ဂျေရုဆလင်၊စက်တင်ဘာ ၃

ဂျေရုဆလင်မြို့မှာ အမေရိကန်ကောင်စစ်ဝန်ရုံး ပြန်ဖွင့်မည့်အစီအစဉ်သည် ကောင်းမွန်သည့်စိတ်ကူးမဟုတ်ဘဲ လက်ရှိဝန်ကြီးချုပ် နက်ဖ်တာလီဘန်းနက်၏အစိုးရကို မတည်မငြိမ်ဖြစ်စေနိုင်ကြောင်း အစ္စရေးဘက်မှပြောသည် ဟု အယ်လ်ဂျာဇီးယားသတင်းဌာနက ရေးသားဖော်ပြသည်။

အမေရိကန်သမ္မတဟောင်း ဒေါ်နယ်ထရမ့်၏ယခင်အစိုးရလက်ထက်ကလည်း ဂျေရုဆလင်မြို့ကို အစ္စရေးတို့၏ မြို့တော်အဖြစ် အသိအမှတ်ပြုသည့်အနေဖြင့် အမေရိကန်သံရုံးကို တဲလ်အဗစ်မြို့မှ ဂျေရုဆလင်သို့ ပြောင်းရွှေ့ ဖွင့်လှစ်ခဲ့ပြီး ကောင်စစ်ဝန်ရုံးကို ပိတ်ခဲ့သည်။ ယင်းကောင်စစ်ဝန်ရုံးသည် ပါလက်စတိုင်းတို့အတွက် သံတမန်ရေး ထိုးဖောက်မှုအတွက် အစဉ်အလာအရ အခြေစိုက်ခဲ့သည်။ ထိုသို့ ထရမ့်အစိုးရ၏ သံရုံးရွှေ့သည့်လုပ်ရပ်သည် အရှေ့ဂျေရုဆလင်ကို ၎င်းတို့အနာဂတ်မြို့တော်အဖြစ် လိုလားနေကြသည့် ပါလက်စတိုင်းခေါင်းဆောင်များကို ဒေါသထွက်စေခဲ့သည်။