CNI International News
ဖနွမ်ပင်၊ ဩဂုတ် ၁၀
ဒေသတွင်းနှင့် ကမ္ဘာ့လုံခြုံရေး စိန်ခေါ်မှု တိုးလာခြင်းအား ကောင်းစွာ စီမံခန့်ခွဲနိုင်ခြင်း မရှိပါက အာဆီယံဒေသတွင်းကို မတည်မငြိမ် ဖြစ်စေနိုင်ကြောင်း ကမ္ဘောဒီးယား ဝန်ကြီးချုပ်ဟွန်ဆန်က သတိပေးခဲ့ကြောင်း ဩဂုတ် ၈ ရက် ရက်စွဲဖြင့် ဖနွမ်ပင်ပို့စ် ဝက်ဘ်ဆိုက်က ရေးသားဖော်ပြသည်။
ဩဂုတ် ၈ ရက်တွင် ကျရောက်ခဲ့သော အာဆီယံ ၅၅ နှစ်မြောက် အထိမ်းအမှတ် သဝဏ်လွှာပေးပို့ရာတွင် အသင်း၏ဥက္ကဋ္ဌ အဖြစ် ယခုနှစ် တာဝန်ယူထားသူ ဝန်ကြီးချုပ် ဟွန်ဆန်က အာဆီယံနှင့် ကမ္ဘာ့ငြိမ်းချမ်းရေးအတွက် ခြိမ်းခြောက်မှုအချို့ကို ထုတ်ဖော် ပြောကြားခဲ့သည်။
“အနာဂတ်မှာ အာဆီယံအနေနဲ့ အဓိကလုံခြုံရေး စိန်ခေါ်မှုတွေကို ဆက်လက် ရင်ဆိုင်ရာမှာ အရေးကြီးဆုံး ဖြစ်နေတာက တော့ မြန်မာ၊ တောင်တရုတ်ပင်လယ်၊ ကိုရီးယားကျွန်းဆွယ်နဲ့ ရုရှား-ယူကရိန်းစစ်ပွဲ အခြေအနေတွေ ဖြစ်ပါတယ်” ဟု ၎င်းက ဆက်လက်ပြောကြားခဲ့သည်။
ဝန်ကြီးချုပ် ဟွန်ဆန်က“ဒီပြဿနာတွေကို ကောင်းကောင်း စီမံခန့်ခွဲတာ မလုပ်ဘူးဆိုရင် ဒေသတွင်း ငြိမ်းချမ်းရေးနဲ့ လုံခြုံရေး မတည်မငြိမ် ဖြစ်စေ မှာပါ” ဟု သတိပေးခဲ့သည်။
အာဆီယံ အစည်းအဝေးတွင် တွေ့ရသော ရုရှားနဲ့တရုတ် နိုင်ငံခြားရေး၀န်ကြီးများ (ASEAN)
အာဆီယံနိုင်ငံများအတွင်း ပဋိပက္ခများ (သို့မဟုတ်) စစ်ပွဲများ ရှိလာမည် မဟုတ်ဟု အာမမခံနိုင်သော်လည်း အပြုသဘော ဆောင်သည့် တွေ့ဆုံ ဆွေးနွေးမှုများအတွက် ပွင့်လင်းသော ဖိုရမ်များ လုပ်ဆောင်နိုင်ခဲ့သဖြင့် ငြိမ်းချမ်းရေးနှင့်တည်ငြိမ်ရေး မြှင့်တင်ရာတွင် သိသာထင်ရှား အထောက်အကူဖြစ်ခဲ့ကြောင်း ဝန်ကြီးချုပ်ဟွန်ဆန်က ၎င်းသဝဏ်လွှာထဲတွင် ထည့်သွင်း ပြောကြားခဲ့သည်။
အာဆီယံဒေသတွင်း စည်းလုံးသည့် စိတ်ဓာတ်ကို မြှင့်တင်သွားမည်ဖြစ်ပြီး အဖွဲ့အတွင်းသာမက ပြင်ပမိတ်ဖက်နိုင်ငံများနှင့်ပါ လက်တွဲ၍ “၂၀၂၅ အတွက် အာဆီယံ အသိုင်းအဝန်း မျှော်မှန်းချက်”ကို အကောင်အထည် ဖော်သွားမည်ဟု ၎င်းက ကတိပြုခဲ့ သည်။
ယခု ၂၀၂၂ ခုနှစ်တွင် ကမ္ဘောဒီးယားသည် (စိန်ခေါ်မှုများအား အတူတကွ ရင်ဆိုင်ဖြေရှင်းခြင်း) “ASEAN ACT: Addressing Challenges Together” ခေါင်းစဉ်ဖြင့် အာဆီယံအလှည့်ကျဥက္ကဋ္ဌ တာဝန်ကို တတိယအကြိမ်မြောက် ထမ်းဆောင်ခဲ့သည်။
“ကုလသမဂ္ဂငြိမ်းချမ်းရေး ထိန်းသိမ်းမှု လုပ်ငန်းတွေ အပါအဝင် ဒေသတွင်းနဲ့ ကမ္ဘာ့ငြိမ်းချမ်းရေးအတွက် အာဆီယံရဲ့ ပါဝင် ကူညီမှု အရှိန်အဟုန်ကို ကျနော်တို့ ထောက်ခံပါတယ်” ဟု ကမ္ဘောဒီးယားဝန်ကြီးချုပ် ဟွန်ဆန်က ဖြည့်စွက် ပြောကြားခဲ့ သည်။
Source: Phnompenh Post
