CNI Sport News
၂၀၂၃ ခုနှစ်၊ ဇွန်လ ၇
ဝက်စ်ဟမ်းအသင်းနည်းပြ ဒေးဗစ်မိုယက်စ်က ဖီအိုရင်တီးနားအသင်းနဲ့ ကစားမယ့် ယူရိုပါကွန်းဖရန့်စ်လိဂ် ဗိုလ်လုပွဲမှာ အသင်းအနေနဲ့ ၄၃ နှစ်ကြာ စောင့်ဆိုင်းခဲ့ရတဲ့ ဆုဖလားမရတာကို အဆုံးသတ်ဖို့ ကစားသမားတွေကို ပြောလိုက်ပါတယ်။
ဒေးဗစ်မိုယက်စ်က “ဒါက ကျနော့် နည်းပြဘဝရဲ့ အကြီးမားဆုံး အခိုက်အတန့်ပါပဲ။ ဝက်စ်ဟမ်းက ဥရောပဗိုလ်လု ပွဲ ကစားရမယ်လို့ ရာသီအစမှာ ပြောခဲ့ရင် လူတွေက ယုံမှာမဟုတ်ဘူးလို့ ထင်ပါတယ်။ ဥရောပဗိုလ်လုပွဲကို ရောက်ရှိလာတာက ကြီးမားတဲ့ အောင်မြင်မှုဖြစ်ပြီး အားလုံးကို ကျော်ဖြတ်နိုင်ဖို့က မလွယ်ကူသလို ပြိုင်ဆိုင်မှုတွေ လည်း ရှိခဲ့ပါတယ်။ ကစားသမားတိုင်းအတွက် ကြီးမားတဲ့ အောင်မြင်မှုဖြစ်ပြီး ဆုဖလား ရယူနိုင်မလားဆိုတာ ဆက်ပြီး ကြည့်ရမှာပါ”လို့ ပြောပါတယ်။
ဝက်စ်ဟမ်းအသင်းဟာ ၁၉၈၀ က FA ဖလား ချန်ပီယံဆုကို ရယူပြီးနောက်ပိုင်း ဆုဖလား ရယူနိုင်ခြင်း မရှိတော့ ပါဘူး။
လန်ဒန်ကလပ်ဟာ ၁၉၆၅ က Cup Winners’ Cup ရယူနိုင်ခဲ့တာက သူတို့ရဲ့ တစ်ခုတည်းသော ဥရောပအောင်မြင် မှု ဖြစ်ခဲ့ပါတယ်။
ယူရိုပါကွန်းဖရန့်စ်လိဂ် ဗိုလ်လုပွဲအတွက် ပြင်ဆင်ထားမှုကိုတွေ့ရစဉ်
ဝက်စ်ဟမ်းအသင်းဟာ အဲဒီနောက်ပိုင်း ၁၉၇၆ ပြိုင်ပွဲမှာ ဗိုလ်လုပွဲ တက်နိုင်ခဲ့ပြီးနောက် နှစ်ပေါင်း ၂၅ နှစ်အကြာမှ ပထမဆုံးအကြိမ် ဥရောပဗိုလ်လုပွဲကို ပြန်ပြီး ယှဉ်ပြိုင်ရမှာ ဖြစ်ပါတယ်။
ဝက်စ်ဟမ်းအသင်းဟာ ယူရိုပါကွန်းဖရန့်စ်လိဂ် ဗိုလ်လုပွဲ မတိုင်ခင် နောက်ဆုံး ကစားခဲ့တဲ့ ပွဲက မေလ ၂၈ ရက်က လက်စတာအသင်းနဲ့ ပွဲဖြစ်ပြီး အဲဒီနောက်ပိုင်း ဗိုလ်လုပွဲအတွက် လေ့ကျင့်မှုတွေ ပြုလုပ်ခဲ့ပါတယ်။
ဝက်စ်ဟမ်းအသင်းအနေနဲ့ ပြီးခဲ့တဲ့အပတ်က အနားယူချိန်နဲ့ အလုပ်အကြား ဘယ်လိုဟန်ချက်ညီအောင် လုပ် ဆောင်ခဲ့လဲဆိုပြီး နည်းပြ ဒေးဗစ်မိုယက်စ်ဟာ မေးမြန်းခြင်း ခံခဲ့ရပါသေးတယ်။
ဒေးဗစ်မိုယက်စ်က “ကျနော်တို့ဟာ ပေါ်တူဂီကို ၂ ရက်၊ ၃ ရက်လောက်ကတည်းက သွားခဲ့ပြီး ပျော်ပျော်ရွှင်ရွှင်နဲ့ လေ့ကျင့်မှုတွေ ပြုလုပ်ခဲ့ပါတယ်။ ကျနော်တို့ဟာ ဒီရာသီမှာ ပြိုင်ပွဲစုံ ၅၆ ပွဲ ကစားပြီးပြီဖြစ်သလို မနှစ်ကဆိုရင် ပွဲ ၆၀ ကျော် ကစားခဲ့ပါတယ်။ ကျနော်တို့ ကစားခဲ့တဲ့ ပွဲတွေကြောင့် ၁၀ ရက် ကွာဟမှုက ပြဿနာမဟုတ်ဘူးလို့ မျှော်လင့်ပါတယ်။ ကျနော်တို့ဟာ အခုရာသီမှာလည်း ရှုံးပွဲမရှိခဲ့သလို ပြီးခဲ့တဲ့နှစ်ကလည်း ဆီမီးဖိုင်နယ် ရောက်ခဲ့ တာကြောင့် ကျနော်တို့ရဲ့ ဥရောပစံချိန်က အလွန်ကောင်းပါတယ်။ ဒါကို ဆက်ပြီးလုပ်နိုင်ဖို့ မျှော်လင့်တယ်”လို့ ဖြေခဲ့ပါတယ်။
ဖီအိုရင်တီးနားနဲ့ ဝက်စ်ဟမ်းအသင်းတို့ရဲ့ ယူရိုပါကွန်းဖရန့်စ်လိဂ် ဗိုလ်လုပွဲကို ဇွန်လ ၈ ရက် မြန်မာစံတော်ချိန် မနက် ၁ နာရီခွဲမှာ ယှဉ်ပြိုင်သွားမှာ ဖြစ်ပါတယ်။
Source: CNA
