CNI Sport Article
၂၀၂၆ ခုနှစ်၊ ဖေဖော်ဝါရီ ၆
မန်စီးတီးအသင်း တိုက်စစ်မှူး ဟာလန်းဟာ ဂိုးသွင်းနှုန်း အလွန်ကောင်းမွန်တဲ့သူ တစ်ဦးဖြစ်ပေမယ့် နောက်ဆုံး ကစားခဲ့တဲ့ ပြိုင်ပွဲစုံ ၈ ပွဲမှာ ၁ ဂိုးသာ သွင်းယူနိုင်ခဲ့ပါတယ်။
ဟာလန်းဟာ ဒီရာသီအစမှာ မန်စီးတီးအသင်း အတွက်ရော နော်ဝေ လက်ရွေးစင် အသင်းအတွက်ပါ သွင်းဂိုးတွေ ဆက်တိုက် သွင်းယူနိုင်ခဲ့သူ ဖြစ်တာကြောင့် သူဂိုးပေါက် ပျောက်ဆုံးပြီး ပုံမှန်ခြေစွမ်းအောက် ရောက်နေတာက သိသာပါတယ်။
ဒါတောင် ဟာလန်းဟာ ဒီရာသီ ပရီးမီးယားလိဂ်ပြိုင်ပွဲမှာ ၂၀ ဂိုးနဲ့ ပြိုင်ပွဲစုံ သူ့ရဲ့သွင်းဂိုးက ၂၇ ဂိုးအထိ ရှိနေတာပါ။
တခြား တိုက်စစ်မှူးတွေနဲ့ နှိုင်းယှဉ်ကြည့်မယ်ဆိုရင် ဟာလန်းရဲ့ ဂိုးသွင်းနှုန်းက ကောင်းမွန်တယ်လို့ ပြောနိုင် ပေမယ့် သူမန်စီးတီးအသင်းကို ရောက်ခါစကို ပြန်ကြည့်ရင်တော့ အလွန်ကွာခြားသွားတာကို မြင်တွေ့နိုင်ပါတယ်။
ဟာလန်းဟာ မန်စီးတီးအသင်းရဲ့ ပွဲထွက် လူစာရင်းထဲ ပါဝင်ခဲ့တဲ့ နောက်ဆုံး ၁၀ ပွဲမှာ ၂ ဂိုးသာ သွင်းနိုင်ခဲ့ပြီး အသင်းဖော် အိုမာမာမွတ်ရှ်က အသင်းရဲ့ ပွဲထွက် လူစာရင်းထဲ ပါဝင်ခဲ့တဲ့ နောက်ဆုံး ၃ ပွဲမှာ ၃ ဂိုး သွင်းယူ ထားတာ ဖြစ်ပါတယ်။
မန်စီးတီးအသင်း ပရိသတ် တချို့ကတောင် အသင်းဟာ တိုက်စစ်မှူး ဟာလန်း မပါဝင်ဘဲ ပိုပြီးကောင်းအောင် ကစားနိုင်ခဲ့တယ်လို့ သူတို့ရဲ့ ဆိုရှယ်မီဒီယာပေါ်မှာ မှတ်ချက်တွေ ပေးခဲ့ကြပါတယ်။
ဟာလန်းနဲ့ ဂွာဒီယိုလာကို တွေ့ရစဉ်
ဟာလန်း နောက်ပိုင်းပွဲတွေမှာ သွင်းဂိုးတွေ ပျောက်ဆုံးနေတာက အကြောင်းအရင်းရှိပြီး ဒီအထဲက တစ်ခုကတော့ ဇန်နဝါရီအပြောင်းအရွှေ့မှာ မန်စီးတီးအသင်းကို ရောက်လာခဲ့တဲ့ ဆီမန်ညိုဟာ ဂိုးသွင်းယူမှု တာဝန်ကို သူ့ဆီက နေ လွှဲပြောင်း ရယူတာလည်း ပါဝင်ပါတယ်။
ပြီးတော့ သူ့ကို ဂိုးဖန်တီးမှုတွေ ပြုလုပ်ပေးနေတဲ့ ဒိုကူနဲ့ ချာကီတို့ ဒဏ်ရာတွေ ရနေတာကလည်း ဟာလန်း အတွက် သွင်းဂိုးရဖို့ ခက်ခဲနေတာဖြစ်ပါတယ်။
နောက်တစ်ခုကတော့ ဟာလန်းရဲ့ ကစားတဲ့ပုံစံ၊ နေရာယူမှုတွေကို ပြိုင်ဘက်အသင်း ခံစစ် ကစားသမားတွေက သတိထား မိတာတွေကြောင့်လည်း ဟာလန်းဟာ ဂိုးဧရိယာထဲမှာ အဆုံးသတ် ကောင်းဖို့ ရုန်းကန်နေရတာပါ။
မန်စီးတီးအသင်းနည်းပြ ဂွာဒီယိုလာကတော့ ဟာလန်း ရှိနေတာက သူတို့အတွက် ကံကောင်းပြီး သူသာမရှိရင် အသင်းဟာ ဒီလို အနေအထားမျိုးတောင် ရှိမှာမဟုတ်ဘူးလို့ ပြောခဲ့ပါတယ်။
ဒါ့ပြင် ဂွာဒီယိုလာက ပွဲတွေ အများကြီး ကစားနေရတာက သူ့အတွက် ခက်ခဲစေပြီး မကြာမီ သူပြန်လာနိုင် လိမ့်မယ်လို့ ပြောခဲ့ပါတယ်။
မန်စီးတီးတိုက်စစ်မှူး ဟာလန်းကို တွေ့ရစဉ်
ဟာလန်းရဲ့ သွင်းဂိုးတွေ ပျောက်ဆုံးနေမှုက မန်စီးတီးအသင်းကို သက်ရောက်မှုတွေ အများကြီးရှိခဲ့ပြီး ပရီးမီးယားလိဂ်ပွဲတွေမှာ ရမှတ်တွေ အများအပြား လျော့စေခဲ့ပါတယ်။
နော်ဝေတိုက်စစ်မှူးဟာ မန်စီးတီးအသင်း နောက်ဆုံးကစားခဲ့တဲ့ ပရီးမီးယားလိဂ် ၇ ပွဲမှာ ဘရိုက်တန် အသင်းနဲ့ ပွဲတစ်ပွဲသာ ဂိုးသွင်းနိုင်ခဲ့ပြီး ဒီဂိုးကို ပယ်နယ်တီကနေ သွင်းယူခဲ့တာပါ။
မန်စီးတီးအသင်းဟာ ဒီပရီးမီးယားလိဂ် ၇ ပွဲမှာ ၂ ပွဲသာ အနိုင်ရခဲ့ပြီး ၄ ပွဲသရေနဲ့ ၁ ပွဲ ရှုံးနိမ့်ခဲ့ပါတယ်။
အဲ့ဒါကြောင့် ဟာလန်းအနေနဲ့ သွင်းဂိုးတွေ အမြန်ဆုံးပြန်သွင်းပြီး ခြေစွမ်းကောင်းတွေနဲ့ မန်စီးတီးအသင်းကို အကူအညီ ပေးနိုင်ဖို့ လုပ်ရတော့မှာပါ။
ပရီးမီးယားလိဂ် ချန်ပီယံဆုအတွက် အာဆင်နယ်အသင်းကို ဖိအားပေးနေတဲ့ မန်စီးတီးအသင်းဟာ လာမယ့်ပွဲ အဖြစ် လီဗာပူးလ်အသင်းနဲ့ ယှဉ်ပြိုင်ရမှာဖြစ်ပါတယ်။
ဟာလန်းဟာ သူ့ရဲ့ သွင်းဂိုးတွေနဲ့ မန်စီးတီးအသင်းကို ပရီးမီးယားလိဂ် ချန်ပီယံဆု ပြေးလမ်းကြောင်းပေါ်မှာ ဆက်ပြီးရှိနေနိုင်အောင် ကူညီပေးနိုင်မလားဆိုတာ စောင့်ကြည့်ရမှာဖြစ်ပါတယ်။
