CNI News
၂၀၂၂ ခုနှစ်၊ စက်တင်ဘာ ၈
မြန်မာ့သနပ်ခါး အများဆုံး စိုက်ပျိုးထွက်ရှိသော စစ်ကိုင်းတိုင်းဒေသကြီးနှင့် မကွေးတိုင်းဒေသကြီးတို့တွင် နယ်မြေ မတည်ငြိမ်မှုနှင့် လမ်းပန်းဆက်သွယ်ရေး ခက်ခဲခြင်းတို့ကြောင့် သနပ်ခါးအတုံး ဈေးကွက်ပျက်နေကြောင်း မြန်မာနိုင်ငံ သနပ်ခါး စိုက်ပျိုးထုတ်လုပ်တင်ပို့ရောင်းချသူများအသင်းက CNI သတင်းဌာနသို့ ပြောသည်။
ထို့အပြင် အခြားပြည်နယ်နှင့်တိုင်းဒေသကြီးများတွင်လည်း ရောင်းအားနှင့် ဝယ်အားများမှာ သိသိသာသာ ကျဆင်းနေကြောင်း၊ စစ်ကိုင်းတိုင်းဒေသကြီးတွင် သနပ်ခါးအတုံးများအား ဈေးလျှော့ရောင်းသည်ကိုပင် ဝယ်ယူမှု နည်းပါးကြောင်း မြန်မာနိုင်ငံ သနပ်ခါးစိုက်ပျိုးထုတ်လုပ်တင်ပို့ရောင်းချသူများအသင်းမှ ဗဟိုပြန်ကြားရေးမှူး ဦးမျိုးဝင်းသန့်က CNI သို့ ပြောသည်။
၎င်းက “စစ်ကိုင်းဘက်မှာလည်း ခက်ခက်ခဲခဲနဲ့ ဈေးကွက်ကို ရုန်းထွက်နေရတဲ့ အပိုင်းတွေ တွေ့ရတယ်။ မကွေး လည်း မအေးချမ်းဘူးပေါ့။ ၂ တိုင်းလုံးပဲ ပြောပါတော့။ ခေတ်ကောင်းစဉ်ကာလလိုတော့ မဟုတ်ဘူးပေါ့။ ခေတ် ကာလအရ ဈေးကွက်ကို အနှောင့်အယှက် ဖြစ်သွားတဲ့ဟာလေးတွေ အတားအဆီး ဖြစ်သွားတဲ့ဟာလေးတွေ ရှိတဲ့အတွက် ဈေးကွက်ပျောက်သွားတာမျိုးလည်း ဖြစ်နေတာပေါ့လေ။ သနပ်ခါးထမ်းပြီးတော့ သွားရောင်းချင်တဲ့ လူလည်း သိပ်မလုံခြုံတဲ့ အပိုင်းတွေရှိတယ်။ နောက်ခါကျ မသွားရဲ မလာရဲတာလေးတွေ ရှိတယ်။ ဈေးကွက် ချဲ့ထွင်ဖို့အတွက်ကို အနေအထားက တိုင်း ၂ တိုင်းလုံးမှာ နည်းနည်းလေး ဈေးကွက်ပျက်နေတဲ့ အနေအထားလေး တွေ တွေ့ရတယ်ပေါ့။ အရင်တုန်းကတော့ စစ်ကိုင်းတိုင်းနဲ့ မကွေးတိုင်းက ဈေးကွက်တွေ တော်တော်ကောင်းခဲ့ တယ်။ တော်တော်ကောင်းခဲ့တယ်ဆိုတာက ၉၅၊ ၉၀ ရာခိုင်နှုန်းလောက်ကို ဈေးကွက်အနေအထား ခိုင်မာခဲ့တယ်။ နောက်တစ်ခုကကျ ပွဲတော်တွေလည်း အများကြီးရှိတယ်။ သနပ်ခါး ဈေးကွက်က စစ်ကိုင်းနဲ့မကွေးမှာ ထွက် မရောင်းဘဲနဲ့တောင်မှ ဝယ်လိုအားအရ အဓိက ရေစကြိုတို့၊ ပခုက္ကူတို့၊ မြိုင်တို့၊ အရာတော်တို့ အဲဒီလိုတွေ အထိကို နယ်ပွဲစားတွေကိုယ်တိုင် တက်ပြီးတော့ လာဝယ်ရတဲ့ အနေအထားတွေ ရှိတာပေါ့။ အခု အဲဒီလို ပွဲစားတွေ ကိုယ်တိုင်က လာဝယ်ဖို့ နေနေသာသာ လှမ်းမှာတာတောင်မှ ရာခိုင်နှုန်းတော်တော်ကျသွားတယ်”ဟု ၎င်းက ပြောသည်။
ပြည်တွင်းတွင် မြန်မာ့သနပ်ခါးအတုံးအစား သနပ်ခါးဖြင့်ပြုလုပ်ထားသည့် ပစ္စည်းများကိုသာ ဝယ်ယူ အသုံးပြု လာကြခြင်း၊ သနပ်ခါးတစ်တုံးလျှင် အချိန်ကာလအားဖြင့် ကြာမြင့်စွာ အသုံးခံခြင်းတို့ကြောင့် ဝယ်ယူသူ နည်းပါး လာခြင်းဖြစ်ကြောင်း သိရသည်။
မြန်မာ့သနပ်ခါးအတုံးများသည် ဈေးတွင် ရောင်းချမှုမှာ နည်းပါးပြီး ပွဲတော်ရက်များနှင့် ခရီးသွားများကိုသာ အဓိက မှီခိုအားထားနေရသည့် လုပ်ငန်းတစ်ခုဖြစ်ကာ လက်ရှိတွင် ပွဲတော်များမှာလည်း မရှိသည့်အတွက်ကြောင့် မြန်မာ့သနပ်ခါးရောင်းချသူများမှာ ဈေးကွက်ပျောက်နေကြကြောင်း သိရသည်။
ရွှေဘိုတွင် သနပ်ခါးရောင်းချသူ မမိုး(အမည်လွှဲ)က “ဝယ်ရတာလည်း ခက်တယ်ရှင့်။ သနပ်ခါးက နယ်က အများဆုံးထွက်တာလေ။ အခု အဲဒီဘက်တွေက မအေးချမ်းဘူးဆိုတော့ ဝယ်ဖို့ဘာညာကြလည်း သွားလာရတာက အခြေအနေကြည့်ပြီးမှ သွားရတာ။ တစ်ခါတစ်လေဆိုရင် သွားပြီးမှ လမ်းအခြေအနေ မကောင်းလို့ ပြန်လာရ တဲ့ဟာတွေ အဲဒီလိုမျိုးလည်း ရှိတယ်။ညီမတို့ဆီကျတော့ ဈေးကွက်က အခုလောလောဆယ်တော့ လမ်းပန်း ဆက်သွယ်ရေးမကောင်းတာတွေကြောင့် တအားကြီး ထင်သလောက်တော့ မရောင်းရဘူးပေါ့။ အရင်တုန်းက ကျတော့ သူ့ဟာနဲ့သူ ရောင်းရတယ်။ အရောင်းအဝယ်ပါးတာ ကြာပြီ။ ခါတိုင်းဆို ဒီရက်တွေဆိုရင် ပွဲတော်တွေ လည်း ရှိတယ်လေ။ ပွဲတော်တွေရှိတဲ့အခါကျတော့ ဘုရားဖူးတွေဘာတွေက ဝင်ဝယ်ကြပေါ့ အဲဒီလို။ အခုကျ ဘုရားဖူးလည်းမလာဘူး။ ခရီးအသွားအလာနည်းတယ်ပေါ့။ အဲဒီတော့ အရောင်းအဝယ ပါးတယ်”ဟု သူက ပြောသည်။
မြန်မာ့သနပ်ခါးအရောင်းဆိုင်တစ်ခုကို တွေ့ရစဉ်
စစ်ကိုင်းနှင့် မကွေးတို့မှ ထွက်ရှိသည့် မြန်မာ့သနပ်ခါးအတုံးများအား ဧရာဝတီတိုင်း၊ ရန်ကုန်တိုင်းနှင့် ရခိုင် ပြည်နယ်တို့မှ အဓိကဝယ်ယူကာ ပြန်လည်ရောင်းချခြင်းဖြစ်ပြီး ဧရာဝတီတိုင်းနှင့် ရခိုင်ပြည်နယ်တို့က ဝယ်ယူမှု ပိုမိုများပြားကာ လက်ရှိမှာ အဆိုပါဒေသများမှ ဝယ်ယူမှုမှာ ယခင်ပုံမှန်ကာလများထက် ပိုမိုနည်းပါးသွားသည့် အတွက် ဈေးကွက်ပျက်နေခြင်းဖြစ်ကြောင်း ဗဟိုပြန်ကြားရေးမှူး ဦးမျိုးဝင်း သန့်က CNI သတင်းဌာနသို့ ပြောသည်။
“ရခိုင်မှာဆိုရင် အနည်းဆုံး ၄၀ ရာခိုင်နှုန်းလောက် ပြုတ်ကျသွားပြီ။ အရင်တုန်းက ရခိုင်မှာဆိုရင် ၁၀၀ ရောင်းရ တယ်ဆိုရင် အခု ၆၀ လောက်ပဲ ရောင်းရတော့တယ်။ ၆၀ ရာခိုင်နှုန်းလောက်ပဲ ရခိုင်မှာရှိတော့တဲ့ အနေအထား ဖြစ်သွားတယ်။
ဧရာဝတီလည်း မကွာဘူး။ အနေအထားကတော့ ၇၀ ရခိုင်နှုန်းလောက်ပဲရှိမယ်။ ရန်ကုန်တိုင်းဆို ၅၀ ရာခိုင်နှုန်းလောက်ပဲရှိမယ်။ ဈေးကွက်အနေနဲ့က ဒီသနပ်ခါးအနေနဲ့ ခိုင်မာတဲ့ ဈေးကွက်တစ်ခုတော့ ရှိသင့်တာ ပေါ့။ ဒါပေမယ့် အခုအနေအထားက နည်းနည်းလေး ငွေသုံးနိုင်တဲ့အားက နည်းနည်းလေး နည်းနေကြတဲ့ အပိုင်း တွေလည်း ပါတာပေါ့။ အရင်တုန်းကရောင်းချသူအပိုင်းမှာ တော်တော်များများက အုန်းအုန်းကျွက်ကျွက်နဲ့ ဘုရား တန်ဆောင်း၊ ကျောင်းတန်ဆောင်း၊ ဈေးကြီး၊ ဈေးလေးကမကျန်၊ ပျံကျဈေးတွေပါအပါပေါ့။ အဲဒီလို အုန်းအုန်း ကျွက်ကျွက်နဲ့ပဲ အရောင်းအဝယ်တွေ ကောင်းခဲ့ကြတယ်။ အခုမှာကကျ ဘာတွေနည်းနည်းလေးရှိလဲဆိုတော့ အဲဒီလောက်ကြီး ရောင်းနိုင်တဲ့ အနေအထား မတွေ့ရဘူးပေါ့။ ဘာကြောင့်လဲဆိုတော့ အဓိကက ဝယ်လိုမှုမရှိလို့ ပေါ့”ဟု ၎င်းကပြောသည်။
နယ်မြေအနေအထားအရ အေးချမ်းစပြုလာပါက မြန်မာ့သနပ်ခါးအတုံးဈေးကွက်သည် ပြန်လည် ဦးမော့လာ နိုင်ပြီး ဆက်လက်၍ နယ်မြေအနေအထား မအေးချမ်းပါက ပြန်လည်ဦးမော့ရန်မလွယ်ကူကြောင်း ရောင်းချသူ များက ပြောသည်။
လက်ရှိတွင် အရှည် ၆ လက်မ အကျယ် ၂ လက်မရှိသည့် သနပ်ခါးတစ်တုံးလျှင် ၂၀၀၀ ကျပ်မှ ၄၀၀၀ ကျပ်ဈေး ပေါက်သော်လည်း သနပ်ခါးအတုံးအမျိုးအစားပေါ်မူတည်ကာ ဈေးနှုန်းကွာခြားချက်ရှိကြောင်း သိရသည်။
မကွေးတိုင်းဒေသကြီးတွင် သနပ်ခါးစိုက်ဧကမှာ သုံးသိန်းဝန်းကျင်ခန့်ရှိပြီး စစ်ကိုင်းတိုင်းဒေသကြီးတွင်လည်း စိုက်ဧက အများအပြား ရှိကြောင်း သိရသည်။
