CNI Sport News
၂၀၂၂ ခုနှစ်၊ သြဂုတ် ၁၈
ဂျပန်နိုင်ငံရဲ့ အစိုးရရှေ့နေတွေဟာ လာဘ်ပေးလာဘ်ယူမှု သံသယနဲ့ ၂၀၂၀ တိုကျိုအိုလံပစ်ပြိုင်ပွဲ ဘုတ်အဖွဲ့ဝင် ဟောင်း တာကာဟာရှီကို ဖမ်းဆီးခဲ့တယ်လို့ Asahi Shimbun သတင်းစာမှာ ဖော်ပြထားပါတယ်။
တာကာဟာရှီဟာ ပြီးခဲ့တဲ့နှစ်က ကျင်းပခဲ့တဲ့ ပြိုင်ပွဲအတွက် ဝတ်စုံလက်လီ ရောင်းချသူနဲ့ စပွန်ဆာပေးသူ Aoki Holdings ထံကနေ ယန်းငွေဘီလီယံ ရာနဲ့ချီတဲ့ လာဘ်ငွေကြေးတွေ ရရှိခဲ့တယ်ဆိုတဲ့ သံသယနဲ့ ဖမ်းဆီးခဲ့တာလို့ Asah Shimbun က ရေးသား ဖော်ပြထားပါတယ်။
တာကာဟာရှီ အပြင် အစိုးရရှေ့နေတွေဟာ Aoki Holdings ဥက္ကဋ္ဌဟောင်း ဟီရိုနိုရီနဲ့ အခြားနှစ်ဦးကိုလည်း ဖမ်းဆီးခဲ့ပါတယ်။ ဇူလိုင်လကုန်ပိုင်းက စုံစမ်းစစ်ဆေးသူတွေဟာ တာကာဟာရှီရဲ့ နေအိမ်နဲ့ ဂျပန်ကြောငြာ ကုမ္ပဏီ Dentsu Group ရဲ့ ရုံးခန်းကို ဝင်ရောက် စီးနင်းခဲ့ပါတယ်။
တာဟာဟာရှီဟာ Dentsu Group ရဲ့ အမှုဆောင်ဟောင်း ဖြစ်တယ်လို့ သိရပါတယ်။ Aoki Holdings က တာကာဟာရှီကို ဒေါ်လာ ၁ သန်းကျော် ပေးချေခဲ့တယ်လို့ သတင်းတွေ ထွက်ပေါ်နေပြီး တိုကျိုရှိ အစိုးရ ရှေ့နေတွေက စုံစမ်းစစ်ဆေးနေပါတယ်။
တိုကျိုအိုလံပစ်ပြိုင်ပွဲ (JRT Post)
Aoki ဟာ ၂၀၁၇ က Dentsu လက်အောက်ခံ ကုမ္ပဏီတစ်ခုကို ဒေါ်လာ ၁.၇ သန်းပေးချေခဲ့ပြီး ဒီငွေတွေကို တာကာဟာရှီ လည်ပတ်နေတဲ့ ကုမ္ပဏီထံ ပြန်လည် လွှဲပြောင်းပေးခဲ့တယ်လို့ Nikkei စီးပွားရေး နေ့စဉ်သတင်းမှာ ဖော်ပြထားပါတယ်။
ယန်း သန်းပေါင်းများစွာကို အားကစားအဖွဲ့အစည်း နှစ်ခုထံ အမှန်အကန် လွှဲပြောင်း ပေးခဲ့ပေမယ့် တာကာဟာရှီ ရဲ့ ကုမ္ပဏီက လက်ကျန် ဒေါ်လာ ၁.၁ သန်းကို သိမ်းဆည်းထားတယ်လို့ Nikkei က ဖော်ပြခဲ့ပါတယ်။
တာကာဟာရှီဟာ ၂၀၁၃ နဲ့ ၂၀၁၄ မှာ ထုတ်ဖော် ပြသခြင်း မရှိတဲ့ လှုပ်ရှားမှုတွေအတွက် ၂၀၂၀ တိုကျိုအိုလံပစ် ပြိုင်ပွဲ လေလံကော်မတီထံကနေ အမေရိကန်ဒေါ်လာ ၈ သန်းကျော် ရရှိခဲ့တယ်လို့ ၂၀၂၀ ခုနှစ်၊ မတ်လမှာ ရိုက်တာက ဖော်ပြခဲ့ပါတယ်။
တာကာဟာရှီရဲ့ အရှုပ်တော်ပုံနဲ့ အခုသတင်းပတ်အတွင်း ဖမ်းဆီးမှုဟာ တိုကျိုအိုလံပစ်ပြိုင်ပွဲရဲ့ အမွေအနှစ်ကို ညှိုးနွမ်းစေခဲ့ပါတယ်။ တိုကျိုအိုလံပစ်ပြိုင်ပွဲကို ၂၀၂၀ မှာ ကျင်းပဖို့ စီစဉ်ထားခဲ့ပေမယ့် ကိုဗစ်ကပ်ရောဂါကြောင့် တစ်နှစ်နောက်ကျပြီးမှ ကျင်းပခဲ့ရပါတယ်။
Source: အာတီ
