CNI News
၂၀၂၄ ခုနှစ်၊ စက်တင်ဘာ ၄
ရှော့တိုက်ဒုံးဖြင့် တိုက်ခိုက်ခံရသော မန္တလေးမြို့၏ လုံခြုံရေး အခြေအနေ ဘယ်လိုရှိနေသလဲဆိုသည့်အပေါ် ဒေသတွင်းနေ ပြည်သူလူထုများနှင့် နိုင်ငံရေး အကဲခတ်များကြား မေးခွန်းထုတ်လျက်ရှိနေသည်။
စက်တင်ဘာ ၃ ရက်နေ့ နံနက် ၄ နာရီဝန်းကျင်မှာ အတိုက်အခံအင်အားစုများက မန္တလေးမြို့ရှိ မြန်မာ့တပ်မတော် ၏ အလယ်ပိုင်းတိုင်းစစ်ဌာနချုပ် (လပခ) ကို ၁၀၇ မမ ရှော့တိုက်ဒုံး ၁၀ လုံးဖြင့် ပစ်ခတ်ခဲ့ကြောင်း ထုတ်ပြန်ခဲ့ သည်။
ထိုတိုက်ခိုက်မှုအတွင်း ရှော့တိုက်ဒုံး ၇ လုံးမှာ အောင်မြင်စွာ ပစ်ခတ်နိုင်ခဲ့ကြောင်း၊ တပ်မတော်ဖက်က ထိခိုက် ဒဏ်ရာရရှိမှုများ ရှိခဲ့ကြောင်း အတိုက်အခံအင်အားစုများဘက်က ထုတ်ပြန်ခဲ့ပြီး နစကဘက်က တစ်စုံတစ်ရာ ထုတ်ပြန်ခြင်းမရှိသေးပေ။
မန္တလေးမြို့ကို ရှော့တိုက်ဒုံးဖြင့် တိုက်ခိုက်ခြင်းမှာ ပြည်သူလူထုအကြား စိုးရိမ်ပူပန်၍ မတည်မငြိမ်ဖြစ်အောင် ဆောင်ရွက်ပြီး စစ်ရေးအားသာချက်ရယူခြင်းဖြစ်ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။
မန္တလေးက ဦးပိန်းတံတားကို တွေ့ရစဉ်
၎င်းက “ဒါကတော့ ဘယ်လိုခေါ်မလဲ ရှော့တိုက်ဒုံး ပစ်တယ်ဆိုတာကတော့ ထုံးစံက ရည်ရွယ်ချက်က နှစ်မျိုးရှိ တယ်၊ ၁ ကတော့ အထူးသဖြင့် မြို့တစ်မြို့ရဲ့ တည်ငြိမ်အေးချမ်းရေးက အဲဒီထဲမှာ နေနေတဲ့ ပြည်သူလူထုရဲ့ အခြေခံအပေါ်မှာ မူတည်တယ်၊ အဲဒီတော့ အဓိကတော့ ပြည်သူလူထုကို ကြောက်လန့်အောင် အနည်းဆုံးတော့ ဘာပဲပြောပြော ကြောက်လန့်ပြီးတော့ အေးအေးဆေးဆေး မနေရဘူးပေါ့၊ အဲဒီကနေမှတဆင့် နောက်ဆက်တွဲ ဘာလိုချင်သလဲဆိုတော့ တစ်ခုခုဖြစ်လို့ရှိရင် သူတို့ ပြေးအောင်လွှားအောင် ပြောရရင် ပြည်သူလူထုကြားမှာ မတည်မငြိမ်ဖြစ်ခြင်းအားဖြင့် စစ်ရေးပိုင်းမှာ အားသာချက်ယူတာမျိုး လုပ်တာပေါ့နော်၊ အဲဒီအတွက် အဲဒီလိုမျိုး လုပ်တာလို့ ပြောရမှာပေါ့၊ အခုလောလောဆယ် အနေအထားအားဖြင့် ကြည့်လိုက်ခြင်းအားဖြင့် နှောက်ယှက်ပြီး တော့ ပြောရရင်တော့ လူထုကြားထဲမှာ စိုးရိမ်ပူပန်မှုတွေ သောကတွေများအောင် အဲဒီလို လုပ်ဖို့ အဓိက ဦးတည် ထားတယ်လို့ သုံးသပ်ပါတယ်” ဟု ပြောသည်။
အဆိုပါ ရှော့တိုက်ဒုံး တိုက်ခိုက်မှုတွင် မန္တလေးမြို့ လူနေရပ်ကွက်ပေါ် ကျရောက်ပေါက်ကွဲမှုရှိခဲ့ပြီး လူနှင့် နေအိမ် အချို့ ထိခိုက်မှုလည်း ရှိခဲ့သည်။
လက်ရှိတွင် မန္တလေးမြို့အတွင်း တိုက်ပွဲများ ဖြစ်ပွားလာနိုင်သည်ဟုဆိုကာ မြို့ခံလူထု အများအပြား နီးစပ်ရာ နေပြည်တော်၊ ရန်ကုန်နှင့် တခြားဒေသသို့ ကြိုတင်တိမ်းရှောင်မှုလည်း ရှိနေသည်။
မန္တလေးမြို့သိမ်းတိုက်ပွဲ လုပ်လာမည်ဆိုလျှင် ပြည်သူ့ကာကွယ်ရေးတပ် (PDF)များက အဓိက လုပ်လာနိုင် ကြောင်း မြန်မာ့နိုင်ငံရေးလေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။
မန္တလေးမြို့ကို တွေ့ရစဉ်
၎င်းက “ဒီတစ်ပွဲမှာတော့ PDF တွေက ဦးဆောင်သွားရလိမ့်မယ်၊ ကျန်တဲ့ဟာတွေက သူတို့ကိုလည်း အကြမ်းဖက် ကြေညာလိုက်ပြီဆိုတော့ သူတို့က မအလအပေါ်မှာ ဘာမှ သူတို့က ထောက်ထားစရာ မရှိတော့ဘူး။ မအလ မင်းတို့ကိုလည်း မဆွေးနွေးတော့ဘူး အကြမ်းဖက်ပြီ။ ငါတို့ကတော့ ငါတို့လမ်းစဉ်နဲ့ သွားတော့မယ်၊ မင်းတို့လည်း ကြိုက်တာလုပ်လို့ ကြေညာလိုက်ပြီပေါ့၊ စစ်ကြေညာလိုက်ပြီ အဲဒါကြောင့်မို့လို့ မန္တလေးမြို့သိမ်းတိုက်ပွဲမှာ ပါလာ မယ်ဆိုရင် ဘာမှ မဆန်းကြယ်ဘူး။ အဲဒီလို ယူဆပါတယ်” ဟု ပြောသည်။
ညီနောင်မဟာမိတ် ပူးပေါင်းတပ်တို့ ဆင်နွှဲခဲ့သော ၁၀၂၇ စစ်ဆင်ရေး ဒုတိယလှိုင်းတွင် ရှမ်းမြောက်ရှိ မြို့များ အပါအဝင် မန္တလေးတိုင်းဒေသကြီးအတွင်းရှိ မိုးကုတ်၊ စဉ့်ကူး၊ မတ္တရာ၊ သပိတ်ကျင်းတို့တွင် မြန်မာ့တပ်မတော်နှင့် တိုက်ပွဲများ ဖြစ်ပွားခဲ့သည်။
လက်ရှိတွင်လည်း ပြင်ဦးလွင်မြို့အနီးက တောင်ခမ်းတွင် မြန်မာ့တပ်မတော်နှင့် ပလောင်ပြည်လွတ်မြောက်ရေး တပ်ဦး (PSLF/TNLA)၊ ပူးပေါင်းမဟာမိတ်တို့အကြား တိုက်ပွဲများ အပြင်းအထန် ဖြစ်ပွားလျက်ရှိနေသည်။
