CNI Sport News
၂၀၂၃ ခုနှစ်၊ ဒီဇင်ဘာ ၂၂
ကမ္ဘာ့ဟဲဗီးဝိတ်ချန်ပီယံဟောင်း အန်သိုနီဂျိုရွှာဟာ ဆော်ဒီမှာထိုးသတ်မယ့်ပွဲစဉ်မှာ ပြိုင်ဘက် ဝေါလ်လင်ကို အရေးနိမ့်ခဲ့မယ်ဆိုရင် အားကစားလောကမှာ သူ့အတွက် အနာဂတ်မရှိတော့ဘူးလို့ ပြောလိုက်ပါတယ်။
အန်သိုနီဂျိုရွှာက “ကျနော့်ရဲ့နှလုံး၊ကျနော့်ရဲ့ စိတ်ဝိညာဉ်နဲ့ ကျနော့်ခန္ဓာကိုယ်မှာရှိတဲ့ ဆဲလ်တိုင်းက ဝေါလ်လင် နဲ့ပွဲအတွက် အပြည့်အဝအာရုံစိုက်ထားပြီး ကျနော်လုပ်နိုင်တဲ့အရာကို လုပ်သွားမှာပါ။ ကျနော့်ဘဝမှာ ဘယ်ကို သွားမလဲဆိုတာ သိပါတယ်။ ဒါပေမယ့်ပြောစရာရှိတာက ဒီပွဲကို မကျော်ဖြတ်နိုင်ဘူးဆိုရင်တော့ အနာဂတ် ဆိုတာလည်း ရှိမှာမဟုတ်ပါဘူး။ ဒါကြောင့်လည်း ဒီပွဲအတွက်အကောင်းဆုံးလုပ်ထားပါတယ်” လို့ ပြောခဲ့တာပါ။
ကမ္ဘာ့ချန်ပီယံ ၂ ကြိမ်ဖြစ်ခဲ့တဲ့ အန်သိုနီဂျိုရွှာဟာ ၂၀၂၁ ခုနှစ်က ယူကရိန်းနိုင်ငံသား အူဆက်ခ်ကို အရေးနိမ့်ပြီး သူ့ရဲ့ ချန်ပီယံခါးပတ်တွေဖြစ်တဲ့ WBA၊IBF၊ WBO နဲ့ IBO ခါးပတ်တွေကို လွှဲပြောင်းပေးခဲ့ရတာဖြစ်ပါတယ်။ ဗြိတိန်ပရော်ဖက်ရှင်နယ်လက်ဝှေ့သမားဟာ အူဆက်ခ်ကို အရေးနိမ့်ပြီးနောက် ထိုးသတ်ခဲ့တဲ့ နောက်ဆုံး ၂ ပွဲစလုံးအနိုင်ရခဲ့ပြီး သြဂုတ်လက ဟီလီနီးယက်စ်နဲ့ နောက်ဆုံးပွဲထိုးသတ်ခဲ့တာပါ။ အန်သိုနီဂျိုရွှာဟာ ဒီပွဲပြီးရင် ဝေလ်ဒါနဲ့ ထိုးသတ်ဖွယ်ရှိတယ်လို့ သတင်းတွေထွက်နေပေမယ့် အန်သိုနီဂျိုရွှာကတော့ ဒီပွဲကိုပဲ အပြည့်အ၀ အာရုံစိုက်ထားတယ်လို့ ပြောခဲ့ပါတယ်။
အန်သိုနီဂျိုရွှာနဲ့ ထိုးသတ်မယ့် ဆွီဒင်နိုင်ငံသား ဝေါလ်လင်ဟာ ပွဲပေါင်း ၂၈ ပွဲထိုးသတ်ခဲ့တာမှာ ၁ ပွဲသာ အရေးနိမ့် ထားပြီး အရေးနိမ့်ခဲ့တဲ့ပွဲစဉ်က တိုင်ဆန်ဗျူရီနဲ့ ထိုးသတ်ခဲ့တဲ့ ၂၀၁၉ ခုနှစ်က ပွဲစဉ်ဖြစ်တာပါ။ ဒီဇင်ဘာ ၂၃ ရက် ဆော်ဒီမှာကျင်းပမယ့်ပွဲစဉ်မှာ ဝေါလ်လင်နဲ့ အန်သိုနီဂျိုရွှာတို့ပွဲစဉ်အပြင် ဝေလ်ဒါနဲ့ ပါကား၊ ဘီဗောလ်နဲ့ အသာ တို့ရဲ့ ပွဲစဉ်အပါအဝင် ပွဲစဉ်အများအပြားပါဝင်မှာဖြစ်တယ်လို့ သိရပါတယ်။
Source:ChannelNewsAsia
