CNI International News

ဘန်ကောက်၊ ဇူလိုင် ၁၆

ကုန်သွယ်ခွန် သဘောတူညီမှု ရရှိရေးအတွက် ထိုင်းနိုင်ငံ၊ ဖန်ငါ (Phang-Nga) ပြည်နယ်ရှိ သက်လာမူ (Thap Lamu) ရေတပ်စခန်းကို အသုံးပြုခွင့်ပေးရန် အမေရိကန်က အဆိုပြုခဲ့သည်ဆိုသည့် သတင်းများနှင့်ပတ်သက်ပြီး ထိုင်းဒုဝန်ကြီးချုပ်နှင့် ပြည်ထဲရေးဝန်ကြီး ဖွမ်သမ် ဝီချာယာချိုင်း (Phumtham Wechayachai) က ဇူလိုင် ၁၅ ရက်တွင် ငြင်းဆိုခဲ့သည်ဟု The Nation မှ ဖော်ပြခဲ့သည်။

လက်ရှိ ထွက်ပေါ်နေသည့် ကောလာဟလများနှင့်ပတ်သက်ပြီး အလွန်စိုးရိမ်ကြောင်း၊ သူသည် ထိုအကြောင်းအရာ များနှင့်ပတ်သက်ပြီး ဆွေးနွေးမှုများတွင် ပါဝင်ခြင်းမရှိကြောင်း ဖွမ်သမ်က အစိုးရအိမ်တော်၌ ပြောကြားခဲ့သည်။

ဖွမ်သမ်သည် ပြည်ထဲရေးဝန်ကြီးဌာနတွင် မီဒီယာများ၏ မေးမြန်းမှုကို ခံရချိန်တွင်လည်း သူသည် အမေရိကန်၏ အဆိုပြုချက်နှင့်ပတ်သက်ပြီး မသိကြောင်း၊ မည်သည့် ဆွေးနွေးမှုမှ မလုပ်ခဲ့ကြောင်း ငြင်းဆိုခဲ့သည်။

 ထိုင်းရေတပ်စခန်းကိုတွေ့ရစဉ်

သက်လာမူ ရေတပ်စခန်းကို ထိုင်းတော်ဝင်ရေတပ်က ပိုင်ဆိုင်ကြောင်း ထိုရေတပ်စခန်း၏ တည်နေရာသည် ထိုင်းပင်လယ်ကွေ့တွင် မဟာဗျူဟာကျသည့် နေရာ၌ တည်ရှိနေသဖြင့် အမေရိကန်က အဆိုပါ ရေတပ်စခန်းကို အသုံးပြုခွင့်ရရန် စိတ်ဝင်စားနေသော်လည်း တရားဝင် ဆွေးနွေးမှုများ မရှိသေးကြောင်း ဖွမ်သမ်က ပြောကြားခဲ့ သည်။

ထိုအကြောင်းအရာနှင့် ပတ်သက်ပြီး အသေးစိတ် အချက်အလက်များနှင့် ရင်းနှီးမြှုပ်နှံမှုများကို သုံးသပ်ရန် လိုအပ် မည်ဖြစ်ကြောင်း ၎င်းက ဆိုသည်။

ထိုင်းတော်ဝင်ရေတပ်သည် ထိုရေတပ်စခန်းနှင့် ပတ်သက်သည့် အစီအစဉ်များ ရှိနိုင်ကြောင်း၊ သူသည် အမေရိကန်နှင့် ဆွေးနွေးညှိနှိုင်းမှုများတွင် ပါဝင်ခြင်း မရှိကြောင်း၊ ကောလာဟလများကို ငြင်းပယ်ကြောင်း ဖွမ်သမ်က ပြောကြားခဲ့သည်။

ထိုအကြောင်းအရာနှင့် ပတ်သက်ပြီး သတင်းများ ဖော်ပြရာတွင် ဂရုစိုက်သင့်ကြောင်း၊ သတင်းအမှားများသည် ထိုင်းနိုင်ငံ၏ နိုင်ငံတကာရေးရာ ဆက်ဆံရေးများကို ထိခိုက်စေနိုင်ကြောင်း ၎င်းက သတိပေးခဲ့သင်္ည။

ဒုကာကွယ်ရေးဝန်ကြီး ဗိုလ်ချုပ်ကြီး နက်တာပိုလ် နက်ပါနစ်ကို တွေ့ရစဉ်  

“ဒါက နိုင်ငံတော်အဆင့် အရေးကြီးကိစ္စ ဖြစ်ပါတယ်။ မီဒီယာတွေက ကောလာဟလတွေကို ဆက်ပြီး ဖော်ပြ နေမယ်ဆိုရင် ကျနော်လည်း အင်တာဗျူးတွေ လုပ်ခွင့်ပေးတော့မှာ မဟုတ်ပါဘူး။ ကျနော်က အမြဲတမ်း သတင်း တွေ ထုတ်ပြန်ချင်ပါတယ်။ ဒါပေမယ့် မီဒီယာတွေ အနေနဲ့ သတင်းအမှားတွေကို မဖြန့်ဘဲ တာဝန်ယူမှုရှိစွာ သတင်း ထုတ်ပြန်ပေးဖို့ ကျနော် တိုက်တွန်းပါတယ်”ဟု ဖွမ်သမ်က ပြောကြားခဲ့သည်။

ဒုကာကွယ်ရေးဝန်ကြီး ဗိုလ်ချုပ်ကြီး နက်တာပိုလ် နက်ပါနစ် (Nattapol Nakpanit) ကလည်း အမေရိကန်သည် ကုန်သွယ်ခွန် သဘောတူညီချက် ရရှိရေးအတွက် ထိုင်း၏ ရေတပ်စခန်းတစ်ခုကို အသုံးပြုခွင့်ပေးရန် တောင်းဆို ခဲ့သည်ဆိုသည့် သတင်းများကို ငြင်းဆိုခဲ့သည်။

Source: The Nation