CNI International News
တိုကျို၊ ဇွန်လ ၉
ဂျပန်နိုင်ငံ၏ အသက်အငယ်ဆုံး အမျိုးသမီးမြို့တော်ဝန်သည် မီးဖွားခွင့်ယူရန် ပြင်ဆင်နေပြီး သူသည် ဂျပန်နိုင်ငံ သမိုင်းတွင် မီးဖွားခွင့်ယူသည့် ပထမဆုံး အမျိုးသမီး မြို့တော်ဝန်အဖြစ် သမိုင်းသစ် ရေးထိုးသွားလိမ့် မည်ဖြစ် ကြောင်း CNN မှ ဖော်ပြခဲ့သည်။
ဂျပန်နိုင်ငံ၊ ကျိုတိုစီရင်စု (Kyoto Prefecture) ရှိ ယာဝါတာ (Yawata) မြို့၏ အသက် ၃၅ နှစ်အရွယ် မြို့တော်ဝန် ဖြစ်သူ ရှိုကို ကာဝါတာ (Shoko Kawata) သည် သူသည် ကလေးမွေးဖွားကာနီးတွင် မီးဖွားခွင့် ယူမည်ဖြစ်ကြောင်း ကြေညာခဲ့ခြင်းဖြစ်သည်။
ထိုကြေညာချက်အရ အမျိုးသားများသာ ကြီးစိုးလေ့ရှိသည့် ဂျပန်နိုင်ငံ၏ သမိုင်းဝင် အလုပ်သမားရေးရာနှင့် နိုင်ငံရေး စနစ်များအတွင်းရှိ ထင်ရှားသော ဟာကွက်တစ်ခုကို မီးမောင်းထိုး ပြလိုက်ခြင်းဖြစ်ပြီး တစ်နိုင်ငံလုံး အတိုင်းအတာဖြင့် ငြင်းခုံဆွေးနွေးမှုများကို ဖြစ်ပေါ်စေခဲ့သည်။
ဂျပန်နိုင်ငံ၊ ကျိုတိုစီရင်စုရှိ ယာဝါတာမြို့ကို တွေ့ရစဉ်
၂၀၂၃ ခုနှစ်က မြို့တော်ဝန်အဖြစ် ရွေးကောက် တင်မြှောက်ခြင်းခံရသည့် ကာဝါတာသည် လာမည့် စက်တင်ဘာ လလယ်တွင် ကလေးမွေးဖွားရန် ရက်ချိန်းယူထားပြီး ကလေးမမွေးဖွားမီ ၈ ပတ်နှင့် မွေးဖွားပြီးနောက် ၈ ပတ် စုစုပေါင်း မီးဖွားခွင့် ၁၆ ပတ် ရယူသွားမည် ဖြစ်သည်။
ယခုကဲ့သို့ တာဝန်ထမ်းဆောင်ဆဲ အမျိုးသမီး မြို့တော်ဝန်တစ်ဦးက မီးဖွားခွင့်ယူခြင်းသည် ဂျပန်နိုင်ငံ သမိုင်းတွင် ပထမဆုံးအကြိမ် ဖြစ်လာခဲ့သည်။
အရပ်ဘက်အစိုးရ ဝန်ထမ်းများအတွက် မီးဖွားခွင့် ရရှိနိုင်သော်လည်း ရွေးကောက်ခံ နိုင်ငံရေးသမားများနှင့် အရာရှိများအတွက်မူ ခွင့်ရယူခွင့်ကို အာမခံထားသည့် ဥပဒေကြောင်းအရ ခိုင်မာသော မူဘောင်မျိုး မရှိသေးပေ။
ဂျပန်နိုင်ငံသည် မွေးဖွားနှုန်း လျင်မြန်စွာ ကျဆင်းနေသည့် ပြဿနာနှင့် နိုင်ငံရေးဦးဆောင်မှု ကဏ္ဍတွင် ကျား/မ ကွာဟချက် ကြီးမားနေသည့် ကိစ္စရပ်များကို ရင်ဆိုင်ဖြေရှင်းနေရချိန်၌ မိမိ၏ ယခုလုပ်ဆောင်ချက်သည် စနစ် တစ်ခုလုံးကို ပြောင်းလဲပစ်ရန်အတွက် အရှိန်အဟုန်ပြင်းသည့် တွန်းအားတစ်ခု ဖြစ်လာလိမ့်မည်ဟု မျှော်လင့် ကြောင်း ကာဝါတာက ပြောကြားခဲ့သည်။
ဂျပန်အစိုးရအဖွဲ့ လွှတ်တော်မှာ တွေ့ရစဉ်
ဂျပန်နိုင်ငံသည် ၂၀၂၅ ခုနှစ်ကမှ ပထမဆုံး အမျိုးသမီး ဝန်ကြီးချုပ်ကို ရွေးကောက်တင်မြှောက်နိုင်ခဲ့ခြင်း ဖြစ် သည်။
ထို့ပြင် ကမ္ဘာ့နိုင်ငံ အသီးသီးရှိ လွှတ်တော်ဆိုင်ရာ အချက်အလက်များကို စောင့်ကြည့်လေ့လာနေသည့် IPU Parline အဖွဲ့၏ အဆိုအရ လက်ရှိတွင် ဂျပန်အောက်လွှတ်တော်၌ အမျိုးသမီး ကိုယ်စားလှယ် ပါဝင်မှုမှာ ၁၅ ရာခိုင်နှုန်းအောက်သာ ရှိသေးကြောင်း သိရသည်။
“အခုလို လုပ်ဆောင်ခြင်းအားဖြင့် ဝန်ထမ်းတွေ တင်မကဘဲ စီးပွားရေး လုပ်ငန်းရှင်တွေ၊ မန်နေဂျာတွေနဲ့ ကဏ္ဍစုံ က အလုပ်အကိုင်တွေမှာ ပါဝင်ပတ်သက်နေကြသူတွေ အားလုံးအနေနဲ့ မိမိတို့ရဲ့ အလုပ်ခွင်နဲ့ မျှတအောင် ချိန်ညှိ ရင်း ကလေးမွေးဖွားတာ၊ ကလေးပြုစုပျိုးထောင်တာ အစရှိတဲ့ ဘဝရဲ့ အရေးကြီးတဲ့ ဖြစ်တည်မှုတွေကို ဝမ်း မြောက် ဝမ်းသာ လက်ခံကြိုဆိုလာကြဖို့ ကျမအနေနဲ့ တိုက်တွန်း အားပေးချင်ပါတယ်” ဟု ကာဝါတာက CNN သတင်းဌာနကို ပြောကြားခဲ့သည်။
ကာဝါတာက သူခွင့်ယူနေသည့် ကာလအတွင်း မြို့တော်ဝန် တာဝန်များကို ထမ်းဆောင်ရန်အတွက် ဒုတိယ မြို့တော်ဝန်ကို အစားထိုး ခန့်အပ်သွားမည်ဟု ပြောကြားခဲ့သည်။
Source: CNN
