CNI Sport News
၂၀၂၃ ခုနှစ်၊ ဇူလိုင် ၂၈
ယူနိုက်တက် တိုက်စစ်မှူးဟောင်း တစ်ဦးဖြစ်တဲ့ အစ်ဟာလိုက ရော်နယ်ဒို ဆော်ဒီကို ပြောင်းလာတာဟာ ဘောလုံးအပေါ် စိတ်ပြင်းပြမှုကြောင့် မဟုတ်ဘဲ ငွေကြောင့်လို့ ပြောလိုက်ပါတယ်။
အစ်ဟာလိုက “ငယ်ရွယ်တဲ့ အချိန်တုန်းက ဘောလုံးကို ဝါသနာကြောင့်နဲ့ စိတ်ပြင်းပြမှုကြောင့် ကစားကြတာပါ။ အဲ့ဒီအချိန်တုန်းက ငွေကို ဂရုမစိုက်ကြပါဘူး။ ကျနော်ဆိုလည်း တစ်ဘဝလုံး စိတ်ပြင်းပြမှုကြောင့် ကစားခဲ့ပေမယ့် အခုကတော့ ငွေကြောင့်ကစားနေတာပါ။ ရော်နယ်ဒို ဆိုရင်လည်း ကျနော့်ဘဝမှာ ရရှိခဲ့တဲ့အရာတွေထက် အဆ ၁၀၀ လောက် ပိုပြီးအောင်မြင်မှုတွေ ရရှိခဲ့တာပါ။ ဒါပေမယ့် သူလည်း ဆော်ဒီကို သွားခဲ့ပါတယ်။ ဒါက စိတ်ပြင်း ပြမှုလားဆိုရင်တော့ ငွေကြောင့်ပါပဲ”လို့ OmaSportsTV ကို ပြောခဲ့တာပါ။
အသက် ၃၄ နှစ်အရွယ်ရှိ အစ်ဟာလိုဟာ ပြီးခဲ့တဲ့ရာသီက ဆော်ဒီပရိုလိဂ်ကလပ် အယ်လ်ဟီလယ်အသင်းမှာ ကစားခဲ့ပြီး လိဂ်ပြိုင်ပွဲရဲ့ ထိပ်တန်းဂိုးသွင်းရှင်အဖြစ် ရပ်တည်ခဲ့တာပါ။
ဒါပေမယ့် အစ်ဟာလိုဟာ ရာသီကုန်ဆုံးချိန်မှာတော့ ဆော်ဒီကလပ်ကနေ ထွက်ခွာခဲ့ပါတယ်။
ပရီးမီးယားလိဂ် တိုက်စစ်မှူးဟောင်း အစ်ဟာလိုက သူလည်း ငွေကြောင့် ဆော်ဒီကို ပြောင်းခဲ့တာဖြစ်သလို ရော်နယ်ဒိုနဲ့ ဘန်ဇီမာလည်း ဒီလိုပဲလုပ်ခဲ့တာလို့ ပြောခဲ့တာပါ။
ဆော်ဒီလိဂ်ဟာ ကမ္ဘာ့ထိပ်တန်းလိဂ်ဖြစ်ချင်တဲ့ ရည်ရွယ်တွေနဲ့ နာမည်ကျော် ကစားသမား အများအပြားကို လုပ်ခလစာ အများကြီးပေးပြီး ခေါ်ယူခဲ့တာ ဖြစ်ပါတယ်။
ရော်နယ်ဒိုကို တွေ့ရစဉ်
အရှေ့အလယ်ပိုင်းနိုင်ငံဟာ ပြီးခဲ့တဲ့ ဇန်နဝါရီက ရော်နယ်ဒိုကို ခေါ်ယူပြီးနောက်ပိုင်းမှာ ဘန်ဇီမာ၊ ကန်တီ၊ ရူဘင်နာဗတ်စ်၊ ဖာမီနိုနဲ့ နောက်ဆုံး ရောက်ရှိလာခဲ့တဲ့သူကတော့ လီဗာပူးလ်အသင်း ခေါင်းဆောင်ဟောင်း ဟန်ဒါဆန်ပါ။
လက်ရှိအချိန်မှာ ဘိုင်ယန်မြူးနစ် တောင်ပံကစားသမား မာနေးနဲ့ လီဗာပူးလ်အသင်း ကွင်းလယ်လူ ဖာဘင်ဟိုကို ခေါ်ယူနိုင်ဖို့ကိုလည်း ဆော်ဒီကလပ်တွေက ကြိုးပမ်းနေပါတယ်။
ဒါ့အပြင် ပီအက်စ်ဂျီအသင်း တိုက်စစ်မှူး ဘတ်ပီကိုလည်း ကမ္ဘာ့စံချိန်တင် ပြောင်းရွှေ့ကြေး ပေါင် ၂၅၉ သန်းနဲ့ ဆော်ဒီကလပ် အယ်လ်ဟီလယ်အသင်းက ကမ်းလှမ်းမှု ပြုလုပ်ထားတာပါ။
ရော်နယ်ဒိုကတော့ ဆော်ဒီလိဂ်ဟာ လာမယ့်နှစ် အနည်းငယ်အတွင်းမှာ ကမ္ဘာ့ထိပ်တန်းလိဂ် ၅ လိဂ်ထဲ ဝင်ရောက် လာနိုင်တယ်လို့ ပြောထားခဲ့တာ ဖြစ်ပါတယ်။
၂၀၂၃-၂၄ ရာသီသစ် ဆော်ဒီပရိုလိဂ်ပြိုင်ပွဲကို သြဂုတ် ၁၁ ရက်မှာ စတင်ပြီး ကျင်းပသွားမှာ ဖြစ်ပါတယ်။
Source: Goal
