CNI International News
ဘေကျင်း၊ ဧပြီ ၂၆
တရုတ်ကွန်မြူနစ်ပါတီသည် နည်းပညာများကို အသုံးပြုပြီး တရုတ်ပြည်သူ တစ်ဦးချင်းစီ၏ လှုပ်ရှားမှုအား အနီးကပ်စောင့်ကြည့်နေသည်ဟု Greek City Times သတင်းဝက်ဘ်ဆိုက်မှ ဖော်ပြခဲ့သည်။
၂၀၂၂ ခုနှစ်က ရိုက်တာသတင်းဌာန၏ သတင်းတစ်ပုဒ်တွင် တရုတ်သည် ၎င်းပြည်သူများအား အနီးကပ် စောင့်ကြည့်ရန် ဆော့ဖ်ဝဲများ၊ စောင့်ကြည့် ပစ္စည်းကိရိယာများနှင့် ကင်မရာများ၌ AI နည်းပညာကို ထည့်သွင်း ခဲ့သည်ဟု ဖော်ပြထားသည်။
Covid-19 ကပ်ရောဂါ ကာလအတွင်းကလည်း တရုတ်အာဏာပိုင်များသည် ကပ်ရောဂါ အခြေအနေ၊ ရောဂါ ကူးစက်မှုနှင့် ကပ်ရောဂါကို ကိုင်တွယ်ဖြေရှင်းမှုအပေါ် ပြည်သူများ၏ သဘောထားနှင့် ပတ်သက်ပြီး သတင်း အချက်အလက်များကို တင်းကျပ်စွာ ထိန်းချုပ်ခဲ့သည်။
တရုတ်နိုင်ငံအတွင်း သတင်းအချက်အလက်နှင့် သဘောထား အမြင်များကို စီမံထိန်းချုပ်မှုသည် ပုံမှန် ဖြစ်လာခဲ့ သော်လည်း ဗဟိုအာရှ အပါအဝင် အခြားနိုင်ငံများတွင်လည်း ထိုကဲ့သို့ လုပ်ဆောင်လာခြင်းသည် တရုတ်၏ ဩဇာ လွှမ်းမိုးရေး စီမံကိန်းများ၏ ကြိုးပမ်းအားထုတ်မှုကို ဖော်ပြရာရောက်နေသည်။
ကာဂျစ္စတန်နိုင်ငံသားတွေ တရုတ်ကို ဆန့်ကျင်နေကြစဉ်
၂၀၂၄ ခုနှစ်၊ ဧပြီ ၁၂ ရက်က Jamestown ဖောင်ဒေးရှင်းအတွက် သုတေသီတစ်ဦးဖြစ်သူ နီဗာ ယူ (Niva Yau) ရေးသားခဲ့သည့် ဆောင်းပါးတစ်ပုဒ်တွင် တရုတ်၏ ပြည်သူ့စိတ်သဘောထား စီမံထိန်းချုပ်ရေး အစီအစဉ်သည် ပြည်တွင်းမှာ သာမကဘဲ ပြည်ပနိုင်ငံများကိုပါ ကျော်လွန်လုပ်ဆောင်လာပြီး အတိုက်အခံများကို ဖိနှိပ်ရန် ကြိုးပမ်းလာခဲ့ကြောင်း ဖော်ပြခဲ့သည်။
ထိုနိုင်ငံများထဲတွင် တရုတ်၏ အကျိုးစီးပွားများ၊ အထူးသဖြင့် နယ်မြေလွှဲပြောင်းမှုနှင့် ရှင်ကျန်း (Xinjiang) ဒေသ ရှိ ဝီဂါ (Uyghurs) မွတ်ဆလင်များကို ဆက်ဆံမှုများ၌ တရုတ်ကို စဉ်ဆက်မပြတ် ထောက်ခံပေးခဲ့သည့် ကာဂျစ္စတန်လည်း ပါဝင်ခဲ့သည်။
တရုတ်သည် ကာဂျစ္စတန်နှင့် အခြားနေရာများတွင် အာဏာရ အခွင့်ထူးခံ လူနည်းစုကို မက်လုံးများပေးပြီး တရုတ်၏ အကျိုးစီးပွားသာမက ထိုနိုင်ငံများ၏ အကျိုးစီးပွားများကို ဦးစားပေး လုပ်ဆောင်လျက်ရှိသည်။
ကာဂျစ္စတန်နိုင်ငံကိုတွေ့ရစဉ်
အဘယ်ကြောင့်ဆိုသော် တရုတ်သည် ကာဂျစ္စတန်နိုင်ငံရှိ ဝေဖန်ရေးသမားများ၏ အသံကို ထိန်းချုပ်ရန်နှင့် တရုတ်ကို ထောက်ခံမှုများ ရှိစေရန် စီမံဆောင်ရွက်နေခြင်းဖြစ်သည်။
ကာဂျစ္စတန်နိုင်ငံတွင်လည်း ကာဂျစ္စတန်၏ ၁၂၅၀ စတုရန်း ကီလိုမီတာ အကျယ်ရှိ နယ်မြေကို တရုတ်အား လွှဲပြောင်းပေးရန် သဘောတူညီချက်နှင့် ပတ်သက်ပြီး ဆန့်ကျင်ကန့်ကွက်မှုများနှင့် ဆန္ဒပြမှုများ ဖြစ်ပွားခဲ့သည်။
သို့သော်လည်း ကာဂျစ္စတန်အစိုးရသည် တရုတ်ကို ဆန့်ကျင်သည့် ဆန္ဒပြပွဲများနှင့် ပတ်သက်သော သတင်းများ ကို ဖော်ပြခြင်းမပြုရန် နိုင်ငံပိုင် မီဒီယာများအား ညွှန်ကြားခဲ့သည်ဟု လွတ်လပ်ပြီး အမှီအခိုကင်းသည့် သတင်းထောက်များက ပြောကြားခဲ့သည်။
Source: Greek City Times
