CNI News
၂၀၂၂ ခုနှစ်၊ ဩဂုတ် ၁
ထိုင်းနိုင်ငံ တောင်ပိုင်းရှိ လဝက အချုပ်ခန်းတွင် အချုပ်ကျနေသည့် မြန်မာများအားတစ်ဦးလျှင် ဘတ် ၁၈၀၀၀ (မြန်မာငွေကိုးသိန်းကျော်)ဖြင့် ရွေးပေးမည်ဟုဆိုကာ ဘတ်ရှစ်သောင်းကျော်(မြန်မာငွေသိန်းလေးဆယ်ကျော်) လိမ်လည်သွားကြောင်း MWRN မှ ဦးဘရီက CNI သတင်းဌာနသို့ ပြောသည်။
“ဒီအချုပ်ကျနေတဲ့ ဆွေမျိုးတွေ၊ အသိတွေက တချို့ထိုင်းနိုင်ငံမှာ သူတို့ကဆောက်လုပ်ရေး လုပ်လေ့ရှိတယ်။ ထိုင်းပွဲစားမတစ်ယောက်ကနေပြီး တစ်ယောက်ကို ဘတ် ၁၈၀၀၀(တစ်သောင်းရှစ်ထောင်)နဲ့ ရွေးပေးမယ် ဆိုပြီးတော့ အကုန်လုံး သူ့ဆီကို မိဘတွေက မြန်မာပြည်က ပိုက်ဆံလွှဲတာ အကုန်လုံး စုစုပေါင်းဆိုရင် ဘတ် ရှစ်သောင်းနဲ့တစ်ထောင်။ ဒီပိုက်ဆံက အခုထက်ထိ မရသေးဘူး။ အချုပ်ထဲကလူတွေက ကျနော့်ဆီ ဖုန်းဆက်ပြီး တော့ အကူအညီတောင်းတာပေါ့။ ကျနော်က ဒီပွဲစားမကို သိတာကြာပြီ။ သူက အရင်ကတည်းကလည်း အဲဒီလို လိမ်ဖူးတဲ့လူတွေ တော်တော်များတယ်”ဟု ၎င်းက ပြောသည်။
ထိုပွဲစားဖြစ်သူအား ငွေများပြန်ပေးရန် ဖုန်းဆက်တောင်းဆိုသည့်အခါတွင် ၉ ရက်နေ့အထိ အချိန်ပေးရန် ပြောဆို ကြောင်း သိရသည်။
ရွှေ့ပြောင်းအလုပ်သမားများအား ဖမ်းဆီးထိန်းသိမ်းထားသည့် ထောင်တွင်းတစ်နေရာ
အဆိုပါအချုပ်ခန်းတွင် အချုပ်ကျနေသူများသည် ထိုင်းနိုင်ငံထဲသို့ တရားမဝင် ခိုးဝင်လာသူများဖြစ်ကာ ၎င်းတို့ အား ထောင်ဒဏ်ကျခံပြီးမှသာ နေရပ်ပြန်ပို့သည့်စခန်းသို့ ပို့ဆောင်ပေးခြင်းဖြစ်ကြောင်းသိရသည်။
ထို့အပြင် နေရပ်သို့ပြန်ပို့ရန်အတွက် ထိုင်းအာဏာပိုင်များထံသို့ ငွေကြေးပေးသူများကိုသာ နေရပ်ပြန်ပို့မည့် စာရင်းထဲသို့ ထည့်ပေးကြောင်းလည်း သိရသည်။
“အခုဆိုရင် တချို့က ဘတ် ၆၀၀၀၊ ၇၀၀၀ အထိတောင်းတယ်။ ဘတ် ၆၀၀၀၊ ၇၀၀၀ မပေးရင် ဒင်နော့ လဝက အချုပ်မှာ ၆ လ၊ ၇ လ၊ ၈ လအထိ ထားမယ်ဘာညာဆိုပြီးတော့ သူတို့က ခြိမ်းခြောက်တယ်။ ပြီးရင် ဗမာပြည်က မိဘတွေရဲ့ ဖုန်းနံပါတ်ကိုတောင်းတယ်။ ဖုန်းဆက်တယ်။ ဒီနေ့ပို့မယ်ဆိုရင် ၆၀၀၀ နဲ့ရမယ်။ မနက်ဖန်မှဆိုရင် ၇၀၀၀ ကျမယ်။ အဲဒီလိုမျိုးတွေပေါ့။ မိဘတွေကလည်း သားသမီးတွေကို ပူပင်တဲ့စိတ်နဲ့ မရှိရှိတာ ချေးငှားပြီးတော့ ပို့ပေးလိုက်တာတွေရှိတယ်။ တကယ့်တကယ် တရားဝင်ဆိုရင် အကျဉ်းကျတဲ့သူတွေဆီကနေ ခရီးစရိတ်က ပေးစရာမလိုဘူး။ ထိုင်းနိုင်ငံရဲ့အစိုးရဥပဒေအတိုင်းဆိုရင် အစိုးရဘတ်ဂျက်နဲ့နေပြီးတော့ နယ်စပ်ကို ပြန်ပို့လို့ ရတယ်” ဟု ၎င်းက ပြောသည်။
ယခုကဲ့သို့ အကျဉ်းကျနေသူများထံမှ ငွေကြေးတောင်းခံပြီး ထိုင်းအာဏာပိုင်နှင့်စကားပြန်တို့ပေါင်း၍ ခွဲဝေယူကြ ခြင်းများရှိကြောင်း၊ ခရီးစရိတ်သည် တစ်ဦးလျှင် ဘတ် ၁၀၀၀ တောင် မကုန်ကျကြောင်း သိရသည်။
