- By CNI
- Category: နည်းပညာ
- Hits: 848
CNI International News
ဝါရှင်တန်၊ မေလ ၄
တရုတ်ကွန်မြူနစ်ပါတီ (CCP) သည် အမေရိကန်ကို ဆိုက်ဘာတိုက်ခိုက်မှုများနှင့် ဆိုက်ဘာ သူလျှိုလုပ်သည့် လှုပ်ရှားမှုများအား ဆက်တိုက် လုပ်ဆောင်နေသည်ဟု Hong Kong Post မှ ဖော်ပြခဲ့သည်။
မကြာသေးမီက အမေရိကန်၏ ဆိပ်ကမ်းများတွင် အသုံးပြုနေသည့် တရုတ်နိုင်ငံလုပ် ဝန်ချီစက် (ကရိန်း) များတွင် ဆက်သွယ်ရေးပစ္စည်းများ တပ်ဆင်ထားသည်ကို တွေ့ရှိခဲ့သည့်ဖြစ်စဉ်နှင့် Volt Typhoon အမည်ရှိ ဆိုက်ဘာ တိုက်ခိုက်မှု စစ်ဆင်ရေးများသည် တရုတ်က အမေရိကန်၏ အခြေခံ အဆောက်အအုံများကို ဆိုက်ဘာ တိုက်ခိုက် မှုများပြုလုပ်သည့် ကြိုးပမ်းမှုများအား ဖော်ပြရာရောက်ခဲ့သည်။
စပိုင် ဝန်ချီစက်များဟု အမည်ပေးခံခဲ့ရသည့် အဆိုပါ ကရိန်းများကို ကမ္ဘာ့အကြီးဆုံး ဝန်ချီစက်များ ထုတ်လုပ် သည့် ရှန်ဟိုင်း (Shanghai) အခြေစိုက် ZPMC ကုမ္ပဏီက ထုတ်လုပ်ခဲ့ခြင်းဖြစ်သည်။
လက်ရှိတွင် အမေရိကန်နိုင်ငံ တစ်ဝန်းရှိ အဓိက ဆိပ်ကမ်းများ၌ ထိုဝန်ချီစက်များကို အသုံးပြုနေသည်။
ဘိုင်ဒန်ကို တွေ့ရစဉ်
ZPMC ၏ ဝန်ချီစက်များသည် ကင်မရာများနှင့် အင်တာနက် ဆက်သွယ်ရေးပစ္စည်းများ တပ်ဆင်ထားကာ ထိုပစ္စည်းများကို ဆန်းပြားရှုပ်ထွေးသည့် အင်တာနက်အသုံးပြုနိုင်သော ကိရိယာများနှင့် ပေါင်းစပ်ထားသည်။
ထိုအင်တာနက် ချိတ်ဆက်မှုများအရ တရုတ်သည် အမေရိကန်၏ အဓိကကျသည့် ဆိပ်ကမ်းများ၏ လည်ပတ်မှု များကို အဝေးမှ စောင့်ကြည့်နိုင်ပြီး နှောင့်ယှက်မှုများပင် ပြုလုပ်နိုင်ခြေရှိသည်ဟု ကျွမ်းကျင်သူများက ပြောကြား ခဲ့သည်။
အမေရိကန်အရာရှိများကမူ တရုတ်လုပ် ထိုဝန်ချီစက်များ အသုံးပြုမှုနှင့်ပတ်သက်ပြီး အမျိုးသားလုံခြုံရေးဆိုင်ရာ စိုးရိမ်မှုများကို အလေးထား ပြောဆိုလျက်ရှိသည်။
တရုတ်အလံကိုတွေ့ရစဉ်
တရုတ်သည် ထိုပစ္စည်းများကို ဝန်ချီစက်များ၌ ထည့်သွင်းထားခြင်း ဖြစ်ပြီး ဟက်ကာများသည် ထိုဝန်ချီစက်များ ကို အဝေးမှ ဝင်ရောက်အသုံးပြုနိုင်ကြောင်း၊ တရုတ်အနေဖြင့် ဆန္ဒရှိ သည့်အချိန်တွင် ထိုဝန်ချီစက်များကို ထိန်းချုပ်နိုင်စွမ်း ရှိနေသည်ဟု အမေရိကန်လွှတ်တော်၏ ထုတ်ပြန်ချက်၌ ဖော်ပြခဲ့သည်။
ထိုအခြေအနေမျိုးတွင် ပင်လယ်ရေကြောင်း ကုန်သွယ်မှုကို ထိခိုက်စေနိုင်သဖြင့် အမေရိကန်သမ္မတ ဂျိုးဘိုင်ဒန် (Joe Biden) အစိုးရအဖွဲ့သည် ZPMC ကုမ္ပဏီ၏ ဝန်ချီစက်များကို ဖယ်ရှားပြီး အမေရိကန် ကုမ္ပဏီများနှင့် ဂျပန် ကဲ့သို့ မဟာမိတ်နိုင်ငံများမှ ထုတ်လုပ်သည့် ဝန်ချီစက်များနှင့် အစားထိုးရန် ဒေါ်လာ ၂၀ ဘီလျံ အသုံးပြုရမည့် အခြေအနေသို့ ရောက်ရှိစေခဲ့သည်။
၂၀၂၃ ခုနှစ်၊ မေလကလည်း Volt Typhoon အမည်ရှိ တရုတ်ဟက်ကာအဖွဲ့သည် အာရှ-ပစိဖိတ်ဒေသနှင့် အမေရိကန်တွင် ဆက်သွယ်ရေး အခြေခံ အဆောက်အအုံများကို ဆိုက်ဘာတိုက်ခဲ့ကြောင်း Microsoft ကုမ္ပဏီက ထုတ်ဖော်ပြောကြားခဲ့သည်။
Source: Hong Kong Post
- By CNI
- Category: နည်းပညာ
- Hits: 1544
CNI International News
ဘန်ကောက်၊ မေလ ၃
ထိုင်းအစိုးရသည် AI နည်းပညာနယ်ပယ်ကို အပြည့်အဝ အားပေးထောက်ခံရန် လုပ်ဆောင်နေပြီး အနာဂတ်တွင် ဒစ်ဂျစ်တယ် အခြေခံအဆောက်အအုံအတွက် လမ်းဖွင့်ပေးထားကြောင်း ထိုင်းဝန်ကြီးချုပ် ဆရီသာ သာဗီဆင် (Srettha Thavisin) က ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။
“အခုဆယ်စုနှစ်ထဲမှာ AI ဟာ တိုးတက်ပြောင်းလဲမှုအရှိဆုံး အင်အားတစ်ခု ဖြစ်တယ်ဆိုတာကို ဘယ်သူကမှ ငြင်းနိုင်မှာ မဟုတ်ပါဘူး”ဟု ဆရီသာက ခလွန်တိုအီ (Khlong Toei) ခရိုင်ရှိ ဘုရင်မ သီရိခေတ် အမျိုးသား ကွန်ဗန်းရှင်းစင်တာ (QSNCC) တွင် ပြုလုပ်သည့် “Microsoft Build: AI Day Event” ပွဲ အခမ်းအနား၌ ပြောကြားခဲ့သည်။
“AI ဟာ ကျနော်တို့ရဲ့ ဘဝတွေ၊ လုပ်ငန်းခွင်တွေနဲ့ စီးပွားရေးတွေအပေါ် ရှုထောင့်ပေါင်းစုံကနေ ပြောင်းလဲခဲ့ပါ တယ်။ ဒီနိုင်ငံမှာ AI လုပ်ငန်းကို အပြည့်အဝ ထောက်ခံပေးဖို့ အစိုးရက လုပ်ဆောင်နေပြီ ထိုင်းဟာ AI အတွက် အသင့်ရှိနေပြီဆိုတာ ကျနော် ဝမ်းမြောက်စွာနဲ့ ပြောချင်ပါတယ်” ဟု ဆရီသာက ပြောသည်။
ထိုပွဲအခမ်းအအနားကို developer များ၊ စီးပွားရေးနှင့် နည်းပညာ ခေါင်းဆောင်များ အပါအဝင် လူပေါင်း ၂၀၀၀ ခန့် တက်ရောက်ခဲ့သည်။
ထိုင်းနိုင်ငံသည် ဒေသတွင်း အင်အားအကောင်းဆုံး အင်တာနက်နှင့် ဒစ်ဂျစ်တယ် အခြေခံ အဆောက်အအုံများ ရှိသည့် နိုင်ငံများထဲတွင် ပါဝင်နေပြီး broadband အင်တာနက်၊ မိုဘိုင်းဆက်သွယ်ရေးနှင့် 5G အခြေခံ အဆောက်အအုံနှင့် နိုင်ငံတကာ ရေအောက် ကေဘယ်ကွန်ရက်တို့ရှိကြောင်း ဆရီသာက ပြောသည်။
AI နည်းပညာကို ပြသထားစဉ်
ဖေဖော်ဝါရီလက စတင်ခဲ့သည့် “Ignite Thailand” အမည်ရှိ အစီအစဉ်အရ အစိုးရအဖွဲ့သည် နိုင်ငံကို ဒေသတွင်း အဓိက လုပ်ငန်းများတည်ရှိသည့် ရပ်ဝန်းတစ်ခုအဖြစ် ပြောင်းလဲ ဖော်ဆောင်မည်ဆိုသည့် ကတိကဝတ်နှင့် လုပ်ဆောင်မှုများကို ပြသရာ ရောက်သည်ဟုလည်း ထိုင်းဝန်ကြီးချုပ်က ပြောသည်။
ထိုအဓိက လုပ်ငန်းနယ်ပယ်များထဲတွင် ဒစ်ဂျစ်တယ်စီးပွားရေး၊ ခရီးသွားကဏ္ဍ၊ ဆေးဝါးကဏ္ဍ၊ အစားအသောက် ကဏ္ဍ၊ လေကြောင်းကဏ္ဍ၊ အနာဂတ် မော်တော်ယာဉ်လုပ်ငန်းကဏ္ဍနှင့် ဘဏ္ဍာရေးကဏ္ဍတို့ ပါဝင်သည်။
ထိုအစီအစဉ်၏ အရေးအကြီးဆုံး အချက်တစ်ခုမှာ ထိုင်နိုင်ငံကို ကမ္ဘာ့အဆင့် မဟုတ်လျှင်တောင် ဒေသတွင်း အဆင့် ဒစ်ဂျစ်တယ် စီးပွားရေး ရပ်ဝန်းအဖြစ် ပြောင်းလဲထူထောင်လိုသည့် ရည်ရွယ်ချက်ဖြစ်သည်။
ထိုအစီအစဉ်အရ အနာဂတ်တွင် အဆင့်မြင့် နည်းပညာလုပ်ငန်းများ ပါဝင်လာလိမ့်မည်ဟု ဆရီသာက ပြောကြားခဲ့သည်။
Source: ဘန်ကောက်ပို့စ်
- By CNI
- Category: နည်းပညာ
- Hits: 358
CNI International News
ဝါရှင်တန်၊ ဧပြီ ၉
ဂျပန်ဝန်ကြီးချုပ်၊ ဖူမီယို ကီရှီဒါ (Fumio Kishida) နှင့် အမေရိကန်သမ္မတ ဂျိုးဘိုင်ဒန် (Joe Biden) တို့သည် ယခုသီတင်းပတ်ကုန်တွင် အစည်းအဝေးလုပ်၍ ကာကွယ်ရေးကဏ္ဍကိုသာမက နည်းပညာပူးပေါင်း ဆောင်ရွက် ရေးကိုပါ ဦးစားပေး ဆွေးနွေးကြမည်ဟု Japan Times မှ ဖော်ပြခဲ့သည်။
ခေါင်းဆောင်နှစ်ဦးသည် တရုတ်ကို အာရုံစိုက်ပြီး နှစ်နိုင်ငံအကြား တစ်ပိုင်းလျှပ်ကူးပစ္စည်း (semiconductor) များနှင့် AI နည်းပညာ အပါအဝင် ခေတ်မီနည်းပညာများနှင့်ပတ်သက်ပြီး ပူးပေါင်းဆောင်ရွက်မှုကို မြှင့်တင်ရန် ကြေညာဖွယ်ရှိနေသည်။
ကီရှီဒါသည် ဧပြီ ၁၀ ရက်တွင် အမေရိကန်နိုင်ငံ၊ ဝါရှင်တန် (Washington) မြို့တော်သို့ သွားရောက်မည်ဖြစ်ပြီး ဘိုင်ဒန်နှင့် ကာကွယ်ရေး၊ လုံခြုံရေး၊ စီးပွားရေး စသည့်နယ်ပယ်များတွင် သဘောတူညီချက် အသစ်များကို ကြေညာမည်ဖြစ်သည်။
အမေရိကန်နဲ့ ဂျပန် နည်းပညာကိုတွေ့ရစဉ်
ထို့နောက် နှစ်နိုင်ငံအကြား အရှိန်အဟုန် မြင့်တက်နေသည့် ဆက်ဆံရေးများကို ထိန်းသိမ်းသွားမည်ဖြစ်သည်။
ထို့ပြင် ချစ်ပ်ပြားထုတ်လုပ်မှု၊ AI နည်းပညာနှင့် အခြား နည်းပညာမြင့်ကဏ္ဍများတွင် ၎င်းတို့၏ ရပ်တည်ချက်ကို မြှင့်တင်ရန် ကမ္ဘာလုံးဆိုင်ရာ မိတ်ဖက်ဆက်ဆံရေးကို လုပ်ဆောင်မည်ဖြစ်ပြီး အခြား စိတ်သဘောထားခြင်း တူညီသည့် နိုင်ငံများနှင့် အနီးကပ် ပူးပေါင်းဆောင်ရွက်ရန် ခေါင်းဆောင်နှစ်ဦးက ကတိပြုထားသည်။
ကီရှီဒါက သူ့ခရီးစဉ်သည် စိန်ခေါ်မှုပေါင်းစုံကို ဖြေရှင်းနေသည့် နိုင်ငံတကာ အသိုင်းအဝိုင်းအတွင်း ဂျပန်နှင့် အမေရိကန်ကို ဦးဆောင်သည့်နေရာမှ ပါဝင်သော မိတ်ဖက်နိုင်ငံများ ဖြစ်သည့်အကြောင်း ပြသရာရောက်စေလိမ့် မည်ဟု မျှော်လင့်ထားကြောင်း ဝါရှင်တန်သို့ မသွားရောက်မီ ဧပြီ ၈ ရက်က တိုကျို (Tokyo) မြို့တော်တွင် မိန့်ခွန်းပြောကြားခဲ့ချိန်၌ ပြောကြားခဲ့သည်။
ဘိုင်ဒန်နှင့် ကီရှီဒါသည် တစ်ပိုင်းလျှပ်ကူး ပစ္စည်းများ၊ ဘက္ကထရီများ သိုလှောင်ရေးနှင့် Permanent Magnets ဆိုသည့် သံလိုက် အမျိုးအစားများကဲ့သို့ မဟာဗျူဟာမြောက် ကုန်စည်များအတွက် ထောက်ပံ့ငွေ စည်းမျဉ်း စည်းကမ်းများနှင့်ပတ်သက်ပြီး သဘောတူညီချက်တစ်ခုကို အစည်းအဝေး အပြီးတွင် ပြုလုပ်သည့် သတင်းစာ ရှင်းလင်းပွဲ၌ ထုတ်ပြန်သွားမည်ဟု Nikkei daily မှ ဖော်ပြခဲ့သည်။
ဘိုင်ဒန်နဲ့ ကီရှီဒါကို တွေ့ရစဉ်
ဂျပန်သည် တစ်ချိန်က နေ့စဉ်သုံးပစ္စည်းများနှင့် လက်နက်များအတွက် မရှိမဖြစ် ထည့်သွင်းအသုံးပြုရသည့်် တစ်ပိုင်းလျှပ်ကူးပစ္စည်းများ ထုတ်လုပ်သော ရှေ့ပြေးနိုင်ငံတစ်ခု ဖြစ်သော်လည်း ထိုင်ဝမ်နှင့် တရုတ် အပါအဝင် အခြားနိုင်ငံများက တစ်ပိုင်းလျှပ်ကူးပစ္စည်းများကို ပိုမိုကျယ်ပြန့်စွာ ထုတ်လုပ်လာသည့် အချိန်မှစပြီး ဂျပန်၏ အဆင့်သည် လျော့ကျလာခဲ့သည်။
ပြီးခဲ့သည့်နှစ် မေလကလည်း ဘိုင်ဒန်နှင့် ကီရှီဒါတို့သည် ဂျပန်နိုင်ငံ၊ ဟီရိုရှီးမား (Hiroshima) မြို့တွင် ပြုလုပ်ခဲ့သည့် စက်မှုထိပ်သီး ၇ နိုင်ငံ (G-7) အစည်းအဝေးတွင် သီးသန့်တွေ့ဆုံခဲ့ပြီး နှစ်နိုင်ငံ ပူးပေါင်း ဆောင်ရွက်မှုများကို မြှင့်တင်ရန် သဘောတူခဲ့ကြသည်။
Source: Japan Times
- By CNI
- Category: နည်းပညာ
- Hits: 540
CNI International News
နယူးဒေလီ၊ မတ်လ ၁၄
အိန္ဒိယနိုင်ငံတွင် ပြုလုပ်မည့် ရွေးကောက်ပွဲမတိုင်မီ AI နည်းပညာနှင့်ပတ်သက်သည့် အကြောင်းအရာများကို လူသိရှင်ကြား တိကျပြတ်သားစွာ ဖော်ပြကြရန် အိန္ဒိယအစိုးရက နည်းပညာကုမ္ပဏီများကို တိုက်တွန်းခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။
နည်းပညာကုမ္ပဏီများ၏ AI ထုတ်ကုန်များသည် ရွေးကောက်ပွဲလုပ်ငန်းစဉ်၏ ဂုဏ်သိက္ခာကို ခြိမ်းခြောက်ခြင်း မရှိအောင် လုပ်ဆောင်ရန်လည်း အစိုးရက သတိပေးခဲ့သည်။
၂၀၂၃ ခုနှစ်၊ ဧပြီလအတွင်း အိန္ဒိယအစိုးရသည် AI နည်းပညာနှင့်ပတ်သက်ပြီး ဥပဒေထုတ်ပြန်ရန် အစီအစဉ်မရှိ ကြောင်း ပြောကြားခဲ့သော်လည်း ယခုတွင်မူ AI နည်းပညာနှင့် ပတ်သက်သည့် စည်းကမ်းဥပဒေများကို ပြဋ္ဌာန်းရန် အပူတပြင်း လုပ်ဆောင်နေခြင်း ဖြစ်သည်။
မကြာသေးမီက Google ကုမ္ပဏီ၏ Gemini AI ဆော့ဖ်ဝဲသည် “မိုဒီက ဖက်ဆစ်ဝါဒီလား” ဆိုသည့် မေးခွန်းကို ပြန်ဖြေကြားခဲ့ရာတွင် “မိုဒီကို အချို့ကျွမ်းကျင်သူများက ဖက်ဆစ်ဝါဒီ တစ်ဦးအဖြစ် ယူဆထားသည်” ဟု ဖြေကြားခဲ့သည်။
ထို့နောက် ပြီးခဲ့သည့် သီတင်းပတ်တွင် အိန္ဒိယအီလက်ထရောနစ်နှင့် ဆက်သွယ်ရေးနည်းပညာဝန်ကြီးဌာနက AI နှင့်ပတ်သက်သည့် ဥပဒေပြဋ္ဌာန်းမှု အစီအစဉ်ကို ထုတ်ပြန်ခဲ့ခြင်းဖြစ်သည်။
မိုဒီကို တွေ့ရစဉ်
ဆက်သွယ်ရေးနည်းပညာဆိုင်ရာ အငယ်တန်းဝန်ကြီး တစ်ဦးဖြစ်သည့် ရာဂျိဗ် ချန်ဒရာဆက်ခါ (Rajeev Chandrasekhar) ကမူ Google ၏ Gemini AI ဆော့ဖ်ဝဲသည် အိန္ဒိယ၏ ဥပဒေကို ချိုးဖောက်ကြောင်း စွပ်စွဲခဲ့ သည်။
“နည်းပညာမှာ ယုံကြည်စိတ်ချလို့ မရဘူးဆိုတဲ့ အချက်ကို ဥပဒေအောက်မှာ ခြွင်းချက်ပေးထားလို့ မရပါဘူး” ဟု ချန်ဒရာဆက်ခါက ပြောကြားခဲ့သည်။
ထိုဖြစ်စဉ်အတွက် Google က ပြန်လည် တောင်းပန်ခဲ့ကြောင်းနှင့် ယုံကြည် စိတ်ချနိုင်ခြင်းမရှိသည့် algorithm စနစ်၏ ရလဒ်ကြောင့် ထိုအဖြေမျိုး ထွက်ပေါ်ခဲ့ခြင်းဖြစ်သည်ဟု ဖြေရှင်းချက်ပေးခဲ့ကြောင်း ၎င်းက ဆိုသည်။
အနောက်နိုင်ငံများတွင်လည်း အဓိက နည်းပညာကုမ္ပဏီများသည် လစ်ဘရယ် ဘက်လိုက်မှုများရှိနေသည်ဟု စွပ်စွဲခံခဲ့ရသည်။
ထိုကဲ့သို့ စွပ်စွဲခံခဲ့ရသည့် AI ထုတ်ကုန်များထဲတွင် Open AI ကုမ္ပဏီ၏ Chat GPT နှင့် Microsoft ကုမ္ပဏီ၏ Copilot ဆော့ဖ်ဝဲများ ပါဝင်ခဲ့သည်။
Source: အယ်လ်ဂျာဇီးယား
- By CNI
- Category: နည်းပညာ
- Hits: 464
CNI International News
ပေကျင်း၊ မတ်လ ၁၄
တရုတ်သည် အမေရိကန်နှင့် နည်းပညာစစ်ပွဲ ပြင်းထန်နေပြီး စီးပွားရေးဖွံ့ဖြိုးတိုးတက်မှုအတွက် ရုန်းကန်နေရချိန် တွင် တရုတ်ခေါင်းဆောင်များက တရုတ်နိုင်ငံကို မြင့်မားသည့် နည်းပညာဗဟိုချက်တစ်ခုဖြစ်အောင် တွန်းအားပေး လုပ်ဆောင်ရန် အမျိုးသားလွှတ်တော်ညီလာခံတွင် ပြောကြားခဲ့သည်ဟု Devdiscourse မှ ဖော်ပြခဲ့သည်။
တရုတ်နိုင်ငံ ပြည်သူ့မဟာခန်းမဆောင်တွင် မတ်လ ၁၁ ရက်က အဆုံးသတ်ခဲ့သည့် အမျိုးသားလွှတ်တော် ညီလာခံနှင့် နိုင်ငံရေးအတိုင်ပင်ခံအဖွဲ့၏ ညီလာခံများ (two sessions)ကို သီတင်းတစ်ပတ်ကြာ ပြုလုပ်ခဲ့သည်။
Covid ကပ်ရောဂါဆိုင်ရာ တားမြစ် ကန့်သတ်ချက်များမပါဘဲ ပထမဆုံးအကြိမ် ကျင်းပခဲ့သည့် ထိုညီလာခံများ သည် တရုတ်သမ္မတ ရှီကျင့်ဖျင်(Xi Jinping) လက်အောက်တွင် တရုတ်၏ နားလည်ရခက်ခဲသော နိုင်ငံရေး စနစ်ကို ရိုးတိုးရိပ်တိပ် စောင့်ကြည့်ခွင့်ရခဲ့သည့် ရှားပါးအခွင့်အရေးတစ်ခု ဖြစ်သည်။
မတ်လ ၁၁ ရက်က အမျိုးသားလွှတ်တော် ပိတ်ပွဲ အခမ်းအနားတွင် ပုံမှန်ပြုလုပ်နေကျဖြစ်သည့် ဝန်ကြီးချုပ်၏ သတင်းစာရှင်းလင်းပွဲကို ပြုလုပ်ခဲ့ခြင်းမရှိခြင်းက ထူးခြားချက်တစ်ရပ်ဖြစ်သည်။
တရုတ်ဝန်ကြီးချုပ် လီချင်ကို တွေ့ရစဉ်
ပြီးခဲ့သည့် သီတင်းပတ်က ညီလာခံအတွင်း တရုတ်ဝန်ကြီးချုပ် လီချင် (Li Qiang) က မိန့်ခွန်းပြောကြားခဲ့ရာတွင် တရုတ်အနေဖြင့် သိပ္ပံနှင့် နည်းပညာနယ်ပယ်တွင် ကိုယ့်အားကိုယ်ကိုးပြီး ခိုင်မာမှုများရှိစေရန် တွန်းအားပေး လုပ်ဆောင်သင့်ကြောင်း တိုက်တွန်းခဲ့သည်။
စက်မှုလုပ်ငန်း ထောက်ပံ့ရေး ကွင်းဆက်များနှင့် မြင့်မားသည့် နည်းပညာကဏ္ဍတွင် တရုတ်၏ ရပ်တည်ချက်ကို ပိုမိုတိုးတက်စေရန် လုပ်ဆောင်သင့်ကြောင်း၊ တရုတ်၏ နှစ်စဉ် အသုံးစရိတ်၏ ၁၀ ရာခိုင်နှုန်းကို သိပ္ပံနှင့် နည်းပညာကဏ္ဍအတွက် အသုံးပြုမည်ဖြစ်ကြောင်း လီက ပြောကြားခဲ့သည်။
Two sessions ညီလာခံများ ပြုလုပ်နေချိန်အတွင်း သီးသန့်ပြုလုပ်သည့် သတင်းစာ ရှင်းလင်းပွဲတွင် တရုတ် နိုင်ငံခြားရေးဝန်ကြီး ဝမ်ယိ (Wand Yi)က အမေရိကန်သည် တရုတ်ကို ထိန်းချုပ်ဟန့်တားရန် နည်းပေါင်းစုံဖြင့် လုပ်ဆောင်နေကြောင်း စွပ်စွဲခဲ့သည်။
ထို့ပြင် တရုတ်အပေါ် အမေရိကန်က ကုန်သွယ်ရေးနှင့် နည်းပညာထိန်းချုပ်မှုများ ပြုလုပ်နေခြင်းနှင့်ပတ်သက်ပြီး ဝမ်က အမေရိကန်အစိုးရကို ဝေဖန်ပြစ်တင်ခဲ့သည်။
Source: Devdiscourse
- By CNI
- Category: နည်းပညာ
- Hits: 847
CNI International News
တိုကျို၊ ဇန်နဝါရီ ၂၃
ဂျပန်နိုင်ငံ၏ လကမ္ဘာဆင်းသက်ရေးယာဉ်သည် ဇန်နဝါရီ ၂၀ ရက်က လကမ္ဘာပေါ်သို့ သမိုင်းဝင် ဆင်သက်နိုင်ခဲ့ ပြီးနောက် ယာဉ်၏ဓာတ်အားစနစ် ပြန်လည်ရရှိနိုင်ရန် မျှော်လင့်ထားကြောင်း ဂျပန်လေကြောင်းနှင့် အာကာသ လေ့လာရေး အေဂျင်စီ (JAXA) က ပြောကြားခဲ့ကြောင်း အယ်ဂျာဇီးယားမှ ဖော်ပြခဲ့သည်။
လကမ္ဘာဆင်းသက်ရေးယာဉ်သည် လပေါ်သို့ ဆင်းသက်ခဲ့ပြီးနောက် ၃ နာရီအကြာတွင် ထိုယာဉ်၏ ဓာတ်အား စနစ်ကို အဝေးထိန်းစနစ်ဖြင့် ပိတ်ခဲ့ခြင်းဖြစ်ကြောင်း JAXA က ဇန်နဝါရီ ၂၂ ရက်တွင် ပြောကြားခဲ့သည်။
ယာဉ်၏ ဓာတ်အားစနစ်ကို အနားပေးရန် ထိုဓာတ်အားစနစ်ကို ပိတ်ခဲ့ခြင်းဖြစ်သည်။
လကမ္ဘာပေါ်ကို ဆင်းသက်နေစဉ်
အဆိုပါယာဉ်တွင် တပ်ဆင်ထားသည့် ဆိုလာပြားများသည် နေရောင်ခြည်စွမ်းအင်ကို ရရှိမည့်အချိန်၌ စက်ပြန်နိုး လာလိမ့်မည်ဟု မျှော်လင့်ရကြောင်း JAXA က ထုတ်ပြန်ခဲ့သည်။
Moon Sniper ဟု အမည်ပေးထားသည့် ထိုလကမ္ဘာ စူးစမ်းလေ့လာရေးယာဉ်သည် လေ့လာရေး လုပ်ငန်းစဉ်များ ကို ပြန်လည်လုပ်ဆောင်နိုင်ရန် ဓာတ်အားစနစ်အား ပြန်ပွင့်စေဖို့ လုပ်ဆောင်နိုင်လိမ့်မည်ဟု မျှော်လင့်ထား ကြောင်းလည်း အာဏာပိုင်များက ပြောကြားခဲ့သည်။
ထို့ပြင် Smart Lander for Investigating Moon (SLIM) ဟု အမည်ပေးထားသည့် စူးစမ်းလေ့လာရေး မစ်ရှင်ထံမှ အချက်အလက် အများအပြားကိုလည်း လက်ခံရရှိခဲ့ပြီးဖြစ်ကြောင်း JAXA က ပြောကြားခဲ့သည်။
လကမ္ဘာဆင်းသက်ရေးယာဉ်ကို တွေ့ရစဉ်
လကမ္ဘာပေါ်သို့ Moon Sniper လေ့လာရေးယာဉ် ဆင်းသက်နိုင်မှုကြောင့် ဂျပန်သည် လကမ္ဘာပေါ်သို့ ညင်သာစွာ ဆင်းသက်နိုင်ခဲ့သည့် ပဉ္စမမြောက်နိုင်ငံအဖြစ် မှတ်တမ်းဝင်သွားခဲ့သည်။
မည်သို့ပင်ဆိုစေ ဇန်နဝါရီ ၂၀ ရက်က ညသန်းခေါင်ကို ကျော်လွန်ပြီး မိနစ် ၂၀ ခန့်အချိန်တွင် ဆင်းသက်ခဲ့ပြီး နောက် Moon Sniper လေ့လာရေးယာဉ်၏ ဆိုလာဘက်ထရီများသည် ဓာတ်အားထုတ်လုပ်ပေးနိုင်ခြင်း ရှိ/မရှိကို JAXA က အတည်မပြုနိုင်ခဲ့ပေ။
လက်ရှိတွင် ထိုလေ့လာရေးယာဉ်၏ ဆိုလာပြားများသည် အနောက်ဘက်သို့ မျက်နှာမူလျက်ရှိပြီး နေရောင်ခြည် နှင့် ထိတွေ့ချိန်တွင် စွမ်းအင်များ ပြန်လည်ရရှိခဲ့မည်ဆိုပါက ဓာတ်အားစနစ် ပြန်ပွင့်လာလိမ့်မည်ဟု မျှော်လင့် ထားကြောင်း တာဝန်ရှိသူများက ပြောကြားခဲ့သည်။
Source: အယ်လ်ဂျာဇီးယား
- By CNI
- Category: နည်းပညာ
- Hits: 908
CNI International News
တဲလ်အဗစ်၊ ဒီဇင်ဘာ ၂၃
အစ္စရေးနှင့် ဟားမာ့စ်အကြား စစ်ပွဲဖြစ်ပွားနေသည့်တိုင် အစ္စရေး၏ နည်းပညာကဏ္ဍတွင် ရင်းနှီးမြှုပ်နှံမှုများ လုပ်ဆောင်ရန် အမေရိကန်စီးပွားရေး လုပ်ငန်းရှင်များက စိတ်ဝင်စားနေသည်ဟု ရိုက်တာမှ ဖော်ပြခဲ့သည်။
အမေရိကန်နိုင်ငံ၊ အော်ရီဂွန် (Oregon) ပြည်နယ်၊ ပို့စ်လန်း (Portland) မြို့မှ စွန့်ဦးတီထွင် လုပ်ငန်းရှင် တစ်ဦးဖြစ်သည့် ဂျော့ချ် ဂျူးရစ် (George Djuric) သည် စစ်ပွဲဖြစ်ပွားနေချိန်တွင် အစ္စရေးသို့သွားရောက်ခဲ့ပြီး အစ္စရေးနည်းပညာကဏ္ဍအတွက် ကူညီပေးမည်ဟု ကတိပြုခဲ့သည်။
အမေရိကန်ရှိ Y Ventures ကုမ္ပဏီတွင် နည်းပညာအရာရှိချုပ်ဖြစ်သည့် ဂျူးရစ်သည် ၁၉၉၀ ပြည့်နှစ် အလယ်ပိုင်း ကာလများက ဘော့စနီးယားစစ်ပွဲ ဖြစ်ပွားချိန်အတွင်း ဘော့စနီးယားမှ အမေရိကန်သို့ ဒုက္ခသည်အဖြစ် ရောက်ရှိ လာခဲ့ခြင်း ဖြစ်သည်။
အမေရိကန်သို့ ရောက်ရှိချိန်တွင် သူသည် အသက် ၃ နှစ်အရွယ်သာ ရှိသေးသည်။ ယခုသီတင်းပတ်အတွင်း အစ္စရေးသို့ သွားရောက်ခဲ့သည့် အမေရိကန်နည်းပညာ အလုပ်အမှုဆောင်များနှင့် ရင်းနှီးမြှုပ်နှံသူ ၇၀ ခန့်တွင် ဂျူးရစ်လည်း ပါဝင်ခဲ့သည်။
"အစ္စရေးနဲ့ စည်းလုံးညီညွတ်မှုရှိကြောင်း ပြသဖို့အတွက် ဒီကိုရောက်လာခဲ့တာ ဖြစ်ပါတယ်။ Silicon Valley ပြီးရင် ကမ္ဘာ့ဒုတိယ အကြီးဆုံးဖြစ်တဲ့ နည်းပညာရပ်ဝန်းဖြစ်တဲ့ အစ္စရေးရဲ့ နည်းပညာကဏ္ဍကို ကူညီပေးသွားမှာ ဖြစ်ပါ တယ်" ဟု ဂျူးရစ်က ပြောသည်။
ဟားမာ့စ်အဖွဲ့နှင့် ဖြစ်ပွားနေသည့် စစ်ပွဲကြောင့် အစ္စရေး၏ နည်းပညာကဏ္ဍတွင် ထိခိုက်မှုရှိနိုင်ကြောင်း ရင်းနှီးမြှုပ်နှံသူများနှင့် ကျွမ်းကျင်သူများက ပြောကြားခဲ့သည်။
နည်းပညာကဏ္ဍသည် အစ္စရေး၏ ပို့ကုန် စုစုပေါင်း၏ ထက်ဝက်ကျော်ရှိကာ နိုင်ငံစီးပွားရေး စုစုပေါင်း၏ ငါးပုံ တစ်ပုံနီးပါး ရှိသည်။
စစ်ပွဲဖြစ်ပွားချိန်တွင် နည်းပညာရပ်ဝန်း၌ လုပ်ကိုင်နေသည့် ဝန်ထမ်းများထဲမှ ၁၅ ရာခိုင်နှုန်းသည် စစ်မှုထမ်းခဲ့ ဖူးသူများ ဖြစ်ကြသည်။
ထိုအခြေအနေများ ရှိနေသည့်တိုင် အမေရိကန် ရင်းနှီးမြှုပ်နှံသူများက အစ္စရေး၏ နည်းပညာကဏ္ဍအပေါ် စိတ်ဝင်စားနေကြဆဲ ဖြစ်သည်။
"အစ္စရေးရဲ့ စီးပွားရေး ပြန်လည် နာလန်ထူမှုဟာ ၃ လ၊ ၆ လ၊ ၉ လ ဒါမှမဟုတ် ၁၂ လလည်း ကြာရင်ကြာမြင့် နိုင်ပါတယ်။ ဒါပေမယ့် ဒါက ကျနော်တို့အတွက် ပြဿနာမဟုတ်ပါဘူး။ ကျနော်တို့ဟာ အစ္စရေးအပေါ် အရင်ကတည်းက ယုံကြည်မှုရှိပြီးသားပါ" ဟု အမေရိကန် ရင်းနှီးမြှုပ်နှံသူတစ်ဦးက ပြောကြားခဲ့သည်။
Source: အေပီ
- By cni
- Category: နည်းပညာ
- Hits: 1360
CNI International News
၂၀၂၃ ခုနှစ်၊ သြဂုတ် ၂၂
ယခင်က Twitter ဟု လူသိများခဲ့သည့် X လူမှုမီဒီယာ အသုံးပြုသူများအနက် Bluemark ရရှိထားသည့် အသုံးပြု သူများသည် ယခုအခါတွင် မိမိတို့၏ selfie ဓာတ်ပုံအပြင် အစိုးရက ထုတ်ပေးထားသည့် မှတ်ပုံတင်ဓာတ်ပုံကို တင်သွင်းရန် လိုအပ်လာလိမ့်မည်ဟု PC မဂ္ဂဇင်း၏ သတင်းတွင် ဖော်ပြခဲ့သည်။
အသုံးပြုသူများ၏ ကိုယ်ရေး အချက်အလက်များကို အစ္စရေးကုမ္ပဏီဖြစ်သည့် AU10TIX software ကုမ္ပဏီက စိစစ်အတည်ပြုမည်ဖြစ်ပြီး ထိုအချက်အလက်များအား ရက်ပေါင်း ၃၀ ကြာ သိမ်းဆည်းထားမည်ဟု အယ်လ်ဂျာဇီးယားမှ ဖော်ပြခဲ့သည်။
AU10TIX software ကို တွေ့ရစဉ်
ဘေးကင်းလုံခြုံရေးနှင့် အကောင့်တုများကို တားဆီးရန် အချက်အလက်များအား စုဆောင်းပြီး အသုံးပြုသူများ၏ ကိုယ်ရေး အချက်အလက်များကို စိစစ်အတည်ပြုသွားမည်ဟု X ကုမ္ပဏီက ပြောကြားခဲ့သည်။
X အသုံးပြုသူ အများစုကမူ ၎င်းတို့၏ အချက်အလက်များကို သိမ်းဆည်းထားမည့် ကုမ္ပဏီ၏ အစီအစဉ်ကို ကျေနပ်မှုမရှိဘဲ X ကုမ္ပဏီဝန်ထမ်းများနှင့် အစ္စရေး ထောက်လှမ်းရေးအဖွဲ့အကြား ဆက်နွှယ်မှုများကို ထောက်ပြ ခဲ့ကြသည်။
ထို့ပြင် အတိတ်ကာလက ကိုယ်ရေး အချက်အလက်များ ချိုးဖောက်ခံခဲ့ရသည့် ဖြစ်စဉ်များနှင့်ပတ်သက်ပြီး X ၏ ဆုံးဖြတ်ချက်ကို သဘောမတူကြောင်း အသုံးပြုသူများက ဖော်ပြခဲ့ကြသည်။
လူမှုကွန်ရက်ကနေ လုံခြုံရေးစိုးရိမ်မှု ရှေ့နေက တင်ပြနေစဉ်
AU10TIX ကုမ္ပဏီသည် ၁၉၈၀ ပြည့်နှစ်နှင့် ၁၉၉၀ ပြည့်နှစ်များအတွင်း လေဆိပ်များနှင့် နယ်စပ်ဂိတ်များတွင် လူပုဂ္ဂိုလ် တစ်ဦးတစ်ယောက်ချင်းစီအား အချက်အလက်များနှင့် ကိုက်ညီမှု ရှိ/မရှိ စိစစ်အတည်ပြုသည့် စနစ်များ ကို ဖန်တီးရာတွင် အကူအညီပေးခဲ့သည်။
ထိုကုမ္ပဏီသည် နောက်ပိုင်းတွင် လုပ်ငန်းချဲ့ထွင်လာခဲ့ပြီးနောက် ၂၀၀၂ ခုနှစ်တွင် ဒစ်ဂျစ်တယ် နယ်ပယ်သို့ ဝင်ရောက်လာခဲ့ကာ Uber ၊ PayPal နှင့် Google ကဲ့သို့ နာမည်ကြီး နည်းပညာကုမ္ပဏီများနှင့် လက်တွဲ လုပ်ဆောင်ခဲ့သည်။
၂၀၂၂ ခုနှစ်၊ အောက်တိုဘာလက Twitter ကို ဝယ်ယူခဲ့သည့် အီလွန် မာ့စ် (Elon Musk) ကမူ မှတ်ပုံတင် စိစစ် အတည်ပြုသည့် စနစ်ကို ယခင်ကတည်းက လုပ်ဆောင်ခဲ့ပြီး မကြာမီအချိန်အတွင်း လူသိရှင်ကြား ချပြမည် ဖြစ်ကြောင်း ပြောကြားခဲ့သည်။
Source: အယ်လ်ဂျာဇီးယား