်ယူထားပေမယ့် ကစားသမားကသာ နောက်ဆုံး ဆုံးဖြတ်ပေးရ မှာ ဖြစ်ပါတယ်။

တကယ်လို့ ဘတ်ပီသာ ပီအက်စ်ဂျီ အသင်းမှာ ဆက်နေမယ်ဆိုရင် သူ့ရဲ့ အကြံပေးတွေဟာ ဝန်ဆောင်ခအဖြစ် ပြင်သစ် ကလပ်ကနေ ပေါင် ၄၂ သန်း ရရှိမှာပါ။ ရီးရယ်လ် အသင်းကတော့ ဘတ်ပီကို ခေါ်ယူနိုင်မယ်လို့ ယုံကြည်ထားတာကြောင့် ဟာလန်းအပေါ် စိတ်ဝင်စားမှု လျော့နည်းသွားတာ ဖြစ်တယ်လို့ သိရပါတယ်။

ဘတ်ပီဟာ ဒီရာသီမှာ ပီအက်စ်ဂျီ အသင်းရဲ့ ထိပ်တန်း ဂိုးသွင်းရှင်အဖြစ် ခြေစွမ်း ပြသနေတာဖြစ်ပြီး ပွဲပေါင်း ၃၈ ပွဲ ပါဝင် ကစားထားကာ ၂၈ ဂိုး သွင်းယူထားတာ ဖြစ်ပါတယ်။

Source: BBC