CNI Sport News
၂၀၂၆ ခုနှစ်၊ မတ်လ ၁၇
ဆန်းတို့စ်အသင်း တိုက်စစ်မှူး နေမာဟာ ဒီလထဲကစားမယ့် ဘရာဇီးလ်အသင်းရဲ့ ခြေစမ်းပွဲတွေအတွက် နည်းပြ အန်ဆယ်လော့တီ ထုတ်ပြန်ခဲ့တဲ့ အသင်းလူစာရင်းမှာ ချန်လှပ်ခြင်း ခံခဲ့ရပါတယ်။
နေမာဟာ နည်းပြ အန်ဆယ်လော့တီ ကိုယ်တိုင် တက်ရောက်ကြည့်ခဲ့တဲ့ ဆန်းတို့စ်အသင်းရဲ့ပွဲကို လွဲချော်ခဲ့ ပြီးနောက် ဘရာဇီးလ်အသင်း လူစာရင်းထဲ ချန်လှပ်ခြင်းခံခဲ့ရတာပါ။
နေမာကတော့ လူစာရင်းထဲ မပါဝင်ခဲ့တဲ့အပေါ် စိတ်ပျက်ပြီး ဝမ်းနည်းမိပေမယ့် နေ့တိုင်း အာရုံစိုက်လုပ်ဆောင် ကာ ရည်မှန်းချက် ပန်းတိုင်ဖြစ်တဲ့ နောက်ဆုံး လူစာရင်းထဲ ပါဝင်အောင် ကြိုးပမ်းသွားမယ်လို့ ပြောခဲ့ပါတယ်။
ဘရာဇီးလ်အသင်းအတွက် ၇၉ ဂိုး သွင်းယူထားပြီး ဂိုးသွင်းအများဆုံး ကစားသမားအဖြစ် ရပ်တည်နေတဲ့ နေမာ ဟာ ၂၀၂၃ ခုနှစ်၊ အောက်တိုဘာလ နောက်ပိုင်း နိုင်ငံအသင်းအတွက် ပါဝင်ရခြင်း မရှိတော့ပါဘူး။
ဒဏ်ရာတွေနဲ့ ရုန်းကန်ခဲ့ရတဲ့ နေမာဟာ ဘရာဇီးလ်အသင်းအတွက် သူ့ရဲ့နောက်ဆုံးပြိုင်ပွဲ ဖြစ်လာနိုင်တဲ့ ၂၀၂၆ ကမ္ဘာ့ဖလားပြိုင်ပွဲမှာ ပါဝင်ချင်တဲ့ ဆန္ဒကို မကြာခဏ ပြောနေခဲ့တာ ဖြစ်ပါတယ်။
နေမာကို တွေ့ရစဉ်
ဘရာဇီးလ်အသင်း နည်းပြ အန်ဆယ်လော့တီက နေမာဟာ ရာနှုန်းပြည့် ကြံ့ခိုင်မှု မရှိတာကြောင့် လူစာရင်းထဲ မပါဝင်ခဲ့တာဖြစ်ပြီး ကြံ့ခိုင်မှုပြည့်ဝရင် ကမ္ဘာ့ဖလား လူစာရင်းထဲမှာ ပါဝင်နိုင်တယ်လို့ ပြောခဲ့ပါတယ်။
ဒါ့ပြင် အန်ဆယ်လော့တီက နေမာ အနေနဲ့ ဆက်ကြိုးစားကစားပြီး အရည်အချင်းတွေကိုပြသကာ ကောင်းမွန်တဲ့ ရုပ်ပိုင်းဆိုင်ရာ အခြေနေကို ထိန်းသိမ်းရမယ်လို့ ပြောခဲ့တာပါ။
ရီးရယ်လ်အသင်းကနေ လိုင်ယွန်အသင်းထံ အငှားကစားပြီး ခြေစွမ်းပြသနေတဲ့ အန်းဒရစ်ဟာ ဘရာဇီးလ်အသင်း လူစာရင်းထဲ ပါဝင်လာခဲ့ပြီး ဘရန်ဖို့ဒ်အသင်း တိုက်စစ်မှူး အီဂေါသီယာဂိုလည်း ပထမဆုံးအကြိမ် ခေါ်ယူခြင်း ခံခဲ့ရပါတယ်။
နည်းပြ အန်ဆယ်လော့တီက အန်းဒရစ်၊ ရာယန်နဲ့ သီယာဂိုတို့ဟာ သူတို့ရဲ့လိဂ်တွေမှာ ခြေစွမ်းပြသနေလို့ ဒီလူစာရင်းထဲ ပါဝင်သင့်တယ်လို့ ပြောခဲ့ပါတယ်။
ဘရာဇီးလ်အသင်းဟာ မတ်လ ၂၆ ရက် ဘော်စတွန်မှာ ပြင်သစ်၊ ၃၁ ရက် အော်လန်ဒိုမှာ ခရိုအေးရှားအသင်းနဲ့ ခြေစမ်းပွဲ ယှဉ်ပြိုင်မှာ ဖြစ်ပါတယ်။
Source: CNA
