၂၀၂၁ ခုနှစ်၊ စက်တင်ဘာ ၁
ရှမ်းပြည်နယ်တောင်ပိုင်းရှိ ကလော၊ ပင်လောင်း၊ ပင်းတယနှင့် ညောင်ရွှေမြို့နယ်များရှိ ကုန်စိမ်းသီးနှံစိုက်ပျိုးသည့် တောင်သူများ ဈေးမရ၍ အရှုံးပေါ်ပြီး စိုက်ပျိုးသီးနှံများ စွန့်ပစ်နေရကြောင်း ဒေသခံ တောင်သူများထံက သိရသည်။
ဒေသခံတောင်သူ ကိုမင်းသူ (အမည်လွှဲ) က “ကျနော်တို့က အဓိကတော့ သီးနှံစိုက်ပျိုးတဲ့ ကလော၊ ပင်လောင်း၊ ပင်းတယနဲ့ ညောင်ရွှေမြို့နယ်တို့ပေါ့။ ဒီလေးမြို့နယ်က အဓိကပေါ့။ ဒီလေးမြို့နယ်က အောင်ပန်းကုန်စည်ဒိုင်မှာ ရောင်းကြရပါတယ်။ အစောပိုင်းကတော့ ကိုဗစ် တတိယလှိုင်းဆိုပြီးတော့ ကုန်စည်ဒိုင်ရော၊ ပွဲရုံတွေရော ပိတ်ထားတယ်။ နောက်တော့ တစ်ပတ်၊ နှစ်ပတ် ပိတ်ပြီးတော့ ပြန်ဖွင့်တယ်ပေါ့။ ပွဲရုံပိတ်သွားတုန်းကလည်း ဈေးကျတယ်။ ပြန်ဖွင့်တော့ ဈေးနှုန်းတွေက ဒီအတိုင်းပဲ။ ခရမ်းချဉ်သီးဈေးက ၅၀ နဲ့ ၁၀၀ ကြားကနေ တက်မလာနိုင်တော့ဘူး ဖြစ်နေတယ်” ဟု CNI သတင်းဌာနသို့ ပြောသည်။
