CNI News

၂၀၂၃ ခုနှစ်၊ ဖေဖော်ဝါရီ ၂၁

ရန်ကုန်တိုင်းဒေသကြီး၊ ကျောက်တန်းမြို့ရှိ သုခိတာရာမ ကျောင်းတိုက်၌ သီလရှင်ကြီးများ၏ ညှင်းပန်းနှိပ်စက် ခံရသည့် တအာင်းကလေးငယ်များအတွက် နစ်နာကြေးအပြင် အရေးယူမှုပါ လုပ်ဆောင်သင့်ကြောင်း လူအခွင့်အရေး ဆောင်ရွက်သူများက CNI သတင်းဌာနသို့ ပြောသည်။

သုခိတာရာမကျောင်းတိုက်သို့ သွားရောက် တွေ့ဆုံဆွေးနွေးခဲ့ရာတွင် ဆေးကုသမှု ခံယူနေရသည့် ကလေးများ အတွက် နစ်နာကြေး စရိတ်ပေးရန် သဘောတူထားသော်လည်း ကလေးများ၏ ရုပ်ပိုင်းဆိုင်ရာသာမက စိတ်ပိုင်း ဆိုင်ရာထိခိုက်မှုအတွက် အရေးယူမှုပါ ဆောင်ရွက်သင့်ကြောင်း တအောင်းအမျိုးသမီး အဖွဲ့အစည်း (TWO)မှ ပြောရေးဆိုခွင့်ရှိသူ လွေးချီဆငါးက CNI သတင်းဌာနသို့ ပြောသည်။

လွေးချီဆငါးက “ကျမတို့ အဖွဲ့အစည်း အနေနဲ့ဆိုရင် ပြောရမယ်ဆိုရင် ဒီလိုမျိုး နစ်နာကြေးဆိုတာထက် ကလေး တွေရဲ့ စိတ်ပိုင်းဆိုင်ရာ ဘယ်လောက်အထိ ထိခိုက်နာကျင်နေတာလဲဆိုတဲ့ အပေါ်မှာလည်း အများကြီး မူတည် တယ်။ ကျမတို့ သိရသလောက်ဆိုရင် တချို့ကလေးတွေဆို လုံးဝကို အသက် အန္တရာယ်အထိတောင်မှ စိုးရိမ်ရတဲ့ အနေအထားဖြစ်တဲ့ အခါကျတော့ နစ်နာကြေး ဒီလောက်နဲ့ပဲ ဆိုရင်တော့ မဖြစ်သင့်ဘူးလို့ မြင်တယ်။ နစ်နာကြေး လည်း ပေးရမယ်၊ တခြားအရေးယူ ဆောင်ရွက်မှုတွေလည်း လုပ်သင့်တယ်လို့တော့ မြင်တယ်။ ဒီဟာသည် ဘာသာရေးအရ ပြန်ကြည့်မယ်ဆိုရင်လည်း သာသနာရေးရာပုံစံမျိုး ဖြစ်တယ်။ ပြောရမယ်ဆိုရင် ကလေးတွေကို ခုတုံးလုပ်ပြီးမှ ဒီလိုနှိပ်စက်တဲ့ပုံစံမျိုး ဒါလုံးဝ မဖြစ်သင့်ဘူး။ နောက်ပိုင်းကျရင်လည်း ဒီလိုမျိုး ဖြစ်စဉ်မျိုး ထပ်မဖြစ် ရလေအောင် ဒီအပေါ်မှာတော့ တစ်စုံတစ်ရာ တစ်ခုခုတော့ လုပ်သင့်တယ်လို့ မြင်တယ်။ သို့ပေမယ့်လည်း မိဘနဲ့ ကလေးအပေါ်မှာလည်း အသေးစိတ် မသိရသေးတဲ့ အခါကျတော့ ဒီလောက်နဲ့ပဲ ပေးတဲ့ နစ်နာကြေးနဲ့ပဲ အဆင်ပြေ လား။ ဒါမှမဟုတ် တခြား ဆောင်ရွက်ချက်တွေ လုပ်သင့်လားဆိုတဲ့ ဟာကြတော့ ပြန်လည်ညှိနှိုင်းဖို့ လိုအပ်တယ် လို့ မြင်တယ်” ဟု ပြောသည်။

နှိပ်စက်ခံထားရတဲ့ ဒဏ်ကြောင့် လမ်မလျှောက်နိုင်သလို စကားပါမပြောနိုင်တော့တဲ့ လွေးမြအောင် (ရွှေဖီမြေ)

မိဘများမှ ရန်ကုန်တိုင်းဒေသကြီး၊ ကျောက်တန်းမြို့ရှိ သုခိတာရာမ ကျောင်းတိုက်တွင် ပညာသင်ကြားရန် အတွက် ကျောက်မဲမြို့နယ် ခုံငင်းနှင့် ကျောင်းခမ်းကျေးရွာမှ ကလေးငယ် ၁၆ ဦးအား ဆရာလေးအဖြစ် ခံယူစေကာ ၂၀၂၂ ခုနှစ်၊ ဧပြီလ၌ ပို့ဆောင်ခဲ့သည်။

သို့သော် သီလရှင်ကြီးများ၏ အမျိုးမျိုးသော ညှင်းပန်းနှိပ်စက်မှုများကြောင့် ဒဏ်ရာများ ရရှိထားကြသည့် တအာင်း ဆရာလေး ငါးပါးအား ကျောက်မဲမြို့သို့ ၂၀၂၃ ခုနှစ်၊ ဖေဖော်ဝါရီ ၁၀ ရက်နေ့တွင် ပြန်လာပို့ထားခဲ့သည်။

ထိုထဲတွင် အသက် ၇ နှစ်အရွယ် ကလေးတစ်ဦးမှာ ဒဏ်ရာ အပြင်းအထန် ရရှိထားသဖြင့် ကျောက်မဲပြည်သူ့ ဆေးရုံတွင် ကုသမှု ခံယူနေရကြောင်း သိရသည်။

ယခုကဲ့သို့ ဖြစ်စဉ်များ ထပ်မံ မဖြစ်ပွားစေရန် သက်ဆိုင်ရာ မြို့နယ်အသီးသီးရှိ သံဃာ့နာယကအဖွဲ့များမှ ဆရာတော်များက ကလေးသူငယ် အခွင့်အရေးနှင့်ပတ်သက်၍ ကျောင်းတိုက်များတွင် အဓိကအလေးထား ညွှန်ကြားသင့်ကြောင်း အမျိုးသမီးနှင့် လူ့အခွင့်အရေး လှုပ်ရှားသူ ဒေါက်တာညိုညိုသင်းက CNI သတင်းဌာနသို့ ပြောသည်။

နိုင်လွန်ကြိုးနဲ့ ကြိုးတုတ်ခံရတဲ့ ပုံစံကို ကာယကံရှင် လွေးဝင်းဝင်းခိုင်က ပြန်ပြောပြနေစဉ် (ရွှေဖီမြေ)

ဒေါက်တာညိုညိုသင်းက “တချို့သော ကျောင်းတွေမှာက မိဘတွေကိုယ်က မြန်မာ့ရိုးရာ ထုံးတမ်း အစဉ်အလာက သားသမီးကို ရိုက်နှက်ပြီး ဆုံးမဖို့အတွက်ကို ဘုန်းကြီးတွေကို အပ်နှံကြတာ ရှိတယ်လေ။ ဒီဟာက ယဉ်ကျေးမှု တစ်ရပ်အနေနဲ့ ရှိနေတာပေါ့။ သို့သော်လည်း ယဉ်ကျေးမှုကလည်း အတိုင်းအတာ အကန့်အသတ် တစ်ခုအထိပဲ လက်ခံလို့ ရမှာပေါ့နော်။ ဘယ်ယဉ်ကျေးမှုမှမဆို လွန်လွန်ကြူးကြူး ကိစ္စရပ်တွေ ဖြစ်တယ်ဆိုရင်တော့ ဒါဟာ အရေးယူရမယ့် ကိစ္စပဲပေါ့။ လူ့အဖွဲ့အစည်း အသိုင်းအဝိုင်းက လက်မခံနိုင်တဲ့ အဖြစ်မျိုးတွေ ဖြစ်လာတယ် ဆိုရင် တော့ ဘယ်လိုယဉ်ကျေးမှုကိုမဆို ပြောင်းသင့်ရင် ပြောင်းရမှာပေါ့။ သာသနာ့ဘောင် ဝင်သည်ဖြစ်စေ၊ မဝင်သည် ဖြစ်စေ ကလေးသူငယ်တွေရဲ့ အခွင့်အရေးကို သူတို့ ရရှိသင့်တယ်။ ကလေးသူငယ်တွေကို ခေါင်းပုံဖြတ် အမြတ် ထုတ်ပြီးတော့ စီးပွားရှာမှုတွေ ဘာတွေ လုပ်တာရှိတယ်ဆိုရင် ဒါ လူကုန်ကူးမှုတို့ ဘာတို့အထိတောင် အရေးယူခံရ နိုင်တယ်။ ဒါကြောင့်မို့လို့ သာသနာ့ဘောင် ဝင်သည်ဖြစ်စေ၊ မဝင်သည်ဖြစ်စေ ကလေးသူငယ်ရဲ့ အခွင့်အရေးက သူ့အခွင့်အရေးက ရှိနေတာမို့လို့လေ ဒီလိုကလေးတွေက ဘယ်နေရာမှာမဆို သူတို့ရဲ့ အခြေခံအခွင့်အရေးလေး တွေကို ရသင့်ရထိုက်တယ်လို့ ပြောချင်တယ်” ဟု ပြောသည်။

အဆိုပါ သုခိတာရာမ ကျောင်းတိုက်တွင် ကျန်ရှိနေသည့် သီလရှင်တစ်ဦး၏ ဖခင်ဖြစ်သူက ၎င်း၏ သမီးဖြစ်သူမှာ ကျောင်းတိုက်တွင် ပျော်ကြောင်းနှင့် လာမခေါ်ခိုင်းကြောင်း ဖုန်းဆက်ပြောလာသည်ဟု ရွှေဖီမြေ သတင်းဌာနတွင် ဖြေဆိုထားသည်။

ရိုက်နှက်ခံထားရပြီး တစ်ကိုယ်လုံး ဒဏ်ရာတွေ ပြည့်နှက်နေ့တဲ့ လွေးနွမ်းခမ်း(ရွှေဖီမြေ)

သို့သော် ထိုသို့ ပြောခြင်းကလည်း သီလရှင်ကြီးများမှ အတင်း ပြောဆိုခိုင်းခြင်း ဖြစ်နိုင်ကြောင်းနှင့် ပြန်ပို့ထား သည့် သီလရှင်များအား မြင်တွေ့ရသဖြင့်် သမီးဖြစ်သူကို စိတ်ပူပြီး ပြန်ခေါ်ချင်ပြီဖြစ်ကြောင်း ၎င်းက ပြောထား သည်။

လက်ရှိတွင် သုခိတာရာမ ကျောင်းတိုက်သို့ တအာင်းသံဃာတော်များအဖွဲ့ (ရန်ကုန်)၊ တအာင်းစာပေနှင့် ယဥ်ကျေးမှု၊ သီလရှင်အဖွဲ့ဝင်၊ သံဃာ့နာယကနှင့် ရပ်ကွက်တာဝန်ရှိသူများက သွားရောက် တွေ့ဆုံဆွေးနွေးခဲ့ ကြခြင်း ဖြစ်သည်။

ထိုသို့ ဆွေးနွေးခဲ့ရာတွင် ကျောင်းတိုက်၌ ကျန်နေသည့် တအာင်းကလေးငယ်များအား ကျောင်းထိုင် ဆရာလေး များမှ ကိုယ်တိုင် လာရောက် ပို့ဆောင်ပေးမည့် အကြောင်းနှင့် ကျောက်မဲမြို့သို့ ရောက်ရှိသွားသည့် ကလေးငယ် များအတွက် ဆေးကုသစရိတ်များပါပေးရန် သဘောတူထားကြောင်း သိရသည်။