CNI News

၂၀၂၂ ခုနှစ်၊ ဩဂုတ် ၉

မြန်မာနိုင်ငံတော်ဗဟိုဘဏ်၏ ပုံသေဒေါ်လာ လဲလှယ်သည့် နှုန်းထားကို ၁၈၅၀ မှ ၂၁၀၀ သို့ ပြောင်းလဲ သတ်မှတ်လိုက်ပြီး နောက် ကြက်သွန်များ အဝယ်လိုက်လာကာ တစ်ပိဿာ ၂၀၀၀ ကျပ်အထိ ဈေးနှုန်း ရရှိလာသည်ဟု ကြက်သွန်ကုန်သည်များ ထံမှ သိရသည်။

ပြီးခဲ့သည့် ဇူလိုင်လတွင် အရောင်းအဝယ် မရှိသလောက် ဖြစ်နေကြောင်း၊ ဩဂုတ်လ ၈ ရက်နေ့မှ စတင်၍ အရောင်းအဝယ် ပြန်လည်သွက်လာကြောင်း၊ လက်ရှိတွင် မြဝတီမှတဆင့် ထိုင်းနိုင်ငံနှင့် ဗီယက်နမ်နိုင်ငံသို့ တင်ပို့ရန်အတွက် ကြက်သွန်များ ကို လာရောက်ဝယ်ယူမှု များပြားလျက် ရှိနေကြောင့် ပခုက္ကူမြို့နယ် ကုန်သည်ပွဲစားများအသင်းမှ ဦးလှသောင်းက CNI သို့ ပြောသည်။

ဦးလှသောင်းက “နည်းနည်း အဝယ်လိုက်လာတယ်။ မြဝတီ လိုချင်တာပေါ့။ မြဝတီသမားတွေ၊ ဗီယက်နမ် သမားတွေပေါ့။ အခုလို ဖြစ်သွားတာ ပြန်ပြီးတော့ တက်လာတာက ဘဏ်ကကိုက သူတို့က ဒေါ်လာကို ၂၁၀၀ နဲ့ သတ်မှတ်လိုက်တော့ အရောင်းအဝယ်က ပြန်သွက်လာတာ။ ၁၈၅၀ တုန်းက အရောင်းအဝယ် ခပ်လေးလေးရယ်။ ၇ လပိုင်း ၁ လလုံး အေးလာတာ။ ဒီ ၈ လပိုင်းရောက်မှ ပြန်သွက်လာတာ ဒေါ်လာဈေး ၂၁၀၀ သတ်မှတ်လိုက်တာ ဆိုတော့လေ။ အဲဒါလေးတွေလည်း သူတို့ မြဝတီဘက်မှာ ငွေလဲရတာလေးတွေ နည်းနည်း ပိုပြီးတော့ အဆင်ပြေသွားတာပေါ့။ ကျနော့်ဘက်က ပခုက္ကူဘက်က အခု ကျနော်ရောင်းမယ့် ကား ၂ စီးက ၂၀၀၀ ပါတယ်။ ၁၉၂၅ ပါတယ်။ ၁၉၀၀ ပါတယ်။ အခြေအနေကတော့ ရန်ကုန် ဘုရင့်နောင် အပေါ်မှာ မူတည်မှာ ဈေးတွေ မြင့်လာတော့” ဟု ပြောသည်။

ကြက်သွန်နီများကို ကုန်ကားပေါ်တင်နေကြ

ထို့အပြင် ပခုက္ကူမှ ထွက်ရှိသည့် ကြက်သွန်များထက် မုံရွာမှထွက်ရှိသည့် ကြက်သွန်များသည် အရည်အသွေးပိုင်းဆိုင်ရာ ကောင်းမွန်ခြင်းကြောင့် ပို၍ စျေးကောင်းရနေကြောင်း၊ ကြက်သွန်နီ တစ်ပိဿာလျှင် ၂၂၀၀ ကျပ်အထိ စျေးကောင်းလာ ကြောင်း ပွဲရုံများနှင့် ကုန်စည်ဒိုင်များထံမှ သိရသည်။

လက်ရှိ ကြက်သွန်ပွဲရုံနှင့် ကုန်စည်ဒိုင်များသို့ နယ်မှ တောင်သူများ လာရောက်ရောင်းချမှု များပြားလျက်ရှိကြောင်း၊ တချို့ သော တောင်သူများသည် ၁ ပိဿာ ၂၀၀၀ ကျော်မည့်အချိန်ကို စောင့်ဆိုင်းနေမှုများ ရှိသည်ကြောင်း ကြက်သွန်ကုန်သည် ဦးကျော်စိန်က ပြောသည်။

ဦးကျော်စိန်က “ကြက်သွန်က ၁ လစာ လိုနေတဲ့ အနေအထားပေါ့၊ ကျန်တဲ့ ရက်နဲ့ တွက်ကြည့်ရင်ပေါ့။ ပစ္စည်း နည်းသွားလေ စားသုံးသူ မလောက်ငှလေ။ နည်းနည်း ပိုတက်နိုင်သေးတာပေါ့နော် အဲလိုတော့ မှန်းရတာပေါ့။ အခုလာတာကတော့ တောက လာတာ များပါတယ်။
တောင်သူတွေ ကိုယ်တိုင်က ရောင်းနေတာပေါ့နော်။ မြို့ပေါ်သမားကတော့ နည်းနည်းလေး ဈေးစောင့် နေတာပေါ့ဗျာ။ ၂၀၀၀ နား တစ်ပတ်လည် ရောက်ရင်တော့လည်း စရောင်းသင့်တဲ့သူက ရောင်းမှာပေါ့ဗျာ ၂၀၀၀၊ ၂၀၀၀ ကျော် လာရင်ပေါ့” ဟု CNI သို့ ပြောသည်။

ဘုရင့်နောင်ကုန်စည်ဒိုင်

ပြီးခဲ့သည့် ၂ နှစ်တွင် နိုင်ငံရေး အပြောင်းအလဲနှင့် ကိုဗစ် - ၁၉ ရောဂါ ပြန့်ပွားမှုများကြောင့် ကြက်သွန်တောင်သူနှင့် ကုန်သည် များသည် အရှုံးနှင့် ရင်ဆိုင်ခဲ့ရကြောင်း၊ ၁ ပိဿာလျှင် ၁၀၀ ကျပ်ဖြင့် ရောင်းချခဲ့ကြရကြောင်း သိရသည်။

လက်ရှိ ဖြစ်ပေါ်နေသည့် ကြက်သွန်ဈေးနှုန်းသည် ကုန်သည်များအတွက် အမြတ်ရှိခြင်းကြောင့် ကြက်သွန် သိုလှောင်ထားသူ များ အနေဖြင့် ထုတ်၍ ရောင်းချလာကြမည်ဟု ဦးလှသောင်းက ပြောသည်။

ဦးလှသောင်းက “အခုချိန်ကတော့ ကုန်သည်တွေအနေနဲ့ကတော့ ဒီဈေး ပတ်ချာလည်က မရှုံးတော့ဘူး။ သူတို့ဝယ်ထည့်တာ ကိုက လျော့တွက်လျော့ခရော ၁ ပိဿာ ၁၀၀၀ အကျ မှန်းတာလေ။ ဂိုဒေါင်ပေါ် အရောက်၊ အကုန်လုံး အလုပ်သမားခ ဘာညာ လျော့တွက် စရိတ်တွေပါ ၁၀၀၀ မှန်းထားကြတာ။ ၁၇၀၀/၁၈၀၀ ဆိုရင် ရောင်းလို့ရတယ်။ ကုန်သည်တွေအနေနဲ့ လှောင်ထားတဲ့ ကြက်သွန်ကို ၂၀၀၀ နားကို ရောက်တဲ့တချိန် ရောင်းကြမှာ။ ကုန်သည်တွေလည်း ကြောက်တယ်လေ ၂ နှစ် ရှုံးထားတယ်ဆိုတော့ ဒဏ်မခံရဲဘူး။ ဆက်ရှုံးမှာ ကြောက်တယ် ၂၀၀၀ ဆိုရင် တော်တော်ထွက်လာမှာ ကြက်သွန်က” ဟု CNI သတင်းဌာနသို့ ပြောသည်။

လက်ရှိ မြင့်တက်နေသည့် ကြက်သွန်ဈေးနှုန်းများသည် ဆက်လက် မြင့်တက်လာနိုင်သည်ဟု ကုန်သည်များက ခန့်မှန်း နေ ကြသည်။ သို့သော်လည်း ဘုရင့်နောင်ပွဲရုံ၏ ဈေးနှုန်း အပြောင်းအလဲပေါ် မူတည်၍ ကျန်သည့် ပွဲရုံများနှင့် ကုန်စည်ဒိုင်ရှိ ကြက်သွန်များ၏ ဈေးနှုန်းများသည် ပြောင်းလဲသွားမည်ဖြစ်ကြောင်း သိရသည်။

ရန်ကုန်ဘုရင့်နောင် ကုန်စည်ဒိုင်၏ သြဂုတ်လ ၈ ရက်နေ့ စျေးနှုန်းများအရ မုံရွာကြက်သွန်နီရှယ် တစ်ပိဿာလျှင် ကျပ် ၂၂၀၀ အထိ စျေးကောင်းရနေပြီး အခြားဒေသထွက် ကြက်သွန်နီများသည် ကျပ် ၁၄၅၀ ကနေ ၂၀၀၀ ကြားမှာ ရှိနေသည်။