CNI News
၂၀၂၁ ခုနှစ်၊ နိုဝင်ဘာ ၃
တရုတ်နိုင်ငံထုတ် ကိုဗစ်ကာကွယ်ဆေးဖြစ်သည့် Sinopharm အား မြန်မာနိုင်ငံတွင် ပုလင်းသွင်းစနစ်ဖြင့် ထုတ်လုပ်နိုင်ရေး ဆောင်ရွက်သွားမည်ဖြစ်ကြောင်း ကျန်းမာရေးဝန်ကြီးဌာနမှ ပြောခွင့်ရပုဂ္ဂိုလ် ဒေါက်တာသန်းနိုင်စိုးက CNI သတင်းဌာနသို့ ပြောသည်။
ထိုသို့ ဆောင်ရွက်ရခြင်းမှာ လုပ်ရမည့် အလုပ်ပမာဏအား လျှော့ချခြင်းဖြစ်ကြောင်း ၎င်းက ဆိုသည်။
ဒေါက်တာသန်းနိုင်စိုးက “အဓိကကတော့ workload ကို လျှော့တာပေါ့နော်။ ကျနော်တို့ နိုင်ငံတကာက ထုတ်ပိုးပြီးသား လာတဲ့ အခါကျရင်လေ လေယာဉ်ပျံတစ်စီးတစ်စီးဆိုလည်း နည်းနည်းပဲ ပါတယ်ပေါ့နော်။ သယ်ယူပို့ဆောင် စရိတ်တွေ လည်း များတယ်။ နောက်တစ်ခါ ထုတ်ပိုးမှုအတွက်ကို လုပ်ရတဲ့ စရိတ်စကတွေ ဒီဟာတွေကလည်း များတယ်။ အဲ့တော့ ဟိုဘက်ကနေပြီးတော့ ထုတ်လာတဲ့ဟာကို ကျနော်တို့က ဒီဘက်မှာပြန်ပြီးတော့ packing ပြန်လုပ်တဲ့အခါကျရင် အဲ့ဒီ လုပ် ရတဲ့ လုပ်ငန်းအဆင့်တွေလည်း သက်သာသွားမယ်။
နောက်ပြီး ဒီနိုင်ငံအတွင်းမှာပဲ လေယာဉ်မလိုတော့ဘူးပေါ့၊ ကားတွေနဲ့ တိုက်ရိုက် ပို့ဆောင်တာတို့ပေါ့နော်။ လေယာဉ်နဲ့ပို့တာလည်း ရှိတာတော့ ရှိဦးမှာပေါ့။ အဲ့လိုမျိုးလုပ်တဲ့ အဆင့်တွေ သက်သာ သွားမယ်ပေါ့” ဟု CNI သတင်းဌာနသို့ ပြောသည်။
နိုဝင်ဘာ ၂ ရက်က ပြုလုပ်သည့် ကိုဗစ်-၁၉ ရောဂါ ကာကွယ်ဆေး ထုတ်လုပ်နိုင်ရေး လုပ်ငန်းညှိနှိုင်းအစည်းအဝေးတွင် စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းက Sinopharm အား Ready to fill bulk အနေဖြင့် ဝယ်ယူ၍ ပုလင်းသွင်းဖြည့်တင်း ထုတ်လုပ်နိုင်ရေး ဆောင်ရွက်သွားမည်ဖြစ်ကြောင်း ပြောခဲ့သည်။
ထို့အပြင် ပုလင်းသွင်း ဖြည့်တင်းခြင်းအဆင့် ဆောင်ရွက်ရာတွင် သတ်မှတ်ထားသည့် ဆေးဝါးထုတ်လုပ်မှု ကျင့်စဉ်နှင့်အညီ ဆောင်ရွက်နိုင်ရေးအတွက် ဆောင်ရွက်ရမည့် နည်းလမ်းအစီအစဉ်များသာမက ထုတ်လုပ်မှုနည်းလမ်းအစီအစဉ်နှင့် အရည် အသွေး စစ်ဆေးခြင်း နည်းလမ်းအစီအစဉ်များကိုပါ လွှဲပြောင်းရရှိထားပြီး ဖြစ်ကြောင်းလည်း ၎င်းက ဆိုသည်။
တရုတ်နိုင်ငံထုတ် Sinopharm ကိုဗစ် ကာကွယ်ဆေး အရည်အား မြန်မာနိုင်ငံသို့ သယ်ဆောင်၍ ပုလင်းသွင်း ဖြည့်တင်း ထုတ်လုပ်မှာ ဖြစ်ကြောင်း သိရသည်။
ဒေါက်တာသန်းနိုင်စိုးက “အဲ့ဒါကတော့ international standard တွေရှိတယ်။ ဒီစံချိန်စံညွှန်းတွေနဲ့ ပြည့်မီအောင် ယူရမှာ ပေါ့။ ဒီဟာတွေ အကုန်လုံးကတော့ ကုန်ထုတ်လုပ်မှု ဆိုတာရှိတယ်ပေါ့။ အဲ့ GNP ရဲ့ အောက်က အရည်အသွေး ထိန်းသိမ်း တာတို့ သူ့ရဲ့ သယ်ယူပို့ဆောင်တဲ့အခါမှာ ဘယ်လို standard နဲ့ သယ်ရမယ်ဆိုတဲ့ နိုင်ငံတကာ အသိအမှတ်ပြုထားတဲ့ စံချိန် စံညွှန်းတွေရှိတယ်ပေါ့။ ဒီဟာအတိုင်းပဲလုပ်ရမှာပါ”ဟု CNI သတင်းဌာနသို့ ပြောသည်။
ထို့အပြင် ကိုဗစ်ကာကွယ်ဆေးအား ပြည်တွင်းတွင် ထုတ်လုပ်မည်ဆိုပါက အအေးသိုလှောင်ရေးစနစ်၊ သယ်ယူပို့ဆောင်ရေး စနစ် စသည်တို့အား ထည့်သွင်း စဉ်းစားရမည်ဖြစ်ကြောင်း ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာ သက်ခိုင်ဝင်းက နိုဝင်ဘာ ၂ ရက်က ပြုလုပ်သည့် အစည်းအဝေးတွင် ပြောသည်။
ဒေါက်တာသက်ခိုင်ဝင်းက Ready to fill bulk ပြုလုပ်၍ ထုတ်လုပ်မည်ဆိုပါကလည်း ကာကွယ်ဆေးများ ပြတ်လပ်မှုမရှိ အောင် ကြိုတင် ညှိနှိုင်းထားရမည်ဖြစ်ကြောင်း၊ ထုတ်လုပ်သည့် ကာကွယ်ဆေးများသည် Antibody ထွက်ရှိမှု မည်မျှရှိ သည်ကိုလည်း ထည့်သွင်း စဉ်းစားသင့်ကြောင်း ပြောကြားခဲ့သည်။
