CNI Sport News

၂၀၂၅ ခုနှစ်၊ ဧပြီ ၃

ဂါလာတာစာရေးအသင်းက ဖီနာဘာချီအသင်းနည်းပြ မော်ရင်ဟိုဟာ တူရကီဖလားပြိုင်ပွဲအပြီးမှာ နည်းပြဖြစ်သူ ဘူရက်ခ်ကို ကိုယ်ထိလက်ရောက် တိုက်ခိုက်ခဲ့တယ်လို့ စွပ်စွဲခဲ့ပါတယ်။

ဂါလာတာစာရေးအသင်းက ဖီနာဘာချီအသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ တူရကီဖလား ကွာတားဖိုင်နယ် ပွဲစဉ် အပြီးမှာ မော်ရင်ဟိုဟာ ဘူရက်ခ်ရဲ့နှာခေါင်းကို ညှစ်ခဲ့တဲ့ ရုပ်သံတွေ ဆိုရှယ်မီဒီယာပေါ်မှာ ထွက်ပေါ်လာခဲ့တာပါ။ 

ဒီပွဲအပြီး မော်ရင်ဟိုနဲ့ ဘူရက်ခ်တို့ဟာ ကွင်းလယ်စက်ဝိုင်းထဲမှာ ပွဲကိုတာဝန်ယူခဲ့တဲ့ ဒိုင်လူကြီးတွေနဲ့ အပြန် အလှန် စကားပြောနေခဲ့တာဖြစ်ပါတယ်။ 

ဘူရက်ခ်ဟာ စကားပြောပြီး ထွက်ခွာချိန်မှာ မော်ရင်ဟိုဟာ သူ့ရဲ့အနောက်ကိုလိုက်ပြီး သူ့ရဲ့နှာခေါင်းကို ညှစ်ခဲ့တာပါ။

ဘူရက်ခ်ဟာ ဒီဖြစ်ရပ်ကြောင့် မျက်နှာကိုအုပ်ပြီး ကွင်းထဲလဲကျသွားခဲ့တာ ဖြစ်ပါတယ်။ 

 မော်ရင်ဟိုကို တွေ့ရစဉ်

ဂါလာတာစာရေးအသင်းဒုဥက္ကဋ္ဌ မီတင်က သူတို့ရဲ့နည်းပြ ဘူရက်ခ်ကို မော်ရင်ဟိုက ကိုယ်ထိလက်ရောက် တိုက်ခိုက်ခဲ့တဲ့အတွက် အဖွဲ့ချုပ်က အရေးမယူခင် ဖီနာဘာချီအသင်းက အရေးယူမှုတွေပြုလုပ်မယ်လို့ ယုံကြည်ကြောင်း ပြောခဲ့ပါတယ်။ 

ဂါလာတာစာရေးအသင်းနည်းပြ ဘူရက်ခ်က မော်ရင်ဟိုရဲ့ လုပ်ရပ်ကြောင့် သူ့မှာခြစ်ရာ အနည်းငယ်ရှိခဲ့တယ်လို့ ပွဲအပြီး အင်တာဗျူးမှာ ပြောခဲ့တာပါ။

ဒါအပြင် ဘူရက်ခ်က သူဟာ ဒီဖြစ်ရပ်ကို ချဲ့ကားပြီးပြောမှာ မဟုတ်ပေမယ့် ဒါက အဆင့်အတန်းရှိတဲ့ လုပ်ရပ် မဟုတ်ဘူးလို့ ပြောခဲ့တာဖြစ်ပါတယ်။

ပြီးခဲ့တဲ့ ဖေဖော်ဝါရီက ဂါလာတာစာရေးနဲ့ ဖီနာဘာချီအသင်းတို့ ဂိုးမရှိသရေကျခဲ့တဲ့ တူရကီစူပါလိဂ်ပွဲစဉ်မှာ မော်ရင်ဟိုဟာ သူတို့ကို လူမျိုးရေးခွဲခြားခဲ့တယ်ဆိုပြီး ဂါလာတာစာရေးအသင်းက ရာဇဝတ်မှုဆိုင်ရာစွဲဆိုမှုတွေ ပြုလုပ်မယ်လို့ ကြေညာခဲ့သေးတာပါ။

မော်ရင်ဟိုဟာ ဖီနာဘာချီအသင်း နည်းပြအဖြစ် တူရကီကို ရောက်ရှိလာကတည်းက ဒိုင်လူကြီးတွေကို ဝေဖန်တာ အပါအဝင် အခြားဖြစ်ရပ်တွေကြောင့် ပွဲပယ်နဲ့ ဒဏ်ကြေးငွေတွေ ချမှတ်ခြင်းခံခဲ့ရပြီး ဒီဖြစ်ရပ်ကြောင့်လည်း အရေးယူမှုခံရဖွယ်ရှိနေတာ ဖြစ်ပါတယ်။ 

Source: BBC