- By CNI
- Category: Travel
- Hits: 784
CNI International News
ဟောင်ကောင်၊ မေလ ၇
ကုန်ကျစရိတ် ချွေတာလိုသည့် တရုတ်ခရီးသွားများသည် ဟောင်ကောင်သို့ လာရောက်လည်ပတ်မှုပုံစံကို ပြောင်းလဲလာခဲ့ကြောင်း ရိုက်တာမှ ဖော်ပြခဲ့သည်။
တစ်ချိန်က ငွေကြေးချမ်းသာကြွယ်ဝသည့် တရုတ်ခရီးသွားများသည် ဟောင်ကောင်တွင် ငွေကြေး ဖောဖောသီသီ သုံးစွဲခဲ့သော်လည်း လက်ရှိအချိန်မှာတော့ ငွေကြေးကို ချွေတာလာခဲ့ခြင်းဖြစ်သည်။
အချို့က ခရီးသွားလုပ်ငန်းများ၊ အေဂျင်စီများဖြင့် ချိတ်ဆက်ပြီး ထိုခရီးသွားလုပ်ငန်းများ၊ အေဂျင်စီများ၏ ဝန်ဆောင်မှု အစီအစဉ်များဖြင့် ဟောင်ကောင်သို့ သွားရောက် လည်ပတ်သည့်ပုံစံကို မရွေးချယ်ကြတော့ဘဲ ကိုယ့်အစီအစဉ်နှင့်ကိုယ် ဟောင်ကောင်သို့ ခြေလျင်လမ်းလျှောက်ဝင်ရောက်ကာ ရှန်ကျန်း (Shenzhen) နယ်စပ်မြို့တွင် ညအိပ်တည်းခိုရင်း ကုန်ကျစရိတ်ကို ချွေတာလာကြသည်။
လော်ရာလီနဲ့ ဝမ်းကွဲမောင်ဖြစ်သူ ဒီယေဂိုတန်ကို တွေ့ရစဉ်
ပြီးခဲ့သည့်သီတင်းပတ်က တရုတ်၏ အလုပ်သမားနေ့ အားလပ်ရက်ကာလအတွင်း တရုတ်နိုင်ငံ အရှေ့မြောက်ပိုင်း လျောင်နင် (Liaoning) ပြည်နယ်တွင် နေထိုင်သည့် အသက် ၂၈ နှစ်ရွယ် လော်ရာလီ (Laura Li) သည် သူမ၏ ဝမ်းကွဲမောင်ဖြစ်သူ အသက် ၂၀ အရွယ် ဒီယေဂို တန် (Diego Deng) နှင့်အတူ ဟောင်ကောင်သို့ ကိုယ့်အစီအစဉ် နှင့်ကိုယ် သွားရောက်ခဲ့ကြသည်။
သူတို့နှစ်ဦးကဲ့သို့ပင် တရုတ်လူငယ် အများစုသည် ခရီးသွားလုပ်ငန်းများ၊ အေဂျင်စီများနှင့် ချိတ်ဆက်ခြင်းမပြုဘဲ လူမှုမီဒီယာများတွင် ဖော်ပြထားသည့် ဟောင်ကောင်သို့ ခြေလျင် ဝင်ရောက်ပြီး လည်ပတ်သည့် အစီအစဉ်များ အတိုင်း သွားရောက်ခဲ့ကြခြင်းဖြစ်သည်။
Little Red Book ဟု လူသိများသည့် တရုတ်၏ လူမှုမီဒီယာ ပလက်ဖောင်းဖြစ်သည့် Xiaohongshu သည် ၁၉၉၅ ခုနှစ်မှ ၂၀၁၀ ပြည့်နှစ်အတွင်း မွေးဖွားသော တရုတ်၏ Generation Z မျိုးဆက် သန်း ၂၈၀ အတွက် မရှိမဖြစ် အက်ပလီကေးရှင်းတစ်ခု ဖြစ်လာခဲ့သည်။
တရုတ်၏ လူမှုမီဒီယာ ပလက်ဖောင်းကို တွေ့ရစဉ်
ထိုအက်ပလီကေးရှင်းတွင် ဟောင်ကောင်သို့ သွားရောက် လည်ပတ်မည့် တရုတ်ခရီးသွားများအတွက် သိသင့်သိထိုက်သည့် အချက်များကို ဖော်ပြထားသည်။
"ပုဂ္ဂိုလ်ရေးအရ ပြောရမယ်ဆိုရင် ကျမက ခရီးသွားအဖွဲ့တွေနဲ့ သွားရတာ မကြိုက်ပါဘူး။ ဘာလို့လဲဆိုတော့ မလွတ်လပ်ဘူးလေ။ ဒီအတိုင်း ခြေဦးတည့်ရာ လျှောက်ရတာကို ပိုသဘောကျပါတယ်" ဟု လီက ရုပ်သံဒရာမာ များနှင့် ရုပ်ရှင်များထဲတွင် မကြာခဏ ပါလေ့ရှိသည့် ဟောင်ကောင်၏ Yau Ma Tei ရဲစခန်းအပြင်ဘက်တွင် ပြောကြားခဲ့သည်။
တရုတ်ပြည်မကြီးတွင် စီးပွားရေး နာလန်ထူမှု နှေးကွေးနေသဖြင့် ထိုကဲ့သို့ တရုတ်ခရီးသွားများ၏ သွားလာ လှုပ်ရှားမှုနှင့် ငွေကြေးသုံးစွဲသည့် အလေ့အကျင့်များ ပြောင်းလဲလာခြင်းဖြစ်သည်ဟု ဟောင်ကောင် ပိုလီတက္ကနစ် တက္ကသိုလ်မှ ဟိုတယ်နှင့်ခရီးသွားလုပ်ငန်း စီမံခန့်ခွဲမှုသင်တန်းကျောင်း၏ လက်ထောက်ပါမောက္ခ ဒန်နီယယ် လီအန် (Deniel Leung) က ပြောကြားခဲ့သည်။
"တရုတ်ရဲ့ စီးပွားရေး နာလန်ထူမှု အရှိန်အဟုန်က ကျနော်တို့ထင်ထားသလို မကောင်းခဲ့ပါဘူး။ လူတွေက ဝင်ငွေ နည်းပါးလာတဲ့ အချိန်မှာ အသုံးစရိတ်ကို စိစစ်လာကြတာ ဖြစ်ပါတယ်" ဟု လီအန်က ပြောကြားခဲ့သည်။
Source: ရိုက်တာ
- By CNI
- Category: Travel
- Hits: 639
CNI International News
တိုကျို၊ ဧပြီ ၂၅
ဂျပန်နိုင်ငံသည် နိုင်ငံအတွင်းသို့ လာရောက်မည့် ခရီးသွားများအတွက် ငွေသားမဟုတ်သည့် အခွန်ပြန်အမ်းငွေ (cashless tax refunds) အစီအစဉ်ကို အကောင်အထည်ဖော်ရန် စဉ်းစားနေသည်ဟု ဘန်ကောက်ပို့စ်မှ ဖော်ပြ ခဲ့သည်။
ခရီးသွားများသည် နိုင်ငံအတွင်း လာရောက်၍ လေဆိပ်မှ ပြန်လည်မထွက်ခွာမီ အကောက်ခွန် ကင်းလွတ်သည့် ပစ္စည်းများကို ဝယ်ယူပြီးနောက် ထိုပစ္စည်းများကို ပြန်လည်ရောင်းချခြင်းမှ တရားမဝင်သည့် နည်းလမ်းဖြင့် ငွေကြေးများရရှိမှုကို ကာကွယ်တားဆီးရန် အားထုတ်ကြိုးပမ်းမှုများ၏ တစ်စိတ်တစ်ပိုင်းအနေဖြင့် ထိုအစီအစဥ် ကို စဉ်းစားနေခြင်းဖြစ်သည်။
ထိုစနစ်အရ ဂျပန်တွင် ပြည်ပခရီးသွားများသည် ထုတ်ကုန်များကို ဝယ်ယူရာ၌ စားသုံးခွန်ကိုပါ ထည့်သွင်း ပေးချေရမည်ဖြစ်သည်။
ထို့နောက် အစိုးရက အဆိုပါ စားသုံးခွန်ကို အကြွေးဝယ်ကဒ် (credit card) သို့မဟုတ် အခြား ငွေသားမဟုတ် သည့် အီလက်ထရောနစ်အခြေပြု ငွေပေးချေမှု စနစ်များဖြင့် ခရီးသွားများကို ပြန်ထည့် ပေးသွားမည်ဟု ဖော်ပြ ခဲ့သည်။
ငွေသားများဖြင့် အခွန်ပြန်အမ်းငွေ (Cash refunds) ထုတ်ပေးသည့် အစီအစဉ်ကို လေဆိပ်များတွင် ဆက်လက် လုပ်ဆောင်မည် ဖြစ်သော်လည်း အစိုးရက ခရီးသွားများအား လေဆိပ်များ၌ ပိတ်ဆို့မှုများ၊ နှောင့်နှေးကြန့်ကြာ မှုများ မဖြစ်စေရန် ငွေသားမဟုတ်သော အခွန်ပြန်အမ်းငွေစနစ် (Cashless refunds) ကို အသုံးပြုရန် တိုက်တွန်း သွားမည်ဟု သတင်းရင်းမြစ်များက ဖော်ပြခဲ့သည်။
ထိုစနစ်နှင့်ပတ်သက်သည့် အသေးစိတ် အချက်အလက်များကို ၂၀၂၅ ခုနှစ် ဘဏ္ဍာနှစ်အအတွက် အခွန်ပြုပြင် ပြောင်းလဲရေး အစီအစဉ်များတွင် ထည့်သွင်းရန် မျှော်မှန်းထားသည်ဟုလည်း ဆိုသည်။
ဂျပန်တွင် ပြည်ပခရီးသွားများသည် ၎င်းတို့၏ သက်ဆိုင်ရာနိုင်ငံများ၌ အသုံးပြုရန် ရည်ရွယ်ချက်ဖြင့် ယန်း ၅၀၀ ( ၃၂ ဒေါ်လာ) နှင့်အထက် တန်ဖိုးရှိသည့် ပစ္စည်းများကို ဝယ်ယူပါက အခွန်ကင်းလွတ်ခွင့် ရရှိထားသည်။
အကောက်ခွန် ကင်းလွတ်သည့် ထိုပစ္စည်းများကို ဝယ်ယူပြီးနောက် ၎င်းတို့၏ သက်ဆိုင်ရာနိုင်ငံသို့ ယူဆောင်ခြင်း မပြုဘဲ ဂျပန်တွင် အသုံးပြုခြင်း သို့မဟုတ် ပြန်လည်ရောင်းချခြင်းမှ ကာကွယ်တားဆီးရန်အတွက် ထိုပစ္စည်းများ ကို သတ်မှတ်ထားသည့် ထုတ်ပိုးမှုပုံစံများ သို့မဟုတ် ဘူးများဖြင့် ချိတ်ပိတ်ရောင်းချနေခြင်း ဖြစ်သည်။
ဂျပန်က ခရီးသွားများ အခွန်ကင်းလွတ်ခွင့်ကို ညွန်းပြထားစဉ်
အကယ်၍ ခရီးသွားများသည် လေဆိပ်မှ မထွက်ခွာမီ ၎င်းတို့ ဝယ်ယူခဲ့သည့် အကောက်ခွန်မဲ့ ပစ္စည်းများကို အကောက်ခွန် အရာရှိများက စစ်ဆေးတွေ့ရှိခြင်း မရှိပါက စားသုံးခွန် ပေးဆောင်ရမည်ဖြစ်သည်။
သို့သော် ဂျပန်တွင် ခရီးသွားများသည် အကောက်ခွန်မဲ့ ပစ္စည်းအများအပြားကို ဝယ်ယူပြီးနောက် နိုင်ငံအတွင်းမှ ပြန်လည် မထွက်ခွာမီ အခွန်ပါရှိသည့် စျေးနှုန်းများအတိုင်း ဂျပန်၌ ပြန်လည်ရောင်းချနေပြီး အကျိုးအမြတ်များ ရရှိသော ဖြစ်စဉ်များ ရှိခဲ့သည်ဟုလည်း သိရသည်။
ယခုစီစဉ်နေသည့် စနစ်တွင် ခရီးသွားများ၏ ပစ္စည်းဝယ်ယူမှု မှတ်တမ်းကို စစ်ဆေးနိုင်ရန် လေဆိပ်များတွင် အကောက်ခွန် အရာရှိများသည် ပတ်စ်ပို့များကို စကန်ဖတ်မည် ဖြစ်သည်။
ထို့နောက် အကောက်ခွန်မဲ့ ပစ္စည်းများရောင်းချသည့် Duty-free ဆိုင်များကို ခရီးသွားများ၏ ပစ္စည်းဝယ်ယူမှု မှတ်တမ်းကို ပေးပို့မည်ဖြစ်သည်။
နောက်ဆုံးအဆင့် အနေဖြင့် Dute-free ဆိုင်များသည် ခရီးသွားများအား ၎င်းတို့ ဝယ်ယူခဲ့သည့် ပစ္စည်းများကို စာရင်းနှင့် တိုက်ဆိုင်စစ်ဆေးပြီး ပြန်အမ်းငွေ ထုတ်ပေးသွားလိမ့်မည်ဟု သတင်းရင်းမြစ်များတွင် ဖော်ပြထား သည်။
Source: ဘန်ကောက်ပို့စ်
- By CNI
- Category: Travel
- Hits: 506
CNI News
၂၀၂၄ ခုနှစ်၊ မတ်လ ၁၈
သင်္ကြန်ပိတ်ရက်ကာလတွင် ခရီးသွားလာရေး ပြင်ဆင်ရာ၌ ပြည်တွင်းခရီးသွားလာမှုထက် ပြည်ပခရီးစဉ်များသို့ သွားရောက်လည်ပတ်မည့်သူ များပြားနေကြောင်း မြန်မာနိုင်ငံ ခရီးသွားလုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။
သင်္ကြန်ပိတ်ရက် ပြည်တွင်း ခရီးသွားလာမှုသည် ပြီးခဲ့သည့်နှစ်နှင့် နှိုင်းယှဉ်ပါက နည်းပါးနိုင်ကြောင်း၊ သို့သော် ပြည်ပခရီးစဉ်သို့ သွားရောက် လည်ပတ်မည့်သူများမှာ ပြီးခဲ့သည့် နှစ်ထက် ပို၍ များပြားလာကြောင်း ၎င်းက ပြောသည်။
ဦးနောင်းနောင်းဟန်က “မူလက ကျနော်တို့ မှန်းတာက အများကြီး တိုးတက်လာမယ်လို့ မှန်းထားတယ်။ ဒါပေမယ့် လက်ရှိ ခရီးသွားအခြေအနေ ကြည့်ရတဲ့အခါမှာ ဘိုကင်တွေက ရှိတော့ရှိတယ်။ ဒါပေမယ့် အခန်းတွေ ဟိုတယ်တွေမှာ အခန်း ပြည့်ရတဲ့ဟာမျိုး မရှိပါဘူး။ ပြည်တွင်း အနေနဲ့ကြည့်မယ်ဆိုရင် ပုံမှန်ထက် ရှိသင့်ရှိထိုက် တာထက်တော့ နည်းနည်း နည်းမယ့် သဘောရှိပါတယ်။ ပြည်ပခရီးတွေက ပြီးခဲ့တဲ့လပိုင်းတွေကတော့ ရက်တို ခရီးစဉ်တွေများတယ်။ အခုသင်္ကြန်ရက်မှာတော့ ရက်ရှည်ခရီးစဉ်တွေ များပါတယ်။ ဗုဒ္ဓဂါယာခရီးစဉ်တွေ၊ တစ်ပတ် ၁၀ ရက် ခရီးစဉ်တွေပေါ့။ သင်္ကြန်ပိတ်ရက် ကာလကလည်း ရှည်သွားတဲ့အတွက် ဒီခရီးစဉ်တွေပါတယ်။ နောက် ဥရောပခရီးစဉ်တွေမှာလည်း တော်တော်များများက ခရီးစဉ် ရောင်းချပြီးသလောက် ဖြစ်ကုန်ပြီပေါ့။ အခြား ခရီးစဉ်တွေကတော့ ဗီယက်နမ်တို့ ဘာတို့ဆိုရင် တော်တော်များများလေး သင်္ကြန်ပိတ်ရက်မှာ သွားကြတာ ရှိပါတယ်။ မြန်မာအဖွဲ့တွေ တော်တော်များများလောက်က ဗီယက်နမ်ခရီးစဉ် သွားကြဖို့ရှိပါတယ်။ ပြည်ပခရီး သွားကတော့ ဒီနှစ်နည်းနည်း ပိုပြီးများလိမ့်မယ်ထင်ပါတယ် နည်းနည်းလေ” ဟု CNI သတင်းဌာနသို့ ပြောသည်။
လေဆိပ်တွင် မြန်မာနိုင်ငံသားများကိုတွေ့ရစဉ်
ပြည်တွင်းရှိ ခရီးသွားဒေသအချို့၌ နယ်မြေအေးချမ်းမှုများ မရှိသည့်အတွက် ပြည်တွင်းခရီးသွား ဧည့်သည် အများစုသည် ပြည်ပခရီးစဉ်သို့ သွားရောက်ရန် ပြင်ဆင်လာကြမှု များပြားလာခြင်း ဖြစ်ကြောင်းလည်း ခရီးသွားလုပ်ငန်းရှင်များက သုံးသပ်သည်။
ပြီးခဲ့သည့်နှစ် သင်္ကြန်ရုံးပိတ်ရက် ကာလတွင် ပြည်တွင်းခရီးသွား အများစုသည် ငပလီ၊ ချောင်းသာ၊ ငွေဆောင်၊ ရှမ်းပြည်နယ်တောင်ပိုင်း၊ ပုဂံ၊ မန္တလေးနှင့် ကချင်ပြည်နယ်သို့ သွားရောက် လည်ပတ်ခဲ့ကြခြင်းဖြစ်သည်။
သို့သော် ထိုခရီးစဉ် ဒေသများထဲမှ အချို့ဒေသများသည် လက်ရှိတွင် နယ်မြေမတည်ငြိမ်ကာ အေးချမ်းမှုမရှိသည့် အပြင် လမ်းပန်းဆက်သွယ်ရေး အခက်အခဲများကြောင့် ချောင်းသာ၊ ငွေဆောင် တို့ကိုသာ ပြည်တွင်းခရီးသွား အဓိကအများဆုံး သွားရောက်ကြနိုင်ဖွယ်ရှိကြောင်းလည်း Myanmar Voyages International Tourism ၏ မန်နေဂျင်း ဒါရိုက်တာ ဦးသက်လွင်တိုးက CNI သတင်းဌာနသို့ ပြောသည်။
ကမ်းခြေကိုတွေ့ရစဉ်
၎င်းက “အထူးသဖြင့်တော့ ငွေဆောင်၊ ချောင်းသာသွားကြမယ်။ ငပလီတောင် အခြေအနေက ပြောလို့မရဘူး။ ဈေးတွေက အရမ်းမြင့်တာကို။ အခုဟာက ဟဲဟိုးဘက်သွားရင်တောင် လေယာဉ်ခက ၂ သိန်းကျော်၊ ပုဂံလည်း အလားတူ ၂ သိန်းလောက်။ လေယာဉ်ကလည်း နေ့တိုင်းမရှိတော့ ကားနဲ့ပဲ သွားကြတာများပါတယ်။ အထူးသဖြင့် အိမ်နီးချင်းနိုင်ငံတွေ ထိုင်းတို့၊ စင်္ကာပူတို့ သွားကြတာတွေရှိပါတယ်။ ထိုင်းကတော့ တော်တော် ပြည့်နေတယ်ပေါ့။ ဧပြီလောက်အထိကို ပြည့်နေတယ်ဆိုတာက ဗီဇာလူငယ်တွေ၊ လူလတ်တွေပေါ့ သူတို့ကတော့ သိတဲ့အတိုင်း အခြေအနေအရ ထွက်ခွာဖို့အတွက် ပြင်ဆင်နေကြတော့ အဲဒါတွေနဲ့တင် လေယာဉ်တော့ ပြည့်နေပါတယ်။ ပြည်ပ ကတော့ ပိုသက်သာတာပေါ့နော်။ ဒါပေမယ့် လေယာဉ် လက်မှတ်တွေကလည်း ဈေးကြီးလာတယ်။ နောက် နေရာ မရတဲ့ပြဿနာပေါ့” ဟု ပြောသည်။
ပြီးခဲ့သည့် ၂၀၂၃ ခုနှစ် သင်္ကြန်ပိတ်ရက်ကာလတွင် ချောင်းသာ၊ ငွေဆောင် အပါအဝင် ရှမ်းပြည်နယ် တောင်ပိုင်း နှင့် ရခိုင်ပြည်နယ် ငပလီကမ်းခြေဒေသသို့ ပြည်တွင်းခရီးသွား အများအပြား ဝင်ရောက်ခဲ့ခြင်း ဖြစ်ကြောင်း သိရသည်။
သို့သော် လက်ရှိအနေထားများအရ ချောင်းသာ၊ ငွေဆောင်အပြင် နယ်မြေတည်ငြိမ်မှုရှိနေသည့် ပုဂံ၊ မန္တလေးနှင့် ရှမ်းပြည်နယ်တောင်ပိုင်း ခရီးစဉ်များကိုလည်း စီစဉ်မှုများရှိနေကြောင်း သိရသည်။
ထိုသို့ သွားကြရာတွင် ခရီးသွားလုပ်ငန်းများနှင့် သွားလာခြင်းထက် မိမိအစီအစဉ်ဖြင့် မိမိ သွားလာကြခြင်းမှာ ပိုများကြောင်း၊ ထို့အပြင် ဘုရားဖူးခရီးစဉ်၌ ယခင်က သွားလာမှုများပြားခဲ့သော်လည်း ယခုအခါတွင် အနည်း အကျဉ်းသာရှိနေကြောင်း ခရီးသွားလုပ်ငန်းရှင်များအသင်းမှ သိရသည်။
- By CNI
- Category: Travel
- Hits: 610
CNI News
၂၀၂၄ ခုနှစ်၊ မတ်လ ၁၃
လာမည့် ဧပြီ ၁ ရက်နေ့မှ စတင်၍ ၂၁ ရက်နေ့အထိ ခမ်းခမ်းနားနားဖြင့် ကျင်းပသွားမည့် ထိုင်းသင်္ကြန်ကို မြန်မာနိုင်ငံမှ စိတ်ဝင်စားမှု များနေပြီး သွားရောက်ဆင်နွှဲရန်အတွက် ကြိုတင်ပြင်ဆင်မှုများ လုပ်ဆောင်နေ ကြသည်ဟု ခရီးသွားလုပ်ငန်း လုပ်ကိုင်သူများထံမှ သိရသည်။
ယူနက်စကို၏ ကမ္ဘာ့ယဉ်ကျေးမှု အမွေအနှစ် စာရင်းဝင်ထားသည်မှာ မကြာသေးသည့် ဆွန်ကရန်(ဆုန်ကရန်) သင်္ကြန်ပွဲတော်ဖြစ်သည်။
၂၀၂၄ သင်္ကြန်ပွဲတော်သည် ထိုင်းနိုင်ငံ၏ သမိုင်းတလျှောက်တွင် အကြီးကျယ်ဆုံးနှင့် အခမ်းအနားဆုံး ဖြစ်လာမည်ဟု ထိုင်းအစိုးရက ကြေညာထားသည်။
လက်ရှိတွင် ထိုင်းသင်္ကြန်ကို ဆင်နွှဲရန်အတွက် လေယာဉ်လက်မှတ် အရောင်းဌာနများနှင့် ပြည်ပခရီးသွား ဝန်ဆောင်မှုကုမ္ပဏီများတွင် လေယာဉ်လက်မှတ်သည် ပြည့်နေပြီဖြစ်ကြောင်း၊ ထိုင်းသင်္ကြန်ကို လက်ရှိတွင် တစ်ကမ္ဘာလုံးမှ ခရီးသွားများက စိတ်ဝင်စားလျက်ရှိနေပြီး မြန်မာနိုင်ငံမှ ခရီးသွားများလည်း ပါဝင်နေသည်ဟု Myanmar Voyages International Tourism ၏ မန်နေဂျင်း ဒါရိုက်တာ ဦးသက်လွင်တိုးက CNI သတင်းဌာနသို့ ပြောသည်။
ထိုင်းသင်္ကြန်ကို တွေ့ရစဉ်
၎င်းက “၉ ရက်၊ ၁၀ ရက်ထဲက လေယာဉ်တွေ ပြည့်နေပြီ။ ဆရာတို့ ကုမ္ပဏီမှာလည်း နေ့စဉ် လက်မှတ်တွေ ထုတ် ပေးနေရတာ ဧပြီအထိကို ပြည့်နေပြီ။ ရန်ကုန် - ဘန်ကောက် လေယာဉ်ရော၊ စင်္ကာပူတို့ဘာတို့၊ မလေးရှားတို့ရော၊ မလေးရှားက အခုနောက်ပိုင်း ကန့်သတ်လိုက်တော့ သိပ်ပြီး မရှိတော့ဘူး။ သွားတော့ သွားကြတာပေါ့နော်။ မလေးရှားလည်း နောက်ပိုင်း မြန်မာတွေကို ကန့်သတ်လိုက်ပြီလေ။ ထိုင်းကတော့ လောလောဆယ် တံခါးဖွင့် ပေးနေတာပေါ့နော်။ ထိုင်းကတော့ မနှစ်ကကတည်းက သူက လုပ်စားလိုက်တာလေ။ ပြန်ဖွင့်တဲ့အချိန်မှာ သူက သင်္ကြန်ကို အကြီးအကျယ် သူက လုပ်လိုက်တော့ တစ်ကမ္ဘာလုံးက အာရုံစိုက်တော့ လာတော့ မနှစ်ကတည်းက သူက ၂၅ သန်းလောက် ဝင်သွားတယ်လေ။ တရုတ်တွေချည်းပဲ ၈ သန်းလောက်မကဘူး ဝင်သွားတယ်။ ဒီနှစ် ကတော့ မြန်မာတွေလည်း ပါမှာပေါ့နော်။ package Tour အနေနဲ့ သွားတာတော့ သိပ်မရှိဘူး။ ဘာလို့ဆို ထိုင်းက တော့ ကိုယ့်ဘာကိုယ်ပဲ သွားတတ်နေတယ်လေ။ တော်တော်များများ Tour Guide တွေနဲ့ သွားတဲ့ဟာ ရှိတော့ ရှိတယ် သိပ်ရှားတယ်။ ကိုယ့်ဘာသာကိုယ် သွားတာတော့ များတယ်။ ဘယ်လောက် သွားမယ်ဆိုတာတော့ မသိ ဘူး။ ကိုရီးယားတို့၊ ဂျပန်တို့ လွှတ်မယ့်ခရီးစဉ်တွေတော့ တွေ့ရတယ်၊ Europe ဘက် သွားတာတွေလည်း တွေ့ရ တယ်” ဟု ပြောသည်။
ထိုင်းသင်္ကြန်ကို လည်ပတ်ရန်အတွက် ရန်ကုန်နှင့် မန္တလေးတိုင်းဒေသကြီးမှ ပြည်သူများက စိတ်ဝင်စားမှုများ နေ ကြောင်း၊ မန္တလေးက ပို၍များပြားကြောင်း သိရသည်။
ထိုင်းသင်္ကြန်ကို လေယာဉ်ခရီးစဉ်ဖြင့် သွားရောက်ရန် စီစဉ်နေမှုများ ရှိသည့်အပြင် အဖွဲ့လိုက်ဖြင့် ကုန်လမ်းကနေ လည်း သွားရောက်လည်ပတ်ရန် စီစဉ်နေမှုများလည်း ရှိနေသည်။
သို့သော်လည်း လက်ရှိတွင် ထိုင်း - မြန်မာ နယ်စပ်လမ်းကြောင်း တလျှောက်၌ တိုက်ပွဲများ ဖြစ်ပေါ်နေခြင်းကြောင့် နယ်မြေတည်ငြိမ်မှု မရှိသည့်အတွက် ချင့်ချိန်နေရသည်ဟု မန္တလေးမှ ခရီးသွားဝန်ဆောင်မှု လုပ်ငန်းရှင်တစ်ဦးက CNI သတင်းဌာနသို့ ပြောသည်။
ထိုင်းသင်္ကြန်ကို တွေ့ရစဉ်
၎င်းက “နှစ်ဆန်း ၁ ရက်နေ့ကတော့ ထိုင်းသင်္ကြန်နဲ့ သူ့ရဲ့ နေ့ပေါ့နော်။ သူတို့ အပျော်ဆုံး ကစားတဲ့နေ့ပေါ့။ အဲဒီ နှစ်ဆန်း ၁ ရက်နေ့ကို မှီပြီးတော့မှ သွားဖို့ လုပ်နေတာပဲ။ စိတ်ဝင်စားတာတော့ ဆက်သွယ်နေတာတော့ ရှိတာပေါ့ နော်။ ခရီးစဉ်က သွားနေကျကိုး။ ပူတာအိုတို့၊ တာချီလိတ်တို့၊ ကော့သောင်းတို့က သွားနေကျကိုး။ ဆိုတော့ ပရိသတ်က ရှိပြီးသား။ ဒါပေမယ့် ၂၀ ရက်နေ့လောက်မှ သုံးသပ်လို့ရမယ်။ ရန်ကုန်ကလည်း စိတ်ဝင်စားတယ်၊ မန္တလေးကတော့ ပိုများတာပေါ့။ လမ်းပန်းဆက်သွယ်မှု အဆင်ပြေရင်တော့ ကားလမ်းနဲ့ သွားမယ်။ လေယာဉ်ပျံ ကျတော့ လောလောဆယ် လေယာဉ်ပျံက နည်းနည်း ခက်တယ်လေ။ ကားနဲ့ သွားဖို့ပဲ စီစဉ်နေတာ။ လေယာဉ်ပျံ က ဈေးကြီးတာလေ။ ၃ သိန်းလောက်ဆိုတော့ အသွားအပြန် ၆ သိန်းလောက် ဖြစ်သွားမယ်။ လည်မယ်၊ ပတ်မယ်၊ ၁၀ သိန်းလောက်ဆိုတော့ ဗုဒ္ဓဂါယာ သွားသလို ဖြစ်နေမှာ။ အဲဒါလည်း စဉ်းစားရမှာ၊ ကားကျတော့ အဲဒီလောက် သိပ်မရှိဘူးလေ။ ကားကို လမ်းဖွင့်မဖွင့်၊ အခုတော့ သွားနေကြတာပေါ့။ အများနဲ့သွားမယ်ဆိုတဲ့ အခါကျတော့ သူတို့ရဲ့ သွားလာနိုင်တဲ့ အခြေအနေကို နည်းနည်း ချင့်ချိန်ရမှာပေါ့” ဟု ပြောသည်။
ထိုင်းသင်္ကြန်ကို ကမ္ဘာ့နိုင်ငံအသီးသီးမှ ခရီးသွားကုန်စည် ပြပွဲများကလည်း စိတ်ဝင်စားလျက်ရှိနေပြီး အကျိုးရှိရှိ အသုံးချဖို့ ပြင်ဆင်လျက် ရှိနေသည်။
ကိုဗစ်ဖြစ်ပွားမှုကြောင့် ခရီးသွားဝင်ရောက်မှုများ ကျဆင်းခဲ့သော်လည်း ပြီးခဲ့သည့် ၂၀၂၃ ခုနှစ်မှ စတင်၍ ထိုင်းနိုင်ငံသည် သင်္ကြန်ကာလကို အသုံးချကာ ခရီးသွားများကို ဆွဲဆောင်နိုင်ခဲ့ကြောင်း၊ ခရီးသွားဝင်ရောက်မှု သည် သန်း ၂၀ ကျော်ခဲ့သည်ကို တွေ့ရှိရသည်။
ယခုနှစ်တွင်လည်း ထိုင်းသင်္ကြန်သည် ယူနက်စကို စာရင်းဝင်ထားပြီ ဖြစ်သည့်အတွက် ယခုနှစ် သင်္ကြန်ကာလ သည် ခရီးသွားပို၍ ဝင်ရောက်လာမည် ဖြစ်သည်ဟု ထိုင်းနိုင်ငံက မျှော်မှန်းထားလျက် ရှိနေသည်။
- By CNI
- Category: Travel
- Hits: 592
CNI International News
ဘန်ကောက်၊ မတ်လ ၂
ထိုင်းဝန်ကြီးချုပ် ဆရီသာ သာဗီဆင် (Srettha Thavisin) က မတ်လ ၁ ရက်တွင် “Thailand Vision 2030” အမည်ရှိ အစီအစဉ်တစ်ခုကို ထုတ်ဖော်ပြောဆိုခဲ့သည်ဟု ဘန်ကောက်ပို့စ်မှ ဖော်ပြခဲ့သည်။
ထိုအစီအစဉ်အရ ထိုင်းနိုင်ငံကို ၂၀၃၀ ပြည့်နှစ်တွင် ဒေသတွင်း လေကြောင်းလိုင်းများ အဝင်/အထွက် များပြား သည့် ကြီးမားသော လေကြောင်း အချက်အချာကျသည့် နေရာတစ်ခုအဖြစ် ထူထောင်ရန်ဖြစ်သည်။
တစ်နှစ်လျှင် နိုင်ငံတကာခရီးသည် သန်း ၁၅၀ ကျော်ကို စီမံထိန်းသိမ်းနိုင်ရန် ရည်ရွယ်ထားသည်။
နိုင်ငံပိုင် ရုပ်သံလိုင်း NBT နှင့် လူမှုမီဒီယာ ပလက်ဖောင်းများတွင် တိုက်ရိုက်ထုတ်လွှင့်သည့် မိန့်ခွန်း၌ ဆရီသာက ထိုင်းနိုင်ငံကို အာရှ-ပစိဖိတ်ဒေသတစ်လျှောက် လေကြောင်းခရီးစဉ်များ ချိတ်ဆက်ပေးသော အဓိက အချက်အချာ ကျသည့် နေရာတစ်ခုဖြစ်လာစေရန် မျှော်မှန်းထားကြောင်းနှင့် ကမ္ဘာ့ထိပ်သီး လေကြောင်း သယ်ယူပို့ဆောင်ရေး နှင့် ဖြန့်ချိရေးစင်တာ ၁၀ နေရာစာရင်းတွင် ပါဝင်လာစေရန် မျှော်မှန်းထားကြောင်း ပြောကြားခဲ့သည်။
ထိုင်းအစိုးရသည် ထိုင်းနိုင်ငံ၏ လေဆိပ်များကို ၅ နှစ်အတွင်း ကမ္ဘာ့ထိပ်သီး လေဆိပ် ၂၀ စာရင်းတွင် ပြန်လည် ပါဝင်လာစေရန် ကြိုးပမ်းသွားမည်ဖြစ်ပြီး အထူးသဖြင့် ထိုင်းပြည်သူ့လေဆိပ်များ ကုမ္ပဏီလိမိတက် (AOT) ၏ စီမံခန့်ခွဲမှုအောက်ရှိ လေဆိပ် ၆ ခုကို အဆင့်မြှင့်တင် မွမ်းမံသွားမည်ဖြစ်ကြောင်း ဆရီသာက ပြောသည်။
ထိုလေဆိပ် ၆ ခုမှာ သု၀ဏ္ဏဘူမိ (Suvarnabhumi) ၊ ဒွန်မောင်း (Don Mueang)၊ ချင်းမိုင် (Chiang Mai)၊ မေ့ဖာလောင်-ချင်းရိုင် (Mae Fah Luang- Chiang Rai) ၊ ဖူးခက် (Phuket) နှင့် ဟတ်ယိုင် (Hat Yai) လေဆိပ်များဖြစ်သည်။
ဆရီသာ၏ ကြေညာချက် ထွက်ပေါ်ခဲ့ပြီးနောက် AOT ကုမ္ပဏီ၏ဥက္ကဋ္ဌ ကီရာတီ ကီဂျ်မာနာဝတ် (Kerati Kijmanawat) က ထိုအစီအစဉ်ကို “Ignite Thailand, Aviation Hub” အမည်ရှိ လှုပ်ရှားမှုအောက်တွင် လုပ်ဆောင်သွားမည်ဟု ပြောကြားခဲ့သည်။
လေဆိပ်များ၏ ဝန်ဆောင်မှုများ မြန်ဆန်စေရေးနှင့် အရည်အသွေး ကောင်းမွန်စေရေးတို့ကို ဦးစားပေး လုပ်ဆောင်မည်ဟုလည်း ၎င်းက ဆိုသည်။
ထိုင်းတွင် လာမည့်လ၌ ကျင်းပမည့် ဆွန်ကရန် ရေကစားပွဲတော်အတွက် လေဆိပ်ဝန်ဆောင်မှုများကို ပိုမို ကောင်းမွန်စေရန် စီမံထားပြီး လေဆိပ်များတွင် လုံခြုံရေးစစ်ဆေးမှုနှင့် ခရီးသည်များကို ကူညီထောက်ပံ့ ပေးရန်အတွက် ဝန်ထမ်းပေါင်း ၈၀၀ ကျော်ကို စုဆောင်းထားကြောင်းလည်း ကီရာတီက ပြောသည်။
ထိုဝန်ထမ်းများသည် မတ်လ ၃၀ ရက်မှစပြီး အလှည့်ကျ အလုပ်ချိန်ဖြင့် စတင် တာဝန်ထမ်းဆောင်မည်ဟုလည်း ကီရာတီက ပြောကြားခဲ့သည်။
Source: ဘန်ကောက်ပို့စ်
- By CNI
- Category: Travel
- Hits: 733
CNI International News
ဘန်ကောက်၊ ဖေဖော်ဝါရီ ၂၁
ထိုင်းနိုင်ငံတွင် လာမည့် ဧပြီလအတွင်း ကျရောက်မည့် မဟာဆွန်ကရန်(သင်္ကြန်ပွဲတော်) ကမ္ဘာ့ရေကစားပွဲတော် ကို မြှင့်တင်ရန်အတွက် ဖေဖော်ဝါရီ ၂၀ ရက်၌ ထိုင်းအစိုးရအဖွဲ့က ဗဟိုရန်ပုံငွေထဲမှ ဘတ် ၁၀၄ သန်းကို ဘတ်ဂျက်အဖြစ် အသုံးပြုခွင့်ပေးခဲ့သည်ဟု Thai PBS World မှ ဖော်ပြခဲ့သည်။
ခရီးသွားလာရေးနှင့် အားကစားရေးရာဝန်ကြီးဌာနက ဦးစီးကျင်းပမည့် ရေကစားပွဲတော်ကို ဧပြီ ၁၁ ရက်မှ ၁၅ ရက်အထိ ဘန်ကောက်မြို့တော်၏ Sanam Luang ဥယျာဉ်မှ Tatchadamnoen လမ်းအထိနှင့် အခြားပြည်နယ် ၁၆ ခုတွင် ပြုလုပ်မည်ဖြစ်သည်။
ထို့နောက် ထိုင်းနိုင်ငံ၏ အစားအစာ၊ အားကစား ၊ခရီးသွားကဏ္ဍ၊ ဂီတ၊ စာပေ၊ ကစားပွဲများ၊ အနုပညာ၊ ဖက်ရှင်နှင့် ဒီဇိုင်းများကို ပြသသွားမည်ဖြစ်သည်။
ထိုင်း၏ မဟာဆွန်ကရန်(သင်္ကြန်ပွဲတော်)ပွဲတော်ကို တွေ့ရစဉ်
အစိုးရအဖွဲ့၏ ဒုတိယပြောရေးဆိုခွင့်ရှိသူ ကေနက်ကာ အွန်ချစ် (Kaenaka Oonchit) က ထိုရေကစားပွဲတော် အတွင်း ထိုင်းနိုင်ငံသို့ ခရီးသွား ၂၀၀,၀၀၀ ကျော် လာရောက်လိမ့်မည်ဟု မျှော်လင့်ထားပြီး ဝင်ငွေအနေဖြင့် ဘတ် ၃ ဒသမ ၁ ဘီလျံအထိ ရရှိနိုင်မည်ဖြစ်ကြောင်းနှင့် ကမ္ဘာ့အကောင်းဆုံး ပွဲတော်များရှိသည့် နိုင်ငံများစာရင်းတွင် ထိုင်းနိုင်ငံကို ထည့်သွင်းသတ်မှတ်လာစေရန် မျှော်မှန်းထားကြောင်း ပြောကြားခဲ့သည်။
ပြီးခဲ့သည့်နှစ် ဒီဇင်ဘာ ၆ ရက်က UNESCO သည် ထိုင်းနိုင်ငံ၏ ဆွန်ကရန် ရေကစားပွဲတော်ကို လူသားမျိုးနွယ်၏ ဒြပ်မဲ့ ယဉ်ကျေးမှုနှင့် အမွေအနှစ်စာရင်းတွင် ထည့်သွင်းကြောင်း ကြေညာခဲ့သည်။
Source: Thai PBS World
- By CNI
- Category: Travel
- Hits: 664
CNI International News
ဘန်ကောက်၊ ဖေဖော်ဝါရီ ၁၇
တရုတ်နှစ်သစ်ကူးကာလတွင် တရုတ်နိုင်ငံအတွင်းသို့ ခရီးသွားများ ဝင်ရောက်မှု ပြန်လည်မြင့်တက်လာခဲ့သည်ဟု ဘန်ကောက်ပို့စ်မှ ဖော်ပြခဲ့သည်။
ထိုအခြေအနေသည် ပြည်တွင်း ယုံကြည်မှု လျော့နည်းနေပြီး အသုံးစရိတ်များ လျှော့ချနေရမှုနှင့် ရုန်းကန်နေရ သည့် တရုတ်နိုင်ငံအတွက် အပြုသဘောဆောင်သော လက္ခဏာများ ဖြစ်လာစေခဲ့သည်။
နှစ်သစ်ကူး အစိုးရရုံးပိတ်ရက်ကာလ၏ ပထမ ၆ ရက်တာကာလတွင် မီးရထားခရီးစဉ်ပေါင်း ၆၁ သန်းကျော်ရှိခဲ့ ကြောင်း တရားဝင် ထုတ်ပြန်ချက်များတွင် ဖော်ပြထားသည်။
ထိုပမာဏသည် ပြီးခဲ့သည့် ၅ နှစ်အတွင်း Bloomberg News က ကောက်ခံခဲ့သည့် စစ်တမ်းများထဲတွင် အမြင့်ဆုံးနှုန်းဖြစ်ပြီး ၂၀၂၃ ခုနှစ်နှင့် နှိုင်းယှဉ်ပါက ၆၁ ရာခိုင်နှုန်း ခန့်မြင့်တက်လာခဲ့သည်။
“တရုတ်ရဲ့ စားသုံးသူကဏ္ဍဟာ စတင် နိုးကြွလာခဲ့ပါပြီ”ဟု HSBC မှ အာရှရေးရာ စီးပွားရေးအကြီးအကဲ ဖရက်ဒရစ် နျူမန်း (Frederic Neumann) က ပြောကြားခဲ့သည်။
လက်ရှိ အခြေအနေသည် မျှော်မှန်းထားသည်ထက် ပိုမိုမြင့်မားနေသည်ဟုလည်း ၎င်းက ပြောသည်။
သို့သော် COVID-19 ကပ်ရောဂါကြောင့် ထိခိုက်ခဲ့ရသည့် စီးပွားရေးအခြေအနေအရ ၂၀၂၃ ခုနှစ်ထက် ပိုမို ဖွံ့ဖြိုး တိုးတက်လာသည့် နှုန်းထားသည် သာမန် မျှော်မှန်းနှုန်းထားထက် လျော့နည်းနေဆဲဖြစ်သည်ဟု ဖရက်ဒရစ် နျူမန်းက ဝန်ခံ ပြောကြားခဲ့သည်။
ပြီးခဲ့သည့်လက စားသုံးသူ စျေးနှုန်းများသည် ကမ္ဘာလုံးဆိုင်ရာ စီးပွားပျက်ကပ် ဖြစ်ပွားပြီးနောက်ပိုင်း အလျင်မြန် ဆုံးနှုန်းဖြင့် ကျဆင်းခဲ့သဖြင့် ကူညီထောက်ပံ့မှုများ ပြုလုပ်ပေးရန် အစိုးရအပေါ် ဖိအားများ ကျရောက်စေခဲ့ ကြောင်း ကျွမ်းကျင်သူများက ပြောကြားခဲ့သည်။
ထို့ပြင် စတော့ရှယ်ယာ စျေးကွက်တွင်လည်း ဒေါ်လာ ထရီလျံချီ တန်ဖိုးရှိသည့် ရှယ်ယာများကို ရောင်းချမှုများသည် တရုတ်၏ စီးပွားရေး မတည်ငြိမ်မှုကို မီးမောင်းထိုး ဖော်ပြရာ ရောက်ခဲ့သည်။
သို့သော် ယခုနှစ် အားလပ်ရက်ရာသီတွင် ကုန်းကြောင်းနှင့် လေကြောင်းခရီးစဉ်များသည် ပြီးခဲ့သည့်နှစ်ကဖြင့် နှိုင်းယှဉ်ပါက တိုးတက်လာသည်ဟု တရုတ်နိုင်ငံပိုင် မီဒီယာက ဖော်ပြခဲ့သည်။
Source: ဘန်ကောက်ပို့စ်
- By CNI
- Category: Travel
- Hits: 1311
CNI News
၂၀၂၃ ခုနှစ်၊ နိုဝင်ဘာ ၃
သီတင်းကျွတ် ပိတ်ရက် ကာလများတွင် ပုဂံ၊ ငွေဆောင်၊ ငပလီဘက်သို့ ခရီးသွား အများအပြား ဝင်ရောက်ခဲ့ ကြောင်း သက်ဆိုင်ရာဒေသရှိ ဟိုတယ်နှင့် ခရီးသွားလာရေးဝန်ကြီးဌာနမှ တာဝန်ရှိသူများက CNI သတင်းဌာနသို့ ပြောသည်။
သီတင်းကျွတ် ပိတ်ရက်ကာလဖြစ်သည့် အောက်တိုဘာ ၂၈ မှ ၃၀ ရက်နေ့အတွင်း ခရီးသွားဝင်ရောက်မှုသည် ပုဂံ၌ ၁ သိန်းကျော်၊ ငွေဆောင်၌ ၇ ထောင်ကျော် ရှိသည့်အနက် ပြည်ပခရီးသွား ၅၀၀ ဦးကျော် ပါဝင်ကြောင်း သိရသည်။
ထို့နောက် ငပလီ၌ ၄ ထောင်ကျော်ရှိပြီး ပြည်ပခရီးသွား ၇၀ ဦးခန့် ပါဝင်ကြောင်း သိရသည်။
ပြီးခဲ့သည့် ၂၀၂၂ ခုနှစ် သီတင်းကျွတ်ကာလ၌ ငပလီသို့ ခရီးသွားဝင်ရောက်မှု ၂ ထောင်ကျော်သာ ရှိခဲ့သော်လည်း ပြည်ပခရီးသွားဝင်ရောက်မှု တစ်ရာကျော်ခန့်ရှိခဲ့သဖြင့် ယခုနှစ်နှင့်နှိုင်းယှဉ်ပါက ပြည်တွင်းခရီးသွား ဝင်ရောက်မှု တိုးလာပြီး ပြည်ပခရီးသွားဝင်ရောက်မှု လျော့နည်းသွားသည်ကို တွေ့ရသည်။
ရခိုင်ပြည်နယ် ဟိုတယ်နှင့်ခရီးသွားလာရေးညွှန်ကြားမှုဦးစီးဌာန ညွှန်ကြားရေးမှူး ဦးတင်ထွန်းအောင် “မနှစ်က Foreigner ၁၅၃ ယောက်ရှိတယ်။ အများကြီး မျှော်မှန်းထားတာပေါ့။ အခုမှ ရာသီက စတာလေ။ မိုးကုန်ခါနီးပဲ ရှိသေးတာကို။ အောက်တိုဘာဆိုတာက မိုးမကျွတ်သေးဘူးပေါ့။ အဲဒီတော့ အခုချိန်က စောသေးတာပေါ့။ လာမယ့် ရာသီက ပွင့်လင်းရာသီ ဖြစ်တဲ့အတွက် သွားလို့လာလို့လည်း ကောင်းပြီလေ။ ရုရှား Fan Trip ပြီးခဲ့တဲ့ ၂၈၊ ၂၉၊ ၃၀ လာသွားတာ ရုရှား Fan Trip တစ်ဖွဲ့လေ။ ၁၁ ယောက်တစ်ဖွဲ့လာသွားတယ်။ ခရီးသွား အေးဂျင့်တွေ ပါတယ်။ ကုမ္ပဏီပိုင်ရှင်တွေပါတယ်။ ဗမာပြည်ရဲ့ ခရီးစဉ် အခြေအနေအကြောင်းကို ရုရှားမှာ ပြန်ပြီးတော့ သတင်းပေးမှာ ပေါ့နော်။ သူတို့ကတော့ ဒီရေ သဘာဝကို တော်တော်ကြိုက်တယ်။ လာလို့ရှိရင် သဲသန့်တယ်၊ ရေသန့်တယ်၊ နောက်တစ်ခုက ရေက အပူအအေး မျှတတာပေါ့နော်။ အေးတဲ့အချိန် ရေထဲဆင်းသွားရင် နွေးနေတယ်။ သူ အံ့တောင် အံ့သြတယ် ရေထဲ ရောက်တော့လေ။ ရေ အပူ temperature ကိုလည်း သူတို့ကြိုက်တယ်” ဟု CNI သတင်းဌာနသို့ ပြောသည်။
ကမ်းခြေမှာ အပန်းဖြေခရီးသွားများကိုတွေ့ရစဉ်
ထို့အပြင် ငွေဆောင် ကမ်းခြေဒေသ၌ ပြီးခဲ့သည့် ၂၀၂၂ ခုနှစ်၊ ဇန်နဝါရီလမှ အောက်တိုဘာလအထိ ခရီးသွား ၂ သိန်းကျော် ဝင်ရောက်ခဲ့ပြီး ယခုနှစ် ကာလတူတွင် ခရီးသွား ၃ သိန်းကျော် ဝင်ရောက်ခဲ့ကြောင်း ဧရာဝတီတိုင်း ဒေသကြီး ဟိုတယ်နှင့်ခရီးသွားလာရေးဝန်ကြီးဌာနမှ (ပုသိမ်၊ ငွေဆောင်ရုံးခွဲ) လက်ထောက် ညွှန်ကြားရေးမှူး ဦးစိုးဝင်းက CNI သတင်းဌာနသို့ ပြောသည်။
ငွေဆောင်သို့ ပြည်ပခရီးသွား ဝင်ရောက်မှု အများဆုံးမှာ တရုတ်နိုင်ငံသားဖြစ်ပြီး ဒုတိယအများဆုံးမှာ အိန္ဒိယ နိုင်ငံသား၊ တတိယအများဆုံးမှာ ရုရှားနိုင်ငံသား၊ စတုတ္ထအများဆုံးမှာ ဂျပန်နိုင်ငံသားနှင့် ပဥ္စမအများဆုံး ဝင်ရောက်သည့် နိုင်ငံမှာ ထိုင်းနိုင်ငံမှ ဖြစ်ပြီး စုစုပေါင်း ၅ ထောင်ဦးကျော် ဝင်ရောက်ခဲ့ကြကြောင်း ၎င်းက ဆက်ပြောသည်။
ပုဂံဒေသက ရွှေစည်းခုံဘုရား သီတင်းကျွတ် လပြည့်ညကို တွေ့ရစဉ်
ဦးစိုးဝင်းက “မနှစ်ကတော့ သီတင်းကျွတ် ရုံးပိတ်ရက်ကာလက ၅ ရက်ဖြစ်တယ်လေ။ ဒီနှစ်ကတော့ ၃ ရက်တည်း ဖြစ်တာပေါ့။ ၃ ရက်တည်းဖြစ်တော့ ဒီနှစ်ကတော့ ခရီးသွားဧည့်သည် ဝင်ရောက်မှု တည်းခိုမှုကတော့ မနှစ်က ထက်စာရင် ပိုမိုလာတာ တွေ့ရပါတယ်။ မနှစ်ကနဲ့ ဒီနှစ် အလားတူကာလ ၁၀ လကို နှိုင်းယှဉ်ကြည့်မယ်ဆိုရင် ခရီးသွားဧည့်သည် ဝင်ရောက်မှုက ၁၂၁,၇၀၄ ဦး ပိုမိုဝင်ရောက်လာတာကို တွေ့ရပါတယ်။ တိုးတက်မှု ရာခိုင်နှုန်း အနေနဲ့ဆိုရင်တော့ ၅၉ ရာခိုင်နှုန်း တိုးလာတာကို တွေ့ရှိရပါတယ်” ဟု CNI သတင်းဌာနသို့ ပြောသည်။
ထို့အပြင် ဟိုတယ် ဘိုကင်ယူထားမှု ပုံမှန် အနေအထားသာရှိခဲ့သည့် ရှမ်းပြည်နယ်ဘက်တွင်လည်း သီတင်းကျွတ် ပိတ်ရက်နေ့၌ လာရောက်လည်ပတ်သည့် ပြည်တွင်းခရီးသွား အများအပြားရှိခဲ့ကြောင်း မြန်မာနိုင်ငံခရီးသွား လုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။
၎င်းက “အင်းလေးတို့၊ ကလောတို့ ဘက်မှာဆိုရင် ရန်ကုန်ကနေ သွားရောက်လည်ပတ်ကြတဲ့ ခရီးစဉ်တွေ များပါ တယ်။ အဲဒီဘက်ကို ခရီးသည်တွေ ဒီသီတင်းကျွတ် ပိတ်ရက်မှာ တော်တော်လေး များသွားပါတယ်။ အနောက် တိုင်း နိုင်ငံသားတွေဆို ခရီးစဉ်တွေကို ၆ လ တစ်နှစ်လောက် ကြိုပြီးတော့ ဆွဲကြတယ်။ မြန်မာလူမျိုးတွေကြ တော့ နှစ်ပတ် တစ်လပေါ့နော် အဲဒီလောက်ပဲ ကြိုပြီးတော့ ဆွဲကြတယ်။ အခုဆို တန်ဆောင်တိုင် ပိတ်ရက် အတွက်ကို ခရီးစဉ်တွေ ကြိုဆွဲပြီးတော့ တစ်ပတ် နှစ်ပတ်လောက်ကြာတော့မှ ခရီးစဉ်တွေအပေါ်မှာ ဘိုကင်တွေ တင်ပြီးတော့ အခန်းတွေ ပြည့်သွားတာမျိုး များပါတယ်။ ပြည်တွင်း ခရီးသွားက အားကောင်းတယ်။ ပြည်ပခရီး သွားကလည်း တိုးတက်မှုတော့ရှိတယ်။ အပေါင်း လက္ခဏာတော့ ဆောင်တယ်။ positive ဆောင်တယ်။ ဒါပေမယ့် ဧည့်သည်တွေ အများအပြား ဝင်ရောက်တာမျိုး မရှိသေးဘူးပေါ့။ မနှစ်ကထက် စာရင်တော့ အများကြီး တိုးတက်လာပါတယ်၊ ပြည်တွင်းခရီးသွားကလေ။ ဒီနှစ် ဒီ ၁၀ လပိုင်းမှာလည်း ခရီးသွားတယ်။ လာမယ့် ၁၁ လ ပိုင်းနဲ့ ၁၂ လပိုင်း ပိတ်ရက်ပေါ့၊ ခရစ္စမတ်ရက်တွေမှာလည်း အများကြီး သွားလာကြဖို့ရှိပါတယ်” ဟု ပြောသည်။
လက်ရှိတွင် တန်ဆောင်တိုင် ပိတ်ရက်အတွက် အချို့ဒေသများ၌ ဟိုတယ်ဘိုကင် ယူထားမှုများ ရှိနေပြီဖြစ် ကြောင်း သိရသည်။