CNI Sport News

၂၀၂၄ ခုနှစ်၊ ဖေဖော်ဝါရီ ၂၆

အယ်လ်နာဆာအသင်း ခေါင်းဆောင် ရော်နယ်ဒိုဟာ ဆော်ဒီပရိုလိဂ်ပွဲစဉ်အပြီးမှာ ပြုလုပ်ခဲ့တဲ့ ညစ်ညမ်းတဲ့ အမူအရာကြောင့် ဆော်ဒီဘောလုံးအဖွဲ့ချုပ်ရဲ့ စုံစမ်းစစ်ဆေး ခံရဖွယ်ရှိနေတယ်လို့ သိရပါတယ်။

အယ်လ်နာဆာအသင်းက အယ်လ်ရှာဘတ်အသင်းကို ၃ ဂိုး-၂ ဂိုးနဲ့ အနိုင်ရခဲ့တဲ့ ဆော်ဒီပရိုလိဂ် ပွဲစဉ်အပြီးမှာ ဒီအဖြစ်အပျက် ဖြစ်ခဲ့တာပါ။ 

အသက် ၃၉ နှစ်အရွယ်ရှိ ရော်နယ်ဒိုဟာ ဒီပွဲမှာ အယ်လ်နာဆာအသင်းအတွက် ပင်နယ်တီကနေ ဦးဆောင် ဂိုးသွင်းယူခဲ့ပြီး တာလီစကာက ၂ ဂိုးသွင်းယူခဲ့တာ ဖြစ်ပါတယ်။ 

အယ်လ်နာဆာအသင်း အနိုင်ရရှိသွားခဲ့တာကြောင့် ရော်နယ်ဒိုဟာ အသင်းဖော်တွေကို ဂုဏ်ပြုမှုတွေ ပြုလုပ် နေချိန်မှာ ပြိုင်ဘက်အသင်း ပရိသတ်တွေက အင်တာမိုင်ယာမီ အသင်းခေါင်းဆောင် မက်ဆီရဲ့ နာမည်ကို အော်ဟစ်ခဲ့ကြတာပါ။

ရော်နယ်ဒိုဟာ ဒါကိုတုန့်ပြန်တဲ့ အနေနဲ့ သူ့လက်ကို နားရွက်ပေါ်မှာ တင်ခဲ့ပြီးနောက် ညစ်ညမ်းတဲ့ အမူအရာကိုပါ လုပ်ပြသွားခဲ့တာ ဖြစ်ပါတယ်။ 

 ရော်နယ်ဒိုကို တွေ့ရစဉ်

အဲဒါကြောင့် ဆော်ဒီဘောလုံးအဖွဲ့ချုပ်ဟာ ဒီဖြစ်ရပ်နဲ့ပတ်သက်ပြီး စုံစမ်းစစ်ဆေးမှုတွေ စတင်နေပြီလို့ ဆော်ဒီ သတင်းစာ တစ်ခုက ရေးသားခဲ့တာကို The Telegraph က ဖော်ပြခဲ့တာပါ။ 

ဆော်ဒီနိုင်ငံရဲ့ ဘောလုံးသုံးသပ်သူတွေက ရော်နယ်ဒိုကို အရေးယူမှုတွေ ပြုလုပ်သင့်တယ်လို့ မှတ်ချက်ပြုခဲ့ကြပါ တယ်။ ရော်နယ်ဒိုဟာ ပြီးခဲ့တဲ့ပွဲတွေမှာလည်း မက်ဆီလို့ခေါ်ပြီး သူ့ကိုလှောင်ပြောင်မှုတွေ ပြုလုပ်တာမှာ တုန့်ပြန်မှုတွေ ရှိခဲ့တာပါ။

မကြာသေးခင်က အယ်လ်ဟီလယ် အသင်းနဲ့ပွဲစဉ်မှာဆိုရင် ရော်နယ်ဒိုဟာ အယ်လ်ဟီလယ်အသင်း ပရိသတ် တွေက ပစ်ချခဲ့တဲ့ ပဝါကို ကောက်ယူပြီး သူ့ရဲ့ဘောင်းဘီထဲကို ထည့်ကာ ပြန်ပစ်ချသွားခဲ့တာ ဖြစ်ပါတယ်။ 

ဒီလို လုပ်ရပ်တွေကြောင့်လည်း ရော်နယ်ဒိုဟာ ဝေဖန်မှုတွေ ပြုလုပ်တာခံခဲ့ရပါတယ်။ 

အသက် ၃၉ နှစ်အရွယ်ရှိ ရော်နယ်ဒိုဟာ ဒီရာသီမှာ အယ်လ်နာဆာအသင်းအတွက် ခြေစွမ်းပြသနေပြီး ပြိုင်ပွဲစုံ ၃၅ ပွဲမှာ ၃၄ ဂိုးသွင်းယူထားတာပါ။

အယ်လ်နာဆာအသင်းဟာ အယ်လ်ရှာဘတ်အသင်းကို အနိုင်ရယူခဲ့ပေမယ့် ဆော်ဒီပရိုလိဂ် အမှတ်ပေးဇယား အဆင့် ၂ နေရာမှာ ရပ်တည်နေပြီး အဆင့် ၁ နေရာက အယ်လ်ဟီလယ်အသင်းနဲ့ ၄ မှတ်ကွာဟနေတာ ဖြစ်ပါတယ်။

Source: Daily Mail

CNI Sport News

၂၀၂၄ ခုနှစ်၊ ဖေဖော်ဝါရီ ၂၆

လီဗာပူးလ်အသင်းနည်းပြ ကလောပ့်က ချယ်လ်ဆီးအသင်းကို အနိုင်ရပြီးရရှိခဲ့တဲ့ ကာရာဘောင်းဆုဖလားဟာ သူရရှိခဲ့တဲ့ ဆုဖလားတွေထဲမှာ အထူးစပါယ်ရှယ် ဆုဖလားဖြစ်တယ်လို့ ပြောလိုက်ပါတယ်။

ကလော့ပ်က “ကျနော့်ရဲ့နှစ်၂၀ အတွင်းမှာ ဒီဆုဖလားက အလွယ်ကူဆုံးနဲ့ စပါယ်ရှယ်ဆုဖလားပါပဲ။ ကျနော့်ရဲ့ အမွေအနှစ်ကိုလည်း ကျနော် ဂရုမစိုက်နိုင်ပါဘူး။ ဒီတစ်ခုကို ဖန်တီးဖို့ ဒီမှာရှိနေတာ မဟုတ်ပါဘူး။ ဒါက ထူးခြား ပါတယ်။ ဒီပွဲမှာ ဖြစ်ပျက်ခဲ့တာတွေက ရူးသွပ်ဖို့ကောင်းပါတယ်။ ဒီဆုဖလားက ကျနော်တို့နဲ့ ထိုက်တန်ပါတယ်”လို့ ပြောကြားခဲ့ပါတယ်။

လီဗာပူးလ်အသင်းနဲ့ ချယ်လ်ဆီးအသင်းတို့ ကစားခဲ့တဲ့ ကာရာဘောင်းဖလား ဗိုလ်လုပွဲမှာ လီဗာပူးလ်အသင်းက ဗန်ဒိုက်ရဲ့ အချိန်ပိုမှာ သွင်းယူခဲ့တဲ့ဂိုးကြောင့် ၁ ဂိုး- ဂိုးမရှိနဲ့ အနိုင်ရပြီး ချန်ပီယံဆုကို ရယူနိုင်ခဲ့တာဖြစ်ပါတယ်။ 

လီဗာပူးလ်အသင်းဟာ ကာရာဘောင်းဆုဖလားကို စံချိန်တင် ၁၀ ကြိမ်မြောက် ရယူနိုင်ခဲ့တာဖြစ်သလို ကလော့ပ် အတွက် လီဗာပူးလ်အသင်းနည်းပြဘဝ ၈ ခုမြောက် ဆုဖလားလည်းဖြစ်ခဲ့တာပါ။ 

လီဗာပူးလ်အသင်းဟာ ဒီပွဲမှာ ဆာလက်၊ ဒါဝင်နူနက်ဇ်၊ အာနိုးလ်နဲ့ ဂျိုတာတို့ အပါအဝင် အဓိက ကစားသမား အများအပြား ဒဏ်ရာကြောင့် မပါဝင်နိုင်ခဲ့ပါဘူး။

ချယ်လ်ဆီးအသင်းက လီဗာပူးလ်ဘက်ကို တိုက်စစ်ဆင်နေစဉ်

အဲဒါကြောင့် နည်းပြကလော့ပ်ဟာ ဒီပွဲမှာ အသက် ၂၀ နှစ်နဲ့အောက် ကစားသမား ၅ ဦးအထိ အသုံးပြုခဲ့ရသလို ပွဲပြီးဆုံးချိန်မှာ လီဗာပူးလ်အသင်းရဲ့ ပျှမ်းမျှအသက်ဟာ ၂၂ နှစ်အောက်သာရှိတာ ဖြစ်ပါတယ်။ 

ယူနိုက်တက်အသင်း နောက်ခံလူဟောင်း ဂယ်ရီနဗီးလ်က ကလော့ပ်ရဲ့ ကလေးတွေဟာ ဘီလီယံပေါင်းနဲ့ချီပြီး သုံးစွဲခဲ့တဲ့ ချယ်လ်ဆီးအသင်းကို အနိုင်ယူခဲ့တယ်လို့ ပြောကြားခဲ့ပါတယ်။ 

အနိုင်ဂိုးရှင် အသင်းခေါင်းဆောင် ဗန်ဒိုက်ကတော့ လီဗာပူးလ် ကစားသမားဖြစ်ရတာ အလွန်ဂုဏ်ယူတယ်လို့ ဆုဖလားရယူအပြီးမှာ ပြောခဲ့ပါတယ်။

ဗန်ဒိုက်က “ဒါက ပရိသတ်တွေ အတွက်ဖြစ်ပြီး ပျော်ရွှင်ကြပါ။ ၂ သင်းစလုံးအတွက် ပြင်းထန်တဲ့ပွဲဖြစ်ခဲ့ပြီး အခွင့်အရေးတွေလည်း ရရှိခဲ့ပါတယ်။ လီဗာပူးလ်အသင်း ခေါင်းဆောင်အဖြစ် ပထမဆုံးဆုဖလားကို ကျနော် ကိုင်မြှောက်နိုင်ခဲ့တာပါ။ ဒီကလပ်ရဲ့ အစိတ်အပိုင်းဖြစ်ခွင့်ရလို့ အလွန်ဂုဏ်ယူမိသလို ကောင်လေးတွေ အတွက် လည်း ဂုဏ်ယူပါတယ်။ ကျနော်တို့ နောက်ထပ် ဆုဖလားတွေ ထပ်ပြီးရယူနိုင်ဖို့ မျှော်လင့်တယ်”လို့ ပြောကြား ခဲ့ပါတယ်။ 

လီဗာပူးလ်အသင်းဟာ ဒီရာသီ ပရီးမီးယားလိဂ်ပြိုင်ပွဲမှာ အမှတ်ပေးဇယားကို ဦးဆောင်ထားသလို FA ဖလားပြိုင်ပွဲ မှာ ပဉ္စမအဆင့်နဲ့ ယူရိုပါလိဂ်ပြိုင်ပွဲမှာ ၁၆ သင်းအဆင့်ကို ရောက်ရှိနေတာကြောင့် ဒီဆုဖလားတွေကို ရယူနိုင်ဖို့ လည်း ပစ်မှတ်ထားနေတာ ဖြစ်ပါတယ်။ 

Source: BBC

CNI Sport News
၂၀၂၄ ခုနှစ်၊ ဖေဖော်ဝါရီ ၂၅

ချယ်လ်ဆီးအသင်းနည်းပြ ပိုချက်တီနိုက လီဗာပူးလ်အသင်းနဲ့ ကစားရမယ့် ကာရာဘောင်းလိဂ်ဖလား ဗိုလ်လုပွဲ အတွက် သူတို့အဆင်သင့်ဖြစ်နေပြီလို့ ပြောလိုက်ပါတယ်။

ပိုချက်တီနိုက “ဒါက ကျနော်တို့အတွက် အိပ်မက်ဖြစ်ပြီး အောင်မြင်မှုရနိုင်ဖို့ မိနစ် ၉၀ ရှိပါတယ်။ ကျနော်တို့ တိုက်ပွဲဝင်သွားမှာဖြစ်သလို အသင်းကလည်း အဆင်သင့်ဖြစ်နေပါပြီ။ ဒီပွဲက ကျနော်တို့အတွက် ကြီးမားတဲ့ အခွင့်အရေးပါပဲ။ ဗိုလ်လုပွဲကို ရောက်ရှိတာက ကျနော်နဲ့ နည်းပြအဖွဲ့ဝင်တွေအတွက် အများကြီး အဓိပ္ပါယ် ရှိပါတယ်။ လီဗာပူးလ်အသင်းကို စိန်ခေါ်ပြီး ၁၁ နှစ်အတွင်း ကျနော်တို့ရဲ့ ပထမဆုံးဆုဖလားကို ရယူသွားမှာပါ”လို့ ပြောခဲ့တာပါ။

ချယ်လ်ဆီးအသင်းဟာ ဒီရာသီမှာ ရလဒ်ပိုင်း မတည်မငြိမ် ဖြစ်နေပေမယ့် ကာရာဘောင်းလိဂ်ဖလား ဗိုလ်လုပွဲကို တက်ရောက်နိုင်ခဲ့တာကြောင့် ဆုဖလားရယူနိုင်ဖို့ မျှော်လင့်လို့ ရနေတာဖြစ်ပါတယ်။ 

ဒီဗိုလ်လုပွဲဟာ ချယ်လ်ဆီးအသင်းကို အသင်းပိုင်ရှင် တော့ဒ်ဘိုလီ ဦးဆောင်တဲ့ အစုအဖွဲ့က လွှဲပြောင်းရယူ ပြီးနောက် အသင်း ပထမဆုံး ကစားရမယ့် ဗိုလ်လုပွဲစဉ်လည်း ဖြစ်တာပါ။

အဲဒါကြောင့် နည်းပြ ပိုချက်တီနိုက ဒီဆုဖလားကို ရယူနိုင်ဖို့ ပစ်မှတ်ထားနေပေမယ့် ဒီဗိုလ်လုပွဲမှာ လီဗာပူးလ် အသင်းက ရေပန်းစားတယ်လို့ ပြောခဲ့ပါတယ်။

ပိုချက်တီနိုက “လီဗာပူးလ်အသင်းဟာ ဒီဆုဖလားကို ရယူနိုင်ဖို့ ရေပန်းစားပါတယ်။ ဘာကြောင့်လဲဆိုရင် သူတို့ ဟာ အသင်းတစ်သင်းလို ယှဉ်ပြိုင်ဖို့ အတွေ့အကြုံရှိပြီး မတူညီတဲ့ ဗိုလ်လုပွဲတွေမှာ ပါဝင်ခွင့်ရခဲ့ပါတယ်။ ကျနော် တို့ရဲ့ ကစားသမား အများအပြားအတွက် ဒါဟာ ပထမဆုံး ဗိုလ်လုပွဲ ဖြစ်ကောင်းဖြစ်နိုင်ပါတယ်။ ဒါကြောင့် သူတို့ ရေပန်းစားတယ်လို့ ပြောချင်ပါတယ်။ ကလော့ပ်က ၅၀ ရာခိုင်နှုန်းစီ အခွင့်အရေး ရှိတယ်လို့ပြောပြီး လိမ္မာပါးနပ် ပါတယ်”လို့ ပြောခဲ့တာပါ။

လီဗာပူးလ်အသင်းဟာ ချယ်လ်ဆီးအသင်းနဲ့ ပရီးမီးယားလိဂ်မှာ နောက်ဆုံးပွဲအဖြစ် ကစားခဲ့တုန်းက ၄ ဂိုး-၁ ဂိုးနဲ့ ဂိုးပြတ် အနိုင်ရခဲ့သလို ကာရာဘောင်းလိဂ်ဖလား ဗိုလ်လုပွဲအဖြစ် ၂၀၂၂ ခုနှစ်က ကစားထားခဲ့တာမှာ လီဗာပူးလ် အသင်းက ပင်နယ်တီအဆုံးအဖြတ်နဲ့ ချယ်လ်ဆီးအသင်းကို အနိုင်ရရှိခဲ့တာ ဖြစ်ပါတယ်။

Source: Daily Mail

CNI Sport News
၂၀၂၄ ခုနှစ်၊ ဖေဖော်ဝါရီ ၂၅

အဲဗာတန်အသင်း ကစားသမားဟောင်း လီတိုင်းဟာ သူ့ရဲ့နိုင်ငံဖြစ်တဲ့ တရုတ်နိုင်ငံအတွင်းမှာ အကျင့်ပျက် ခြစားမှုနဲ့ ထောင်ဒဏ် တစ်သက်တစ်ကျွန်း ချမှတ်ခံခဲ့ရပါတယ်။

လီတိုင်းဟာ အဲဗာတန်အသင်းမှာ ၂၀၀၂ ကနေ ၂၀၀၆ ခုနှစ်အထိ ပွဲပေါင်း ၄၀ ပါဝင်ကစားခဲ့တာပါ။ 

တရုတ်အသင်းကို ၂၀၁၉ ကနေ ၂၀၂၁ ခုနှစ်အထိ ကိုင်တွယ်ခဲ့တဲ့ လီတိုင်းဟာ ပရီးမီးယားလိဂ်ကလပ် ရှက်ဖီးယူနိုက်တက်အသင်းမှာ ၁ ပွဲ ပါဝင်ကစားခဲ့တာ ဖြစ်ပါတယ်။

အခုအချိန်မှာတော့ လီတိုင်းဟာ တရုတ်ဘောလုံးလောကရဲ့ အဂတိလိုက်စားမှု နှိပ်နှင်းမှုတွေကြားမှာ သူ့ရဲ့ ကျန်ရှိနေတဲ့ဘဝကို ထောင်ထဲမှာသာ ဖြတ်သန်းရတော့မှာပါ။

လီတိုင်းဟာ တရုတ်နည်းပြရာထူးကနေ နုတ်ထွက်ပြီး တစ်နှစ်အကြာမှာ စုံစမ်းစစ်ဆေးမှုတွေ ပြုလုပ်တာ ခံခဲ့ရတာ ဖြစ်ပါတယ်။ 

လီတိုင်း အဲဗာတန်မှာ ကစားခဲ့စဉ်

တရုတ်နိုင်ငံပိုင် ရုပ်သံလိုင်း CCTV မှာ လီတိုင်းက သူဟာ တရုတ်လက်ရွေးစင်အသင်းကို ကိုင်တွယ်ခွင့်ရဖို့အတွက် နိုင်ငံဘောလုံးအဖွဲ့ချုပ် တာဝန်ရှိသူတွေကို ပေါင် ၃၃၀,၀၀၀ ဝန်းကျင်ပေးချေခဲ့တယ်လို့ ပြောခဲ့ပါတယ်။ 

ဒါအပြင် လီတိုင်းဟာ တရုတ်နိုင်ငံမှာ သူကိုင်တွယ်ခဲ့တဲ့ အသင်းတွေကို တန်းတက်စေဖို့ လုပ်ပွဲ အရှုပ်တော်ပုံမှာ ပါဝင်ခဲ့တယ်လို့ ဝန်ခံခဲ့တာပါ။

လီတိုင်း အပါအဝင် သူ့ရဲ့ လာဘ်ငွေတွေကိုယူခဲ့တဲ့ တရုတ်ဘောလုံးအဖွဲ့ချုပ် တာဝန်ရှိသူတွေကို နှစ်ရှည် ထောင်ဒဏ်တွေ ချမှတ်ခဲ့တာ ဖြစ်ပါတယ်။ 

တရုတ်ဘောလုံးလောကမှာ လုပ်ပွဲတွေကို ဖော်ထုတ်ပြီး အရေးယူမှုတွေ ပြုလုပ်ဖို့ စုံစမ်းစစ်ဆေးမှုတွေ ပြုလုပ်ခဲ့ တာမှာ လီတိုင်းရဲ့ အဖြစ်အပျက် ထွက်ပေါ်လာခဲ့တာပါ။ 

လီတိုင်းဟာ တရုတ်လက်ရွေးစင် အသင်းအတွက် ၁၉၉၅ ကနေ ၂၀၀၇ ခုနှစ်အထိ ပွဲပေါင်း ၉၂ ပွဲ ပါဝင်ကစားခဲ့ပြီး ၆ ဂိုး သွင်းယူနိုင်ခဲ့ပါတယ်။ 

အသက် ၄၆ နှစ်အရွယ်ရှိ လီတိုင်းဟာ တရုတ်အသင်းကို ၁၂ ပွဲကိုင်တွယ်ခဲ့ပြီး ၆ ပွဲနိုင် ၁ ပွဲသရေ ၅ ပွဲ ရှုံးနိမ့်ခဲ့တာ ဖြစ်ပါတယ်။

Source: Metro

CNI Sport News
၂၀၂၄ ခုနှစ်၊ ဖေဖော်ဝါရီ ၂၄

မန်စီးတီးအသင်းနည်းပြ ဂွာဒီယိုလာက မြို့ခံပြိုင်ဘက် ယူနိုက်တက်အသင်းဟာ ရင်းနှီးမြှုပ်နှံသူအသစ် ဆာဂျင်ရက်ကလစ်ဖ်ရဲ့ အကူအညီနဲ့ ပြန်လာနိုင်မယ်လို့ ယုံကြည်ကြောင်း ပြောခဲ့ပါတယ်။

ဂွာဒီယိုလာက “အသင်းတွေဟာ ဝန်ခံလိုက်ပြီဆိုတာနဲ့ ကျနော်တို့နဲ့သူတို့ ပိုပြီး နီးစပ်လာပါလိမ့်မယ်။ ကျနော်တို့ အောက်အသင်းအဖြစ် ရှိခဲ့တုန်းကလည်း သူတို့ကို အမြဲတမ်း လေးစားခဲ့ရပြီး သူတို့နဲ့ နီးစပ်ဖို့၊ စိန်ခေါ်ဖို့ ဘာတွေ လုပ်ရမလဲဆိုတာကို စဉ်းစားခဲ့ရပါတယ်။ ကျနော်တို့ အောက်အသင်းအဖြစ်ရှိခဲ့တုန်းက ယူနိုက်တက်အသင်းရဲ့ အောင်မြင်မှုတွေကိုကြည့်ပြီး အားကျခဲ့ရတာပါ။ ရက်ကလစ်ဖ်ရဲ့ ပြောဆိုမှုတွေကြောင့် ယူနိုက်တက် ပြန်လာမယ် ဆိုတာ ကျနော်ခံစားမိတယ်”လို့ ပြောခဲ့တာပါ။

ဗြိတိန်ဘီလျံနာ ဆာဂျင်ရက်ကလစ်ဖ်ဟာ ယူနိုက်တက်အသင်းရဲ့ ရှယ်ယာ ၂၇.၇ ရာခိုင်နှုန်း ဝယ်ယူမှုကို ဖေဖော်ဝါရီ ၂၀ ရက်က အပြီးသတ်နိုင်ခဲ့တာ ဖြစ်ပါတယ်။ 

ဆာဂျင်ရက်ကလစ်ဖ်ဟာ ဒီဝယ်ယူမှုအပြီးမှာ ယူနိုက်တက်အသင်း အောင်မြင်မှုတွေရအောင် ပြန်လုပ်ဖို့ သူ ရည်မှန်းထားတဲ့ အရာတွေကိုပြောခဲ့ပြီး ဒီအထဲမှာ မြို့ခံပြိုင်ဘက် မန်စီးတီးအသင်းကို အလဲထိုးနိုင်ဖို့ မျှော်လင့် တယ်လို့ ပြောသွားခဲ့တာပါ။

အဲဒါကြောင့်လည်း ဂွာဒီယိုလာက ယူနိုက်တက်အသင်း ပြန်လာနိုင်မယ်လို့ ယုံကြည်နေတာဖြစ်ပါတယ်။

၂၀၁၆ ခုနှစ်က မန်စီးတီးအသင်းကို စတင်ကိုင်တွယ်ခဲ့တဲ့ ဂွာဒီယိုလာဟာ ပြီးခဲ့တဲ့ရာသီက ပရီးမီးယားလိဂ်၊ ချန်ပီယံလိဂ်နဲ့ FA ဖလား ရယူပေးနိုင်ခဲ့တာ အပါအဝင် သူတာဝန်ယူပြီးကတည်းက အသင်းကို ဆုဖလား ၁၄ ခု ရယူပေးထားနိုင်ခဲ့တာပါ။ 

ယူနိုက်တက်အသင်းဟာ ဂွာဒီယိုလာ ရောက်ရှိလာပြီးကတည်းက ဆုဖလား ၃ လုံးသာ ရယူထားနိုင်ခဲ့ပြီး အောင်မြင်မှုတွေနဲ့ ဝေးကွာနေတာ ဖြစ်ပါတယ်။ 

ဒါပေမယ့် ဆာဂျင်ရက်ကလစ်ဖ်ကတော့ လာမယ့်နှစ် အနည်းငယ်အတွင်းမှာ ယူနိုက်တက်အသင်း အောင်မြင် မှုတွေ ပြန်လည်ရယူနိုင်ဖို့ မျှော်လင့်နေတာပါ။

မန်စီးတီးအသင်းဟာ ဒီရာသီ ပရီးမီးယားလိဂ်ပြိုင်ပွဲမှာ အဆင့် ၁ နေရာက လီဗာပူးလ်အသင်းနဲ့ ၄ မှတ်အကွာ အဆင့် ၂ နေရာမှာ ရပ်တည်နေပြီး ယူနိုက်တက်အသင်းကတော့ အဆင့် ၆ နေရာမှာ ရပ်တည်နေတာ ဖြစ်ပါတယ်။

Source: BBC

CNI Sport News
၂၀၂၄ ခုနှစ်၊ ဖေဖော်ဝါရီ ၂၄

လေဗာကူဆင်အသင်းဟာ မိန့်ဇ်အသင်းကို ၂ ဂိုး-၁ ဂိုးနဲ့ အနိုင်ရပြီးနောက် ပြိုင်ပွဲစုံ ၃၃ ပွဲဆက်တိုက် ရှုံးပွဲမရှိစံချိန်နဲ့ ဂျာမနီစံချိန်သစ်တင်နိုင်ခဲ့ပါတယ်။

လေဗာကူဆင် အသင်းအတွက် ဂိုးတွေကို ရှာကာနဲ့ အန်ဒရစ်ချ်တို့က သွင်းယူခဲ့တာဖြစ်ပြီး မိန့်ဇ်အသင်းအတွက် ချေပဂိုးကို ခိုက သွင်းယူခဲ့တာပါ။ 

လေဗာကူဆင်အသင်းဟာ ဒီပွဲမှာ အနိုင်ရခဲ့တာကြောင့် ဘိုင်ယန်မြူးနစ်အသင်းရဲ့ ပြိုင်ပွဲစုံ ၃၂ ပွဲဆက်တိုက် ရှုံးပွဲမရှိ စံချိန်ကိုချိုးဖျက်ပြီး စံချိန်သစ်တင်နိုင်ခဲ့သလို ဘွန်ဒစ်လီဂါ အမှတ်ပေးဇယားမှာ ဘိုင်ယန်မြူးနစ်အသင်းကို ၁၁ မှတ်အထိဖြတ်ပြီး ဦးဆောင်နိုင်ခဲ့တာ ဖြစ်ပါတယ်။ 

ဒီပွဲမှာ လေဗာကူဆင် အသင်းအတွက် ဂိုးသွင်းယူနိုင်ခဲ့တဲ့ ရှာကာဟာ ၂၀၁၅ ခုနှစ်နောက်ပိုင်း သူ့ရဲ့ပထမဆုံး ဘွန်ဒစ်လီဂါ သွင်းဂိုးဖြစ်လာခဲ့တာပါ။ 

အနိုင်ဂိုး သွင်းယူပေးခဲ့တဲ့ အန်ဒရစ်ချ်က အသင်းဟာ မိန့်ဇ်အသင်းနဲ့ပွဲမှာ ကောင်းမွန်စွာ မကစားနိုင်ခဲ့ပေမယ့် ကံကောင်းပြီး နိုင်ပွဲရယူနိုင်ခဲ့တယ်လို့ ပြောခဲ့ပါတယ်။

အန်ဒရစ်ချ်က “ရိုးရိုးသားသားပြောရမယ်ဆိုရင် ကျနော်တို့ဟာ ဒီပွဲကို ကောင်းမွန်စွာ မကစားနိုင်ခဲ့ပါဘူး။ ကျနော် တို့ဟာ အနည်းငယ် ကံကောင်းခဲ့တဲ့အတွက် နိုင်ပွဲရယူနိုင်ခဲ့ပါတယ်။ ကျနော်တို့ဟာ ဒီပွဲမှာ လိုအပ်တဲ့ ဖြေရှင်းချက် တွေကို ရှာမဖွေနိုင်ခဲ့ပါဘူး။ ကျနော်တို့ အမှားအယွင်းတွေ အများကြီးလုပ်ခဲ့တယ်”လို့ ပွဲအပြီးအင်တာဗျူးမှာ ပြောခဲ့တာပါ။

လေဗာကူဆင်အသင်းဟာ ဘွန်ဒစ်လီဂါပြိုင်ပွဲမှာ အမှတ်ပေးဇယားကို ရမှတ်ဖြတ်ပြီး ဦးဆောင်နိုင်ခဲ့သလို ပိုကယ် ဖလားပြိုင်ပွဲမှာလည်း ဆီမီးဖိုင်နယ်အဆင့်ကို ရောက်ရှိနေတာ ဖြစ်ပါတယ်။

ဒါအပြင် ယူရိုပါလိဂ်ပြိုင်ပွဲမှာလည်း ၁၆ သင်းအဆင့်ကို ရောက်ရှိနေတာကြောင့် ဒီရာသီ ဆုဖလား ၃ လုံး ရယူနိုင် မယ့် လမ်းကြောင်းပေါ်မှာ ရှိနေပါတယ်။ 

လေဗာကူဆင်အသင်းဟာ ၁၉၉၂-၉၃ ရာသီက ပိုကယ်ဖလား ရယူပြီးနောက်ပိုင်း ဆုဖလားအောင်မြင်မှုတွေနဲ့ ဝေးကွာနေတာ ဖြစ်ပါတယ်။ 

Source: ESPN 

CNI Sport News

၂၀၂၄ ခုနှစ်၊ ဖေဖော်ဝါရီ ၂၃

ဆီဗီလာအသင်းနောက်ခံလူ ရာမို့စ်ဟာ ၄ နှစ်အကြာမှာ ပထမဆုံးအကြိမ်အဖြစ် ဘာနေဗျူးကွင်းကို သွားရောက် ပြီး အသင်းဟောင်း ရီးရယ်လ်အသင်းနဲ့ ရင်ဆိုင်ရမယ့်ပွဲမှာ ဂိုးသွင်းနိုင်ခဲ့ရင် အောင်ပွဲမခံဘူးလို့ ပြောခဲ့ပါတယ်။

ရာမို့စ်က “မက်ဒရစ်သားတွေ အားလုံးနဲ့ ပရိသတ်တွေကို ကျနော်လေးစားပါတယ်။ ကျနော်ဂိုးသွင်းနိုင်ခဲ့ရင် အောင်ပွဲခံသွားမှာ မဟုတ်ပါဘူး။ ဒီဂိုးက ကျနော်တို့ အနိုင်ရဖို့ လုံလောက်ပြီဆိုရင် ကျနော် ဝမ်းသာမှာပါ။ ဒီ ၃ မှတ်က ကျနော်တို့အတွက် အလွန်ကောင်းပါလိမ့်မယ်။ ဘာနေဗျူးကွင်းကို ပြန်ရောက်တာဟာ အိမ်ကိုပြန်ရောက် သလို ခံစားရမှာဖြစ်ပြီး ကျနော့်အတွက် ထူးခြားတဲ့ အခိုက်အတန့် ဖြစ်မယ်လို့ ထင်ကြောင်း”ပြောခဲ့တာပါ။

အသက် ၃၇ နှစ်အရွယ်ရှိ ရာမို့စ်ဟာ ၂၀၂၁ ခုနှစ်က ပီအက်စ်ဂျီအသင်းထံ မပြောင်းရွှေ့ခင် ရီးရယ်လ်အသင်းမှာ ၁၆ နှစ်ကြာ ကစားခဲ့ပြီး ဆုဖလားပေါင်း ၂၂ လုံး ရယူနိုင်ခဲ့တာ ဖြစ်ပါတယ်။ 

ရာမို့စ်ဟာ ပီအက်စ်ဂျီအသင်းနဲ့ စာချုပ်ကုန်ဆုံးခဲ့တဲ့ ပြီးခဲ့တဲ့နွေရာသီက ငယ်ဘဝကလပ် ဆီဗီလာအသင်းထံ ပြောင်းရွှေ့ကာ စပိန်ကိုပြန်လာခဲ့တာပါ။ 

ရာမို့စ်ကို တွေ့ရစဉ်

ရာမို့စ်ဟာ ရီးရယ်လ်အသင်းအတွက် ပွဲပေါင်း ၆၇၁ ပွဲ ကစားခဲ့ပြီး အသင်းရဲ့သမိုင်းမှာ စတုတ္ထမြောက်ပွဲ အများဆုံး ကစားထားတဲ့သူအဖြစ် မှတ်တမ်းဝင်ထားပါတယ်။

ရာမို့စ်ဟာ ဒီရာသီမှာ ဆီဗီလာအသင်းအတွက် ၂၄ ပွဲ ကစားထားပြီး ၅ ဂိုး သွင်းယူထားတာပါ။

ပြီးခဲ့တဲ့ရာသီက ယူရိုပါလိဂ်ပြိုင်ပွဲမှာ ချန်ပီယံဖြစ်ခဲ့တဲ့ ဆီဗီလာအသင်းဟာ ဒီရာသီမှာရလဒ်တွေဆိုးနေပြီး စပိန်လာလီဂါ အမှတ်ပေးဇယားအဆင့် ၁၅ နေရာမှာ ရပ်တည်နေတာ ဖြစ်ပါတယ်။

ဆီဗီလာအသင်းဟာ မကြာသေးခင်က နည်းပြ အပြောင်းအလဲတွေနဲ့အတူ နောက်ဆုံးကစားခဲ့တဲ့ ၄ ပွဲမှာ ၂ ပွဲနိုင် ၂ ပွဲ သရေနဲ့ ရှုံးပွဲမရှိထားတာပါ။ 

ရီးရယ်လ်အသင်းကတော့ စပိန်လာလီဂါ အမှတ်ပေးဇယားအဆင့် ၁ နေရာမှာ ရပ်တည်နေပြီး အဆင့် ၂ နေရာက ဂျီရိုနာအသင်းကို ၆ မှတ်ဖြတ်ပြီး ဦးဆောင်နေတာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဖေဖော်ဝါရီ ၂၃

မန်စီးတီးအသင်းနည်းပြ ဂွာဒီယိုလာက နည်းပြဘဝက အနားမယူခင် နိုင်ငံအသင်းတစ်သင်းကို အဓိကပြိုင်ပွဲ တစ်ခုမှာ ကိုင်တွယ်ချင်တယ်လို့ ဖွင့်ဟခဲ့ပါတယ်။

ဂွာဒီယိုလာက “ကျနော်ဟာ နိုင်ငံအသင်းတစ်သင်းကို ကမ္ဘာ့ဖလားပြိုင်ပွဲ ဒါမှမဟုတ် ယူရိုပြိုင်ပွဲမှာ လေ့ကျင့်မှုတွေ ပြုလုပ်ပေးပြီး ကိုင်တွယ်ပေးချင်ပါတယ်။ ဘယ်နိုင်ငံက ကျနော့်ကို လိုချင်လဲဆိုတာ မသိပါဘူး။ ကမ္ဘာ့ဖလား၊ ယူရိုနဲ့ ကိုပါအမေရိက ဖလားပြိုင်ပွဲမှာ ဖြတ်သန်းရတဲ့ အတွေ့အကြုံကို လိုချင်ပါတယ်။ 
အခုကနေ ၅ နှစ်၊ ၁၀ နှစ်၊ ၁၅ နှစ်အတွင်း ဘယ်အချိန် ဖြစ်မလဲဆိုတာတော့ မသိပါဘူး။ ကမ္ဘာ့ဖလားပြိုင်ပွဲမှာ နည်းပြချင်တဲ့အတွေ့အကြုံကို ကျနော်အမှန်တကယ် လိုချင်ပါတယ်”လို့ ESPN Brasil ကို ပြောခဲ့တာပါ။

ဂွာဒီယိုလာဟာ မန်စီးတီးအသင်းနဲ့ ၂၀၂၅ ခုနှစ်အထိ စာချုပ်ရှိနေသေးပြီး စာချုပ်သက်တမ်းတိုးဖို့ကို ငြင်းဆန် ထားခြင်း မရှိပါဘူး။ 

စပိန်လူမျိုးနည်းပြဟာ အရင်က ဘရာဇီးလ်၊ အင်္ဂလန်၊ အမေရိကန်အသင်းတို့ရဲ့ နည်းပြအဖြစ် ခန့်အပ်ခံရဖို့ ချိတ်ဆက်မှုတွေရှိခဲ့ပေမယ့် ကလပ်အသင်းတွေကိုသာ ကိုင်တွယ်နေခဲ့တာပါ။ 

ဂွာဒီယိုလာကို တွေ့ရစဉ်

အခုအချိန်မှာတော့ ကမ္ဘာ့ဖလား၊ ယူရိုပြိုင်ပွဲ ဒါမှမဟုတ် ကိုပါအမေရိက ဖလားပြိုင်ပွဲကို ဝင်ရောက်ယှဉ်ပြိုင်တဲ့ နိုင်ငံအသင်းတစ်သင်းကို ကိုင်တွယ်ဖို့ ဆန္ဒရှိနေတာ ဖြစ်ပါတယ်။

ဂွာဒီယိုလာဟာ ကလပ်အသင်းတွေဖြစ်တဲ့ ဘာစီလိုနာ၊ ဘိုင်ယန်မြူးနစ်နဲ့ မန်စီးတီးအသင်းတို့ကို ကိုင်တွယ်ခဲ့ တာမှာ အောင်မြင်မှု အများအပြား ရရှိခဲ့ပြီး အဓိကဆုဖလားပေါင်း ၃၂ ခုအထိ ရယူနိုင်ခဲ့တာပါ။ 

စပိန်လူမျိုးနည်းပြဟာ နိုင်ငံအသင်းကို အဓိကပြိုင်ပွဲတစ်ခုမှာ ကိုင်တွယ်ချင်တဲ့ နည်းပြအတွေ့အကြုံကိုသာ လိုချင်တာဖြစ်ပြီး ဆုဖလားရယူနိုင်ဖို့အထိတော့ ရည်မှန်းထားခြင်း မရှိပါဘူး။ 

ဂွာဒီယိုလာဟာ မန်စီးတီးအသင်းနဲ့ စာချုပ်သက်တမ်း မတိုးဖြစ်ဘူးဆိုရင် နိုင်ငံအသင်းတစ်သင်းကို ကိုင်တွယ်မယ့် ဆန္ဒကို အကောင်အထည်ဖော်ဖို့ ရှိနေတာပါ။

ဂွာဒီယိုလာရဲ့မန်စီးတီးအသင်းဟာ ဒီရာသီ ပရီးမီးယားလိဂ်ပြိုင်ပွဲမှာ အဆင့် ၂ နေရာ ရပ်တည်နေပြီး ချန်ပီယံလိဂ် ပြိုင်ပွဲမှာ ၁၆ သင်းအဆင့်နဲ့ FA ဖလားပြိုင်ပွဲမှာ ပဉ္စမအဆင့်ကို ရောက်ရှိနေတာဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဖေဖော်ဝါရီ ၂၃

ရီးရယ်လ်အသင်းကွင်းလယ်လူ တိုနီကရူးစ်ဟာ ဂျာမနီလက်ရွေးစင်အသင်းကနေ အနားယူထားတဲ့ ဆုံးဖြတ်ချက်ကို ပြန်ပြောင်းပြီး ယူရို ၂၀၂၄ ပြိုင်ပွဲမှာ နိုင်ငံအသင်းအတွက် ပြန်လည်ကစားပေးဖို့ ဆုံးဖြတ်ခဲ့ ပါတယ်။

ဂျာမနီအသင်းနဲ့ ၂၀၁၄ ကမ္ဘာ့ဖလား ချန်ပီယံဆု ရယူနိုင်ခဲ့တဲ့ အသက် ၃၄ နှစ်အရွယ်ရှိ တိုနီကရူးစ်ဟာ နိုင်ငံအသင်းအတွက် ၁၀၆ ပွဲ ပါဝင်ကစားထားတာပါ။ 

တိုနီကရူးစ်ဟာ ယူရို ၂၀၂၀ ပြိုင်ပွဲမှာ သူ့ရဲ့ စွမ်းဆောင်ရည်ကို ပြင်းထန်စွာ ဝေဖန်ခဲ့တာကြောင့် ပြိုင်ပွဲအပြီးမှာ ဂျာမနီအသင်းကနေ အနားယူကြောင်း ကြေညာခဲ့တာ ဖြစ်ပါတယ်။ 

ဒါပေမယ့် ဂျာမနီအသင်းနည်းပြ နာဂျယ်လ်စမန်းနဲ့ ဆွေးနွေးမှု ပြုလုပ်အပြီးမှာ တိုနီကရူးစ်ဟာ သူ့ရဲ့ဆုံးဖြတ်ချက် ကို ပြန်ပြောင်းခဲ့တာပါ။

တိုနီကရူးစ်က “မတ်လမှာ ဂျာမနီအသင်းအတွက် ကျနော် ပြန်ကစားပေးတော့မှာပါ။ ဘာကြောင့်လဲဆိုရင် နည်းပြ က ကျနော့်ကို ပြန်ကစားပေးဖို့ ပြောခဲ့သလို ကျနော်လည်း ဒီလိုမျိုး လုပ်ချင်တာကြောင့် အဆင်ပြေခဲ့ပါတယ်။ အခု အချိန်မှာ လူအများအပြားက ထင်တာထက် ဥရောပချန်ပီယံရှစ်ပြိုင်ပွဲမှာ အသင်းနဲ့အတူ အများကြီး ဖြစ်နိုင်ဖွယ် ရှိတယ်ဆိုတာ သေချာတယ်”လို့ အင်စတာဂရမ်မှာ ရေးသားခဲ့ပါတယ်။

တိုနီကရူးစ်ကို တွေ့ရစဉ်

ယူရို ၂၀၂၄ ပြိုင်ပွဲကို အိမ်ရှင်အဖြစ် လက်ခံကျင်းပမယ့် ဂျာမနီအသင်းဟာ ဒီပြိုင်ပွဲမတိုင်ခင် ခြေစမ်းပွဲတွေမှာ ရလဒ်တွေ ဆိုးနေတာကြောင့် နည်းပြ ဟန်ဆီဖလစ်ကို ထုတ်ပယ်ပြီး နာဂျယ်လ်စမန်းကို နည်းပြသစ်အဖြစ် ခန့်အပ်ထားတာပါ။ 

နာဂျယ်လ်စမန်းကတော့ ယူရိုပြိုင်ပွဲမှာ အောင်မြင်မှု ရယူနိုင်ဖို့အတွက် ဝါရင့်ကွင်းလယ်လူ တိုနီကရူးစ်ကို အသင်း လူစာရင်းမှာ အားဖြည့်ပြီး ပြင်ဆင်မှုတွေ ပြုလုပ်သွားတော့မှာ ဖြစ်ပါတယ်။ 

ဂျာမနီအသင်းဟာ မတ်လထဲမှာ ပြင်သစ်၊ နယ်သာလန်အသင်းတို့နဲ့ ခြေစမ်းပွဲယှဉ်ပြိုင်သွားမှာပါ။

ဂျာမနီအသင်းဟာ ယူရို ၂၀၂၄ ပြိုင်ပွဲမှာ စကော့တလန်၊ ဟန်ဂေရီ၊ ဆွစ်ဇာလန်အသင်းတို့နဲ့ တစ်အုပ်စုတည်း ကျရောက်နေပြီး အဖွင့်ပွဲစဉ်အဖြစ် ဇွန်လ ၁၄ ရက်မှာ စကော့တလန်အသင်းနဲ့ ယှဉ်ပြိုင်ရမှာဖြစ်ပါတယ်။

Source: BBC