CNI News

၂၀၂၄ ခုနှစ်၊ ဇွန် ၅

ရှမ်းပြည်နယ်မြောက်ပိုင်းတွင် ကချင်လွတ်လပ်ရေးတပ်မတော် (KIA) နှင့် ပလောင်ပြည်လွတ်မြောက်ရေးတပ်ဦး (PSLF/TNLA) တို့ နယ်မြေအငြင်းပွားမှု မည်ကဲ့သို့ ဖြေရှင်းနေကြသလဲဆိုသည့်အပေါ် သုံးသပ်မှုများ ရှိနေသည်။

ပြီးခဲ့သည့် ၂၀၂၃ ခုနှစ်၊ အောက်တိုဘာ ၂၇ ရက်နေ့က စတင်ခဲ့သော ညီနောင်မဟာမိတ်သုံးဖွဲ့ (TNLA-AA-MNDAA) ၏ ၁၀၂၇ စစ်ဆင်ရေးနောက်ပိုင်း ရှမ်းမြောက်တွင် နယ်မြေပြဿနာ ပိုမိုဖြစ်ပေါ်လာခဲ့ပြီး ထိတွေ့တိုက်ပွဲများ ဖြစ်ပွားမှု ရှိခဲ့သည်။

ထိုကိစ္စကို တော်လှန်ရေးတပ်ဖွဲ့ အချင်းချင်း ဖြေရှင်းရမှာဖြစ်ကြောင်း၊ ငြိမ်းချမ်းရေးနည်းလမ်းဖြင့် တွေ့ဆုံဆွေးနွေး ရန် လိုအပ်ကြောင်း မြန်မာ့နိုင်ငံရေးလေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြော သည်။

၎င်းက “ဒါကတော့ သူတို့တော်လှန်ရေးတပ်ဖွဲ့ အချင်းချင်း ဖြေရှင်းရမှာပဲလေ၊ တတ်နိုင်သမျှလည်း အချင်းချင်း ကြားမှာ ဖြေရှင်းနေကြတာ တွေ့တာပဲ၊ အဲဒီတော့ ဆက်ဖြေရှင်းကြမယ်နဲ့ တူပါတယ်။ ပဋိပက္ခတော့ ရှိမှာပဲဗျ၊ ဘယ်နေရာမဆို အဲဒါကို အေးအေးချမ်းချမ်းနဲ့ စားပွဲပေါ်ရောက်အောင် ဆွေးနွေးပြီးတော့ ဖြေရှင်းဖို့ လိုတာပေါ့။ အဲဒီလိုဖြစ်အောင် ကြိုးစားနေကြတာနဲ့ တူပါတယ်” ဟု ပြောသည်။

KIA တပ်ဖွဲ့ကို တွေ့ရစဉ်

ပြီးခဲ့သည့် လပိုင်းက ကွတ်ခိုင်မြို့အတွင်း KIA ဆက်ဆံရေး ဖွင့်လှစ်ထားမှုကို ဖယ်ရှားပေးဖို့ ပြောဆိုခဲ့သလို မူဆယ်မြို့နယ် ကောင်းနောင်ရပ်ကွက်ရှိ ဦးကျောက်တဲ့ယုန် ပိုင်ဆိုင်သော ONE NINE ဓာတ်ဆီဆိုင်အတွင်း အခြေချထားသည့် KIA အဖွဲ့များအား အဆိုပါနေရာမှ ဖယ်ရှားပြီး မူလပိုင်ရှင်အား ပြန်ပေးရန် TNLA က စာထုတ် ခဲ့သည့် ဖြစ်စဉ်များလည်း ရှိခဲ့သည်။

နယ်မြေအငြင်းပွားမှု ကိစ္စများနှင့်ပတ်သက်၍ တရားဝင် ကြောင်းကြားခြင်း မရှိကြောင်း KIA ၏ ပြန်ကြားရေး တာဝန်ခံ ဗိုလ်မှူးကြီးနော်ဘူက CNI သတင်းဌာနသို့ ပြောသည်။

၎င်းက “အဲဒါနဲ့ ပတ်သက်လို့တော့ ကျနော်တို့ကို တရားဝင် အကြောင်းကြားတာတော့ မရှိဘူး၊ ရှေ့တန်းသမားတွေ အချင်းချင်း နည်းနည်းထိတွေ့ပြီးမှ စကားများတာ၊ အချင်းများတာများ ဖြစ်တာလားပေါ့နော်၊ တရားဝင်ဗဟိုကနဲ့ ညွန်ကြားချက်လောက်တော့ မဟုတ်လောက်ဘူးလို့ ကျနော်ထင်တယ်။ ဘာမှ တိတိကျကျတော့ အကြောင်းကြား တာ မရှိဘူး။ လိုင်းပေါ်မှာ တွေ့တာလောက်ပဲ ရှိပါတယ်။ ကျနော်တို့ တရားဝင်အကြောင်းကြား ရုံးပိုင်းဆိုင်ရာက (နေ)နဲ့ ဘာမှ အကြောင်းကြားတာ မရှိဘူး” ဟု ပြောသည်။

ထို့အတူ ရှမ်းပြည်တိုးတက်ရေးပါတီ (SSPP) နှင့် TNLA အကြားတွင် လည်းကောင်း၊ TNLA နှင့် KIA အကြားတွင် လည်းကောင်း၊ KIA နှင့် MNDAA အကြားတွင် လည်းကောင်း နယ်မြေအငြင်းပွားမှုများကြောင့် ထိတွေ့ပစ်ခတ် မှုများ ရံဖန်ရံခါ ဖြစ်ပွားလေ့ရှိနေသည်။

မဟာမိတ်တပ်ဖွဲ့များ သာမက အခြားသော တိုင်းရင်းသား လက်နက်ကိုင်တပ်ဖွဲ့များနှင့်ပါ နိုင်ငံရေးနည်းလမ်းဖြင့် ဖြေရှင်းသွားမည်ဖြစ်ကြောင်း TNLA မှ သတင်းနှင့် ပြန်ကြားရေးတာဝန်ခံ လွေးယေဦးက CNI သတင်းဌာနသို့ ပြောသည်။

ကွတ်ခိုင်မြို့အ၀င်ကို တွေ့ရစဉ်

၎င်းက “ဟုတ်ကဲ့ မဟာမိတ်တပ်ဖွဲ့တွေဖြစ်ဖြစ် အခြားအဖွဲ့တွေပဲဖြစ်ဖြစ် ကျမတို့ နိုင်ငံရေးနည်းလမ်းတွေနဲ့ တွေ့ဆုံဆွေးနွေးပြီးတော့မှ ဒီကိစ္စက ပြေလည်သွားတဲ့ဟာ ဖြစ်တယ်ပေါ့လေ၊ ကွတ်ခိုင်ဖက်မှာလည်း ဒီအခြေအနေတွေက အဆင်ပြေသွားပြီးပါပြီ” ဟု ပြောသည်။

၁၀၂၇ စစ်ဆင်ရေးအတွင်း စစ်စခန်းပေါင်း အများအပြားကို သိမ်းယူခဲ့သလို လောက်ကိုင်၊ ကုန်ကြမ်း၊ ချင်းရွှေ ဟော်၊ ဖောင်းဆိုင်၊ ကွမ်လုံ၊ ဟိုပန်၊ ပန်ဝါ၊ သိန္နီ၊ ကွတ်ခိုင်၊ နမ့်ခမ်း၊ နမ့်ဆန်၊ မန်တုံ၊ နမ္မတူ၊ မိုင်းငေါ့ စသည့် မြို့နယ်များကိုလည်း မြန်မာ့တပ်မတော်က လက်လွှတ်ခဲ့ရသည်။

ထို့နောက် ရှမ်းမြောက်တွင် လှုပ်ရှားကြသည့် ရှမ်းလက်နက်ကိုင်တပ် (SSPP)၊ ကိုးကန့်တပ် (MNDAA)၊ တအာင်းတပ် (TNLA)နှင့် ကချင်တပ် (KIA) တို့အကြား နယ်မြေအငြင်းပွားမှု သိသာစွာဖြစ်ပေါ်လာခဲ့သည်။

ရှမ်းမြောက်တွင် မြန်မာ့တပ်မတော် အပါအဝင် SSPP၊ TNLA၊ MNDAA၊ KIA၊ သျှမ်းပြည်ပြန်လည်ထူထောင်ရေး ကောင်စီ (RCSS)၊ အာရက္ခ (AA) အပြင် ပြည်သူ့စစ်များလည်း လှုပ်ရှားလျက်ရှိနေသည်။