CNI News
၂၀၂၃ ခုနှစ်၊ ဇန်နဝါရီ ၂၇
နိုင်ငံရေးပါတီများ ပြန်လည် မှတ်ပုံတင်ရန် နစက-က ထုတ်ပြန်ခဲ့သော်လည်း အမျိုးသားဒီမိုကရေစီအဖွဲ့ချုပ် (NLD) အနေဖြင့် မှတ်ပုံတင် ပြန်တင်နိုင်ခြေ မရှိကြောင်း မြန်မာ့နိုင်ငံရေးလေ့လာသုံးသပ်သူ တရားလွှတ်တော် ရှေ့နေ ဦးကြီးမြင့်က CNI သတင်းဌာနသို့ ပြောသည်။
လာမည့် ဩဂုတ်လအတွင်း ရွေးကောက်ပွဲ ကျင်းပသွားရန် ပြင်ဆင်နေသည့်အတွက် နိုင်ငံရေးပါတီများ မှတ်ပုံတင် ဥပဒေကို ဇန်နဝါရီ ၂၆ ရက်မှာ နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က လက်မှတ်ရေးထိုး၍ ထုတ်ပြန် ကြေညာ သွားခဲ့သည်။
ဦးကြီးမြင့်က “ကျနော်ကတော့ မှတ်ပုံတင် ပြန်တင်နိုင်မယ့် အနေအထား မရှိဘူးလို့ ဒီလိုယုံကြည်ပါတယ်၊ ဘာလို့လဲဆိုလို့ရှိရင် သူတို့ တစ်ခါတည်း တင်ပြီးပြီလေ၊ ၂၀၁၀ ရွေးကောက်ပွဲကို ဦးသိန်းစိန် လက်ထက်မှာ ဝင်မယ် လုပ်တော့ ပါတီတွေ မှတ်ပုံတင် ပြန်တင်ရမယ်ဆိုတာမျိုး လုပ်တယ်၊ နောက်တစ်ခါကြတော့ သူတို့ ကြားဖြတ် ရွေးကောက်ပွဲဝင်ဖို့ ဦးသိန်းစိန်က ဖွင့်ပေးလိုက်တော့ သူတို့ကို ဒီအတိုင်းတော့ လုပ်လို့မရဘူး။ ပါတီကို မှတ်ပုံတင် ပြန်တင်ရမယ်ဆိုတော့ သူတို့ ပြန်တင်ရတယ်၊ NLD အဲဒီတုန်းက အဲတုန်းကတော့ ပုံစံတစ်မျိုးပေါ့၊ ရှင်းရှင်းပြောရ ရင်တော့ နိုင်ငံရေးသမားတွေကတော့ ပြောတာပဲလေ၊ ပါတီဆိုတာ ဘာမှအရေးမကြီးဘူး။ ပြည်သူတွေ ထောက်ခံ နေသမျှ ဘယ်အချိန် ပြန်ဖွဲ့ဖွဲ့ ရတယ်ဆိုတဲ့ စကားရှိတယ်၊ ဒါကြောင့်မို့ ဦးဝင်းတင်တို့က အဲဒီသဘောထားကို ပြောတယ်၊ ဒါကြောင့်မို့လို့ ဦးဝင်းတင် သဘောထားကို ဒေါ်စုတို့က နောက်ပိုင်းမှာ အစဉ်တစိုက် မလိုက်နာတော့ ဦးဝင်းတင်လည်းပဲ အငြင်းမပွားတော့ဘူးပေါ့နော်၊ အဲဒီလိုပဲ အသာပဲ နေလိုက်ကြတယ်၊ အဲတုန်းက တစ်ခါပြန်တင် တယ်၊ ဒီတစ်ခါတော့ လုံးဝတင်တော့မှာ မဟုတ်တော့ဘူး။ ဒီတစ်ခါတင်လို့ကတော့ ခွေးဖြစ်တော့မှာပဲလေ၊ ဒါကြောင့်မို့လို့ တင်စရာအကြောင်း လုံးဝမရှိဘူးလို့ မြင်ပါတယ်” ဟု CNI သတင်းဌာနသို့ ပြောသည်။
ဒေါ်အောင်ဆန်းစုကြည်ကိုတွေ့ရစဉ်
လက်ရှိတွင် NLD အနေဖြင့် ၎င်းတို့၏ ခေါင်းဆောင်အများစု ထောင်ထဲမှာ ရှိနေကြောင်း၊ သို့သော်လည်း နစကနှင့် သင့်မြတ်သည့် ပုဂ္ဂိုလ်များ NLD အမည်ခံကာ မှတ်ပုံတင် ပြန်တင်မလားဆိုသည်ကို မပြောနိုင်ကြောင်း ရခိုင် နိုင်ငံရေးသမား ဦးဖေသန်းက CNI သတင်းဌာနသို့ ပြောသည်။
၎င်းက “NLD ကတော့ ခေါင်းဆောင် အများစုကတော့ ထောင်ထဲမှာ ရှိတယ်၊ တချို့တောင်မှ ကြိုးပေးကွပ်မျက် ခံရတာရှိတယ်၊ လွှတ်တော်ကိုယ်စားလှယ် အများအပြား ဖမ်းခံရတာရှိတယ်၊ CRPH တို့၊ NUG တို့ ဆိုတာလည်း ဒီစစ်ကောင်စီကို တော်လှန်တိုက်ခိုက်နေတဲ့ အဖွဲ့အစည်းတွေ ဖြစ်နေတယ်၊ ဆိုတော့ သူ့အနေနဲ့တော့ ပြောလည်း ပြောထားပြီးပြီပေါ့၊ ရွေးကောက်ပွဲ အသိအမှတ်မပြုဘူး။ ရွေးကောက်ပွဲလည်း မဝင်ဘူးပေါ့၊ ဒါပေမဲ့ သူတို့ထဲက အဲဒီလို စုန်းပြူးတွေများ ရှိမလားတော့ မပြောတတ်ဘူးပေါ့နော်၊ NLD အမည်ခံပေါ့၊ စစ်ကောင်စီက ပလဲနံပသင့်တဲ့ ပုဂ္ဂိုလ်တွေနဲ့ NLD အမည်ခံပြီး ဝင်မလားပေါ့၊ ဒါကတော့ နိုင်ငံရေးနဲ့ ဆိုင်သွားပြီပေါ့နော်၊ ဘယ်သူပဲဝင်ဝင်ပေါ့၊ NLD ပဲ ဖြစ်ပါလိမ့်မယ်၊ NLD ဆိုတဲ့ နာမည်တော့ ရပါလိမ့်မယ်၊ ဒါပေမဲ့ ပြည်သူက အသိအမှတ်ပြုဖို့က ခက်တယ်၊ ဒါမှမဟုတ် တခြားနာမည်နဲ့ ပြောင်းဝင်မလားပေါ့၊ ဒါတွေလည်း ကျနော်တို့တော့ စဉ်းစားနေတာပေါ့၊ စဉ်းစား ကြည့်တာပေါ့နော်၊ ဘယ်လိုပဲဝင်ဝင် ဒီပါတီတွေရဲ့ သမိုင်းက ကောင်းစရာ မရှိဘူး။ ဒီအချိန်မှာ ဒီတော့ NLD နောက်တစ်ပါတီ ပြိုင်မလားဆိုတော့ ပြိုင်နိုင်တယ်၊ NLD နာမည်နဲ့ ဖြစ်စေ၊ တခြားနာမည်နဲ့ ဖြစ်စေ၊ NLD ထဲက တချို့ ပုဂ္ဂိုလ်တွေက ပြိုင်နိုင်တယ်ပေါ့နော်၊ အရင်လည်း အဲဒီလို လုပ်ခဲ့တာတွေ ရှိတယ်” ဟု ပြောသည်။
ပြည်ထောင်စု တစ်ဝန်းလုံး၌ စည်းရုံးမည့် ပါတီဖြစ်ပါက ပါတီရန်ပုံငွေ သိန်း ၁၀၀၀ ကို မြန်မာ့စီးပွားရေးဘဏ် တစ်ခုခုတွင် ငွေစာရင်းဖွင့်လှစ်ရမည်ဖြစ်ကြောင်း၊ ထို့အတူ ပါတီဝင်ဦးရေ ၁၀၀၀၀၀ ကို နိုင်ငံရေးပါတီအဖြစ် မှတ်ပုံတင်ခွင့် ပြုသည့်နေ့မှစ၍ ရက်ပေါင်း ၉၀ အတွင်း စည်းရုံးရမည်ဖြစ်ကြောင်း ထုတ်ပြန်ချက်တွင် ပါရှိသည်။
NLD ပါတီဝင် အချို့မှ မှတ်ပုံတင်ပြီး ရွေးကောက်ပွဲ ဝင်လာနိုင်ကြောင်း သို့သော်လည်း ပါတီဝင် အင်အား ၁ သိန်း ရရှိရန် ခက်ခဲကြောင်း ဦးကြီးမြင့်က ပြောသည်။
NLD ပါတီ ထောက်ခံသူများကိုတွေ့ရစဉ်(ဖရွန်းတီးယားမြန်မာ)
၎င်းက “ဒါပေမဲ့ တစ်ခုရှိတာက အန္တရာယ်ရှိတာက NLD က အဟောင်းတွေက မဝင်တော့ဘူးဆိုရင် NLD ထဲမှာ ဖောက်ပြန်နေတဲ့ အုပ်စုတွေရှိတယ်လေ၊ ပါတီထောင်နိုင်တယ်၊ NLD အနေနဲ့ ပါတီထောင်သွားနိုင်တယ်၊ ထောင် သွားပြီးတော့ ရွေးကောက်ပွဲ ဝင်သွားနိုင်တာတော့ ရှိတယ်၊ ဘာလို့ဆို ပင်မပါတီကြီးက မတင်တော့ဘူးလေ၊ ပင်မ ပါတီကြီးက မှတ်ပုံမတင်တော့ဘူးဆိုရင် သူတို့က သူတို့ဟာ သူတို့ အနေနဲ့ မှတ်ပုံတင် သွားနိုင်တယ်၊ ရန်ပုံငွေ တစ်ထောင်ဆိုတာလဲ သူတို့အတွက် ဘာမှမခက်ဘူးလေ၊ ဒါပေမဲ့ တစ်ခုတော့ ရှိတယ်၊ ပါတီဝင် အင်အား ၁ သိန်း ရှိရမယ်ဆိုတာတော့ သူတို့ ဘယ်လိုကျော်ဖြတ်မလဲ အဲဒါ။ NLD ကို ဘယ်သူမှ ဝင်မှာ မဟုတ်တော့ဘူးလေ၊ အဲဒီ ၁ သိန်းကို ဘယ်လိုလုပ်လို့ ပြမှာလဲ၊ NLD ပါတီ အဟောင်းကလည်း တင်မှာ မဟုတ်ဘူး။ NLD ပါတီ အသစ်အနေနဲ့ ထည့်ရင်လည်း လူတစ်သိန်းရဖို့ မလွယ်ဘူး။ NLD ကတော့ ဒီရွေးကောက်ပွဲကို ဝင်ဖို့ မလွယ်ဘူးထင်တယ်” ဟု ပြောသည်။
လက်ရှိတွင် NLD ပါတီ၏ ထိပ်ပိုင်း ခေါင်းဆောင်များဖြစ်သည့် ဒေါ်အောင်ဆန်းစုကြည်၊ ဦးဝင်းမြင့်၊ ဒေါက်တာ ဇော်မြင့်မောင်တို့ ဖမ်းဆီးထိန်းသိမ်းခြင်း ခံထားရသည်။
တခြားသော NLD ၏ ဗဟိုအလုပ်အမှုဆောင်ကော်မတီ အဝင်ဖွဲ့ဝင် ဦးဟံသာမြင့်၊ ဒေါက်တာမျိုးညွန့်တို့ ပြန်လည် လွတ်မြောက်လာပြီး ဖြစ်သော်လည်း နိုင်ငံရေးလှုပ်ရှားမှုကို မတွေ့ရသလို တခြား အဖွဲ့ဝင်များဖြစ်သည့် ဒေါ်မေဝင်းမြင့်နှင့် ဦးအောင်ကြည်ညွန့်တို့ကတော့ နွေဦးတော်လှန်ရေးကို ဆောင်ရွက်လျက်ရှိနေသည်။
