CNI International News
ဒမတ်စကတ်၊ ဇူလိုင် ၁၆
ပြည်တွင်းစစ်အလွန် ကျိုးပျက်လွယ်သည့် ဆီးရီးယားနိုင်ငံ၌ လူမျိုးစုပဋိပက္ခများ မြင့်တက်လာမည့်အရေးကို စိုးရိမ်မှုများ ထွက်ပေါ်ခဲ့သည်ဟု အေပီမှ ဖော်ပြခဲ့သည်။
ဆီးရီးယားနိုင်ငံတွင် ဘီဒိုအင် (Bedouin) လူမျိုးစု၊ အစိုးရတပ်ဖွဲ့များနှင့် ဒရုဇ် (Druze) လူမျိုးစုဝင်များကြား တိုက်ခိုက်မှုများ ဖြစ်ပွားခဲ့သဖြင့် လူပေါင်း ဒါဇင်ချီ သေဆုံးခဲ့ပြီးနောက် ထိုသို့ စိုးရိမ်မှုများ မြင့်တက်လာခြင်း ဖြစ်သည်။
ဆီးရီးယားတွင် ဆယ်စုနှစ်များစွာကြာ အာဏာရှင် လက်အောက်၌ နေခဲ့ရပြီး ၁၄ နှစ်နီးပါးကြား ပြည်တွင်းစစ် ဖြစ်ပွားခဲ့ပြီးနောက် ပြန်လည်ထူထောင်ရေး လုပ်ငန်းများ လုပ်ဆောင်နေချိန်မှာ နိုင်ငံအတွင်း သဘောထားများ နက်ရှိုင်းစွာ ကွဲလွဲနေသည်။
ပြီးခဲ့သည့်နှစ် ဒီဇင်ဘာလက ဆီးရီးယားသမ္မတ ဘာရှာအာဆတ် (Bashar Assad) အစိုးရအဖွဲ့ ပြုတ်ကျ သွားခဲ့ပြီးနောက် အစိုးရသစ္စာခံ တပ်ဖွဲ့များနှင့် ဒရုဇ်လူမျိုးစု လက်နက်ကိုင်များကြား တိုက်ခိုက်မှုများ ဖြစ်ပွားခဲ့သည်။
ဘီဒိုအင်လူမျိုးစု လက်နက်ကိုင်တွေကိုတွေ့ရစဉ်
ဒရုဇ်လူမျိုးစုသည် ၁၀ ရာစုနှစ်က ရှီးယိုက်အစ္စလာမ်မှ ခွဲထွက်လာသည့် အစ္စလာမ်ဘာသာဝင်များဖြစ်ပြီး လူနည်းစုဖြစ်သည်။
ကမ္ဘာပေါ်တွင် ဒရုဇ်လူမျိုးစု ၁ သန်းခန့် ရှိသည့်အနက် ထက်ဝက်ကျော်သည် ဆီးရီးယား၌ နေထိုင်လျက်ရှိပြီး အခြား ဒရုဇ်လူမျိုးများသည် လက်ဘနွန်နှင့် အစ္စရေးနိုင်ငံများမှာ နေထိုင်ကြသည်။
ဘီဒူအင် လူမျိုးစုများသည် တိရိစ္ဆာန်အုပ်များဖြင့် ရေကြည်ရာမြက်နုရာ လှည့်လည်သွားလာလေ့ရှိသည့် လူမျိုးစုဖြစ်ပြီး ဒရုဇ်လူမျိုးစုများနှင့် နှစ်ပေါင်းများစွာကြာ တိုက်ခိုက်မှုများ ဖြစ်ပွားခဲ့သည်။
ပြီးခဲ့သည့် ရက်ပိုင်းက ဘီဒူအင် လူမျိုးစုဝင်များသည် Sweida(ဆွစ်ဒါ)ပြည်နယ်တွင် စစ်ဆေးရေးဂိတ် တစ်ခု တည်ဆောက်ပြီး ဒရုဇ်လူမျိုးစုဝင် အမျိုးသားတစ်ဦးကို တိုက်ခိုက်ခဲ့ပြီးနောက် လူမျိုးစုပဋိပက္ခများ ဖြစ်ပွားခဲ့ခြင်း ဖြစ်သည်။
ဆီးရီးယားအစိုးရက အခြေအနေကို ထိန်းသိမ်းရန် ပဋိပက္ခများ ဖြစ်ပွားနေသည့် နေရာသို့ လုံခြုံရေးတပ်ဖွဲ့များ စေလွှတ်ခဲ့သော်လည်း လုံခြုံရေးတပ်ဖွဲ့များသည် ဘီဒူအင်လူမျိုးစုများဘက်မှ ရပ်တည်က ဒရုဇ်လူမျိုးစုများကို တိုက်ခိုက်နေသည်ဟု သတင်းများ ထွက်ပေါ်နေပြီး လက်ရှိအချိန်အထိ အခြေအနေ တင်းမာနေဆဲဖြစ်သည်။
ဆီးရီးယား ကြားဖြတ်အစိုးရသည် ဒရုဇ်လူမျိုးစု အပါအဝင် လူနည်းစုများကို အစိုးရအဖွဲ့ထဲ ထည့်သွင်းမည်ဟု ကြေညာခဲ့သော်လည်း အဖွဲ့ဝင် ၂၃ ဦးပါသည့် အစိုးရအဖွဲ့ထဲတွင် ဒရုဇ်လူမျိုးစုဝင် တစ်ဦးသာ ပါဝင်ခဲ့သည်။
Source: အေပီ
