CNI News
၂၀၂၂ ခုနှစ်၊ ဒီဇင်ဘာ ၁၂
ရန်ကုန်တိုင်းဒေသကြီး အပါအဝင် မြန်မာတစ်နိုင်ငံလုံးတွင် ယခုကာလ၌ လျှပ်စစ်မီး ပြတ်တောက်မှု မကြာခဏ ဖြစ်ပေါ်နေပြီး တချို့သော နေရာများမှာတော့ လျှပ်စစ်မီး ပြတ်ချိန်သည် ၄ နာရီမှ ၅ နာရီအထိ ကြာမြင့်နေခြင်းကြောင့် လျှပ်စစ်မီးကို မှီခိုနေရသည့် အသေးစားနှင့် အလတ်စား လုပ်ငန်းများ အခက်တွေ့လာနေကြောင်း သိရသည်။
လျှပ်စစ်မီး ပြတ်တောက်ချိန်တွင် မီးစက်များကို အသုံးပြုရခြင်းကြောင့် စက်သုံးဆီစရိတ် ပိုလာသဖြင့် အကျိုး အမြတ် နည်းပါးသွားကြောင်း၊ ထို့နောက် လုပ်ငန်းပြီးမြောက်မှု နှောင့်နှေးသွားကြောင်း ရန်ကုန်တိုင်းဒေသကြီး၊ တာမွေမြို့နယ်ရှိ သံပန်း၊ သံတခါးလုပ်ငန်း လုပ်ကိုင်သူ ကိုလှခိုင်က CNI သတင်းဌာနသို့ ပြောသည်။
၎င်းက “မီးပျက်တော့ အလုပ်လုပ်လို့ မရဘူးပေါ့၊ မီးစက်နဲ့ လုပ်ရတာပေါ့။ အကျိုးအမြတ်ကတော့ မီးလာရင်တော့ ကုန်ကျစရိတ် မကုန်ဘူးပေါ့ဗျာ။ မီတာခပဲ ကုန်တာပေါ့။ မီးစက်မောင်းလုပ်တော့ ဆီဖိုးတွေ ကုန်တာပေါ့။ မီးစက် မရှိတဲ့လူ မီးစက် ဝယ်ရတာပေါ့။ လက်ရှိ မီးမလာနိုင်ဘူး၊ တချို့ မဝယ်နိုင်တဲ့ သူတွေဆိုရင်တော့ မီးလာတဲ့အချိန်ကို စောင့်လုပ်ပေါ့။ မီးလာလို့ စောင့်လုပ်တဲ့အချိန်မှာ အချိန်တော့ ပိုကြာသွားတာပေါ့ဗျာ။ လေဘာစရိတ်တွေ ဘာတွေ ပိုထောင်းတာပေါ့ဗျာ။ မီးပုံမှန် လာနေရင်တော့ အဆင်ပြေတာပေါ့ ခရီးရောက်တာပေါ့။ မီးစက်နဲ့လုပ်တဲ့ အခါကျ တော့ မီးစက်က အကြီးကြီးလည်း မဝယ်နိုင်ဘူးလေဗျာ။ အသေးဆိုတော့ ၃ ယောက်လုပ် လုပ်ရမယ့် နေရာက ၁ ယောက်လောက်ပဲ လုပ်ရတာပေါ့။ လောလောဆယ် ချိန်းထားတဲ့ ရက်လေးတွေ ကျော်သွားတာမျိုးတွေတော့ ရှိတာပေါ့လေ။ ဒါပေမယ့် Consumer ကို နားလည်အောင် ပြောပြပြီး တောင်းပန်ရတာပေါ့။ လျှပ်စစ်မီးလာတဲ့ အခါကျတော့ ၃ ယောက်ဆိုလည်း ၃ ယောက် ဝိုင်းလုပ်လို့ရတာပေါ့ ဒါမျိုးလေးတွေ ကွာတာပေါ့” ဟု ပြောသည်။
လျှပ်စစ်မီးပြတ်၍ ဖယောင်းတိုင်မီး ထွန်းထားရစဉ်
အသေးစားနှင့် အလတ်စား လုပ်ငန်းများသည် ပြီးခဲ့သည့် ကိုဗစ်ကာလတွင် ဆုံးရှုံးမှု များပြားခဲ့ပြီးနောက် ယခုမှ ပြန်လည် လည်ပတ်လာနေသည့် ကာလဖြစ်သော်လည်း လတ်တလော လျှပ်စစ်မီး ပြတ်တောက်မှု ပိုမို ကြာမြင့်လာခြင်းကြောင့် အခက်အခဲများ ဖြစ်နေကြောင်း လုပ်ငန်းရှင်များက ပြောသည်။
ထို့အပြင် မီးစက်အသုံးပြု၍ လုပ်ကိုင်ရခြင်းကြောင့် လုပ်ငန်းလာရောက် အပ်နှံသူများကို ဈေးနှုန်းတိုး၍ တောင်းခံရခြင်းများလည်း ရှိသည်ဟု မိတ္တူဆိုင်ပိုင်ရှင်တစ်ဦးက CNI သတင်းဌာနသို့ ပြောသည်။
၎င်းက “သက်ရောက်မှုကတော့ အလုပ်မဖြစ်တာပေါ့ဗျာ။ Consumer တွေ လာတဲ့အချိန်မှာ မီးကပျက်နေရင် အလုပ်က လုပ်မရဘူးပေါ့။ ဒါဆိုရင်တော့ ဒီလို မီးပျက်တယ်ဆိုရင် မီးစက်သုံးရတာပေါ့နော်။ မီးစက်နဲ့ဆိုရင်တော့ ဈေးတစ်မျိုး ယူရတာပေါ့နော်။ အဲလိုမျိုးပေါ့ အပြောင်းအလဲတော့ နည်းနည်းရှိတာပေါ့” ဟု ပြောသည်။
မီးစက်နှိုးအလုပ်လုပ်ကြရန် ပြင်ဆင်နေစဉ်
ရန်ကုန်တိုင်းဒေသကြီးအတွင်း ယခင်က လျှပ်စစ်မီးကို အလှည့်ကျဖြင့် တစ်နေ့လျှင် ၃ နာရီသာ ပြတ်တောက် သော်လည်း လက်ရှိတွင် တစ်နေ့လျှင် ၄ နာရီကြာ ပြတ်တောက်လာကြောင်း၊ တချို့သော မြို့နယ်များတွင် ၈ နာရီအထိ ပြတ်တောက်မှုများလည်း ရှိကြောင်း သိရသည်။
ရေအားလျှပ်စစ် စက်ရုံများမှ ဓါတ်အား ထုတ်လုပ်နိုင်မှု လျော့နည်းလာခြင်း၊ သဘာဝ ဓာတ်ငွေ့သုံး လျှပ်စစ်စက်ရုံ တချို့ ပြင်ဆင်ထိန်းသိမ်းနေခြင်း၊ လာမည့် နွေရာသီကာလ ဓာတ်အား ထုတ်လုပ်ဖြန့်ဖြူး ပေးနိုင်ရန်အတွက် ရေ လှောင်တမံများရှိ သိုလှောင်ဆည် ရေကို မျှတထိန်းညှိ မောင်းနှင်နေရခြင်းတို့ကြောင့် လျှပ်စစ်ဓာတ်အား ထုတ် လုပ်နိုင်မှု မလုံလောက်ဘဲ ဖြစ်နေကြောင်း သိရသည်။
ထို့ကြောင့် မြန်မာနိုင်ငံ တဝှမ်းလုံးရှိ အများပြည်သူများအား အလှည့်ကျ ဝန်အားလျှော့ချ ဓာတ်အားဖြန့်ဖြူးပေး နေရကြောင်း ရန်ကုန်လျှပ်စစ် ဓာတ်အားပေးရေး ကော်ပိုရေးရှင်းမှ ထုတ်ပြန် ကြေညာထားသည်။
