CNI International News

ကိယက်ဗ်၊ ဇူလိုင် ၅

ယူကရိန်း ခံစစ်သမားများ နိုင်ငံ၏အရှေ့ပိုင်း လူဟန့်စ်ခ် (Luhansk) ဒေသမှ နောက်ဆုံး ဆုတ်ခွာပေးလိုက်ပြီး တစ်ရက် အကြာတွင် ရုရှားသမ္မတ ပူတင်က ထိုဒေသကို သိမ်းပိုက်နိုင်ခဲ့ပြီး ဖြစ်ကြောင်း ကြေညာခဲ့သည်ဟု အေပီသတင်းဌာနက ရေးသားဖော်ပြသည်။

ဇူလိုင် ၄ ရက်က ထုတ်လွှင့်ခဲ့သည့် အစည်းအဝေးတစ်ခုတွင် ရုရှားကာကွယ်ရေးဝန်ကြီး ဆာဂျေရွှိုင်ဂု (Sergei Shoigu) က ရုရှားတပ်များ လူဟန့်စ်ဒေသကို သိမ်းပိုက်ခဲ့ကြောင်း သမ္မတ ပူတင်ထံသို့ အစီရင်ခံနေပုံကို တွေ့မြင်ခဲ့ရသည်။

အဆိုပါဒေသသည် ယူကရိန်း၏ စက်မှုလုပ်ငန်း ဗဟိုအချက်အချာဖြစ်သော ဒွန်ဘတ်စ်ဒေသကြီးထဲတွင် ဒွန်နက်စ်ဒေသနှင့် ယှဉ်တွဲလျက် တည်ရှိသည်။

လူဟန့်စ်ဒေသရှိ ယူကရိန်းတပ်ဖွဲ့များ၏ နောက်ဆုံး အမာခံ နယ်မြေဖြစ်သော လာဆက်ချိုက် (Lysychansk) မြို့ကို ရုရှားတို့ သိမ်းပိုက်ပြီးနောက် စစ်ဆင်ရေးမှာ ဇူလိုင် ၃ ရက်တွင် အဆုံးသတ်ခဲ့ကြောင်း ရွှိုင်ဂုက ပူတင်ကို အစီရင်ခံတင်ပြခဲ့သည်။

ရုရှားသမ္မတ ပူတင်နဲ့ ရုရှားကာကွယ်ရေးဝန်ကြီး ဆာဂျေရွှိုင်ဂု (AP)

ထို့နောက် ပူတင်က “လူဟန့်စ်တွင် တက်ကြွသော တိုက်ခိုက်မှုများတွင် ပါဝင်ခဲ့သည့် မိမိတို့တပ်ဖွဲ့များ အောင်ပွဲခံပြီးနောက် အနားယူသင့်ကြောင်း၊ ၎င်းတို့၏ တိုက်ခိုက်ရေးစွမ်းရည် တိုးမြှင့်သင့်ကြောင်း” ပြန်လည် မှာကြားခဲ့သည်။

ဇူလိုင် ၃ ရက်တွင် ၎င်းတို့တပ်ဖွဲ့များ လာဆက်ချိုက်မြို့မှ ဆုတ်ခွာခဲ့ကြောင်း ယူကရိန်းစစ်တပ်က အတည်ပြုခဲ့ပြီးနောက် ရုရှားတပ်များက ယူကရိန်း အရှေ့ပိုင်းထဲသို့ ပိုမိုနက်ရှိုင်းစွာ ထိုးစစ်ဆင်ရန် ကြိုးစားနေစဉ် ပူတင်၏အထက်ပါ ကြေညာချက် ထွက်ပေါ်လာခဲ့သည်။

ယူကရိန်း တပ်ဖွဲ့များသည် ဝိုင်းရံပိတ်ဆို့ခြင်းမှ ရှောင်ရှားရန်အတွက် လာဆက်ချိုက်မြို့မှ ဆုတ်ခွာခဲ့ပြီဟု ယူကရိန်းဘက်မှ လူဟန့်စ်ဒေသအုပ်ချုပ်ရေးမှူး ဆာဟေးဟိုင်ဒိုင်း (Serhii Haidai) က ဇူလိုင် ၄ ရက်တွင် ပြောကြားခဲ့သည်။

“လာဆက်ချိုက်မှာ အဝိုင်းခံရတာ အန္တရာယ်များပါတယ်” ဟု ဟိုင်ဒိုင်းက အေပီသတင်းဌာနသို့ ပြောကြားခဲ့သည်။

ယူကရိန်းတပ်ဖွဲ့ (AP)

ယူကရိန်းတပ်များသည် ရက်သတ္တပတ် အတန်ကြာ အဆိုပါမြို့ကို ဆက်ထိန်းထားနိုင်သော်လည်း ပေးဆပ်မှု ကြီးမားနိုင်ဖွယ် ရှိနေကြောင်း ၎င်းက ဆက်လက် ပြောကြားခဲ့သည်။

“ကျနော်တို့က စစ်မြေပြင် ဗဟိုပြုထားတဲ့ နေရာကနေ ဆုတ်ခွာပေးလိုက်ပြီးတော့ ဒဏ်ရာရသူတွေ အားလုံး ကယ်ထုတ် နိုင်ခဲ့ ပါတယ်။ ပစ္စည်းတွေလည်း အားလုံး ပြန်သိမ်းနိုင်ခဲ့လို့ ဒီကနေ ဆုတ်ခွာပေးလိုက်ရတာ အခြေအနေ ကောင်းပါတယ်” ဟု ဟိုင်ဒိုင်းက ရှင်းပြသည်။

ရုရှားထိန်းချုပ်ထားသည့် ဒွန်နက်စ်ဒေသရှိ စီဗာ့စ် (Siversk) ၊ ဖီဒိုရိုဗကာ (Fedorivak) နှင့် ဘက်ခ်မက် နယ်မြေများဆီသို့ မော်စကိုတပ်များ ယခုအခါ အာရုံစိုက် ကြပ်မတ်နေကြောင်း ယူကရိန်းစစ်ဦးစီးချုပ်ရုံးက သတင်းထုတ်ပြန်ခဲ့သည်။

ရုရှားသည် ဒွန်နက်စ်ဒေသရှိ စလိုဗီယန်စ် (Sloviansk) နှင့် ကရာမာတော်စ် (Kramatorsk) တို့ရှိ အဓိက ယူကရိန်း အမာခံ နယ်မြေများကိုလည်း ပစ်ခတ်တိုက်ခိုက်မှုများ တိုးမြှင့်လုပ်ဆောင်ခဲ့သည်။

ဇူလိုင် ၃ ရက်၌ စလိုဗီယန်စ်နယ်မြေတွင် ရုရှား၏ ပစ်ခတ်မှုကြောင့် အသက် ၉ နှစ်အရွယ် မိန်းကလေးတစ်ဦး အပါအဝင် လူ ၆ ဦး သေဆုံးပြီး ၁၉ ဦး ဒဏ်ရာရခဲ့ကြောင်း၊ ကရာမာတော်စ် နယ်မြေတွင်လည်း မီးလောင်မှု ဖြစ်ပွားခဲ့ကြောင်း ဒေသန္တရ အာဏာပိုင်များ၏ ပြောကြားချက်အရ သိရသည်။

Source: AP